Otumbr—Jivit ani Porgottnni Mittingechea Pustike Pasot Modot

Otumbr—Jivit ani Porgottnni Mittingechea Pustike Pasot Modot

OTUMBR 2-8

DEVACHEA UTRANTLE THEVE | DANIEL 7-9

“Danielachi Bhasaunni Mesias Ieuncho Vell Kollit Korta”

(Daniel 9:24) “Tuje porje ani tujea povitr Xara pasot sotʼtor satollim nemlolim asat: tedna soglle toreche opradh somptole, patkacho bhosm zatolo, sogllea khotteponnachem bhogsonnem melltolem, sodam togpachem promannikponn sthapon ietolem, dorxonam ani bhakitam purnn zatolim, porom-povitracho obhixek zatolo.”

it-2 902 ¶2

Sotʼtor Satollim

Oprad ani patkacho bhosm. Jezu melo, jivont zalo ani sorgar gelo dekhun amchea ‘soglea opradhancho ani patkancho bhosm zalo ani amkam soglea khotteponnachem bhogsonnem favo zalem.’ (Dan. 9:24) Somurtichea koraran Judev patki mhunn ukteponnim dakhoun tancher formonn marlem ani kaido moddpi mhunn tancher xirap poddlo. Punn Moizesachea kaidea pormonnem tanchem patok jitlem “choddlem-vaddlem” tachea poros chodd Mesiasa udexim Devachi kaklut ani manietai vaddli. (Rom. 5:20) Mesiasachea bolidana uprant poschatap kelʼlea patki lokanche opradh ani patok bhogsunk zatalem ani tankam khast favo zaina asli.

(Daniel 9:25) “Hea pasot, hem tum zanno za ani somzun ghe: “Portun ie ani Jerusalem novean bandun kadd” - ho sondex bhair sorlo tea vella thaun ‘Obhixikt’ ie-sor sat satollim ani basotth (62) satollim bollanddtolim, ani hem sonkoxttachea kallar zatolem. Xar bandon ietolem, novean bandon ietole Tache chovk ani kilʼleancheo vonnti.”

it-2 900 ¶7

Sotʼtor Satollim

‘Ekonn-Sotʼtor Satollim’ Somplea Uprant Mesiasachem Iennem. Basotth satollim (Dan. 9:25), 70 satolleancho ek bhag. ‘Sat satolleam’ uprant basotth satollea vixim sanglam, taka lagon, tim sat satollim sorlea uprant suru zatat. ‘Jerusalem novean bandun kaddunk hukum’ dilo tednam thaun obhixikt ieum porian sat ani basotth satollim mhunnche ekonn-sotʼtor satollim zatat. Him ekonn-sotʼtor satollim mhunnttlear 483 vorsam. Tim 483 vorsam, 455 K.X.A. thaun suru zalim ani 29 vorsak (K.X.) somplim. 29 vorsak (K.X.) Jezun udkant bautizm ghetlo, povitr xokten taka makhlo, ani Mesias mhunn tannem seva suru keli.—Luk. 3:1, 2, 21, 22.

(Daniel 9:26, 27a) “Basotth (62) satollim somplea uprant, tachea guneanva viret, eka Obhixiktak jivexim martole. Ieuncho asa to razkunvor Xar ani Devmondir bhosmun uddoitolo. Punn tea razkunvracho xevott zatolo nisontton, ani xevott porian zhuz astolem, ani soglleacho nas zauncho mhonn Devachem formonn asa. Ek satollem-bhor zaitea fuddariam kodde to ek thir kott kortolo; ani ordem satollem [“ordem satollem sompta tednam,” NW] iodn ani bhettovnnio to bond dovortolo.”

