Manchi ani tache voir aslolea banner-acho laginchean kaddlolo fottu
1922—Xembor Vorsam Poilim
“DEV . . . Jezu Krista udexim . . . amkam . . . zoit dita.” (1 Kor. 15:57, King James Version) Him utram, 1922 vorsachem vers zaun aslem. Hea utram vorvim Bible Vidʼdheartheanchea visvaxiponnak lagon Jehova tankam besanvam ditolo mhunn tankam khatri mellʼlli. Ani khorench tea vorsa, hea urbebhorit porgottnnarank Jehovan besanvam dilim. Karonn tim svota zaun Bible-acher adarit prokaxonam chhapunk laglim, ani radio udexim Rajeachem sot porgottunk laglim. Uprant, Jehova tachea lokancher besanv ghalta mhunn anikui spoxtt ritin dison ailem. Karonn tednam Bible Vidʼdhearthi Cedar Point, Ohio, U.S.A.-nt, eka mhotvachea odhivexonak hajir zaunk pavlim. Ani hea odhivexona vorvim aiz pasun Jehovachea songottnnechea kamacher probhav poddla.
“EK BORI IEVZONN”
Porgottnnechem kam vaddot gelem toxem, bhav-bhoinnank anikui prokaxonanchi goroz poddli. Brooklyn Bethel-antle bhav masikam chhaptale. Punn pustokam chhapʼpachem kam korunk, te printing komponichi modot ghetale. Uprant zaite mhoine porian, porgottnnent zai aslim titlim pustokam hi printing komponi chhapunk xokona zali. Tea pasot, bhav Rutherford-an, factory-cho manager, bhav Robert Martin-ak, tannim svota zaun pustokam chhapunk zatat kai mhunn vicharlem.
Brooklyn, New York-ant asloli Concord Street factory
Hea vixim ugddas kortana, “hi ek ekdom ojapachi ievzonn asli” mhunn bhav Martin sangta. “Karonn hacho orth, ami pustokam chhapunk zata tosli ek factory ugddunk zai asli.” Tor bhavamnim Brooklyn-ant, 18 Concord Street, hanga ek zago bhaddeak ghetlo ani goroz tim sadhonam haddlim.
Punn ami svota zaun amchim pustokam chhaptolim, hem aikon zaitim zannam khuxal zaunk nant. Amchim pustokam chhapunk amkam modot kortalim tantuntle eke komponicho president amchi factory pollounk ailo tednam tannem oxem mhunnttlem: “Tumche lagim pustokam chhapunk ekdom borim sadhonam asat. Punn tim koxim uzar korchim tem tumkam ekleakui khobor na. Tor sov mhoineam bhitor, tumi hem soglem moddun uddoitolim.”
Bhav Martin-an mhunnttlem: “Tanchem chintop ghoddie sarkem aslem. Punn Jehova amkam modot kortolo mhunn ami zannam aslim. Ani tannem toxench kelem.” Bhav Martin-an mhunnttlolem tem sarkem zalem. Karonn rokddench amche nove factory-int, ami dor disa 2,000 pustokam chhapunk laglim.
Factory-nt linotype mexinam choloupi, mexina lagim ube asat
RADIO VORVIM HOZARAMNIM LOKANK BORI KHOBOR PAVLI
Pustokam chhapʼpachem kam suru kelea uprant, ami radio vorvim broadcast korun eke nove toren bori khobor porgottunk laglim. Febrer 26, 1922, hea Aitarachea donparam, bhav Rutherford-an Los Angeles, California, U.S.A.-nt, KOG radio station-a udexim poile pavtti bhaxonn dilem. Tea bhaxonnachem nanv aslem, “Millions Now Living Will Never Die.”
Sumar 25,000 lokamnim hem bhaxonn aikolem. Ani thoddeamnim chitteo boroun bhav Rutherford-acho upkar attoilo. Tantuntli ek chitt, Santa Ana, California-nt ravpi, Willard Ashford-an boroilʼli. Bhav Rutherford-an ek “khub borem ani urbebhorit” bhaxonn dilem mhunn tannem taka xabaski dili. Uprant tannem mhunnttlem: “Amchea ghorant tin duent munxam asat. Tor tunvem amchea ghora lagim ieun bhaxonn dilʼlem zalear pasun, amkam tem aikonk mellchem naslem. Punn radio vorvim bhaxonn dilolean amkam tem aikonk mellʼllem.”
