Jeremias
48 Moaba vixim Izraelacho Dev, fouzancho Dev Jehova oxem mhunntta:
“Nebocher hai, karonn tacho nas zala!
Kiriathaimak lojek ghatlam ani tacher kobzo kela.
Ghott* kilʼleak loz zatoli ani tacho churo zatolo.
2 Te atam Moabachi vhoddvik korinant.
Dusmanamnim Heshbonant tacho nas korchi manddnni kelea:
‘Ieiat, ami tem raxttr kabar korun uddoum-ia.’
Madmena, tum vogi rav,
Karonn tolvar tujea fattlean ieit asa.
3 Horonaima thaun roddnneacho avaz aikonk ieta,
Nisonttonacho ani moddon poddtta to vhoddlo avaz ieta.
4 Moabacho nas zala,
Tachim lhan bhurgim roddttat.
5 Te Luhithachea choddtter choddttana dukam golloun roddot voitat.
Ani te Horonaima thaun sokol denvtana odruxtt ailam mhunn roddttat ti bob aikonk ieta.
6 Pollon vochat! Tumcho jiv salvar korunk pollon vochat!
Ranvott vattarantlea juniper zhadda* bhaxen zaiat.
7 Tumi tumchea kamancher ani tumchea theveancher visvas dovortat dekhun,
Tumcherui kobzo kortole.
Ani Kemosh dev koident voitolo,
Tachea sangata tache iadnik ani kunvor pasun koident voitole.
8 Nas korpi, dor eka xaracher akromonn kortolo,
Ani khoinchench xar suttchem na.
9 Moabak vatt dakhounk fatracho khambo ubo kor,
Karonn tacho nas zaun tem padd zatolem tednam tache lok pollon voitole,
Tachea xaranchi oxi poristhiti zatoli ki polloitat tim soglim thottaktolim,
Ani thoim ravonk konnuch urchona.
10 Jehovan dilolem kam dhean diun korina, tacher xirap poddom!
Rogot varounchem nhoi mhunn zo apli tolvar addaun dovorta, tacher xirap poddom!
11 Moabit lok tornattponnar thaun sukhant jiele,
Sokol mhell boslolea drakxanchea sorea sarke te asat.
Tankam kednanch eka aidona thaun dusrea aidonant votounk nant,
Ani te kednanch koident vochonk nant.
Taka lagon tancho svad asa tosoch asa,
Ani tancho vasui bodlonk na.
12 “Punn Jehova mhunntta, ‘Taka lagon polloi! te dis ietat jednam hanv tankam portunk munis dhaddttolom. Te tankam portitole ani tanchim aidonam ritim kortole, ani tanchea vhoddlea-vhoddlea moddkeancho churo kortole. 13 Bethelant zata tea khottea bhoktecher visvas dovorlo dekhun Izraelachea ghoranneak loz bhogchi poddli toxi, Moabachea lokank tancho dev Kemoshak lagon loz bhogchi poddttoli.
14 Tumi oxem mhunnttlench koxem: “Ami xoktivont zhuzari, ami zhuzak toiar asat”?’
15 To Raza, zachem nanv fouzancho Dev Jehova zaun asa, to oxem mhunntta,
‘Moabacho nas kela,
Dusman tachea xaramnim ghusleat,
Ani tachea sogleant borea tornatteank jivexim marleat.’
16 Moabit lokancher beginuch odruxtt ieunchem asa,
Tancho nas zauncho vell samko vegan* ieta.
17 Tanchea bhonvtonnchea lokank ani tanchem nanv khobor asloleank,
Tanchea vixim vaitt dislem mhunn dakhoun diunk poddttolem.
Tankam sangat: ‘Are re, hi ghott boddi, sobit danddo koso mhunn moddun uddoilo!’
18 Dibonant ravpi dhuve, tujea mhoime voilem sokol denv,
Ani tanelʼlench* boson rav,
Karonn Moabacho nas korpi tujer akromonn korunk aila,
Ani to, tujea kilʼleancho nas kortolo.
19 Aroerant ravpi munxa, rosteachea kuxik ubo rav ani polloi.
Pollon voita tea dadleak ani kus marun voita tea bailek vichar, ‘Kitem zalem?’
20 Moabak lojek ghatla, tacher bhirant ailea.
Vhoddlean bob marat ani roddat.
Moabacho nas kela mhunn Arnonant kollounni korat.
21 “Ek-sarki zomin* aslolea hea vattarancher formonn marlam. Holon, Jahaz ani Mefath, 22 Dibon, Nebo ani Beth-diblathaim, 23 Kiriathaim, Beth-gamul ani Beth-meon, 24 Kerioth ani Bozra, toxench Moab desantlea laginchea ani poisulʼlea soglea xarancher formonn marlam.
25 Jehova mhunntta, ‘Moabachem xing* katrun uddoilam,
Tacho hat moddun uddoila.’
26 ‘Taka khub soro pieun ttaitt korat, karonn tannem Jehova add vochon apleakuch voir kaddla.
Moab apunn vonkla tantunt lolltta,
Ani dor eklo tacheo moskoreo korta.
27 Tunvem Izraelacheo moskoreo korunk nasleo kai?
To choranchea zomeant sampoddlolo kai,
Zaka lagon, tumi tokli haloun tacheo moskoreo kortat ani tachea add uloitat?