it-2 901 ¶2

Sotʼtor Satollim

Satollea modem “jivexim marlo”. Fuddem Gabrielan Danielak sanglem: “Basotth (62) satollim somplea uprant, tachea guneanva viret, eka Obhixiktak jivexim martole.” (Dan. 9:26) Hi ghoddnni 7 ani 62 satollim sompon, thoddea vellan ghoddtta. Hacho orth, 69 satollim somptoch, sumar sadde tin vorsam uprant Jezuk kambear jivexim marlo ani munxank soddvonn diunk tannem aplem jivit somorpilem. (Iz. 53:8) Purave dakhoitat ki ‘satolleachea’ poilea ordea bhagant Jezun porgottnnechem kam kelem. Ek pavtt, chodd korun 32 vorsa (K.X.) Jezun ek vopar uzar keli. Tantunt tannem Judevanchea raxttrak anjirachea zhaddak sor kelem. (Mt. 17:15-20; 21:18, 19, 43 sor korat) Tea zhaddan “tin vorsam” porian kainch follam diunk nam. Mollo vosoitolean, molleachea dhoniak mhunnttlem: “Dhonia, hem-i aniek voros tem asum-di; tachea mundak allem kaddun, taka hanv sarem ghaltam; ghoddiek taka foll zait; na tor, magir kator.” (Luk. 13:6-9) Jezuchi hi vopar, tannem aikona toslea Judevanchea raxttrak porgottnni keli to vell dakhoita. Hi vopar sangli tednam Jezun tin vorsam porgottnni kelʼli ani fuddem chovtea vorsak chalu urchi asli.

it-2 901 ¶5

Sotʼtor Satollim

“Ordem satollem” mhunnttlear sadde tin vorsam. 70-vem “satollem” 29 vorsachea (K.X.) xorod kalla thaun suru zata. Tea vorsak Jezun bautizm ghetlo ani taka Krist mhunn makhlo. Dekhun, satolleachem poilem ordem (sade tin vorsam), 33 vorsachea (K.X.) vosont kall vo paskachea vella poriant (Nisan 14) pavta. Ho dis Gregorian calendar-a pormonnem 33 vorsa (K.X.) Abrilachea 1 tarker poddtta. (LORDʼS EVENING MEAL [Time of Its Institution] Inglez bhaxen polloiat.) Apostl Paulu sangta, Jezu ‘Devachi khuxi korunk ailo.’ Tea khuxe pormonnem Jezu ‘adlea korarant formailʼle sogle iodn rodʼd korta ani tanche suvater novea koraracho iodn stapun dovorta.’ Hem tannem aplem jivit bolidan korun kelem.—Heb. 10:1-10.

Bible-ant Motiam Sodhum-ia

w01 5/15 27

Vachpeam Thaun Prosn

Daniel 9:24-ant sanglolea pormonnem “porom povitracho obhixek” kednam zalo?

Daniel 9:24-27-ache bhakit, “Obhixikt” mhunnche Krist ieunchea vixim asa. Tor “porom povitracho” obhixek zatolo mhunnche Jerusalemachea mondiracho, Bhov Povitr zago obhixek zata oxem nhoi. Punn, “porom povitr” hem utor Jehovachea vhodd odheatmik mondirant aslolo sorgincho bhov povitr zago dakhoita.—Hebrevank 8:1-5; 9:2-10, 23.

Devachea odheatmik devmondirachi survat kednam zali? Hem zannam zaunk 29 vorsa (K.X.), Jezun bautizm ghetlo tednam kitem ghoddlem tem polloum-ia. Tednam thaun Jezun Stotr 40:6-8-ant boroilolim utram purnn kelim. Jezun Deva lagim oxem magnnem kelem mhunn apostl Paulun uprant sanglem: “Iodn ani bhettovnnio Tuka naka zalim, punn mhaka Tunvem ek kudd toiar keli.” (Hebrevank 10:5) Jerusalemachea dev mondirant zonvarache iodn Devak ‘naka zale’ mhunn Jezuk khobor asli. Jezu aplea kallzant kitem asam tem oxem sangta: “Pustokachea kovlleacher Mhoje vixim oxem boroilolem asa, Tuji khuxi korunk Deva Hanv ieta.” (Hebrevank 10:7) Ani Jehovan kitem zobab dilo? Matevache xubhvortoman sangta: “Jezu snan gheun udkantlo bhair sorun iena fuddem, ovchituch sorg ugoddlo ani Devacho Atmo Apnnacher parvo koso denvun ieta to Tannem dekhlo. Ani okosmat sorgar thaun ek tallo oso gazlo: Ho Mhozo Put, soglle opurbaiecho; Tacher asa Mhojem dhadosponn.”—Matev 3:16, 17.

Jezuchi kudd bolidana pasot Jehova Devan manun ghetlolea vorvim Jerusalemachea Dev mondirache vedi poros ek vorti vedi ostitvant aili mhunn kollon ieta. Hi vedi mhunnttlear, Jezucho iodn svikar korunk Devachi “khuxi” vo manddavoll. (Hebrevank 10:10) Jezu Povitr xokte udexim obhixek zalo. Hacho orth, Devan atam tachea odheatmik devmondirachi akʼkhi manddavoll stapon keli. Oxem toren, Jezuchea bautizma vellar, sorgar Devacho ravpacho zago obhixikt zalo, vo Devachea vhodd odheatmik mondirachea manddavollint ‘porom povitr’ mhunn kuxin kaddlo.

