Jeremias
13 Jehovan mhaka oxem mhunnttlem: “Voch ani boro pottʼtto* vikto ghe ani to tujea bhenddak band. Punn taka udok lagonk dinaka.” 2 Tor Jehovan sanglolea pormonnem hanvem ek pottʼtto vikto ghetlo ani mhojea bhenddak bandlo. 3 Jehovacho sondex anik ek pavtt mhaka mellʼllo: 4 “Zo pottʼtto tunvem vikto gheun tujea bhenddak bandla, to gheun Eufrates Nhoim-e lagim voch ani thoim eka khoddpachea khanchint to lipoi.” 5 Tor Jehovachea adnea pormonnem hanv Eufrates Nhoim-e lagim gelom ani thoim to pottʼtto lipoilo.
6 Punn zaitea disam uprant Jehovan mhaka mhunnttlem: “Utth ani Eufrates Nhoim-e lagim voch ani hanvem tuka lipounk adnea dilʼli to pottʼtto thoim thaun porot gheun ieo.” 7 Tor hanv Eufrates Nhoim-e lagim gelom ani jea zagear hanvem to pottʼtto lipoilʼlo thoim thaun khonnon hanvem to bhair kaddlo. To pottʼtto samko piddʼddear zala ani to kainch upeogacho na mhunn hanvem polloilem.
8 Uprant Jehovacho ho sondex mhaka mellʼllo: 9 “Jehova oxem mhunntta, ‘Hanv heach toren Judacho gorv ani Jeruzalemacho ghomondd kabar korun uddoitolom. 10 He noxtte lok je mhoji adnea pallunk nakartat, hottʼtti* zaun apleak zai tench kortat, dusrea devam fattlean voitat, tanchi seva kortat ani tankam paim-am poddttat, te hea pottʼttea sarke zatole zo kainch upeogacho na.’ 11 Jehova mhunntta, ‘Karonn zoso ek munis aplea bhenddak pottʼtto bandta, teach toren hanvem Izraelachem akʼkhem ghorannem ani Judachem akʼkhem ghorannem mhaka bandun dovorlolem. Te mhoje lok, mhoje nanv, mhoji vakhannʼnni ani mhoji sobitkai zaunche mhunn hanvem oxem kelʼlem. Punn tannim mhojem aikonk na.’
12 “Tum tankam ho pasun sondex di, ‘Izraelacho Dev Jehova oxem mhunntta: “Dor ek vhoddli moddki drakxanchea sorean bhorloli asonk zai.”’ Ani te tuka mhunnttole, ‘Dor ek vhoddli moddki drakxanchea sorean bhorloli asonk zai mhunn amkam khoborna kitem?’ 13 Tednam tum tankam oxem sang, ‘Jehova oxem mhunntta: “Hanv hea desant ravtolea sogleank, Davidachea xinvasonar bostolea razank, iadnikank, provadeank ani Jeruzalemant ravtolea sogleank, te ttaitt zaum meren drakxancho soro pivoit ravtolom.” 14 Jehova mhunntta: “Hanv tankam eka-mekak apttitolom, bapaink ani putank eka-mekak apttitolom. Hanv tankam doia-maia dakhounchom na vo tanchea vixim mhaka dukh zaunchem na vo hanv tanchi kakut korchom na. Tancho nas korun uddounk mhaka kitench addaunk xokchem na.”’
15 Aikat ani dhean diat.
Gorvixtt zainakat, karonn Jehovan hem sanglam.
16 Tumcho Dev Jehovachi mhoima korat.
Tannem kallokh haddchea poilim,
Ani sanjechea vellar dongrancher tumche paim addkhollchea poilim, tachi mhoima korat.
Tumi uzvaddak axetole,
Punn to kallich savlli gheun ietolo,
To uzvaddak datt kallokh korun uddoitolo.
17 Ani tumi aikonk nakarlem zalear,
Hanv tumchea gorvak lagon lipon roddttolom.
Hanv dukam golloitolom ani mhojea dolleantlean dukanche vhall vhanvtole,
Karonn Jehovachea hinddak koidi korun vhela.
18 Razak ani razache avoik oxem sang, ‘Tumi xinvasona voilim denvon sokol bosat,
Karonn tumchea tokle voile sobit mukutt sokol poddttole.’
19 Dokxinnechea xaranche darvontte bond zaleat,* te ukte korunk konnuch na.
Judachea soglea lokank koidi korun vheleat, tanchea modlea konnankuch soddunk na.
20 Tuje dolle ubar ani utʼtore thaun ietoleank polloi.
Tuka dilʼlo to hindd ani tujim sobit menddram khoim asat?
21 Survatek thaun zankam tunvem tujim lagxilʼlim ixttam kelʼlim,
Tanchea thaun tuka khast mellttoli tednam tum kitem mhunnttolem?
Bhurgem zolmak haddtta tea baile bhaxen, tuka okosmat vollvolle suru zaunchenant kai?
22 ‘Hem soglem mhojea sangata kiteak ghoddtta?’ Oxem tum tujea kallzant mhunnttolem tednam,
Tujea vhodd guneanvak lagonuch tuje ghagre kaddun uddoileat,
Ani tujea khonttink* khub dukh soschi poddlea mhunn zannam zav.
23 Ek Kushit munis* aplea katicho rong, vo ek bibtto vag aple ttipke bodlunk xokta kai?
Toxem zalear tum, jem vaitt korunk xiklam,
Tem borem koxem korunk xokta?
24 Zoxem oronnʼnneant suttlolem varem, korodd hanga-thoim ximpddaun uddoita, toso hanv tankam ximpddaitolom.
25 Ho tuzo bhag, to vantto zo hanvem mezun tuka dila,
Karonn tum mhaka visorlam ani tunvem fottincher visvas dovorla,” oxem Jehova mhunntta.
26 “Taka lagon, hanv tuzo ghagro voir kaddun tujea tonddar uddoitolom,
Ani tujem vingllemponn sogleank dixtti poddttolem,
27 Toxench, tunvem kelʼlo pordvar ani tujeo loingik itsa,*
Tuje xindollkechim lojechim kamam sogleank dixtti poddttolim.
Hanvem dongrancher ani xetamnim,
Tuji vitt haddtta tosli vagnnuk polloilea.
Jeruzalema, tujer hai!
Tum anik kednam poriant oxench oxudʼdh ravtolem?”