Tannim Jehovak Promise Keli

Ejiptt-a thaun bhair soron don mhoinea uprant, Izraelitkar Sinai dongra lagim pavtat ani thoim aple tombu ghalun ravonk lagtat. Jehova Moizesak apoita ani Moizes Sinai dongrar voita. Thoim Jehova Moizesak sangta: ‘Hanvem Izraelitkarank suttka dilea. Te mhojem aikotat ani mhoje kaide pallttat zalear, te mhoje khas lok zatole.’ Moizes dongra voilo sokol denvon Jehovan kitem sanglam tem Izrael lokank sangta. Tednam tim kitem mhunnttat? Tim sangtat: ‘Jehovan kitem sanglam tem soglem ami kortolim.’

Moizes dongracher porot voita. Thoim Jehova taka sangta: ‘Tin disam uprant, hanv tumchea lagim uloitolom. Lokank sang ki tannim Sinai dongrar choddpacho proitn korcho nhoi.’ Moizes sokol denvta ani Izraelitkarank sangta ki tannim Jehova koddlean aikonk toiar ravchem.

Tin disam uprant, Izraelitkar dongracher zhoglam martat tim ani ek kallem kup ailam tem polloitat. Toxench, tim vhodd goddgoddacho ani turtureancho avaz aikotat. Uprant, Jehova ujea sarko dongracher denvta. Izraelitkar hem polloun khub bhietat ani kampunk lagtat. Akʼkho dongor ekdom halta ani dhunvran bhorta. Turtureancho avaz vhodd zait ravta. Ani uprant Dev sangta: ‘Hanv Jehova, tumi mhaka soddun dusrea khoincheach devanchi bhokti korchi nhoi.’

Moizes dongracher porot voita ani thoim Jehova taka kaide dita, je lokamnim pallunk zai asle. Tantunt, tannim koxi tachi bhokti korunk zai ani koxem vagonk zai tem sanglolem. Moizes he kaide boroun gheta ani uprant Izraelitkarank vachun dakhoita. Tim mhunnttat: ‘Jehovan sanglam tem soglem ami kortolim.’ Hoi, tim Jehovak promise kortat. Punn tim apli promise pallttolim kai?