(Daniel 9: 27) “Ek satollem-bhor zaitea fuddariam kodde to ek thir kott kortolo; ani ordem satollem [“ordem satollem sompta tednam,” NW] iodn ani bhettovnnio to bond dovortolo, ani Devmondirache kuxik, xevott porian, ghorttann kortoleacho Devan formailʼlo nas zai porian, bhirankull sotianasacho kanttallo vostolo.”

w07 9/1 20 ¶4

Daniel Pustokantle Mukhel Mudʼde

9:27—Khoincho korar 70-vem satollem sompom porian vo 36 K.X. porian lagu aslolo? Somurticho korar 33 vorsa (K.X.) Jezu melo tednam somplo. Punn Abrahamak kelʼlo korar 36 vorsa (K.X.) meren Israel porjek ani Judev dhorm apnnailolea lokam pasot lagu dovorlolo. Hea toren Jehovan Judev porjek ek khas ritin doia dakhoili karonn ti Abrahamachi sonsot asli. Abrahamak kelʼlo korar azun-ui Devachea Israelak’ lagu zata.—Galasiekarank 3:7-9, 14-18, 29; 6:16.

OTUMBR 9-15

DEVACHEA UTRANTLE THEVE | DANIEL 10-12

“Fuddarachea Razam Vixim Jehova Adinch Kolloita”

(Daniel 11:2) “Atam hea vostum vixim sot tem hanv tuka sangtam. Tin nove raza Persient utthtole; ek choutho raza ietolo ani sogllea heram poros girest zatolo, ani jedna to aple girestkaiek lagun podvedar zatolo, tedna sogllea her Grik rajeancher to zhuz manddtolo.”

dp 212-213 ¶5-6

Don Raza Zhuztat

⁵ Cyrus the Great, Cambyses II, ani Darius I (Hystaspes) poile tin raza aslem. Bardiya-n (vo tachea razvottkecho hokʼk dakhoupi raza Gaumata) fokot sat mhoine razvottki choloili, taka lagon bhakitant tachea thoddeach vellache razvottke vixim sangonk na. 490 vorsa (K.X.A.), tisro raza Darius I-an, Grik rajeacher dusre pavtt akromonn korcho proitn kelo. Punn, Persieche soinik Marathon-ant harle ani te Azia Minorak portole. Darius-an portun Grik-achea add zhuzonk bori toiari keli, punn char vorsamnim to melo, dekhun hem zhuz korunk to pavonk na. Tor hem zhuz tacho put ani fuddlo raza, Xerxes I hachea hatant poddlem. Xerxes I “choutho” raza zalo. To Esthera lagim kazar zalʼlo raza Ahasuerus aslo.—Esther 1:1; 2:15-17.

⁶ Xerxes I hannem aplea lagim aslem soglem gheun “Grik rajeancher” vo svotontr aslolea ‘soglea Grik raxttrancher zhuz manddlem.’ The Medes and Persians—Conquerors and Diplomats hem pustok sangta, “rajmahalantlea huxar ani havesan bhorlolea munxanchea solʼlea khala Xerxes-an zomin ani doriantlean zhuz manddlem.” Panchvea xekddeantlo (K.X.A.) Grik itihaskar, Herodotus oso boroita, “hachea poilim anik konnench hea ritin akromonn korunk naslem.” To sangta, doriache soinent “sogle mellon 5,17,610 soinik asle. Tor zomnir cholun vochpi 17,00,000 soinik asle ani 80,000 ghoddesvar soinik asle. Tache bhair, unttancher boson arab munis ani rotham gheun Libeakar zhuztale. Hancho ankddo 20,000 aslo. Tor zomnicher ani doriant sogle mellon 2,317,610 soinik asle.”

(Daniel 11:3) “Ek bollixtt raza utthtolo ani eka vhodd raxttracher razvott choloitolo ani apnnak zai tem kortolo.”

dp 213 ¶8

Don Raza Zhuztat

⁸ Ainzan sanglem, “Ek bollixtt raza utthtolo ani eka vhodd raxttracher razvott choloitolo ani apnnak zai tem kortolo.” (Daniel 11:3) Ek bollixtt raza utthtolo mhunn sanglolo to raza Alexander the Great. 336 vorsa (K.X.A.) vis vorsancho astana Alexander, Masedonient raza zalo. Magir aplo bapui Philip II hachi ievzonn uzar korun, tannem Persiechem somraj aplea tabeant kelem. Tea uprant, Eufrata ani Tigris nodi par korun tachea 47,000 munxamnim, Gaugamelant Darius III hachi 2,50,000 munxanchi fouz ximpddaili. Xevottak, Darius thoinchean pollon voita punn taka marun uddoitat ani Persiechi razvottki sompta. Grik atam sonvsarachi vorixtt razvottki zata. Alexander ‘vhodd raxttracher razvott choloun, apnnak zai toxem korunk lagta.’

