Eka-mekak Visvaxi Mog Dakhoit Ravat

1-2. Ami eka-mekak visvaxi mog kiteak dakhounk zai?

AMI eka-mekak visvaxi mog kiteak dakhounk zai? Bible-antlea Mhonnʼnneo pustokant hachim thoddim karonnam dilʼlim asat. Tantuntlea thoddea versamnim oxem sanglolem asa: “Visvaxi mog ani visvaxiponn soddun dium nakat. . . . Tednam Devachea ani munxachea nodren tuka maniotai astoli ani tuka bori zannvai asa mhunn tankam kollon ietolem.” “Visvaxi mog kortoleak mogacho inamʼ asta.” “Promannikponnan ani visvaxi mogan cholon vavurtoleak jivit mellttolem.”​—Mho. 3:3, 4, NW; 11:17; 21:21, NW.

² Tor ami visvaxi mog dakhoitat tednam, poilem mhunnttlear ami Devachea nodren moladik zatat. Dusrem, oxem kelʼlean atam amkam faido zata. Udharonnak, ami dusream sangata sodankal urta tosli ixttagot korunk pavtat. Ani tisrem, ami fuddarachim besanvam zoddunk pavtat. Ani hantuntlem ek mhunnttlear, sasnachem jivit. Tea pasot, “visvaxi mogachi ani nitichi vatt dhor,” him Jehovachim utram ami sodanch pallpachi goroz asa.​—Hos. 12:7.

3. Hea lekhant ami kitem polloitolim?

³ Hea lekhant ami char prosnanche zobab polloitolim. Ami konnank visvaxi mog dakhounk zai? Visvaxi mog koso dakhouncho, hea vixim Ruthachea pustokantlean ami kitem xikonk zata? Aiz ami visvaxi mog koso dakhounk zata? Ani visvaxi mog dakhoilolean amkam koso faido zata?

AMI KONNANK VISVAXI MOG DAKHOUNK ZAI?

4. Jehovachi dekh gheun ami konnank visvaxi mog dakhounk zata? (Marku 10:29, 30)

⁴ Aplo mog ani apli seva kortoleankuch Jehova visvaxi mog dakhoita mhunn ami fattlea lekhant polloilʼlem. (Dan. 9:4) Ani ami ‘Devachim opurbaiechim bhurgim dekhun tachi dekh gheunk’ sodhtat. (Ef. 5:1) Tor amkam amchea sobhentlea bhav-bhoinnank visvaxi mog dakhounk zai.​—Marku 10:29, 30 vachat.

5-6. Ek munis “visvaxi” asa mhunn ami kednam mhunnonk xoktat?

⁵ Visvaxi mog mhunnttlear kitem tem ami jitlea bore toren zannam zatat titleach bore toren amchea bhav-bhoinnank ami to dakhounk pavtat. Punn thoddea zannank dista ki visvaxi mog asop ani visvaxi asop mhunnttlear ekuch. Punn hanche modem kitem ontor asa tem zannam zaunk ami ek udharonn polloum-ia.

⁶ Ek munis khub temp poriant ekuch komponint kam korta zalear to tea komponik visvaxi asa oxem ami mhunnonk zata. Punn itlim vorsam kam korun pasun to tea komponi choloitolea vhoddlea patranvak ghoddie kednanch mellonk na astolo. Vo komponi pasot tannem kelʼle kaide taka ghoddie avoddnant astole. Tori astana, aplem pott bhorunk, retirement zaisor to he komponint kam korit ravta. Punn komponi pasot taka mog na. Karonn faleam taka dusrem ek borem kam mellʼllear, to hi komponi soddun voitolo.

7-8. (a) Visvaxi mog dakhounk ekleak kitem fuddem kaddtta? (b) Ruth pustoka thaun ami kitem xiktolim?

⁷ Tor ami peregraf 6-ant polloilem toxem, visvaxi asop ani visvaxi mog asop hanchea modem ontor asa. Hem amkam, Devachea lokamnim visvaxi mog koso dakhoila hantuntlean pasun kollon ieta. Udharonnak, Davida vixim chintat. Jonathanacho bapui, raza Saulu taka marunk sodhtalo tori astana Davidan Jonathanak visvaxi mog dakhoilo. Ani Jonathan moron zaitea vorsam uprant pasun tacho put, Mephibosheth-ak vo Meribbaalak tannem visvaxi mog dakhoilo. Kiteak? Karonn to Jonathanacho kallzan thaun mog kortalo. Tor visvaxi asop ani visvaxi mog asop hanchea modem hoch ontor asa.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Atam ami Ruth pustoka thaun visvaxi moga vixim anik xikom-ia. Ruth, Boaz ani Naomi thaun visvaxi moga vixim ami kitem xiktat? Ani tantuntlean xiklolim lisanvam ami sobhent koxim lagu korunk zatat tem polloum-ia.b

RUTH PUSTOKA THAUN VISVAXI MOGA VIXIM AMKAM KITEM XIKONK MELLTTA?

