Jeremias

27 Josiacho put, Judacho Raza Jehoiakimachea razvottkechea survatek Jehovacho ho sondex Jeremiasak mellʼllo: 2 “Jehovan mhaka oxem mhunnttlem, ‘Tum tujea pasot pottʼtte ani zum toiar kor ani tujea maner dovor. 3 Uprant, Judacho Raza Zedekia lagim Jeruzalemant ailolea sondexkaranchea hatant tem zum diun, Edom, Moab, Amonitkar, Tir ani Sidonachea razank dhadd. 4 Tea sondexkarank tanchea dhoniank oxem sang mhunn adnea di:

“‘“Izraelacho Dev, fouzancho Dev Jehova oxem mhunntta, tumi tumchea dhoniak oxem sangchem, 5 ‘Hanvench mhozo hat fuddem kaddun, mhoje vorte xokten prithumek, munxank, ani prithume voilea zonvarank rochlim, ani mhaka zai taka* hanvem tem dilam. 6 He sogle des hanvem atam mhozo sevok, Babilonacho Raza Nebukadnezarachea hatant dileat. Ranantlea zonvarank pasun hanvem tachea adhin keleant. 7 Soglim raxttram tachi, tachea putachi, ani tachea natvachi seva kortolim. Magir tachea desacho xevott zauncho vell ietolo tednam, zaitim raxttram ani vhoddle-vhoddle raza taka aplo gulam kortole.’

8 “‘“Jehova mhunntta, ‘Khoinchem-i raxttr vo raj Babilonacho Raza Nebukadnezarachi seva korunk ani tachem zum aplea maner dovrunk nakarta zalear, Babilonachea razachea hatantlean hanv tacho nas korina tea meren, hanv tea raxttrak tolvarin, bhuken ani pidden* khast di-it ravtolom.’

9 “‘“‘Taka lagon, tumi tumchea provadeanchem, fuddar parkhupeanchem, sopnam polloitoleanchem, jadugaranchem ani jadu-ttona korpeanchem aikonakat, je tumkam sangtat: “Tumkam Babilonachea razachi seva korunk poddchina.” 10 Karonn te tumkam fottkireo bhasaunneo sangtat. Tumi tanchem aikolem zalear hanv tumkam tumchea desantlean khub pois vhortolom. Hanv tumkam ximpddaitolom ani tumcho nas zatolo.

11 “‘“‘Punn jem raxttr aplea manecher Babilonachea razachem zum dovortolem ani tachi seva kortolem, taka hanv tachea desant ravonk* ditolom, jea vorvim to thoim zomin kostolo ani thoim ravtolo,’ oxem Jehova mhunntta.”’”

12 Hanvem Judacho Raza Zedekiak pasun hench sanglem: “Tumi tumchea manecher Babilonachea razachem zum dovrat ani tachi ani tachea lokanchi seva korat, tednam tumi jivim urtolim. 13 Tum ani tuje lok, tolvar, bhuk ani pidden kiteak moronk sodhtat? Jehovan sanglam toxem, jem raxttr Babilonachea razachi seva korchem na tacho hoch porinnam zatolo. 14 ‘Tumkam Babilonachea razachi seva korunk poddchina,’ oxem sangtat tea provadeanchem aikonakat. Karonn te khotteo bhasaunneo kortat.

15 “Jehova mhunntta, ‘Hanvem tankam dhaddunk na. Te mhojea nanvan khotteo bhasaunneo kortat. Tumi tanchem aikolem zalear hanv tumkam ximpddaitolom, ani tumcho ani tumkam bhasaunneo sangtat tea provadeancho pasun nas zatolo.’”

16 Ani iadnikank ani soglea lokank hanvem oxem sanglem: “Jehova oxem mhunntta, ‘Tumchea tea provadeanchem aikonakat, je tumkam hi bhasaunni sangtat: “Polloi! Jehovachea ghorantlim aidonam beginuch Babilonantlean porot haddttole!” Te tumkam khotteo bhasaunneo sangtat. 17 Tumi tanchem aikonakat. Babilonachea razachi seva korat ani tumi jive urtole. Na zalear hea xaracho nas zatolo. 18 Punn te provadi zalear, ani tankam Jehova koddlean sondex mellʼlla zalear, tannim fouzancho Dev Jehova lagim oxi vinoti korchi ki jim aidonam Jehovachea ghorant,* Judachea razachea rajmahalant ani Jeruzalemant urleant, tim Babilonant vhorchim nhoi.’

19 “Karonn fouzancho Dev Jehovan mondirachea khambea vixim, Doria* vixim, hat-gaddie vixim ani hea xarant urlolea aidonam vixim ek sondex dila. 20 Him tim aidonam, jim Jehoiakimacho put ani Judacho raza Jekoniak, toxench Judantlea ani Jeruzalemantlea soglea vhoddlea odhikareank, Jeruzalemantlean Babilonant koidi korun vhelʼle tednam Babilonacho Raza Nebukadnezaran aplea borabor vhoronk naslim. 21 Hoi, Jehovachea ghorant, Judachea razachea rajmahalant ani Jeruzalemant urleant tea aidonam vixim, Izraelacho Dev, fouzancho Dev Jehova oxem sangta: 22 ‘“Him aidonam Babilonant vhortole ani hanv tancher dhean dina tea meren tim thoinch urtolim,” oxem Jehova mhunntta. “Magir hanv tim thoinchean porot haddun hea zagear dovortolom.”’”