(Daniel 11:4) “Punn ekdam tannem podvi hatant ghetli mhonnttoch, tachea raxttrache kuddke zatole ani mollbachea char-ui vareank tanche vantte poddtole, punn tache sonstik te vantte mellche nant: tannem raj choloilʼlem te bhaxen te tem cholounche nant, kiteak tachi razpodvi pallam soit umttun kaddtole ani ti dusreanchea tabeant poddtoli, punn tache sonstichea hatant nhoi.”

dp 214 ¶11

Don Raza Zhuztat

¹¹ Alexander melea uprant tachea somrajeache ‘kuddke zale ani mollbachea char-ui vareank tanche vantte poddle.’ Somrajeache vantte melloun gheunk tache senapoti ap-aplea bhitor zhuzle. Ek-dollo aslolo senapoti, Antigonus I hannem Alexander-achem akʼkhem somraj aplea tabeant korcho proitn kelo. Punn Frijient, Ipsus zagear zhuz kortana to melo. 301 vorsak (K.X.A.) Alexanderachem akʼkhem somraj tachea char senapotimnim aplea tabeant ghetlem. Masedonia ani Grikacher Cassander raj cholounk laglo. Azia Minor ani Thrace-acher Lysimachus raj cholounk laglo. Seleucus I Nicator-an, Mesopotamia ani Siria aplea tabeant ghetlem. Toxench, Ptolemy Lagus-an Ejipt ani Palestine aplea tabeant ghetlem. Bhakitant sanglolea porim, Alexanderachem vhoddlem somrajache char vantte zale.

Bible-ant Motiam Sodhum-ia

(Daniel 12:3) “Xannim tim mollbachea porzolla porim jhigjhigtolim, ani zannim zaiteank promannikponnachi vatt xikoilea, tim noketram porim jhigjhikit zatolim sasnnachea sasnnak.”

w13 7/15 13 ¶16, enddnott

“Polloi! Kalla-Ieuganche Sompadnne Porian Hanv Tumchea Sangata Asam”

Daniel 12:3 sangta, “xannim tim [obhixikt kristanv] mollbachea porzolla porim jhigjhigtolim.” Hem tim, sonvsarant astana porgottnnechem kam korun kortat. Punn, Matev 13:43-ant tim sorginchea Rajeant suria vorim porzollttolim to vell dakhoila. Poilim, him donui versam porgottnnechea kamak lagu zatat mhunn ami chintalim.

(Daniel 12:13) “Punn tum voch atam ani xevott pavo-sor visov ghe; tujem inam gheunk kallachea xevottak tum utthtoloi.”

dp 315 ¶18

Jehova Danielak Ek Boro Inam Ditolo Mhunn Bhas Dita

¹⁸ Danielachea pustokachea nimannea odheai-ant, Dev munxak sogleant bori bhasaunni dita. Jehovachea dutan Danielak sanglem: “Kallachea xevottak tum utthtoloi.” Devdutachea utrancho orth kitem aslo? Tannem sangla to ‘visov’ mhunnttlear moronn zalear, to xevottak porot utthtolo hacho orth oso ki to fuddarak novean jivont zatolo. Khorem mhunnttlear, Hebrev bhaxent boroilolea pustokam modem, porot jivontponna vixim poile pavtt Daniel 12 odheai-ant spoxtt ritin sanglam oxem thodde zannkar mhunnttat. (Daniel 12:2) Punn tanchem hem mhunnop chukichem. Danielak porot jivontponna vixim poilinch khobor asli.

OTUMBR 16-22

DEVACHEA UTRANTLE THEVE | HOSEA 1-7

“Visvaxi Mog Jehovak Khuxalkai Haddtta—Tumkam-i Haddtta?”