Fuddlea sumanamnim, bhavan radio vorvim anikui bhaxonnam dilim. Ani vorsachea xevottak “sumar 3,00,000 lokamnim radio vorvim bori khobor aikoli” mhunn Pahrogopur-ant sanglolem.
Hea bhaxonnank lagon, bhavache upkar attounk khub chitteo aileo. Hea vorvim taka khub urba mellʼlli. Tea pasot Bible Vidʼdheartheamnim, Brooklyn Bethel-achea laginch, Staten Island-acher aslolea eka zagear, aplem svotachem radio station chalu korunk tharailem. Ani ieunchea disamnim Rajeachi bori khobor anikui lokank pavonk, WBBR, hem radio station tim uzar kortolim aslim.
“ADV”
Jun 15, 1922-achea Pahrogopur-ant, Setembr 5 tem 13 tarker, Cedar Point, Ohio-nt, ek odhivexon astolem mhunn sanglem. Bible Vidʼdhearthi thoim pavlim tednam tim khub umedin aslim.
Aplea poilea bhaxonnant, bhav Rutherford-an oxem mhunnttlem: “Jehova Dev . . . hea odhivexonacher besanv ghaltolo ani hea prithumer aplea vixim poili kednanch sakx mellonk na, title vhodd ritin sakx mellonk modot kortolo mhunn mhaka purnn khatri asa.” Tea uprant, bhaxonn ditolea dor eka bhavan, bhav-bhoinnank porgottnnechem kam korit ravonk urba dili.
1922-ant, Cedar Point, Ohio-nt zalʼlea odhivexonak hajir zalʼlo zomo
Sukrar, Setembr 8 tarker, sumar 8,000 lok auditorium-ant ektthaim zale. Bhav Rutherford-achem bhaxonn aikonk tim umedin aslim. Karonn amontronnacher aslolim “ADV,” hea utrancho orth bhav somzaitolo mhunn tim axeun aslim. Tim aplea zagear boslim tednam manchier voir, ek vhoddlo kopddo guttlailʼlo asa tem tannim polloilem. Tea vellar bhaxonnam bore toren aikonk ietat toslo zago mellop, khub kotthin aslem. Karonn tednam mike vo loudspeaker nasle. Tori astana, Tulsa, Oklahoma, U.S.A.-ntlean odhivexonak ailʼlea Arthur Claus-ak, bhaxonn bore toren aikonk ieta toslo zago mellʼllo.
“Ami dor ek utor bariksannen aikotalim”
Bhaxonna vellar konnakuch addkholl zaina zaunk, late ietat tankam auditorium-ant bhitor ieunk diunche nant mhunn chairman-an sanglem. Sokallchea sarkea 9:30 vorancher, bhav Rutherford-an Matev 4:17-nt aslolim Jezuchim utram sangon aplem bhaxonn suru kelem. Tannem mhunnttlem: “Sorginchem raj ieunchem zalem.” (King James Version) Uprant Rajeachi bori khobor soglea lokank koxi kollttoli tea vixim sangtana tannem mhunnttlem: “Jezun sanglolem ki to hajir zatolo tednam to lunvnnechem kam kortolo, ani tea vellar khorim ani visvaxi asat tankam to ektthaim kortolo.”
Hea vixim ugddas kortana bhav Claus mhunntta: “Ami dor ek utor bariksannen aikotalim.” Punn okosmat, bhav Arthur-achea jivak borem disona zalem, ani taka auditorium soddun voicho poddlo. Punn taka oxem korunk naka aslem. Karonn taka porot ieunk mellchem na mhunn to zannam aslo.
