Jeremias
50 Jehovan Jeremias provadea udexim Babilona vixim, mhunnche Kaldeikaranchea desa vixim oso sondex dilo:
2 “Raxttram modem vochon hea vixim sangat ani kollounni korat.
Khunna mhunn khambo ubarat ani hea vixim kolloiat.
Kainch lipoinakat!
Oxem mhunnat, ‘Babilonacher kobzo kela.
Bel devak lojek ghatla,
Marduk* dev samko bhiela,
Babilonachea murteank lojek ghatleat.
Kanttallo haddtta tosleo tacheo murteo* khub bhieleat.’
3 Karonn tacher utʼtorechea raxttran akromonn kelam.
Tannem tachea desachi oxi poristhiti kelea ki polloitat tim soglim samkinch thottaktat,
Tantunt konn ravona.
Munxam ani zonvaram pollon geleant,
Tim thoim thaun pollon geleant.”
4 Jehova mhunntta, “Tea disamnim ani tea kallar, Izraelache lok ani Judache lok ek zomo koso sangata cholon ietole. Te roddot ietole ani sangata mellon aplea Devak, Jehovak sodhtole. 5 Te Siona vatten tondd korun thoim vochpachi vatt vichartole, ani mhunnttole, ‘Ieiat, ami sogle mellon Jehova sangata ek sasnacho korar korum-ia, zo kednanch konn visorchona.’ 6 Mhoje lok, sanddlolea menddranchea hindda sarke zaleat. Tanchea gonvlleamnim tankam bhottkoileat. Te tankam porvotacher gheun gele. Tim eka porvota voilean dusrea dongrar bhottkot ravlim. Tim aplo visov gheupacho zago visorleant. 7 Zankam tim sampoddlim tannim tankam pinzun khailim. Ani tanchea dusmanamnim mhunnttlem, ‘Amchi kainch chuk na, karonn tannim Jehova add patok kelam, zo nitivontponnache dorje tharaita, ani zacher tanche purvoz bhorvonso dovortale, tea Jehova add patok kelam.’”
8 “Babilonantlean pollon vochat,
Kaldeikaranchea desantlean bhair sorat,
Ani hindda mukhar choltat tea bokddeam ani menddream bhaxen zaiat.
9 Atam hanv, utʼtorechea desantlean vhoddlea-vhoddlea raxttranchi ek fouz upzoitam,
Ani tankam Babilonacher akromonn korunk haddttam.
Ti fouz zhuzak toiar zaun ietoli.
Thoim thaun ti fouz tacher kobzo kortoli.
Tanche bann eka zhuzareachea bannam sarke asat,
Zaka lagon avoi-bapainchim bhurgim na zatat ani tim dukh kortat,
Tanche tir kednanch chukonant.
10 Kaldeikarancho des lutticho mhal zatolo.
Tacho mhal luttʼttat te purnn toren dhadoxi zatole,” oxem Jehova mhunntta.
11 “Karonn tunvem mhojem daiz luttlem tednam,
Tum khuxalkaien nachot ravlem, ani khuxalkai monoit ravlem.
Tum tornatte gaie* bhaxen tonnacher uddio marit ravlem,
Ani ghoddeam bhaxen killonch marit ravlem.
12 Tumche avoik lojek ghatlea.
Tumkam jinnem zolm dilo ti niraxi zalea.
Polloi! Raxttram modem ti sogleant unnea molachi asa,
Ti udok naslolea ranvott vattara bhaxen ani oronnʼnnea bhaxen asa.
13 Jehovachea krodhak lagon thoim porot konnuch ravchona,
Tem purnn toren padd zaun voitolem.
Babilona koddlean pasar zavpi dor eklo tachi poristhiti polloun samkoch thottaktolo,
Ani tachea piddenk lagon fivnneo* ghalun tachim fokannam kortolo.
14 Dhonu toiar kortat* te tumi sogle,
Ek fouz koxi toiar zaun soglea vattentlean Babilona add ieiat.
Tacher bann marat, ekui bann marinastana dovornakat,
Karonn tannem Jehova add patok kelam.
15 Soglea vatten tachea add zhuzachi kollounni korat.
Tannem apli har manun ghetlea.
Tache khambe moddon poddleat, tachim durgam moddun uddoileant,
Karonn Jehova tache koddlean sudd gheta.
