Jeremias
14 Dukolla vixim Jehovacho ho sondex Jeremiasak mellʼllo:
2 Juda dukh korta, ani tache darvontte khala poddleat.
Te samke niraxi zaun zomnir poddleat,
Ani Jeruzalemantlo roddnneancho avaz sorga meren pavla.
3 Thoinche dhoni aplea sevokank* udok haddunk dhaddttat.
Te baim-cher* voitat punn tankam udok mellona,
Te aple rite kollxe gheun porot ietat.
Tankam loz zalea ani te niraxi zaleat,
Ani te apleo tokleo dhamptat.
4 Zomnir vero poddleat,
Karonn desant paus poddonk na,
Xetkar dukhi asat ani te apli tokli dhamptat.
5 Xetant aslolem horonn* pasun atanch zolmolʼlea aplea porak soddun dita,
Karonn khoinsoruch tonn na.
6 Ranvotti gaddvam dongrancher ubim asat.
Tim koleam* bhaxen khorxetat.
Zhaddam naslolean tanche dolle oskot zatat.
7 Amche guneanv amchea add govai ditat tem khorem,
Tori astana Jehova Deva, tujea nanva khatir tum panvl ghe.
Karonn ami kitle pavtti ovisvaxi zaleat tacho hixob na,
Ani ami tujeach add patok kelam.
8 Izraelachea bhorvonxea, sonkoxttachea vellar taka Salvar Korpi Deva,
Tum desant ek porko zalʼlea bhaxen kiteak vagta,
Ekuch rat sarunk ailʼlea eka provas korpea sarko kiteak vagta?
9 Tum eka thottaklolea munxa bhaxen kiteak zala,
Salvar korunk xokona toslea eka xoktivont munxa bhaxen kiteak zala?
Karonn Jehova Deva, tum amchea modem asa,
Ani amkam tujea nanvan vollkhotat.
Tum amkam soddun dinaka.
10 Hea lokam vixim Jehova oxem mhunntta: “Tankam hanga-thoim bhottkonk avoddtta, tannim aplim panvlam addaunk nant. Taka lagon Jehovak te avoddnant. Atam to tancho guneanv ugddasak haddttolo ani tanchea koddlean tanchea patkancho hixob ghetolo.”
11 Uprant Jehovan mhaka mhunnttlem: “Hea lokanchem borem zaum mhunn tum magnnem korinaka. 12 Te upas kortat tednam hanv tancheo vinoteo aikona, te hulpailʼleo bhetto ani daneancheo bhetto bhettoitat tednam hanv khuxal zaina. Hanv tankam tolvarin, bhuken ani pidda dhaddun* kabar korun uddoitolom.”
13 Tednam hanvem mhunnttlem: “Akʼkhea Vixvachea Dhonia Jehova Deva, hem kitlem dukhachem! Provadi lokank oxem sangtat, ‘Tumi tolvar pollounchenant ani bhuk pasun poddchina. Punn hanv tumkam hea zagear khori xanti ditolom.’”
14 Uprant Jehovan mhaka mhunnttlem: “Provadi mhojea nanvan khotteo bhasaunneo kortat. Hanvem tankam dhaddunk na, vo adnea diunk na vo tanchea lagim ulounk na. Te tumkam khottim dorxonam, polkeo bhasaunneo ani apleach kallzantlim khotteponnam sangtat. 15 Taka lagon, jea provadeank hanvem dhaddunk nant ani je mhojea nanvan bhasaunneo kortat ani oxem mhunnttat ki hea desak tolvar ani bhuk pollounk poddchina, tea provadeam vixim Jehova oxem mhunntta: ‘Tolvarin ani bhuken te provadi mortole. 16 Ani jea lokank te bhasaunneo kortat te lok pasun tolvarin mortole. Tanchim moddim Jeruzalemachea rosteancher poddlolim astolim. Tankam, tanchea bailank, tanchea putank vo dhuvank purunk konn aschona, karonn hanv tancher, tankam favo toslench odruxtt haddttolom.’
17 “Tum tankam oxem sang,
‘Mhojea dolleantlean dis ani rat dukanche vhall vhanvot ravom-di, tankam thambonk dinaka.
Karonn mhojea lokanchea ankvar dhuvek purnn toren mostilea ani toddun uddoilea,
Ani tika boroch ghavo ghatla.
18 Hanvem moidanar vochon polloilear,
Mhaka tolvarin marun uddoilʼlea lokanchim moddim distat!
Ani hanv xarachea bhitor gelear,
Mhaka osle lok distat je bhukek lagon duent poddleat!
Karonn iadnik ani provadi, he dogui tankam vollokh na toslea eka porkea desant bhonvtat.’”
19 Deva, tunvem Judak purnn toren nakarlam kai, vo tuka Sionachi vitt ailea kai?
Tunvem amcher pekonk xokona toslo ghavo kiteak ghatla?
Ami xantichi vatt polloit aslim, punn kainch borem zaunk na,
Ami borim zatolim mhunn vatt polloitalim, punn amcher akant aila!
20 Jehova Deva, ami amchem noxtteponn,
Ani amchea purvozancho guneanv manun ghetat.
Karonn ami tujea add patok kelam.
21 Tujea nanva khatir amkam nakarum naka,
Tujea mhoimebhorit xinvasonak kainch valor naslolea bhaxen lekhinaka.
Amchea sangata kelʼlo korar ugddas dovor, to moddinaka.
22 Raxttrantlea upeog naslolea murteam modlea konnancheanui paus dhaddunk zata kai?
Vo mollob apunnuch pausacho xinvor ghalunk xokta kai?
Jehova amchea Deva, tujea bhair anik konnui oxem korunk xokta kai?
Ami tujer bhorvonso dovortat,
Karonn tunvem ekleanuch heo sogleo vostu keleat.