Izaias
18 Gunztolea kiddeanchea desacher hai!
Ethiopiechea nhoim-chea lagim aslolea tea vattaracher hai!
2 To aplea sondexkarank doriantlean,
Papyrus-achea vhoddeamnim udkantlean poltoddi oxem sangon dhaddtta:
“Soddsoddit kam kortolea sondexkaramno, vochat.
Tea raxttra lagim vochat, zanche lok lamb ani zanchi kat sullsullit asa,
Tea raxttra lagim vochat, zankam sogle lok bhietat,
Jem raxttr xoktivont asa ani zoit melloun gheit asa,
Zachi zomin nhoim-emnim vhanvon geli, tea raxttra lagim vochat.”
3 Veg-vegllea desantlea lokamno ani prithumer ravtoleamno,
Tumi jem polloitat tem dongram voir khunna mhunn ubarlolea khambea sarkem astolem.
Ani tumi aikotole to avaz, xingachea* avaza sarko astolo.
4 Karonn Jehovan mhaka oxem mhunnttlem:
“Zoxi suriachea uzvadda borabor gormi asta,
Lunvnnechea vellar gorom vatavoronnant dov poddtta,
Toso hanv mhojea staplolea zageak* vogich polloit ravtolom.
5 Fulam purnn toren fultolim, ani drakxam pikonk lagtolim,
Punn lunvnnecho vell ieunchea poilinch,
Tache fantte koiteamnim katortole
Ani tacheo vali katrun uddoitole.
6 Tankam dongra voilea xikar korpi suknneam pasot,
Ani prithume voilea ranvotti zonvaram pasot soddun ditole.
Xikar korpi suknnim gimant tacher aplem pott bhortolim,
Lunvnnechea akʼkhea kallar ranvotti zonvaram tem khatolim.
7 Tea vellar, tem raxttr zanche lok lamb ani zanchi kat sullsullit asa,
Zaka sogle lok bhietat,
Jem xoktivont asa ani zoit melloun gheit asa,
Zachi zomin nhoim-emnim vhanvon geli,
Tem raxttr fouzancho Dev Jehova pasot ek dennem haddttolem.
Tem raxttr hem dennem Sion Dongrar haddttolem, jea dongrak fouzancho Dev Jehovachea nanvan vollkhotat.”