(Hosea 6:4, 5) “Efraima, Hanv tuka kitem mhonn korum? Juda, kitem mhonn korum Hanv tuka? Tuzo mog mhollear eke sokallche dhunvre bhaxen, rokhddoch na zatolea dhova sarko. Hea khatir provadiam vorvim tanche Hanvem kuddkean-kuddke kele, Mhojea tonddantlea utrammnim tankam Hanvem jivexim marun uddoilim. Fantea porim Mhozo niticho nirnnoi bhogbhogun porzolltolo.”

w10 8/15 25 ¶18

“Doiallponnachi Xikvonn” Tumchi Jib Rakhum

¹⁸ Jehovachi bhokti kortoleam sangata amchea soglea vagnnukent ami visvaxi mog dakhounk zai. Kotthin poristhitint pasun doiallponnachi xikvonn amche jiber uronk zai. Israelitkarancho visvaxi mog “rokddoch na zatolea dhova sarko,” zalo tednam Jehova tancher ragar zalo. (Hos. 6:4, 6) Punn sodanch visvaxi mog dakhoilear Jehova khuxal zata. Oso mog dakhoitat tea lokank tannem zaitim besanvam dileant.

(Hosea 6:6) “Mhaka iodn naka, visvaxi mog zai, hom nakat, Devachi vollokh zai!”

w07 9/15 16 ¶8

Hosea Pustokantle Mukhel Mudʼde

6:6. Patok korit ravtat te lok Devak visvaxi mog dakhoun dinant. Kitle-i odheatmik iodn bhettoilear pasun, hem unnemponn bhoronk xokona.

w07 6/15 27 ¶7

Jehovachem Utor Aikotat Tancho To Valor Korta

⁷ Adim kitem ghoddlem tem ugddasak haddat. Zonvaranchea iodna poros aplem utor aikolear chodd mhotvachem mhunn Jehovan aplea adlea lokank kolloilʼlem. (Mhonnʼnneo 21:3, 27; Hosea 6:6; Matev 12:7) Jehovanuch aplea lokank iodn bhettounk sanglolem, tor atam tannem oxem kiteak sanglem? Iodn bhettoinnaracho hetu kitem asta? Hem to Devak khuxal korunk korta kai vo fokot ek rit pallunk korta? To khorench Devak khuxal korunk oxem korta zalear, to Devache sogle kaide pallttolo. Devak zonvaranchea iodnanchi goroz na. Punn ami tachem utor pallttat tednam ami taka kitem valorachem tem ditat.

Bible-ant Motiam Sodhum-ia

(Hosea 1:7) “Punn Hanv Judachea Ghoranneachi doia kortolom ani tanchem taronn kortolom: dhonuchea, tolvarichea vo ostram-xostranchea bollan nhoi, ghoddeanche ani ghoddesvaranche soktin-ui nhoi, punn Sorvespora tanchea Devache podven Hanv tankam soddoitolom.”

w07 9/15 14 ¶7

Hosea Pustokantle Mukhel Mudʼde

1:7—Judachea ghoranneak doia ani taronn kednam mellʼllem? 732 vorsa (K.X.A.), Raza Hezekiachea disamnim him utram ghoddon ailim. Jehovachea eka devdutan ekech ratik 1,85,000 Assiriechea soinikank kabar kele ani Jerusalemak doia dakhoili. (2Raz. 19:34, 35) Jehovan Judak “dhonuchea, tolvarichea, vo ostram-xostranchea bollan nhoi, ghoddeanche ani ghoddesvaranche soktin-ui nhoi” punn eka devduta udexim taronn dilem.

(Hosea 2:20) “To dis pavtoch, tanche pasot Hanv ranvott monzatim kodde, mollba velea suknneam kodde ani zomnir sorpottun choltolea pranniam kodde ek korar kortolom. Hanv bhalo ani tolvar moddtolom, desant anink zhuzam asunk diuncho na, ani tankam sust add poddun nhidunk ditolom.”

w05 11/15 20 ¶16

Hosea-achem Bhakit Amkam Deva Sangata Cholonk Modot Korta

¹⁶ Devan hem-ui bhasailem: “To dis pavtoch, tanche pasot Hanv ranvott monzatim kodde, mollba velea suknneam kodde ani zomnir sorpottun choltolea pranniam kodde ek korar kortolom. Hanv bhalo ani tolvar moddtolom, desant anink zhuzam asunk diuncho na, ani tankam sust add poddun nhidunk ditolom.” (Hosea 2:20) Aplea ganvant porot ailʼle Judev surokxitaien jiele. Tankam zonvaranchi koslich bhirant nasli. Hi bhasaunni, 1919 vorsa (K.X.) porot purnn zali. Tea vorsa, urlolea otmik Israelit lokank “Vorixtt Babilon” vo sonvsarantlea khottea dhormachea somraja thaun suttka mellʼlli. Atam te, sonvsaracher jieuncho bhorvonso aslolea tanchea sangateam borabor, otmik bhagent surokxitaien ani khuxalkaien jietat. Hea khorea Kristanvam modem zonvaram-sarko sobhav na.—Prokasovnni 14:8; Izaias 11:6-9; Galasiekarank 6:16.

