Jehovacher Visvas Dovorlolean Mhaka Khori Surokxa Mellʼllea

HANV JEHOVAK VOLLKHONK ANI TACHER VISVAS DOVRUNK PAVLOM

Hanv 1948-ant, Nigeria-ntlea eka lhanxea ganvant zolmolʼlom. Tea vellar mhozo titiu Moustapha, ani vhoddlo bhav Wahabi bautizm gheun Sakxi zalʼle. Hanv nnov vorsancho astana mhozo daddy bhair poddlo. Tednam hanv samkoch tuttlom. Punn daddy amkam jivontponnant porot mellttolo mhunn Wahabi-n mhaka sanglem tednam, hanv itlo khuxal zalo ki hanvem Bible obheas suru kelo. Ani 1963-ant hanvem bautizm ghetlo. Tea uprant mhojea tin bhavamnim pasun bautizm ghetlo.

1965-ant, Lagos xarant, hanv mhozo vhoddlo bhav Wilson-a lagim gelo. Thoinchea Igbobi Sobhentlea pioneer-am sangata vell sarun, hanv khub khuxal zalom. Tanchi urba ani khuxalkai polloun, hanv pasun Janer 1968-ant niemit pioneer zalom.

Ek pavtti, Bethel-ant seva korpi bhav Albert Olugbebi-n, tornnatteam pasot ek khas mitting dovorloli. Karonn Nigeria-chea utʼtore vatten, khas pioneer-anchi goroz asa mhunn to sangonk sodhtalo. Tannem amkam kitli urba dilʼli, tem mhaka azun pasun ugddas asa. Tannem mhunnttlolem: “Tumi tornnattim asat. Tor tumi tumcho vell ani takot Jehova pasot uzar korunk zata. Karonn xet piklam!” Hanv Izaiasa bhaxen khoinsorui vochonk toiar aslom dekhun, hanvem khas pioneer seva korunk fom bhorlem.—Iz. 6:8, 9a.

May 1968-ant, mhaka Nigeria-chea utʼtore vatten aslolea Kano xarant khas pioneer mhunn seva korunk sanglo. Tea vellar, thoim Biafran Zhuz choltalem (1967-1970). Zhuzak lagon lokank khub tras sosunk poddlole, toxench zaiteancho jiv gelʼlo. Eka bhavak mhozo khub usko aslo dekhun, tannem mhaka thoim vochonaka mhunn sanglem. Punn hanvem taka mhunnttlem: “Tuka mhoji porva asa dekhun, hanv tuzo khub upkari. Punn hanvem thoim vochon seva kelʼli Jehovak zai zalear, to mhoji rakhonn kortolo mhunn mhaka purnn khatri asa!”

KANO XARANT SEVA KORTANA HANVEM JEHOVACHER VISVAS DOVORLO

Kano xarachi poristhiti ekdom bigoddloli. Porgottnni kortana, zhuzant moron gelʼlea lokanchim moddim amkam thodde pavtti dixtti poddttalim. Thoim zaiteo sobha asleo, punn choddxim bhav-bhoinnam xar soddun pollon gelʼlim. Tor thoim 15 poros unnim porgottnnaram urlolim, ani tim ekdom bhielʼlim ani niraxi zalʼlim. Punn ami sov khas pioneer-am thoim pavlim tednam, amkam polloun tim ekdom khuxal zalim. Ami tankam urba dili dekhun, tankam khub borem dislem. Thoim porot mittingo ani porgottnni suru korunk ami tankam modot keli, toxench tanche porgottnneche ripott xakhek dhaddunk ani prokaxonam order korunk dakhoilem.

