Jeremias
49 Amonitkaram vixim Jehova oxem mhunntta:
“Izraelak put nant kai?
Taka daiji na kai?
Toxem zalear, Malkaman Gadacher kobzo kiteak kela?
Tache lok Izraelachea xaramnim kiteak ravtat?”
2 “Jehova mhunntta, ‘Taka lagon polloi!
Te dis ietat, jednam hanv Amonitkaranchea Raba xara add zhuzachi kollounni kortolom.
Tem padd zalʼli ras zaun urtolem,
Ani tachea bhonvtonnchea nogrank uzo laun uddoitole.’
Jehova mhunntta, ‘Zannim Izraelacho vattar aplea tabeant ghetlolo, to vattar Izrael tanchea koddlean porot ghetolo.’
3 ‘Heshbona, vhoddlean bob marun rodd, karonn Ai-acho nas kela!
Rabachea bhonvtonnim aslolea nogramno, vhoddlean roddat.
Sak ghalat.
Vhoddlean bob marun roddat ani fatranchea addeam* modem hevtten-tevtten dhanvat.
Karonn Malkam koident voitolo,
Tachea sangata, tache iadnik ani kunvor pasun koident voitole.
4 Ovisvaxi dhuve, tum ji tujea theveancher visvas dovorta ani mhunntta:
“Mhojea add konn ietolo?”
Tum tujea falkeam* vixim
Ani udok vhanvta tea tujea moidana vixim kiteak boddai marta?’”
5 “Akʼkhea Vixvacho Dhoni, fouzancho Dev Jehova mhunntta, ‘Hanv tujea bhonvtonnchea lokank dhaddun
Tujer ek bhirankull odruxtt haddchom asa.
Tumi soglea vatten ximpoddttolim,
Ani pollon voitoleank konnuch ektthaim korchona.’”
6 “Jehova mhunntta, ‘Punn uprant, hanv Amonitkaranchea koideank ektthaim kortolom.’”
7 Edomitkaram vixim fouzancho Dev Jehova oxem mhunntta:
“Temanant anik zannvai uronk na kai?
Somjikai asloleam koddlean boro solʼlo mellop bond zala kai?
Tanchi zannvai upeog nasloli zalea kai?
8 Dedanant ravtoleamno, fatti vollat ani pollon vochat!
Khol zageamnim vochon ravat!
Karonn Esau-acher dhean diuncho vell ietolo tednam,
Hanv tacher odruxtt haddttolom.
9 Tumchea lagim drakxam kaddpi aile zalear,
Te, magir punzaunk ietat tanchea pasot thoddim drakxam soddun voichenant kai?
Ratchea vellar chor aile zalear,
Te apleak zai titlem mellom poriant luttchenant* kai?
10 Punn Esau-a koddem asa tem soglem hanv kaddun ghetolom.
Tache lipʼpache zage khoim asat te hanv ugddape kortolom,
Jea udexim to khoinch liponk xokchona.
Tachim bhurgim, bhav ani xezari, hancho sogleancho nas zatolo,
To anik urchona.
11 Tujea onath* bhurgeank sodd,
Ani hanv tanchea jivachi rakhonn kortolom.
Ani tujeo vidva mhojer visvas dovortoleo.”
12 Karonn Jehova oxem mhunntta: “Polloi! Zankam krodhacho pelo pieunchi khast favo zaunk na, tankam pasun to pelo pieunk poddla zalear, tum khasti thaun koso suttʼttolo? Tuka khast favo zatolich. Tuka to pelo pieunkuch poddttolo.”
13 Jehova mhunntta, “Hanv mhojea jivacho soput gheun sangtam, Bozrachi oxi poristhiti zatoli ki polloitat tim soglim samkinch thottaktolim. Tacho opman zatolo, tem padd zaun voitolem, tacher xirap poddttolo ani tachim soglim xaram sodanch osadd poddlolim astolim.”
14 Hanvem Jehova koddlean ek khobor aikolea,
Raxttram modem eka sondexkarak dhaddla, zo mhunntta:
“Tumi sogle ektthaim zaiat ani tacher akromonn korat,
Zhuza pasot toiar zaiat.”
15 “Karonn polloi! Hanvem tuka raxttram modem samkem lhan korun uddoilam,
Munxam modem tuka kainch valor naslolea bhaxen kelam.
16 Tum jem khoddpachea khanchimnim surokxit ravta,
Sogleant unch dongrar ravta,
Tunvem posrailʼlea bhirantin
Ani tujea gorvixtt kallzan tuka fosoilam.
Ghonni bhaxen unch zagear tunvem tuzo ghontter bandla,
Tori astana, hanv tuka thoim thaun sokol uddoitolom,” oxem Jehova mhunntta.
17 “Edomachi oxi poristhiti zatoli, ki polloitat tim soglim samkinch thottaktolim. Thoinchean pasar zata to dor eklo tacher ailoleo sogleo pidda polloun ojap zatolo ani tachim fokannam korun fivnneo* ghaltolo. 18 Sodom, Gomora ani tachea bhonvtonnchea nograncho nas zalea uprant tanchi ji poristhiti zali, toxich Edomachi zatoli. Thoim konnuch ravchona, khoinchoch munis thoim ravonk voichona,” oxem Jehova mhunntta.