g05 9/8 12 ¶2

Sonvsarbhor Ekvottkai Astoli Tednam

Prithumecher ek nove torechi ekvottkai astoli. Karonn Dev aplea visvaxi munxank, tanchea ghorachi mhunnche prithumechi bori dekhrekh korunk xikoitolo. To zonvaram sangata pasun “ek korar” kortolo. Munxak ranvott zonvarancher odhikar astolo ani tanche modem xanti astoli.—Hosea 2:18; Utpoti 1:26-28; Izaias 11:6-8.

OTUMBR 23-29

DEVACHEA UTRANTLE THEVE | HOSEA 8-14

“Jehovak Tumchem Boreantlem Borem Bhettoiat”

(Hosea 14:2) “[Khore khonti-dukhichim] utram gheun Sorvespora-xim portun ieiat. Taka mhonnat: Sogllem amchem khotteponn kaddun uddoi ani borem tench manun ghe. Boilanche svater ami Tuka amche ontt bhettoitoleanv.”

w07 4/1 20 ¶2

Devak Manvotat Tosle Iodn Bhettoiat

Amchea vonttanchi vakhannʼnni, Devak ek iodn bhettoilʼlea sarki mhunn Bible dakhoita. Jehovak amchi vonttanchi vakhannʼnni khub moladik mhunn dakhounk Hosea provadean te vakhannʼnnek tornnea boilanchea iodnak sor kelea. (Hosea 14:2) Apostl Paulun Hebrev Kristanvank sanglem: “Tor Devak amchea onttamnim vakhannun, Taka Jezu vorvim nirontorim amcho vakhannʼnnecho iodn bhettoum-ia.” (Hebrevank 13:15) Porgottnnechea kamant ani soglea raxttrantlea lokank xis korpachea kamant Jehovache Sakxi aiz khub vell ghaltat. (Matev 24:14; 28:19, 20) Sonvsarbhor te, dis ani rat Devak vakhannʼnnecho iodn bhettoitat.—Prokasovnni 7:15.

(Hosea 14:4) “Tanchem ovisvaxiponn Hanv pekoitolom, sogllea Mhojea Kallzan Hanv tancho mog kortolom, kiteak Mhozo rag tanche velo koddsorlo.”

w11 2/15 16 ¶15

Devachi Manietai Sasnachea Jivitak Pavoita

¹⁵ Boil sogleam-von marog zonvar aslem jem iodn bhettounk Israelitkar vapurtale. Taka lagon, jednam ami niall korun borea utramnim kallzant thaun Jehovak vakhannttat tednam amchi vakhannʼnni tornnea boilanchea iodna sarki zata. Osle iodn bhettoitat tanche vixim Jehova kitem sangta? To mhunntta: “Sogllea Mhojea Kallzan Hanv tancho mog kortolom.” (Hos. 14:4) Aplea vonttamnim vakhannʼnni ditat tankam Jehova bhogsonnem, manietai ani apli ixttagot favo korta.

(Hosea 14:9) “Xannim monxam him utram somzun gheum, zannar monxam tancho orth xikum, kiteak Sorvesporacheo vatto nitt-soroll: promannik monxam tancher choltat, punn patki monxam adllun poddtat.”

jd 87 ¶11

Tachea Unch Dorjea Pormonnem Jehovachi Seva Korat

¹¹ Nitiche vatten cholʼlolean kitem faido melltta tem Hosea 14:9 amkam sangta. Devak manta tea pormonnem cholʼlear amkam besanvam ani faide mellttat. Amcho Rochnnar zalʼlean to amkam boro vollkhota, ani Jehova jem amkam korunk sangta tem amchea borea pasot. Devachea ani amchea modem aslolo sombond ami eka ghaddiek, ani ti toiar korpeak sor korunk zata. Ti ghaddi koxi toiar kelea tem toiar korpi zannam. Vella-vellar engine-achem tel bodlunk zai mhunn to zannam. Ghaddi bori cholta hem chintun to tel bodolna zalear kitem zaunk xokta? Beginuch, engine piddʼddear zaun ghaddi bond poddttoli. Munxankui toxench zaunk xokta. Amchea rochnnaran amkam kaide dileat. Te pallʼllear amkam faideak poddtta. (Izaias 48:17, 18) Jehovache dorje amchea faideak mhunn manun ghetlear, tachea dorjeam vo kaidea pormonnem jieunk amkam anik ek karonn melltta.—Stotr 112:1.