Ami thoinchi Hausa bhas xikonk laglim. Tor ami lokam lagim tanchea mai-bhaxent ulounk laglim dekhun, zaitim zannam bore khobrek kan diunk toiar zalim. Punn tea xarantlea mukhel dhormachea lokank, amchem porgottnnechem kam avoddnaslem. Tor porgottnni kortana amkam chotur ravonk poddttalem. Ek pavtti ek munis suri gheun, mhojea ani mhojea borabor aslolea bhava fattlean laglo. Punn ami tachea poros fast dhanvle dekhun, ami salvar zale. Thoim dhoke asle te khore, punn Jehovan amkam “huskeavinn” jieunk modot keli, ani thoim porgottnnaranchi vaddavoll zaunk lagli. (St. 4:8) Aiz Kano xarantlea 11 sobhamnim, 500 poros chodd porgottnnaram asat.

NIGER DESANT DHUMALLEACHO FUDDO KORTANA

Kano xarant thodde mhoine seva kelea uprant, mhaka Agost 1968-ant anik don khas pioneer-am sangata Niamey-nt dhaddlo. Hem xar, Republic of Niger hachi rajdhani asli. Thoim pavtoch amkam kollon ailem ki Ostom Afrikent aslolea hea xarant sogleam-von chodd gormi zatali. Tor ami ti gormi sosunk, ani thoinchi mukhel bhas French xikonk zai asli. Punn heo oddchonneo aslear pasun, ami Jehovacher visvas dovorlo ani thoim ravtolea thoddeach porgottnnaram sangata porgottnni suru keli. Tea vellar ami Bible obheas korunk, The Truth That Leads to Eternal Life hem pustok uzar kortalim. Ani tea xarant ami itlea umedin porgottnni keli ki thoddeach vella bhitor, vachunk kollttolea dor eka munxa lagim tem pustok aslem. Itlench nhoi, thodde pavtti lok amche lagim tem magonk pasun ietalo!

Punn odhikareank Jehovachim Sakxi avoddnant mhunn amkam rokddench kollon ailem. Julay 1969-ant, tea desant sogleam-von poili sorkittachi zomat dovorloli. Thoim 20 zannam hajir aslim, ani dog zann bautizm gheunche asle. Punn zomatichea poilea disa pulis aile, ani tannim kariavoll bond keli. Te sorkittachi dekhrekh korpeak toxench khas pioneer-ank gheun pulis station-ar gele, ani ekar-ek prosn vicharunk lagle. Uprant tannim amkam dusrea disa porot ieo mhunn sanglem. Tor te amkam tras korunk xoktat mhunn amkam dubhav aslo dekhun, ami bautizmachem bhaxonn eka ghorant dovorlem, ani lipon tea dogui umedvarank eke nodint bautizm dilo.

Thoddea sumanam uprant, sorkaran mhaka ani her panch khas pioneer-ank, 48 voram bhitor Niger soddun vochonk hukum dilo. Ami hanga thaun koxem bhair sorchem tem amich polloun gheunchem mhunn tannim sanglem. Tor ami thoinchean somtech Nigeria-chea xakha ofisant gele. Ani fuddem ami khoim voichem tem bhavamnim amkam sanglem.

Mhaka Orisunbare mhunnttlolea Nigeria-chea eka lhanxea ganvant seva korunk dhaddlo. Thoim thoddixim bhav-bhoinnam aslim. Tanchea sangata mellon porgottnnent vochonk, ani Bible obheas korunk mhaka khub avoddttalem. Punn sov mhoinea uprant, mhaka xakha ofisan porot Nigeria-nt vochonk sanglo. Hem aikon survatek hanv ojap zalom, ani mhaka thoddi bhirantui disli. Punn thoinchea bhav-bhoinnank hanv porot mellonk pavtolom mhunn hanv khuxal aslom!

Hanv Niger desantlea Niamey xarant ailom. Thoim pavtoch eka disa uprant, mhaka Nigeria-ntlo ek businessman mellʼllo. Hanv ek Jehovacho Sakxi mhunn to rokddoch vollkholo, ani Bible-a vixim zaite prosn vicharunk laglo. Tor hanvem tachea sangata Bible obheas suru kelo, ani tannem aplea jivitant zaite bodlav kele. Zoxem tannem sigrett voddpachi ani chodd soro pieupachi sonvoim soddun dili, ani uprant bautizm ghetlo. Niger desachea veg-vegllea vattaramnim bhav-bhoinnam sangata porgottnni korun, ani vorsam voitat toxim sovkas-sovkas korun lok sot xikta tem polloun hanv khub khuxal zalom. Mhaka poile pavtt Niger desant dhaddlolo tednam, thoim fokot 31 Sakxi aslim. Punn mhaka thoinchean dusrea zagear dhaddlo tednam, thoim soglim mellon 69 porgottnnaram zalʼlim.