28 Moabant ravtoleamno, tachim xaram soddat ani khoddpamnim vochon ravat,
Falkeachea deger ghontter bandun ravtat tea parvea bhaxen zaiat.’”
29 “Ami Moabachea gorva vixim aikolam—to ekdom gorvixtt—
To kitlo ragixtt, ghomonddi ani gorvixtt asa, ani tachem kalliz kitlem gorvan fulʼlam, tea vixim ami aikolam.”
30 “Jehova mhunntta, ‘To kitlo ragixtt asa tem hanv zannam,
Punn to marta teo boddaieo polkeo mhunn kollon ietoleo.
Te kainch korchenant.
31 Taka lagon, hanv Moaba pasot vhoddlean bob marun roddttolom,
Akʼkhea Moaba pasot vhoddlean roddttolom,
Ani Kir-heresachea lokam pasot dukh kortolom.
32 Sibmachea drakxanche vali, hanv Jazera pasot jitlom roddlolom,
Tachea poros chodd tujea pasot roddttolom.
Tuje vaddttat te fantte doria poltoddi meren pavleat.
Doria meren, Jazer meren pavleat.
Nas korpi, tujea gimantlea follancho* ani ektthaim kelʼlea drakxancho
Nas korunk aila.
33 Tujea bagentlean ani Moab desantlean khuxalkai kaddun ghetlea,
Thoim khuxalkai monovop bond kelam.
Hanvem tujea drakxam maddovpachea zagea voilean vhanvtalo to drakxancho soro bond kela.
Atam thaun konnuch khuxalkaien bob marun drakxam maddovchona.
Thoim thaun bob marta to avaz ietolo, punn to khuxalkaiecho aschona.’”
34 “‘Heshbona thaun Eleale meren, bob martat to avaz aikonk ieta.
Te itlea vhoddlean bob martat, ki tancho avaz Jahaz meren aikonk ieta,
Zoara thaun Horonaim meren ani Eglath-shelishiya meren aikonk ieta.
Nimrimantlem vhanvta tem udok pasun sukon voitolem.’
35 Jehova mhunntta, ‘Hanv Moabache oxe hal kortolom ki,
Thoim unch zageancher iodn bhettounk konnuch aschona,
Nhoi mhunn aplea devak bolidanam bhettounk konnuch aschona.
36 Taka lagon, mhojem kalliz eke basure* bhaxen Moaba pasot roddttolem,
Mhojem kalliz eke basure* bhaxen Kir-heresantlea lokam pasot roddttolem,
Karonn tannem ektthaim kelʼli girestkai nas zaun voitoli.
37 Dor ekleak tasun khoddʼddo kela,
Ani dor ekleachem khadd kaddlam.
Dor ekleachea hatar ghave ghatleat,
Ani tanchea bhenddak sak bandla!’”
38 “Jehova mhunntta, ‘Moabachea soglea ghorancher,*
Ani tachea soglea nakeancher,
Fokot bob marun roddttat to avaz aikonk ieta.
Karonn kainch upeog naslolea moddke sarko,
Hanvem Moabacho churo kela.’
39 ‘Polloi, to kitlo bhiela! Vhoddlean bob marun roddat!
Moab lojen fatti sorla!
Soglim tachim fokannam kortat,
Tachi poristhiti oxi zalea ki bhonvtonnchim soglim taka polloun samkim bhieleant.’”
40 “Jehova oxem mhunntta:
‘Polloi! Zoxi ek ghonn aplea xikaracher zhompoi marta,
Toso to aple pakhotte posraun Moabacher zhompoi martolo.
41 Tachea nograncher kobzo kortole,
Ani tachea kilʼleancher kobzo kortole,
Bhurgeak zolm diunchi asa tea bailechem kalliz koddkoddtta toxem,
Tea disa Moabachea zhuzareanchem kalliz bhirantin koddkoddttolem.’”
42 “‘Moabacho oxe toren nas zatolo ki to ek raxttr mhunn urchona,
Karonn tannem Jehovachea add vochon apleakuch voir kaddla.’
43 Jehova mhunntta, ‘Moabant ravtolea munxa,
Tujea mukhar akant, fondd ani fas manddlolo asa.’
44 Jehova mhunntta, ‘Akanta thaun zo pollon voitolo, to fonddant poddttolo,
Fonddantlean bhair soron ietolo, to fasak sampoddttolo.’
‘Karonn hanv Moabachea lokank khast ditolom tem voros ieta.’
45 ‘Pollon voitat te, Heshbonachea savllent xokti nastana ube ravtole.
Karonn Heshbonantlean uzo bhair sortolo,
Ani Sihonantlean ujeache agttem ietolem.
Ho uzo Moabachem kopol lasoun uddoitolo,
Ani hinvsechea putanchem toklechem kottʼttem lasoun uddoitolo.’
46 ‘Moaba, tujer hai!
Kemosh devachea lokancho nas zala.
Tujea putank koidi keleat,
Ani tujea dhuvank koident vheleant.
47 Punn xevottachea disamnim hanv Moabachea koidi kelʼlea lokank ektthaim kortolom,’ oxem Jehova mhunntta.
‘Hanga Moabacho zhoddttecho sondex sompta.’”