Punn thoddea vella uprant, bhav Arthur-achea jivak borem disonk laglem. Tor porot auditorium-ant ietana soglim vhoddlean talleo martat tem aikon to anikui umedin bhorlo. Ani bhav Rutherford-achem urlolem bhaxonn aikonk taka pakear choddonk poddlear pasun to toxem kortolo mhunn tannem tharailem. Tor bhav Arthur, zo tednam 23 vorsancho tornnatto aslo, tannem pakear choddonk vatt sodhli. Pakear aslolim zonelam uktim aslim. Tor bhav tea zonelam lagim pavlo tednam taka thoinchean bhaxonn “bore toren aikonk ieunk laglem,” mhunn tannem sanglem.
Punn bhav Arthur pakear ekloch naslo. Tache thodde ixtt pasun thoim asle. Tantuntlo eklo, Frank Johnson tache lagim dhanvon ailo ani taka oxem vicharlem, “Tujem lagim ek lhan suri asa?”
Bhav Arthur-an mhunnttlem, “Hoi, asa.”
Tednam Frank-an taka sanglem, “Konnachea-i lagim tori suri aslear puro mhunn ami magot asle. Tuka ho vhoddlo guttlailʼlo kopddo dista? To hea khilleank bandlolo ek banner. Neai-Korpeachema bariksannen aik. ‘Tumi kolloiat, kolloiat,’ oxem to mhunntta tednam ami ho kopddo soddunk zai.”
Tor bhav Arthur, aplea ixttam sangata suri hatant gheun, bhav Rutherford kednam tim utram mhunnttolo mhunn vatt polloitalo. Ani rokddench bhav Rutherford-an aplea bhaxonnantlim ekdom mhotvachim utram mhunnttlim. Ekdom umedin bhoron ani urbebhorit zaun tannem vhoddlea tallean oxem sanglem: “Tumi Jehovache khore ani visvaxi sakxi mhunn dakhoun diat. Khottea dhormancho purnn toren nas zaum meren, dhiran fuddem sorat. Devachea Rajeachi bori khobor soglea zagear porgott korat. Jehova ek Khoro Dev, ani Jezu razancho Raza ani dhoniancho Dhoni mhunn akʼkhea sonvsarak kollon ieunk zai. Ho itihasantlo ekdom mhotvacho vell. Polloiat, Jezu Krist Raj choloita! Hea vixim sogleank sangop tumchi zobabdari mhunn zannam zaiat. Tor Raza ani Rajea vixim sogleank kolloiat, kolloiat, kolloiat!”
Bhav Rutherford-an him utram mhunnttlim tednam tannem ani tachea ixttamnim to kopddo soddlo ani to banner bore toren denvlo mhunn bhav Arthur-an sanglem. Tor amontronnacher aslolim “ADV,”b hea utram pormonnem tea banner-acher oxem boroilʼlem aslem: “Raza ani Rajea Vixim Kolloiat.”
EK EKDOM MHOTVACHEM KAM
Cedar Point-ant zalʼlea odhivexonak lagon bhav-bhoinnank porgottnnechea mhotvachea kamacher dhean diunk modot zali. Ani zaitim zannam ap-khuxen hem kam korunk fuddem sorlim. Oklahoma, U.S.A.-ntlea eka colporteur-an (atam ami taka pioneer mhunnttat) oxem sanglem: “Ami porgottnni kortat tea vattarant choddso lok kollxeachea dholint kam kortat ani to lok khub gorib.” Tor tim Golden Age masikentlo sondex aikotalim tednam tim “roddonk lagtalim” mhunn bhavan sanglem. “Ami tankam bhuzvonn diunk xoklim mhunn ami khub khuxal” oxem tannem mhunnttlem.
Tor Bible Vidʼdheartheank, Lukas 10:2-ant Jezun mhunnttlolim utram kitlim mhotvachim tem kollon ailem. Jezun mhunnttlolem: “Pik khorench khub, punn vavraddi thodde.” Tor voros sompot ailem toxem, soglea lokank Rajea vixim porgottunk Bible Vidʼdheartheancho nichov anikui ghott zalo.
a Thodde pavtti bhav Rutherford-ak “Neai-Korpi” mhunnttale. Karonn to Missouri, U.S.A.-nt, thodde pavtti neai korpachem kam kortalo.
b “ADV” hem ‘Advertise’ hea Inglez utrak uzar kelʼlem shortform. Ani hea utracho orth, ‘porgott korat’ vo ‘sakx diat.’