Tannim Dilʼli Promise Moddli

Jehovan Moizesak sanglem: ‘Mhojea lagim dongrar ieo. Hanv mhoje kaide tuka fatrachea pattiecher boroun ditam.’ Moizes dongrar choddlo ani thoim to 40 dis ani rat ravlo. To thoim astana, Jehovan Dha Kaide (Updes) fatrachea don pattiencher boroile ani te Moizesak dile.

Thoddea disam uprant, Izraelitkar chintʼtat ki Moizes tankam soddun gela. Tim Aronak mhunnttat: ‘Amkam vatt dakhounk konn tori zai. Tum amchea pasot ek dev kor!’ Aron tankam sangta: ‘Tumchem bhangar mhaka diat.’ Hem bhangar to ujeant koddoita ani tacho ek paddkulo korta. Hem polloun lok mhunnttat: ‘Ho paddkulo amcho Dev zaun asa, zannem amkam Ejiptta thaun soddun haddleant!’ Ani tim tea bhangarachea paddkuleachi bhokti korunk lagtat ani khuxalkai monoitat. Oxem korop sarkem aslem kai? Na, karonn lokamnim Jehovak promise kelʼli ki tim fokot tachich bhokti kortolim. Punn tannim apli promise moddli.

Hem soglem Jehova polloitalo. Tannem Moizes-ak mhunnttlem: ‘Sokol denvon lokam sorxim voch. Tim mhoje kaide moddttat ani khottea devachi bhokti kortat.’ Tednam Moizes, teo don pattio gheun dongra voilo sokol denvta.

Moizes denvon ailo tednam lok gitam gaitat tem tannem aikolem. Tea paddkulea mukhar te nachtale ani dimbi ghalun bhokti kortale. Hem polloun Moizesak ekdom rag ailo. Tannem teo fatracheo don pattio zomnir xevttileo ani tanche kuddke zale. Tannem rokddoch to paddkulo moddun uddoilo. Tea uprant, tannem Aronak mhunnttlem: ‘Tunvem lokanchem aikon itlem vaitt koxem mhunn kelem?’ Aronan mhunnttlem: ‘Ragar zainaka. He lok kosle te tum zannam. Tankam ek dev zai aslo. Dekhun hanvem tanchem bhangar ujeant uddoilem ani tantuntlean ho paddkulo bhair sorlo!’ Aronan toxem korunk zainaslem. Moizes dongrar porot voita ani lokank bhogos mhunn to Jehova lagim magnnem korta.

Jim konn aplem utor pallttat tankam Jehova bhogxita. Tor Jehova Moizes-a vorvim kitem sangta tem Izraelitkaramnim aikop kitlem mhotvachem aslem tem tunvem polloilem?