19 “Polloi! Hea surokxit chorvachea mollancher akromonn korunk konn tori ietolo. Jordana lagim aslolea datt ranam thaun xinv bhair soron ieta toso to ietolo. Punn hanv taka* ekach khinna bhitor tacheach desantlo dhanvddaitolom. Ani hanv mhojea vinchun kaddloleak tacher nemtolom. Karonn mhojea sarko konn asa, ani konn mhaka addaunk xokta? Khoincho gonvlli mhojea mukhar ubo ravonk xokta? 20 Taka lagon, lokamno aikat. Jehovan Edoma add koslo nirnnoi ghetla* ani Temanant ravtoleam sangata kitem korunk chintlam tem aikat:
Dubhav nastana, hinddantlea lhan menddrank voddit vhortole.
Tankam lagon to tancho ravpacho zago padd korun uddoitolo.
21 Tanchea poddpachea avazan prithum halta.
Soglea koddem bob zalea!
Ho avaz pois, Tambddea Doria poriant aikonk aila.
22 Polloi! Ek ghonn voir sorta ani sokol aplea xikaracher zhompoi marta,
Toso to aple pakhotte posraun Bozracher zhompoi martolo.
Bhurgeak zolm diunchi asa tea bailechem kalliz koddkoddtta toxem,
Tea disa Bozrachea zhuzareanchem kalliz bhirantin koddkoddttolem.”
23 Damaska pasot sondex:
“Hamathak ani Arpadak lojek ghatleat,
Karonn tannim ek vaitt khobor aikolea.
Tanchim kallzam bhirantin pigollttat.
Doria itlo uchamboll zala ki to xant zaina.
24 Damaskan dhir soddun dila.
Tem pollon vochonk portolem, punn tacher akant aila.
Bhurgeak zolm diunchi asa tea baile bhaxen,
Tacher sonkoxtt ani dukh ailam.
25 Vakhannʼnni melltta tea xarak,
Khuxalkaien bhorlolea nograk, lok soddun kiteak vochonk nant?
26 Tea disa tache tornatte, tachea nakeancher moron poddlole astole,
Ani soglea soinikancho nas zatolo,” oxem fouzancho Dev Jehova mhunntta.
27 “Hanv Damaskachea durgak uzo laitolom,
Ho uzo Ben-hadadachea vhoddlea gopurancho bhosm korun uddoitolo.”
28 Kedar ani Hazor, zancher Babilonacho Raza Nebukadnezaran* zoit vhelem, tanche vixim Jehova oxem mhunntta:
“Utthat, ani Kedarant voir vochat,
Ani Udentechea putancho nas korat.
29 Tanchea tombunk ani hinddank vhortole,
Tanchea tombuchim lugttam ani tanchem soglem saman vhortole.
Tanchea unttank vhortole,
Ani te vhoddlean roddon Kedarachea lokank sangtole, ‘Sogle kodden akant asa!’”
30 Jehova mhunntta, “Hazorant ravtoleamno, pollat!
Pois pollon vochat, khanchimnim vochon lipat.
Karonn Babilonacho Raza Nebukadnezaran* tumchea add ievzonn kelea,
Tumkam kabar korpachi manddnni kaddlea.”
31 Jehova mhunntta, “Utthat, jem raxttr xantin jieta,
Ani surokxit asa, tacher akromonn korat!
Tea raxttrak daram ani lokhnnache dandde nant, thoinche lok sogleam thaun pois eksure jietat.”
32 Jehova mhunntta, “Tanchea unttank luttun vhortole,
Tanchea zonvaranchea vhoddlea-vhoddlea hinddank luttun vhortole.
Je lok aplea tokleche saiddiche kens tastat,
Tankam hanv soglea vattamnim* ximpddaitolom,
Ani dor eka vattentlean hanv tancher odruxtt haddttolom.
33 Hazor koleanchi* dhol zatolo,
To sasnak padd zaun urtolo.
Thoim konnuch ravchona,
Khoinchoch munis thoim ravonk voichona.”
34 Judacho Raza Zedekiachea razvottkechea survatek, Elama vixim Jehovacho ho sondex Jeremias provadeak mellʼllo: 35 “Fouzancho Dev Jehova oxem mhunntta, ‘Elamak jea udexim xokti melltta, to tacho dhonu hanv moddun uddoitolom. 36 Hanv Elamacher, mollbachea charui konnxeam thaun char varem haddttolom ani hanv tankam tea vareamnim ximpddaitolom. Oxem ekui raxttr aschem na, zoim Elamache lok ximpddonk nant.’”
37 Jehova mhunntta, “Hanv Elamachea lokancho, tanchea dusmanam mukhar ani tancho jiv kaddunk tanche fattik lagleat tanchea mukhar churo kortolom. Hanv tancher odruxtt haddttolom, mhozo zolltto rag votoitolom. Ani te purnn toren kabar zainant tea meren, hanv tancher tolvarin akromonn korit ravtolom.”
38 Jehova mhunntta, “Hanv mhojem xinvason Elamant stapon kortolom ani thoinchea razancho ani kunvrancho nas korun uddoitolom.”
39 Jehova mhunntta: “Hanv xevottachea disamnim koident aslolea Elamachea lokank ektthaim kortolom.”