Jeremias
22 Jehova oxem mhunntta: “Judachea razachea rajmahalant voch ani ho sondex di. 2 Tankam oxem sang, ‘Davidachea xinvasonacher boslolea Judachea raza, tum ani tuje sevok ani tuje lok, je hea darvontteantlean bhitor sortat, Jehovacho ho sondex aikat. 3 Jehova oxem mhunntta: “Neai-an ani nitivontponnan cholat. Ani luttpeachea hatant poddloleak soddoiat. Khoinchea-i pordexi munxa sangata vaitt toren vagonakat, ani onathak* vo vidvek tras korinakat. Toxench, hea zagear niropradeachem rogot varoinakat. 4 Heo vostu tumi bariksannen pallʼlleo zalear, Davidachea xinvasonar bospi raza rothancher ani ghoddeancher boson hea rajmahalachea darvontteantlean bhitor ieunk xoktole. Te aplea sevokam sangata ani aplea lokam sangata bhitor ieunk xoktole.”’
5 “‘Punn tumi heo vostu pallinant zalear, hanv mhozo soput gheun sangtam, hea rajmahalacho nas zatolo,’ oxem Jehova mhunntta.
6 “Judachea razachea rajmahala vixim Jehova oxem mhunntta,
‘Tum mhaka Gileada sarko asa,
Lebanonachea tengxe sarko asa,
Punn hanv tuka padd zalʼlo ranvott vattar korun soddttolom,
Tujea khoincheach xarant lok ravchona.
7 Hanv tujea add nas korpeank nemtolom,
Te sogle hotʼtearam gheun ietole.
Te tujim cedar-achim* borim-borim zhaddam katortole
Ani tim ujeant uddoitole.
8 “‘Zaitim raxttram hea xara koddlean pasar zatolim ani eka-mekak vichartolim: “Jehovan hea vortea xarak oxem kiteak kelem?” 9 Uprant te mhunnttole: “Karonn tannim aplea Devacho, Jehovacho korar moddlo ani dusrea devank man bagoun tanchi bhokti keli.”’
10 Zo mela tachea pasot roddonakat,
Ani tachea pasot dukh korinakat.
Tachea bodlek, koident voita tachea pasot dukamnim roddat,
Karonn to porot kednanch tachea zolmachea desant ieunchona.
11 “Karonn Judacho raza Shalum,* zo aplo bapui Josiachea zagear raza zala ani zo hea zagear thaun koident gela, tachea vixim Jehova oxem mhunntta: ‘To hanga porot kednanch ieunchona. 12 Taka jea zagear koidi korun vhela, to thoinch mortolo, ani ho des to porot kednanch pollounk pavchona.’
13 Zo onitivontponnan aplem ghor bandta,
Zo onʼneai korun aple unchle rum bandta,
Zo aplea sangatea koddlean funkott kam korun gheta,
Ani taka tacho disvoddo diunk nakarta, tacher hai!
14 Zo mhunntta, ‘Hanv mhojea pasot ek sobit rajmahal bandtolom,
Zache unchle rum vhoddle-vhoddle astole.
Hanv taka zonelam bosoitolom,
Ani tem cedar* lakddachea folleamnim bandtolom, toxench, taka zhogzhogit tambddo rong kaddttolom.’
15 Dusream poros chodd cedar* zhaddachem lakudd uzar korun, tunvem rajmahal bandlem dekhun tum razvottki choloit ravtolo oxem tuka dista?
Tuzo bapui pasun khatalo-pietalo,
Punn tannem neai kelo ani to nitivontponnan vaglo,
Ani tachea sangata borem zalem.
16 Tras sostoleachea ani goribachea hokʼka pasot to zhogoddlo,
Dekhun tachem borem zalem.
Jehova mhunntta: ‘Mhaka vollkhop mhunnttlear hench nhoi kai?’
17 ‘Punn tuje dolle ani tujem kalliz fokot fottingponnachea zoddicher asa.
Toxench, niropradeachem rogot varovop,
Nagovop ani luttop, hacher tuje dolle ani kalliz asa.’
18 “Taka lagon, Josiacho put ani Judacho raza Jehoiakima vixim Jehova oxem mhunntta,
‘Lok oxem mhunnon dukh kortat:
“Are re, mhozo bhav! Are re, mhoji bhoinn!”
Punn tachea pasot konnuch oxem mhunnon dukh korchona:
“Are re, mhozo dhoni! Are re, tachem vorteponn koxem mhunn kabar zalem!”
19 Melʼlea gaddvak kortat toxench, to melea uprant tachea-i sangata kortole,
Tachem moddem voddit vhortole,
Ani tem Jeruzalemachea darvontteam bhair uddoitole.’
20 Voir Lebanonant voch ani vhoddlean rodd,
Bashanant vhoddlea avazan rodd,
Ani Abarima thaun vhoddlean dukh kor,
Karonn tujer mortat tea tujea soglea mog korpeank mostileat.
21 Tum surokxit aslem tednam hanv tuje koddem uloilʼlom,
Punn tunvem mhunnttlem, ‘Hanv tujem aikonchem na.’
Tornattponnar thaun tum oxench vagot ailam,
Karonn tunvem mhoji adnea kednanch pallunk na.
22 Varem tujea soglea gonvlleank uboun vhortolem,
Tujer mortat te tuje mog korpi, koidi zaun voitole.
Tednam tujer ieupi soglea odruxttak lagon, tuka loz zatoli ani tuzo opman zatolo.
23 Tum, ji Lebanonant ravta,
Tum, ji cedar-achea* zhaddamnim ravta,
Tuka ballontiniche vollvolle sosunk poddttat tednam tum koxi mhunn pirgotoli,
Tum bhurgeak zolm ditole baile bhaxen kitli mhunn tollmollttoli!”
24 “Jehova mhunntta, ‘Jehoiakimachea puta ani Judachea raza Konia,* hanv mhojea jivacho soput gheun sangtam, tum mhojea uzvea hatachi xikʼko marpachi mudi aslo zalear pasun, hanv tuka kaddun bhair uddoitolom aslom! 25 Je tuzo jiv kaddunk sodhtat, ani zankam tum bhieta, tanchea hatant hanv tuka ditolom. Hanv tuka Babilonacho Raza Nebukadnezarachea* hatant ani Kaldeikaranchea hatant ditolom. 26 Hanv tuka, ani tuka zolm dilole tuje avoik, dusrea desant, tum zolmonk naslo tea desant uddoitolom, ani tum thoinch mortolo. 27 Tumi ieunk axetat tea desant, tumi porot kednanch ieunchimnant.
28 Ho Konia kainch valor nasloli ani funttloli moddki nhoi kai?
To konnankuch naka toslea aidona sarko nhoi kai?
Taka ani tachea sonstik sokol kiteak uddoilea?
Tankam khoborna toslea desant tankam kiteak uddoileat?’
29 Prithume,* prithume, prithume! Jehovacho sondex aik.
30 Jehova oxem mhunntta:
‘Ho munis bhurgo naslolo,
Ani tachea jivitant* taka kednanch ies mellchem na, mhunn tachea vixim boroiat.
Karonn tachea sonstintlo konnuch Davidachea xinvasonar bosonk pavchona,
Ani Judacher porot raj cholounk pavchona.’”