‘Povitr Xokte Udexim Ekvottan Bandun Dovorta Ti Xanti Samballat’
APOSTL Paulun Efezantlea Kristanvank oxi urba dili: “Mogan eka-mekak soxit ravat. Tumkam povitr xokte udexim ekvottan bandun dovorta ti xanti samballun dovorcho purnn toren proitn korat.”—Ef. 4:2, 3.
Tor Jehovache “povitr xokte udexim” amchea modem ‘ekvott’ asa. Punn Paulun sanglem toxem ho ekvott samballunk vavr korcho poddtta. Tor ho vavr konnem korunk zai? Dor eka Kristanvan.
Hem somzonk, konnui tumkam ek novi gaddi gift dita mhunn chintat. Tor te gaddiecho samball konnem korunk zai? Ami nhoi? Punn ami tea gaddiecho sarko samball korinant dekhun ti gaddi bond poddtta zalear amkam gaddi gift dila to zobabdar zaunchona.
Teach bhaxen, Kristanvam modem aslolo ekvott Jehova Deva thaun ek dennem zaun asa. Punn to samballop amchi dor ekleachi zobabdari zaun asa. Tor khoinchea-i eka bhava vo bhoinni sangata amchi xanti piddʼddear zalear ami amkanch vicharunk zai: ‘Tea bhava vo bhoinni sangata porot xanti korunk hanv mhojean zata tem soglem kortam kai?’
XANTI SAMBALLUNK “PURNN TOREN PROITN KORAT”
Paulun jem sanglem tantuntlean xanti samballop soglech pavtti sompem aschem na mhunn kolltta. Khas korun, amcho bhav vo bhoinn amkam dukhoita tednam. Tor xanti samballop hacho orth oso kai, ki ami soglech pavtti tea bhav vo bhoinni lagim uloun tem suttavem korunk zai? Na. Ami soglech pavtti oxem korchi goroz na. Kiteak? Ami amkanch vicharunk zata: ‘Tea vixim uloilear poristhiti suttavi zatoli vo anik bigoddttoli?’ Thodde pavtti, tea vixim kainch uloinastana ami tea bhav vo bhoinnik bhogxilear vo jem kitem zalem tem soddun dilear borem zatolem.—Mho. 19:11; Mk. 11:25.
Tumkanch vicharat, ‘Hea vixim uloilear xanti samballunk modot zatoli vo poristhiti anikui bigoddttoli?’
Apostl Paulun boroilem toxem, ami sogleamnim ‘mogan eka-mekak soxit ravonk’ zai. (Ef. 4:2) Ek pustok sangta ki “mogan eka-mekak soxit ravat” him utram, “dusrim zoxim asat tea toren tankam apnnaiat,” oxim-i bhaxantor korunk zatat. Tor amchea bhaxen amchim bhav-bhoinnam pasun patki asat mhunn ami ugddas dovrunk zai. Ami “novi vagnnuk” apnnaunk proitn kortat tem khorem, punn amchea modlo konnuch ti purnn toren apnnaunk xokona. (Ef. 4:23, 24; Rom. 3:23) Hem ugddas dovorlolean eka-mekak soxit ravonk, bhogsunk ani ‘povitr xokte udexim ekvottan bandun dovorta ti xanti samballunk’ amkam anikui sompem zatolem.
Ami bhav-bhoinnancheo chuki bhogxitat ani teo soddun ditat tednam ami “ekvottan bandun dovorta ti xanti” samballttat. Efezkarank 4:3-ant, “ekvottan bandun dovorta” mhunn bhaxantor kelʼlem Grik utor, Koloskarank 2:19-ant ‘mas’ (ligament) mhunn sanglam. Hem mas don haddank zoddun dovorta. Teach bhaxen, bhav-bhoinnam amkam avoddna toxem kitem-i mhunnttat vo kortat zalear, amchi xanti toxench tanchea pasot aslolo mog amchi ixttagot ghott samballunk modot korta.
Tor ek bhav vo bhoinn amkam dukhoita vo rag haddtta toslem kitem-i korta vo mhunntta zalear, tacher ragar zaunchea bodlek ami taka somzon gheunk zai. (Kol. 3:12) Ami soglim opurnn aslolean kednam-na-kednam ami-i dusreank dukhoilam zait. Hem ugddas dovorlolean, ‘povitr xokte udexim ekvottan bandun dovorta ti xanti samballunk’ amkam modot zatoli.