Tumi-i tache koddlean sudd gheiat.
Tannem tumkam kelam toxench tumi-i tachea sangata korat.
16 Babilonant bim vomptoleak,
Ani lunvnne vellar villo* uzar kortoleak soddinakat.
Bhirankull tolvarik lagon dor eklo aplea lokam lagim porot voitolo,
Dor eklo aplea desant pollon voitolo.
17 “Izraelache lok hanga-thoim ximpoddlole menddre zaun asat. Xinvamnim tankam hanga-thoim ximpddaileat. Poilim, Asiriechea razan ieun tankam khaun uddoile. Uprant, Babilonacho Raza Nebukadnezaran* ieun tanchim haddam chabddailim. 18 Taka lagon, Izraelacho Dev, fouzancho Dev Jehova oxem mhunntta: ‘Atam hanv Babilonacho raza ani tachea desa sangata teach toren vagtolom, zoso hanv Asiriechea raza sangata vaglom. 19 Hanv Izraelak tachea chorvachea mollar porot gheun ietolom. To Karmel ani Bashanachea vattarant chortolo, Efraim ani Gileadachea porvotancher to dhadoxi zatolo.’”
20 Jehova mhunntta, “Tea disamnim ani tea vellar,
Izraelant sodhlear pasun guneanv mellchona,
Judant koslench patok mellchem na,
Karonn zankam hanvem jive soddleat, tankam hanv bhogxitolom.”
21 Jehova mhunntta, “Merathaim desacher ani Pekodant ravtoleancher add vochon akromonn kor.
Tankam jivexim mar ani tancho purnn toren nas kor.*
Hanvem tuka korunk adnea dilea tem soglem kor.
22 Desant zhuzacho bovall aikonk ieta,
Vhodd nisontton zata to avaz aikonk ieta.
23 Polloi, prithume voilea soglea raxttrancho churo korpi hatoddek koxi mhunn katrun ani moddun uddoilea!
Polloi, soglea raxttramnim Babilonachi poristhiti oxi zalea, ki polloitat tim soglim samkinch thottaktat!
24 Babilona, hanvem tujea pasot ek fas manddlo, ani tum tantunt sampoddlem!
Tuka kollonkuch na.
Tuka sodhun, tujer kobzo kelo,
Karonn tunvem Jehovacho virodh kelo.
25 Jehovan hotʼtearam dovorpacho aplo gudanv ugoddla,
Ani to aplim krodhachim hotʼtearam bhair kaddtta.
Karonn Akʼkhea Vixvacho Dhoni, fouzancho Dev Jehovak
Kaldeikaranchea desant ek kam asa.
26 Poisulʼlea zageam thaun ieun tacher akromonn korat.
Tachea daneache gudanv ukte korat.
Daneachea raxi sarki, tachi ras korat.
Tacho purnn toren nas korat.*
Tacho ekui munis jivo uronk dinakat.
27 Tachea soglea paddeank marun uddoiat.
Tankam jivexim marunk dhaddat.
Tancher hai, karonn tancho dis ailo,
Tancho hixob gheuncho vell pavlo!
28 Pollon voitoleancho avaz aikonk ieta,
Babilona thaun salvar zaun pollon voitoleancho avaz aikonk ieta.
Amchea Devan, Jehovan sudd ghetlea, aplea mondirak lagon sudd ghetlea,
Hem Sionant kollounk, pollon voitoleancho avaz aikonk ieta.
29 Babilonacho nas korunk bann martat tankam apoiat,
Dhonu toiar kortat* tankam sogleank apoiat.
Soglea vattamnim taka veddo ghalat, konnankuch pollon vochonk dinakat.
Taka tachea kamam pormonnem farikponn diat.
Tannem kelem toxench tachea-i sangata korat.
Karonn tannem gorvan bhoron Jehovachea add kam kelam,
Izraelachea Povitr Deva add kam kelam.
30 Tor tea disa, tachea nakeancher tache sogle tornatte moron poddttole,
Tachea soglea soinikancho nas zatolo,”* oxem Jehova mhunntta.
31 Akʼkhea Vixvacho Dhoni, fouzancho Dev Jehova mhunntta, “Gorvixtt Babilona, polloi! Hanv tujea add asam.
Karonn to dis ietoloch, to vell jednam hanv tuje koddlean hixob ghetolom.