“GUINEA DESANT KAM KOXEM CHOLʼLAM TEM AMKAM KHOBOR NA”

Dezembr 1977-ant, tin sumananchea korsa pasot mhaka porot Nigeria-nt apoilo. Korsachea xevottak bhav Malcolm Vigo, zo Xakha Somiticho sohokari aslo, tannem mhaka Sierra Leone xakhe thaun ailʼli ek chitt vachunk laili. Tea chittint sanglolem ki Guinea desant sorkittachi dekhrekh mhunn seva korunk, bholaiken boro aslolo eka ankvar bhavachi goroz asa. Ani taka Inglez toxench French bhas kollonk zai. Hi zobabdari samballunk mhaka proxikxonn dilʼlem mhunn bhav Vigo-n sanglem. Punn ti samballop titlem sompem na mhunn tannem spoxtt toren sanglem, ani mhunnttlem, “Hoi mhunnchea poilim hea vixim bariksannen chint.” Tednam hanvem rokddoch oso zobab dilo: “Jehova mhaka thoim dhaddtta dekhun hanv voitolonch!”

Hanv plane-an Sierra Leone-ant pavlom, ani thoinchea xakhentlea bhavank mellʼllom. Sierra Leone xakha ofis, Guinea desantlem pasun porgottnnechea kamachi dekhrekh kortalem. Punn xakha somitintlea eka bhavan mhaka mhunnttlem: “Guinea desant kam koxem cholʼlam tem amkam khobor na.” Tea desant rajkaronnak lagon goddbodd choltalo dekhun, xakhentlea bhavank, porgottnnarank sompork korunk mellonaslo. Tannim zaite pavtti thoddea bhavank thoim dhaddunk proitn kelʼlo. Punn toxem zaunk pavonk na. Dekhun bhavamnim mhaka Guinea-chi rajdhani, Conakry-nt vochon, thoinchea sorkara thaun tea xarant ravonk porvangi magonk sanglem.

Hanv Conakry-nt pavlom tednam hanv Nigeria-chea embassy-nt gelom, ani thoinchea officer-ak mellʼllom. Hanv Guinea-nt porgottnnechem kam korunk sodhtam mhunn hanvem taka sanglem. Punn oxem kelear mhaka arrest korunk xoktat, vo mhojea jivak dhoko asonk xokta mhunn to sangonk laglo. Tannem mhunnttlem: “Portun Nigeria-nt voch ani thoim porgottnni kor.” Hanvem zobab dilo: “Hanvem Guinea desant porgottnni korcho nichov kela.” Tor tannem Guinea-che eka minister-ak chitt boroili, ani mhaka modot kor mhunn taka sanglem. Uprant hanv tea minister-ak mellʼllom, ani tannem mhaka modot keli.

Jehovachea axirvadan soglem borem zalem. Mhaka Guinea desant ravonk porvangi mellʼlli! Hanvem Sierra Leone-antlea xakha ofisant vochon thoinchea bhavank hi khobor dili ani te ekdom khuxal zale!

1978-1989 poriant, hanvem Guinea ani Sierra Leone-ant sorkittachi dekhrekh korpi mhunn, ani Liberia-nt substitute sorkittacho dekhrekh korpi mhunn seva keli. Survatek hanv zaite pavtti duent poddttalom. Ani thodde pavtti hanv ravtalom tea zagear hospital-am naslim. Torui, mhaka hospital-ant vhoronk, bhav-bhoinnam tanche lagim zata tem soglem kortalim.