9. Jehova aplea add asa oxem Naomik kiteak dislem?

⁹ Ruth pustokant, amkam Naomi, tichi sun Ruth, ani Naomichea ghovacho soiro Boaz, zo ek Dev-bhirantecho munis aslo hanchea vixim vachunk melltta. Naomi Israelant ravtali. Punn thoim ek dukoll ailo tednam ti, ticho ghov ani putam sangata Moabant geli. Thoim astana, ticho ghov bhair poddlo, ani uprant tiche dogui put je tednam mhunnttlear kazar zalʼle, tevui bhair poddle. (Ruth 1:3-5; 2:1) Haka lagon Naomi khub nirax zali. Ti itli dukhi asli ki Jehova ticher add asa oxem tika dislem. Tea pasot tinnem oxem mhunnttlem: “Sorvesporan Aplo hat mhoje add ubarlo.” “Sorvpodvedaran mhojem jivit koddu kelam.” Ani tinnem oxem-i mhunnttlem: “Sorvesporan Apunn mhojer add mhonn dakhoilam ani Sorvpodvedaran mhaka khast lailea.”​—Ruth 1:13, 20, 21.

10. Naomichim utram aikon Jehovan kitem kelem?

¹⁰ Naomichim him utram aikon Jehovan tika soddun diunk na. Bodlek “zulumxai eka budvontak piso korta” mhunn zannam aslolean Jehovan tichi poristhiti somzon ghetli. (Up. 7:7) Punn apnnem tika soddun diunk na ani azunui tika modot korunk sodhta mhunn dakhoun diunk Jehovan kitem kelem? (1 Sam. 2:8) Tannem Ruthak uzar keli. Ruthan Naomik visvaxi mog dakhoilo. Nirax zaunchea bodlek, Jehova ticho azunui mog korta mhunn dakhoun diunk, mogan tinnem tika modot keli. Ami Ruthachea udharonnantlean kitem xiktat?

11. Aiz zaitim doiall bhav-bhoinnam nirax zaloleank modot korunk kiteak fuddem sortat?

¹¹ Visvaxi mog aslear ami nirax zaloleank modot korunk fuddem sortolim. Ruthan Naomik modot keli toxi aiz zaitim doiall bhav-bhoinnam herank modot kortat. Sobhent nirax aslolea bhav-bhoinnancho tim khub mog kortat dekhun apleachean zata tem soglem korun tankam modot korunk tim fuddem sortat. (Mho. 12:25; 24:10) Ani apostl Paulun pasun amkam hench korunk urba dili. Tannem mhunnttlem: “Bhezuddank [nirax zaloleank, NW] dhir diat, osoktank boll diat, soglleam sorim sosnnikaien cholat.”​—1 Tes. 5:14.

12. Nirax zalolea bhav-bhoinnank modot korunk ek ekdom bori vatt khoinchi?

¹² Nirax zalolea bhav-bhoinnank ami koxi modot korunk xoktat? Ek ekdom bori vatt mhunnttlear tim uloitat tednam tankam kan divop ani ami tancho mog kortat mhunn tankam sangop. Oxe toren ami Jehovachea moladik sevokam sangata doiall ritin vagtat tednam to amcho khub valor korta. (St. 41:1) Taka lagon Mhonnʼnneo 19:17 sangta: “Goribank adar dita to Sorvesporak usnnem dita To taka tachea vavrachi mozuri ditolo.”

13. Ruthan Orpa poros kitem vegllem kelem, ani Ruthan visvaxi mog dakhoilo mhunn ami kiteak mhunnonk zata? (Masikachem fuddlem chitr polloiat.)

¹³ Visvaxi mog mhunnttlear kitem tem anik bore toren somzonk, Naomicho ghov ani tiche dogui put bhair poddlea uprant kitem zalem tem polloum-ia. ‘Sorvespor aplea porjek bhett diun tika jevonn-khann dita,’ mhunn Naomik kollon ailem tednam ti porot aplea ganv-ghora ieunk bhair sorli ani ticheo dogui suneo tichea sangata ieunk lagleo. (Ruth 1:6) Punn vatter tin pavtti tinnem aplea dogaim sunank tanchea ghora Moabant porot vochonk sanglem. Tednam kitem zalem? “Orpa aple sasumaincho umanv gheun aplea ghorcheam-xim portoli. Punn Ruth tika chikttun ravli.” (Ruth 1:7-14) Kitem korunk zai mhunn Naomin sanglea uprant, Orpan tem kelem. Punn Ruthan kitem kelem? Ruthak zai zalear ti aplea ganv-ghora porot vochonk xoktali, punn ti Naomi sangatach ravli. (Ruth 1:16, 17) Ani hem Ruthan, apnnak korunk poddtta mhunn nhoi, punn apnnak zai aslem mhunn kelem. Hantuntlean, Naomi pasot aslolo Ruthacho visvaxi mog amkam dison ieta. Tor ami kitem xiktat?

