Jeremias
12 Jehova Deva, tum nitivont Dev zaun asa. Hanv mhoji kes tujea mukhar haddttam tednam,
Ani neai-a vixim tujea lagim uloitam tednam, tum neai korta.
Punn noxttea munxank tanchea kamamnim kiteak ies melltta?
Ani ghatki kosloch usko nastana kiteak jietat?
2 Tunvem tankam roile ani tannim pallam ghetlim.
Te vaddle ani tannim foll dilem.
Tum tanchea vonttancher asa, punn tanchea khol chintnam* thaun khub pois asa.
3 Punn Jehova Deva, tum mhaka bore bhaxen vollkhota, tum mhaka polloita,
Tunvem mhojem kalliz topaslam ani tem tujea sangata ekvottan asa mhunn tunvem polloilam.
Menddrank jivexim marunk kuxin kaddttat toxe, tum tankam kuxin kadd,
Tankam jivexim marunk tharailʼlea disa pasot kuxin kadd.
4 Kednam poriant ho des padd zait voitolo,
Ani dor eka xetantlim zhaddam sukot voitolim?
Hea desantlea lokanchea vaitt kamank lagon,
Zonvaram ani suknneancho nas zaun gela.
Karonn hangache lok mhunnttat: “Amchem kitem zatolem tem to pollounk xokona.”
5 Tum cholon voitoleam sangata dhanvon thokta zalear,
Ghoddeam sangata tum koso dhanvtolo?
Tum xantichea desant surokxit asa oxem tuka dista.
Punn Jordan nhoim-chea deger aslolea datt jhilkuttamnim tum kitem kortolo?
6 Karonn tujeach bhavamnim pasun, tujeach bapaichea ghorannean,
Tuzo visvasghat kela.
Te tujea add vhoddlean bob martat.
Te tujea lagim borim-borim utram uloile zalear pasun,
Tum tancher bhavarth dovornaka.
7 “Hanvem mhojem ghor soddun dilam, hanvem mhojem daiz soddlam.
Hanv zacho khub mog kortam, taka hanvem tachea dusmananchea hatant dilam.
8 Mhojem daiz mhojea pasot ranantlea eka xinva bhaxen zalam,
Tem mhojer gorozlem.
Taka lagon hanv tacho dves kortam.
9 Mhojem daiz mhojea pasot veg-vegllea rongachea* xikar korpi suknnea bhaxen asa,
Dusrim xikar korpi suknnim taka gherav ghalun tacher akromonn kortat.
Xetantlea soglea zonvaramno, ektthaim zaun ieiat,
Ani khaunk ieiat.
10 Zaitea gonvlleamnim mhojea drakxanchea molleacho nas korun uddoila,
Mhojea vantteachi zomin maddoun uddoilea.
Mhozo avddicho zomnicho vantto tannim ek ranvott vattar korun soddla.
11 Hi zomin padd zalea.
Ti sukon gelea,*
Ti mhojea mukhar osadd poddlea.
Akʼkho des osadd poddla,
Punn konnankuch tachem poddon gelʼlem na.
12 Ranvott vattarantlea soglea rosteam voilean nas korpi aileat.
Karonn Jehovachi tolvar desachea eka ponta thaun dusrea ponta meren nas korit voita.
Konnankuch xanti na.
13 Tannim gonv vomple, punn kantte lunvle.
Kam korun-korun te thokleat, punn tankam kainch faido zaunk na.
Tanchea pikek lagon tankam loz bhogchi poddttoli,
Karonn Jehovacho rag tancher pettla.”
14 Jehova oxem mhunntta: “Jem daiz hanvem mhozo lok Izraelachea hatant dilʼlem, taka hat laitat tea mhojea soglea noxttea xezareank hanv tanchea desantlean bhair kaddttolom. Ani hanv Judachea ghoranneak tanchea modlem umttun kaddttolom. 15 Punn tankam umttun kaddlea uprant, hanv porot tanchi kakut kortolom ani tanchea modlea dor ekleak hanv tanchea desant ani tankam daiz mhunn dilʼlea zomnicher porot haddttolom.”
16 “Tim raxttram zor mhoje lok cholta tea vatte vixim xiklim, ani tannim mhojea lokank Baalachea nanvacho soput gheunk xikoilʼlem toxem tim zor ‘Jehovachea jivacho soput!’ mhunn mhojea nanvacho soput ghetat zalear, hanv tankam mhojea lokam modem ravonk ditolom. 17 Punn tanchea modlem khoinchem-i raxttr mhojeo adnea pallunk nakarta zalear hanv taka umttun uddoitolom ani tacho nas kortolom,” oxem Jehova mhunntta.