Izaias
19 Ejiptta add sondex:
Polloi! Jehova kupacher boson vegan Ejipttant ieta.
Ejipttantle valor naslole dev tachea mukhar koddkoddttole,
Ani Ejipttantlea lokanchem kalliz pigllon voitolem.
2 “Hanv Ejipttkarank eka-meka add uksaitolom,
Ani te eka-meka add zhogoddttole,
Dor eklo aplea bhava add ani xezarea add zhogoddttolo,
Ek xar dusrea xara add ani ek raj dusrea rajea add zhogoddttolem.
3 Ejipttache lok gondhollant poddttole,
Hanv tancheo ievzonneo purnn zaunk diunchom na.
Te valor naslolea devam koddem,
Jadu-ttona kortoleam koddem, melolea lagim uloitoleam koddem ani fuddar parkhupeam koddem modot magtole.
4 Hanv Ejipttak nibor kalliz aslolea eka dhoniachea hatant ghaltolom,
Ani ek krur raza tacher raz choloitolo,” oxem khoro Dhoni, fouzancho Dev Jehova mhunntta.
5 Doriachem udok suktolem,
Ani nhoim-chem udok sukon voitolem.
6 Nhoim-enk ghann martoli,
Ejipttantlea Nil kanalachem* udok denvon suktolem,
Lamb tonn ani udkantlim zhaddam kuson voitolim.
7 Nil nhoim-che deger, tachea tondda koddem aslolim soglim zhaddam,
Ani tachea bhonvtonnim aslolim soglim xetam suktolim,
Varem tankam hanga-thoim uboun vhortolem ani kainch urchem na.
8 Kharvi dukh kortole,
Nil nhoim-ent goroitat te roddttole,
Udkacher zallam uddoitoleancho ankddo unno zatolo.
9 Sonnbim-anchea sutan kopdde kortoleank,
Ani attiecher dhovo kopddo vinnpeank loz bhogunk poddttoli.
10 Ejipttantle vinnpi niraxi zatole,
Ani disvoddeak kam korpi kamdar dukh kortole.
11 Zoanache kunvor murkh,
Faraoh-che solʼle diupi sogleam-von bore zannar munis faideak poddona toslo solʼlo ditat.
Tor tumi Faraoh-k oxem koxem mhunnonk xoktat:
“Hanv zannaranchea sonstintlo,
Adlea kalla voilea razanchi sonsot”?
12 Are Faraoh, tuje zannar munis khoim gele?
Fouzancho Dev Jehovan Ejiptta vixim jem tharailam, tea vixim te zannant zalear tannim tuka tem sangchem.
13 Zoanache kunvor murkhponnan vagleat,
Nofachea* kunvrank fosoileat,
Ejipttachea kullanchea mukheleamnim Ejipttak fosoun dusre vatten vheleat.
14 Jehovan Ejipttak ghuspa-gondhollant ghatlam,
Ek bebdo apunn vonkla tantunt lolltta toso,
Ejipttachea fuddareamnim Ejipttak tachea soglea kamamnim ghuspaila.
15 Ejiptt kainch korunk pavchona,
Tachi tokli vo tachi xempddi, tacho fantto vo tachem lamb tonn* kainch korunk pavchem na.
16 Tea disa, Ejipttache lok bailam sarke zatole, te koddkoddttole ani bhietole. Karonn fouzancho Dev Jehova tanchea add aplo hat ubartolo. 17 Ejiptt Judak bhietolo. Tachem nanv aikotanch Ejipttkarancher bhirant ietoli. Karonn fouzancho Dev Jehovan tanchea add nirnnoi ghetla.
18 Tea disa, Ejipttant oslim panch xaram astolim, zantunt Kananachi bhas uloitolim ani tim fouzancho Dev Jehovak visvaxi ravtolim mhunn soput ditolim. Tanchea modlea eka xarak Nisonttonachem Xar mhunnttole.
19 Tea disa, Ejipttachea desa modem Jehova pasot ek vedi astoli ani Ejipttachea ximer Jehova pasot ek khambo astolo. 20 Fouzancho Dev Jehovacho, lokamnim ugddas korcho mhunn teo khunna ani govai koxeo astoleo. Tancher zulum kortoleank lagon te Jehovak ulo martole. Tednam Dev ek salvar korpi dhaddttolo, zo vorto astolo ani tankam vanchoitolo. 21 Ani tea disa, Jehova Ejipttkarank apli vollokh ditolo ani te Jehovak vollkhotole. Te taka bolidanam bhettoitole ani dennim ditole, toxench te Jehovak angvonn kortole ani ti pallttole. 22 Jehova Ejipttak khast ditolo. To taka martolo ani boro kortolo. Ejipttache lok Jehova lagim porot ietole ani to tanchem magnnem aikon tankam bore kortolo.
23 Tea disa, Ejipttantlean ek mha-marg Asirient voitolo. Uprant, Asiriekar Ejipttant ietole ani Ejipttantle lok Asirient voitole. Ani Ejiptt Asirie sangata mellon Devachi seva kortole. 24 Tea disa Izraelache lok, tisro zomo zatolo zo Ejiptt ani Asiriek zuddttolo, ani to akʼkhea prithume pasot ek besanv koso zatolo. 25 Karonn fouzancho Dev Jehova tankam besanv diun mhunnttolo: “Ejipttkaramno, tumi je mhoje lok zaun asat, Asiriekaramno, tumi je mhojea hatanchem kam zaun asat, ani Izraelitkaramno, tumi je mhojem daiz zaun asat, tumcher besanv asum.”