14. (a) Rutha bhaxen aiz zaitim bhav-bhoinnam kitem kortat? (b) Hebrevank 13:16 pormonnem Devak kitem manvota?

¹⁴ Visvaxi mog aslear ami korunk zai tachea-von chodd korunk fuddem sortat. Rutha bhaxen, aizui zaitim bhav-bhoinnam tim kednanch mellonk nant tea bhav-bhoinnank pasun visvaxi mog dakhoitat. Udharonnak, ek odruxtt ghoddlam mhunn tankam kolltta tednam tim koxe toren modot korunk xoktat tem rokddinch zannam zaun ghetat ani odruxttak sampoddlolea bhav-bhoinnank modot korunk fuddem sortat. Toxench, sobhent konnakui poixeanchem unnemponn asa zalear, tankam kosli goroz asa tem zannam zaun tim tankam modot kortat. Tor poilea xekddeantlea Masedoniekaram bhaxen, tim “aple kuveti voir porian” dusreank modot kortat. (2 Kor. 8:3) Ani tannim korunk zai tachea-von chodd korunk tim fuddem sortat. Tem mhunnttlear, tim aplo vell ani apleo vostu diun gorjek sampoddlolea bhav-bhoinnank modot kortat. Hem polloun Jehova kitlo khuxal zata astolo!​—Hebrevank 13:16 vachat.

AIZ AMI VISVAXI MOG KOSO DAKHOUNK ZATA?

15-16. Ruthan soddun diunk na mhunn amkam koxem kolltta?

¹⁵ Ruthachea pustokantlean ami zaitem xikonk xoktat. Tantuntlim thoddim lisanvam ami atam polloum-ia.

¹⁶ Dusreank modot korop soddun dium nakat. Ruth Naomi sangata Judant ieunk sodhtali tednam Naomin poilim tika addailem. Punn Ruthan soddun diunk na. Tacho porinnam kitem zalo? “Apli patt soddunk Ruth toiar na tem polleun, Naomin anink zap keli na.”​—Ruth 1:15-18.

17. Niraxi asat tankam modot korop ami kiteak soddun diunchim nant?

¹⁷ Ami kitem xiktat: Niraxi asat tankam ami modot korop soddun diunchem nhoi. Ani hem korunk amkam pasiensachi goroz asa. Gorjek sampoddloli ek bhoinn ghoddie survatek amchi modot gheunk fatti sorot.c Punn amkam ticho visvaxi mog asa zalear ami tika modot korunk proitn korit ravtolim. (Gal. 6:2) Ani ek-na-ek dis ti amchi modot ghetolich mhunn ami zannant.

18. Ruthak kiteak khub vaitt dislem astolem?

¹⁸ Kallzak lavun ghenakat. Ruth ani Naomi porot Bethlehemant ailim tednam, Naomi tichea xezareank mellʼlli. Ani tinnem mhunnttlem: “Hanv bhorlolea hatamnim mhojem ghor soddun gelʼlim ani Sorvesporan mhaka ritea hatamnim mhojea ghora portun haddlea.” (Ruth 1:21) Naomichim him utram Ruthachea kallzak toplim astolim! Karonn Ruthan tika khub modot kelʼli. Ti tichea sangata roddli, tika bhuzvonn dili, ani tichea vangdda ti itli lamb vatt cholon aili. Tori astana Naomin, “Sorvesporan mhaka ritea hatamnim mhojea ghora portun haddlea,” oxem mhunnttlem. Tor apnnem kelʼlea soglea modoticho Naomin kaim valoruch korunk na mhunn Ruthak khub vaitt dislem astolem. Tori punn, ti Naomi sangatach ravli.

19. Niraxi asloleank modot korit ravonk ami kitem korunk zai?

¹⁹ Ami kitem xiktat: Niraxi aslolea eke bhoinnik modot korunk ami khub proitn kortat astolim. Tori astana ti amkam dukhounk puro. Punn ami tem amchea kallzak lavun gheunchem nhoi. Tachea bodlek, amchea bhoinnik bhuzvonn diunk amkam modot kor mhunn ami Jehova lagim magtat.​—Mho. 17:17.