Bible-ant Motiam Sodhum-ia

(Hosea 10:12) “Tumchech khatir promannikponn vompat, ani visvaxi mogachem pik lunvun kaddat; roinastana soddloli tumchi zomin nangrat: Sorvesporak sodunk vochpacho vell ho, magir To ietolo ani doiallaiechea nitivontponnacho tumcher paus ghaltolo.”

w05 11/15 28 ¶7

“Jehovacheo Vatto Niticheo”

⁷ Ami dhong korinastana ani nitin Jehovachi bhokti keli zalear, To amkam aplo visvaxi mog dakhoitolo. Vankddea vatten gelʼlea Israelitkarank Jehovan sanglem: “Tumchech khatir promannikponn vompat, ani visvaxi mogachem pik lunvun kaddat; roinastana soddloli tumchi zomin nangrat: Sorvesporak sodunk vochpacho vell ho, magir To ietolo ani doiallaiechea nitivontponnacho tumcher paus ghaltolo.”—Hosea 10:12.

(Hosea 11:1) “Israel bhurgo aslo tedna Hanvem tacho mog kelo, ani Mhojea putak Hanvem Ejiptantlo apoun bhair kaddlo.”

w11 8/15 10 ¶10

Te Mesiasak Ravle

¹⁰ Israelitam bhaxen, Mesiasak Ejiptantlo apoun haddlo. (Hos. 11:1) Herod razan ballkank marun uddoupacho hukum bhair kaddchea poilim eka devdutan Juzek, Mariek, ani Jezuk Ejiptant pollun vochonk sanglem. Ani thoim tim ‘Herod morosor ravlim.’ “Ejiptak thaun Mhojea putak Hanvem apoun haddlo, oxem Sorvesporan provadia vorvim sanglolem utor pallon ieunche khatir hem ghoddlem.” (Mt. 2:13-15) Aplea zolma vixim ani jivita vixim kelʼli bhasaunni ghoddon ieum-xim korunk Jezun svota kainch korunk na.

OTUMBR 30–NOVEMBR 5

DEVACHEA UTRANTLE THEVE | JOEL 1-3

“Tumche Put ani Tumcheo Dhuvo Sondex Ditolim”

(Joel 3:1, 2) “Hea uprant sogllea monxakullacher Hanv Mhozo Atmo ghaltolom. Tumche put ani tumcheo dhuvo sondex ditolim, tumchim utar piraiechim sopnam sopnetolim, tumchim tornnattim dorxonam ghetolim. Gulam dadleam ani bailancher porian tea disamnim Hanv Mhozo Atmo ghaltolom.”

w02 8/1 15 ¶4-5

“Devachim Xrextt Kortutvam” Polloun Urben Bhorlim

⁴ Povitr xokti mellʼllea uprant, Jerusalemant aslole xis vell ibadd korinastana soddvonne vixim dusreank bori khobor porgottunk lagle. Tea sokallim, thoim zomlolea lokam lagim uloun tannim porgottunk suru kelem. Tanchea hea porgottnnechea kamam udexim, atth xekddeam poilim Pethuelacho put, Joelan kelʼli bhasaunni purnn zali: “Hea uprant sogllea monxakullacher Hanv Mhozo Atmo ghaltolom. Tumche put ani tumcheo dhuvo sondex ditolim, tumchim utar piraiechim sopnam sopnetolim, tumchim tornnattim dorxonam ghetolim. Gulam dadleam ani bailancher porian tea disamnim Hanv Mhozo Atmo ghaltolom . . . Vhodd ani bhirankull Sorvesporacho Dis udeunche adim.”—Joel 1:1; 3:1, 2, 4; Itihas 2:17, 18, 20.

