Jeremias
26 Josiacho put ani Judacho Raza Jehoiakimachea razvottkechea survatek Jehovacho ho sondex mhaka mellʼllo: 2 “Jehova oxem mhunntta, ‘Jehovachea ghorachea* angnnant ubo rav ani Jehovachea ghorant bhokti korunk* ietat tea Judachea xarantlea soglea lokam vixim uloi.* Hanv tuka adnea ditam teo sogleo vostu tankam sang, tantuntli ek vost pasun sangonastana ravonaka. 3 Ghoddie te aikot ani apli vaitt vatt soddun, porot ieit. Tednam hanv mhojem mon bodoltolom ani tanchea noxttea kamank lagon hanvem jem odruxtt tancher haddunk tharailʼlem, tem hanv haddchom na. 4 Tum tankam sang: “Jehova oxem mhunntta, ‘Zor tumi mhojem aikonant ani hanvem tumkam dilʼlo kaido* pallinant, 5 ani hanv tumchea lagim porot-porot dhaddttam tea mhojea sevokanchem, mhunnche, mhojea provadeanchem tumi aikonant, zoxem tumi atam kortat, 6 zalear hanv hea ghorachi tich poristhiti kortolom zoxi hanvem Shilochi kelʼli. Ani hanv hea xarache oxe hal kortolom, ki prithume voilim soglim raxttram xirap ditana tachem udharonn ditolim.’”’”
7 Jeremias Jehovachea ghorant hem soglem sangtalo tednam, iadnikamnim, provadeamnim ani soglea lokamnim aikolem. 8 Jehovan taka sangonk adnea dilʼli tem soglem Jeremiasan lokank sanglem tednam, iadnikamnim, provadeamnim ani soglea lokamnim taka dhorlo ani mhunnttlem: “Tum mortoloch. 9 Tunvem Jehovachea nanvan oxi bhasaunni kiteak keli, ‘Hem ghor Shilo bhaxen zatolem, ani hea xaracho nas zaun voitolo ani tantunt ekui munis urchona’?” Jehovachea ghorant sogle lok Jeremiasa bhonvtonnim ektthaim zale.
10 Judachea kunvramnim hem soglem aikolem tednam, te rajmahalantlean bhair soron Jehovachea ghorant aile ani Jehovachea ghorachea novea darvontteantlean bhitor sortat tea zagear bosle. 11 Iadnikamnim ani provadeamnim, kunvrank ani soglea lokank oxem sanglem: “Hea munxak mornnachi khast favo. Karonn tumi tumcheach kanamnim aikolam toxem, tannem hea xara add bhasaunni kelea.”
12 Tednam Jeremiasan soglea kunvrank ani soglea lokank sanglem: “Hea ghora ani xara add, tumi aikolam tea soglea vixim bhasaunni korunk Jehovanuch mhaka dhaddla. 13 Tor, tumi tumcheo vatto ani vagnnuk bodlat ani tumchea Devachi, Jehovachi adnea pallat, tednam Jehova aplem mon bodlun tumcher haddttolo mhunn sanglolem, tem odruxtt haddchona. 14 Punn hanv zalear, tumchea hatant asa. Tumkam jem borem dista, jem sarkem dista, tem tumi mhojea sangata korat. 15 Punn hem mat zannam zaiat, tumi mhaka jivexim marlo zalear, tumi, hem xar ani he lok, eka niropradeachea rogtache zobabdar zatole. Karonn khorem mhunnttlear, hem soglem tumkam sangonk Jehovanuch mhaka tumchea lagim dhaddla.”
16 Tednam kunvramnim ani soglea lokamnim, iadnikank ani provadeank sanglem: “Hea munxan, taka mornnachi khast favo zai sarkem kainch korunk na. Karonn to amcho Dev Jehovachea nanvan amchea lagim uloila.”
17 Uprant desantle thodde vhoddil utthle ani lokanchea akʼkhea zomeak oxem sangonk lagle: 18 “Moreshethant ravpi Mikan, Judacho Raza Hezekiachea disamnim bhasaunni kelʼli. Tannem Judachea soglea lokank sanglem, ‘Fouzancho Dev Jehova oxem mhunntta:
“Sion zot ghatlolea eka xeta bhaxen zatolem,
Jeruzalem fatranchi ras zatolem,
Ani jea dongracher Devachem Ghor* aslem to dongor ranantlea unchlea zagea bhaxen zatolo.”’
19 “Hem aikon Judacho Raza Hezekian ani Judachea soglea lokamnim Mikak jivexim marun uddoilo kai? Tea razan Jehovachi bhirant dhorunk na kai, ani Jehova koddlean doiechi bhik magonk na kai? Ani taka lagon Jehovan pasun tancher odruxtt haddche vixim aplem mon bodlunk na kai? Tor ami oxem kitem-i kelear,* ami amcheruch ek vhoddlem odruxtt haddttole.
20 “Anik ek munis Jehovachea nanvan bhasaunni kortalo. Tachem nanv Urija aslem, ani to Kiriath-jearimant ravtolea Shemaiacho put aslo. Urija pasun Jeremiasa bhaxen hea xara ani desa add bhasaunni kortalo. 21 Jehoiakim Razan ani tachea soglea xoktivont zhuzareamnim ani soglea kunvramnim tachim utram aikolim, ani razan taka jivexim marpacho proitn kelo. Urijan hem aikolem tednam to khub bhielo ani rokddoch Ejipttak pollon gelo. 22 Tednam Jehoiakim Razan, Akboracho put Elnathanak ani tachea sangata anik thoddea munxank Ejipttant dhaddle. 23 Tannim Urijak Ejipttantlean dhorun, Jehoiakim Raza koddem haddlo. Razan taka tolvarin marun uddoilo ani tachem moddem chaltea munxank purtat tea fonddant uddoilem.”
24 Punn Shafanacho put Ahikaman, Jeremiasak tenko dilo. Taka lagon, Jeremiasak jivexim marcho mhunn taka lokanchea hatant diunk na.