20. Ruthak bhuzvonn koxi mellʼlli?

²⁰ Dusreank goroz asa tednam tankam bhuzvonn diat. Ruthan Naomik visvaxi mog dakhoilʼlo. Punn atam tika svota bhuzvonnechi goroz asli. Ani Jehovan Boazak uzar korun taka hi bhuzvonn dili. Karonn Boazan tika mhunnttlem: “Jem tunvem kitem kelai tache khatir Sorvespor tuka farik korum ani Zachea pakotteam khal asro sodunk tum aileai, To Sorvespor Israelacho Dev tuka subham mozuri dium.” Tor Boazachea hea utramnim Ruthak sarkea vellar goroz ti bhuzvonn, ani Naomichi kallji gheit ravonk ghottai dili mhunn amkam kollon ieta. Karonn Ruthan taka oxem mhunnttlem: “Tunvem dhir-boll ditolim utram uloun, tuje chakornik ghottai dili.”​—Ruth 2:12, 13.

21. Izaias 32:1, 2-a pormonnem, vhoddil kitem kortat?

²¹ Ami kitem xiktat: Ruthan Naomik koso visvaxi mog dakhoilʼlo tea vixim Boazak kollʼllem tednam tannem taka xabaski dili. Teach bhaxen, sobhentlim bhav-bhoinnam nirax zalʼleank modot kortat tednam, vhoddil tim kortat tacher dhean ditat ani tankam xabaski ditat. Oxem kelolean, hea bhav-bhoinnank dusreank modot korit ravonk urba melltta.​—Izaias 32:1, 2 vachat.

VISVAXI MOG DAKHOILOLEAN AMKAM KOSO FAIDO ZATA?

22-23. Naomin porot khuxal zaun kitem mhunnttlem, ani oxem ti kiteak mhunnonk pavli? (Stotr 136:23, 26)

²² Ruth Boazachea xetant konnsam punzaitali tednam, ek pavtti Boazan tika bhorpur mapan konnsam dilim. (Ruth 2:14-18) Ani hem polloun Naomin mhunnttlem: “Zo jiveank toso melʼleank aplea visvaxi moga thaun pois kaddina to Sorvespor tacher axirvad ghalum.” (Ruth 2:20a) Tor Naomi poilim dukhi asli tednam tinnem “Sorvpodvedaran mhaka khast lailea,” oxem mhunnttlolem. Punn atam ti khuxalkaien, “Sorvespor aplea visvaxi moga thaun pois kaddina” oxem mhunntta. Tor atam ti oxem kiteak mhunnonk pavli?

²³ Jehovan apnnak kednanch soddun diunk na mhunn Naomin vollkhon ghetlem. Aplea ganv-ghora portota tednam tannem Ruthak uzar korun apnnak tenko dilo, toxench tika ani Ruthak modot korunk tannem Boazak uzar kelo hem tika kollon ailem. (Ruth 1:16; 2:19, 20b) ‘Jehovan mhaka kednanch soddunk na. To mhojea sangatach aslo tem hanv atam somzoli,’ oxem Naomin chintlem astolem. (Stotr 136:23, 26 vachat.) Ruthan ani Boazan apnnak visvaxi mog dakhovop soddun diunk na hem zannam zaun Naomi kitli khuxal zali astoli! Ani Naomi porot khuxalkaien Jehovachi seva korunk lagli tem polloun Ruthak ani Boazak khub borem dislem astolem.

24. Amchea niraxi zalʼlea bhav-bhoinnank ami visvaxi mog kiteak dakhoit ravtat?

²⁴ Ruthachea pustokantlean visvaxi moga vixim ami kitem xiklim? Rutha bhaxen amkam visvaxi mog asa zalear amchea niraxi zalʼlea bhav-bhoinnank ami soddun diunchim nant. Punn ami tankam modot korit ravtolim. Ani hem korunk amchean zata titlo vavr ami kortolim. Toxench, jim bhav-bhoinnam dusreank visvaxi mog dakhoitat, tankam vhoddilamnim urba diunk zai. Ani oxem amchim niraxi zalʼlim bhav-bhoinnam khuxalkaien porot Jehovachi seva korunk lagtat tednam amkam khub sontos bhogta. (Itihas 20:35) Punn visvaxi mog dakhounk mukhel karonn mhunnttlear, “visvaxi mogan bhorlolo” Jehova Devachi ami dekh ghetat ani taka manta tem korunk sodhtat.​—Jo. 2:13; Dan. 9:4.