Jeremias
28 Teach vorsa, mhunnche Judacho Raza Zedekiachea razvottkechea survatek, chovtea vorsachea panchvea mhoineant, Gibeonant ravpi Azuracho put provadi Hananian, Jehovachea ghorant,* iadnikam mukhar ani soglea lokam mukhar mhaka oxem mhunnttlem: 2 “Izraelacho Dev, fouzancho Dev Jehova oxem mhunntta, ‘Hanv Babilonachea razachem zum moddttolom. 3 Babilonacho Raza Nebukadnezaran Jehovachea ghorantlim jim aidonam hea zagear thaun Babilonant vhelʼlim, tim soglim hanv don vorsam bhitor hea zagear porot haddttolom.’” 4 “Jehova mhunntta, ‘Ani Jehoiakimacho put ani Judacho raza Jekoniak ani koidi korun Babilonant vhelʼlea Judachea soglea lokank, hanv hea zagear portun haddttolom. Karonn hanv Babilonachea razachem zum moddttolom.’”
5 Tednam Jeremias provadi, Jehovachea ghorant ube aslolea iadnikam mukhar ani soglea lokam mukhar Hanania provadea lagim uloilo. 6 Jeremias provadean mhunnttlem: “Amen!* Jehovan oxench korum! Jehovan tuji hi bhasaunni purnn korum, ani Jehovachea ghorantlim soglim aidonam ani koidi korun vhelʼlea soglea lokank, Babilonantlean hea zagear porot haddum! 7 Punn atam upkar korun, hanv tuka ani hea soglea lokank sangtam to sondex aik. 8 Adim thaun, mhunnche, mhojea ani tujea poilim je provadi asle, te zaitea desank ani vhoddlea-vhoddlea rajeank, zhuz, odruxtt ani piddecho* fuddo korunk poddttolo mhunn bhasaunni kortale. 9 Khoincho-i provadi xantichi bhasaunni kortalo, ani tannem sanglolim utram ghoddon ietat zalear, to khorench Jehovan dhaddlolo provadi mhunn mantale.”
10 Hanania provadean hem aikolem tednam, tannem Jeremias provadeachea mane voilem zum kaddlem ani tem moddun uddoilem. 11 Uprant Hananian soglea lokam mukhar mhunnttlem: “Jehova oxem mhunntta, ‘Don vorsam bhitor, hanv heach toren soglea raxttranchea mane voilem, Babilonacho Raza Nebukadnezaran ghatlolem zum moddun uddoitolom.’” Tednam Jeremias provadi thoinchean gelo.
12 Hanania provadean, Jeremias provadeachea mane voilem zum kaddun moddlea uprant, Jehovacho ho sondex Jeremias provadeak mellʼllo: 13 “Voch ani Hananiak sang, ‘Jehova oxem mhunntta: “Tunvem lakddachem zum moddun uddoilem, punn tache bodlek tum lokhnnanche zum kortolo.” 14 Karonn Izraelacho Dev, fouzancho Dev Jehova oxem mhunntta: “Babilonacho Raza Nebukadnezarache gulam zaunche mhunn, hanv hea soglea raxttranchea maner ek lokhnnachem zum dovortolom. Tankam tache gulam zaunchech poddttole. Hanv ranantlea zonvarank pasun tachea tabeant ditolom.”’”
15 Uprant, Jeremias provadean Hanania provadeak mhunnttlem: “Hanania, upkar korun aik! Tuka Jehovan dhaddunk na, tunvem hea lokank fotticher visvas dovrunk laila. 16 Taka lagon Jehova oxem mhunntta, ‘Polloi! hanv tuka hea prithume voilo kaddun uddoitolom. Tum heach vorsa mortolo, karonn tunvem lokank Jehovachea add vochonk uksaileat.’”
17 Teach vorsa, satvea mhoineant, Hanania provadi melo.