⁵ Tor hacho orth oso kai ki Dev David, Joel, ani Debora bhaxen fuddarachea ghoddneam vixim kollounk dadleam ani bailanchi ek pinddka toiar kortolo? Na. Kristi ‘put ani dhuvo, gulam dadle ani bailo’ bhakit kortat hacho orth, tim Jehovachea xokte udexim Jehovan aiz porian keleant ani fuddem kortolo tim “xrextt kortutvam” porgottʼttat. Tor hea toren tim sorvxoktivont Jehova vixim sakxi diupachem kam kortat. Punn, hem aikon zomean kitem kelem?—Hebrevank 1:1, 2.

jd 167 ¶4

“Lokamno, Raxttram Modem Porgott Korat”

⁴ Ho vixoi dusrea nodren polloiat. Sogle toreche lok bhakitam kortole mhunn Jehova Devan Joel provadeak eka vella vixim sanglem: “Hea uprant sogllea monxakullacher Hanv Mhozo Atmo ghaltolom. Tumche put ani tumcheo dhuvo sondex ditolim, tumchim utar piraiechim sopnam sopnetolim, tumchim tornnattim dorxonam ghetolim. Gulam dadleam ani bailancher porian tea disamnim Hanv Mhozo Atmo ghaltolom.” (Joel 3:1-2) Him utram apostl Pedrun, 33 vorsa (K.X.) Ponʼnasavea disachea Utsova vellar, Jerusalemant eka suvater zomlolea lokank lagu kelim. Ho lok tea disa Devachea povitr xokten bhoron, “Devachim xrextt kortutvam” porgottʼttalo. (Itihas 1:12-14; 2:1-4, 11, 14-21) Atam amchea kalla vixim polloum-ia. 20-avea xekddeachea survatek thaun, Joel-achi bhasaunni purnn zait asa. Dadle ani bailo, zanntte ani tornnatte aslolim obhixikt Kristanvam “Devachim xrextt kortutvam,” mhunnche sorgar stapon zalʼlea Devachea Rajeachi bori khobor porgottun ‘sondex diunk laglim.’

(Joel 3:3-5) “Mollbar ani prithumer Hanv ojapam-odbhutam korun dakhoitolom, rogot ani uzo ani dhunvrache khambe. Vhodd ani bhirankull Sorvesporacho Dis udeunche adim suriacho zatolo kallokh ani chondrimachem zatolem rogot. Sorvesporachem Nanv ghetat tea soglleank taronn melltolem. Kiteak, Sorvesporan sanglam tea pormannem, Sion Dongrar thoddim zannam vattovtolim ani Jerusaleant vanchtolo Sorvesporan apoilʼlo urlolo zomo.”

w07 10/1 13 ¶2

Joel ani Amos Pustokantle Mukhel Mudʼde

3:5—‘Jehovachea nanvan ulo marop’ mhunnttlear kitem? Devachea nanvan ulo marop mhunnttlear tachem nanv zannam zavop, tea nanvak man divop ani tem nanv aslolea Devacher patievop ani visvas dovrop.—Romkarank 10:13, 14.

Bible-ant Motiam Sodhum-ia

(Joel 2:12, 13) “Tor atam uloita to Sorvespor! upas korun, rudon korun, vilapun, sogllea tumchea kallzan Mhoje-xim portun ieiat. Tumchim vostram nhoi, punn tumchim kallzam pinzat ani Sorvespora tumchea Deva-xim portun ieiat, kiteak To movall ani doiall, vhodd sosnnikaiecho ani visvaxi mogan bhorlolo; khast lailear porian To churchurta.”

w07 10/1 13 ¶5

Joel ani Amos Pustokantle Mukhel Mudʼde

2:12, 13. Khoro poschatap kallzant thaun ieta. Hem kortana ‘tumchim vostram nhoi,’ punn ‘tumchim kallzam pinzat.’

(Joel 4:14) “Urponjincher urponji Nirnnoiachea Falkeant! Kiteak Nirnnoiachea Falkeant Sorvesporacho Dis lagim pavlo!”

w07 10/1 13 ¶3

Joel ani Amos Pustokantle Mukhel Mudʼde

4:14—‘Nirnnoiachem falkem’ mhunnchem kitem? Nirnnoiachem falkem Devacho nit korpacho zago suchoita. Judacho Raza Jehoshaphatachea disamnim, Jehovan dusmanache foujek ghuspaili ani Judak sorv bhonvtonnchea raxttram thaun salvar kelim. Jehoshaphat hea nanvacho orth ‘Jehova monsubidar.’ Taka lagon, tea zageak ‘Jehosafatachem falkem mhunnttlam.’ (Jo. 4:2, 12) Amchea disamnim, him utram oslo zago suchoitat zoim-sor Dev raxttrank ganneant dako koso mollttolo.—Prok. 19:15.