Ek pavtti mhaka malaria zali, toxench pottant dont challvole, ani hanv ekdom chodd duent poddlom. Punn sovkas-sovkas korun hanv boro zalom tednam mhaka kollon ailem ki bhavank hanv vanchʼchona oxem dislem. Tor mhaka khoim purcho tea vixim te chintʼtale. Mhojea jivitant zaitem kitem ghoddlem. Punn hem soglem soddun hanv porot ghora voitolom, oxem hanvem kednanch chintunk na! Fokot Jehova Devuch amkam khori surokxa diunk xokta mhunn mhaka purnn khatri asa. Karonn ami melim zalearui, to amkam jivont korunk xokta.

MHOJE BAILEN ANI HANVEM JEHOVACHER VISVAS DOVORLO

1988-ant, hanv Dorcas-ak mellʼllom. Tem pioneer seva kortalem, Jehovacho khub mog kortalem ani khalti aslem. Ami kazar zalim, ani sangata mellon sorkittachem kam korunk laglim. Jehovache sevent, mhoji mogall bail Dorcas-an zaito vavr kela ani khub teag keleat. Thodde pavtti eke sobhe thaun dusre sobhent vochonk, ami saman gheun 25 kilometr pasun cholon voitalim. Ani anikui poixilʼlea sobhamnim provas korunk, ami jem kitem melltta tem uzar kortalim. Te roste chikott ani fondd poddlole asle.

Dorcas ekdom dhirvont pasun asa. Ek pavtti amkam panch disam pasot provas korcho aslo. Thoim vochonk, modem amkam ek nodi par korunk poddttali. Punn lakddache pul moddlole dekhun, amkam vhoddem uzar korunk poddlem. Vhoddeantlean denvtana, Dorcas udkant poddlem. Amkam dogainkui penvonk kollonaslem. Ani tea nodint manngim aslim. Punn thoinsor aslolea thoddea tornnatteamnim rokddich uddki marun taka vanchoilem. Hea ghoddnne vixim, thodde dis poriant amkam bhirankull sopnam poddttalim. Punn ami sorkittachem kam korit ravlim.

1992-achea survatek, Dorcas gorbest asa mhunn amkam kollʼllem. Ami dogaim ojap zalim! Ami atam khas pioneer mhunn seva korit ravtolim vo na, tem ami tharaunk zai aslem. Tor ami chintlem: “Jehovan amkam hem dennem dilam!” Tea pasot, ami amchea dhuvek Jahgift mhunn nanv dovorlem. Char vorsam uprant, amcho put Eric zolmolo. Amchi dhuv Jahgift-an, thoddim vorsam poriant Conakry-ntlea RTO-nt seva keli. Ani amcho put sobhecho sevok zaun asa. Khorench, amchim dogaim bhurgim Jehova koddlean dennim zaun asat!

Jehovachea modotin hanv khas pioneer mhunn seva korit ravonk pavlom. Punn Dorcas-ak thoddea vella pasot khas pioneer seva soddchi poddli. Torui, bhurgeancho samball kortana pasun, tem niemit pioneer mhunn seva kortalem. Bhurgim vaddlea uprant, Dorcas portun khas pioneer mhunn seva korunk laglem. Ani aiz ami dogaim Conakry-nt mixinori mhunn seva korit asat.

JEHOVA DEVUCH AMKAM SUROKXIT SAMBALLTTA!

Jehovachea hatant asloli suitcase koxi, to mhaka jea-jea zagear gheun gela, thoim hanv gelam. Mhoje bailen ani hanvem zaite pavtti, Jehova amkam koxe toren rakhta ani besanvam dita tem polloilem. Ami sonvsarantlea vostuncher nhoi, punn Jehovacher visvas dovorlo dekhun ami zaitea trasam thaun pois uronk pavlim. Toxench amkam gorje bhair usko zaunk na. Ani amchea onnbhovantlean, Jehova ‘amcho taronn korpi Dev’ mhunn ami xikleant. (1 It. 16:35) Tor tacher visvas dovortat tea sogleancho jiv to “surokxit samballtolo” mhunn mhaka purnn khatri asa!—1 Sam. 25:29.