Jeremias
21 Jehovacho ho sondex Jeremiasak tea vellar mellʼllo, jednam Zedekia razan, Malkijacho put Pashurak ani Maseiacho put, iadnik Zefaniak, Jeremiasa lagim dhaddun oxem vicharunk sanglem: 2 “Upkar korun fuddem kitem zatolem tem amchea pasot Jehovak vichar, karonn Babilonacho Raza Nebukadnezar* amcher zhuz korunk aila. Adim kelʼlim toxim, Jehova ghoddie amchea pasot ek ojapachem kam korit, jea vorvim Nebukadnezar fattim sorot.”
3 Jeremiasan tankam mhunnttlem: “Tumi Zedekiak oxem sangat, 4 ‘Izraelacho Dev Jehova mhunntta: “Tumi jim hotʼtearam gheun Babilonacho raza ani xarachea durgam bhair gherav ghatlolea Kaldeikaram lagim zhogoddttat, hanv tinch hotʼtearam gheun tankam tumcheruch akromonn korunk laitolom.* Hanv tankam xarachea modem ektthaim kortolom. 5 Ani hanv mhozo xoktivont hat ubarun svota tumcher zhuz kortolom. Hanv ragan, tiddkin, ani zollttea krodhan tumchea lagim zhuztolom. 6 Hanv hea xarant ravtolea sogleank marun uddoitolom, munxank toxench zonvarank. Te sogleak posorta tosle pidden* mortole.”’
7 “‘Jehova mhunntta, “Hea uprant hanv Judacho Raza Zedekia ani tache sevok ani hea xarantle lok—je pidda, tolvar ani bhuke thaun vanchleat—tankam Babilonacho Raza Nebukadnezarachea* hatant, tanchea dusmananchea hatant ani tancho jiv kaddunk sodhtat tanchea hatant ditolom. To tankam tolvarin martolo. Taka tanche churchure dischena, toxench, to tanchi doia-maia ani kakut korchona.”’
8 “Ani tum hea lokank sang, ‘Jehova oxem mhunntta: “Hanv tumkam jivitachi ani mornnachi vatt vinchun kaddunk sondhi ditam. 9 Zo konn hea xarant ravta, to tolvarin, bhuken ani pidden mortolo. Punn zo konn bhair vochon, xarak gherav ghatlolea Kaldeikaranchea hatant apnnakuch dita, to jietolo ani aplo jiv salvar kortolo.”’
10 “‘Jehova mhunntta, “Hanvem hea xarak fatt kelea. Hanv tacher odruxtt haddttolom, hanv taka kainch borem korchom na. Hem xar Babilonachea razachea hatant poddttolem ani to tem ujean zolloun uddoitolo.”
11 “‘Judachea razachea ghoranneak sang: Jehovacho sondex aik. 12 Davidachea ghorannea, Jehova oxem mhunntta:
“Dor sokallim neai korat,
Ani luttpeachea hatant poddloleak soddoiat,
Na zalear, tumchea noxttea kamank lagon
Mhozo krodh ujea bhaxen pettʼttolo
Ani to palounk konnuch aschona.”’
13 Jehova mhunntta, ‘Falkeant* ravtolea,
Ek-sarke zomnir aslolea khoddpa, hanv tuka khast diunchom asam.
Tumi je oxem mhunnttat: “Amchea lagim zhuzonk konn ietolo?
Ani amchea ghorancher konn akromonn kortolo?”
14 Hanv tumche koddlean
Tumchea kamam pormonnem hixob ghetolom,’ oxem Jehova mhunntta.
‘Hanv tumchea ranak uzo pettoitolom,
Zo tumchea bhonvtonnchea soglea vostuncho bhosm korun uddoitolo.’”