32 Gorvixtt Babilona, tum addkhollon poddttolem,
Tuka ubarunk konnuch aschona.
Hanv tujea xarank uzo laitolom,
Ani to uzo tujea bhonvtonnim aslolem soglem kabar korun uddoitolo.”
33 Fouzancho Dev Jehova oxem mhunntta:
“Izraelachea ani Judachea lokancher zulum kortat,
Ani jea lokamnim tankam koidi keleat tannim tankam azun meren soddunk nant.
Te tankam soddunk toiar nant.
34 Punn tancho Soddoupi bollixtt asa.
Tachem nanv fouzancho Dev Jehova.
To tanchea vatten kes zhogoddttoloch,
Jea vorvim tanchea desant xanti astoli,
Ani Babilonant ravpi uchamboll zatole.”
35 Jehova mhunntta, “Ek tolvar Kaldeikaram add ietoli,
Ek tolvar, Babilonant ravtoleanchea, tachea kunvranchea ani tachea zannaranchea add ietoli.
36 Ek tolvar, polkeo vostu uloitat tanchea* add ietoli ani te murkham bhaxen vagtole.
Ek tolvar tanchea zhuzareanchea add ietoli, ani te khub bhietole.
37 Ek tolvar tanchea ghoddeanchea ani zhuzachea rotham add ietoli,
Ek tolvar tantunt ravpi soglea pordexianchea add ietoli,
Ani tanchi poristhiti bailam bhaxen zatoli.
Ek tolvar tanchea theveam add ietoli, ani tankam luttun vhortole.
38 Tachea udkancher hai, tim sukon voitolim.
Karonn ho kantoilʼlea murteamnim bhorlolo des,
Ani te bhirankull dorxonam polloitat dekhun pixeam bhaxen vagot ravtat.
39 Taka lagon, thoim oronnʼnneantlim ranvotti zonvaram ani kuleo ghaltat toslim zonvaram ravtolim,
Ani xohamrugam* ravtolim.
Thoim porot konnuch munis ravchona,
Pillgean-pillgi poriant konnuch thoim ieun ravchona.”
40 “Sodom, Gomora ani tachea bhonvtonnchea nograncho Devan nas kelea uprant tanchi ji poristhiti zali, toxich tachi-i zatoli. Thoim konnuch ravchona, khoinchoch munis thoim aplem ghor-dar korchona,” oxem Jehova mhunntta.
41 “Polloi! Utʼtore thaun lok ietat.
Ek vhoddlem raxttr ani vhoddle-vhoddle raza,
Prithumechea sogleam-von poisulʼlea vattarantlean uttʼtthole.
42 Te dhonu ani bhale uzar korpi zaun asat.
Te krur asat ani te konnanchich kakut korinant.
Te aplea ghoddeancher ietat tednam,
Tancho avaz goroztolea doria bhaxen aikonk ieta.
Babilonache dhuve, ek fouz koxi te ektthaim zaun tujea add ietat.
43 Babilonachea razan tachea vixim khobor aikolea,
Tache hat gollon poddleat.
To khontin buddla,
Bhurgeak zolm dita tea baile bhaxen to dukhin vollvolltta.
44 “Polloi! Hea surokxit chorvachea mollancher akromonn korunk konn tori ietolo. Jordana lagim aslolea datt ranam thaun xinv bhair soron ieta toso to ietolo. Hanv tankam* ekach khinna bhitor tancheach desantlo dhanvddaitolom. Ani hanv mhojea vinchun kaddloleak tacher nemtolom. Karonn mhojea sarko konn asa, ani konn mhaka addaunk xokta? Khoincho gonvlli mhojea mukhar ubo ravonk xokta? 45 Taka lagon, lokamno aikat. Jehovan Babilona add koslo nirnnoi ghetla* ani Kaldeikaranchea desa add kitem korunk chintlam tem aikat.
Dubhav nastana, hinddantlea lhan menddrank voddit vhortole.
Tankam lagon to tancho ravpacho zago padd korun uddoitolo.
46 Babilonacher kobzo korpachea avazan prithum haltoli,
Ani tim bob marun roddttat to avaz raxttram modem aikonk ietolo.”