Tornnatteancher Social Media-cho Vaitt Probhav Poddonk Xokta Mhunn Eka Vhodd Bholaiki Odhikarean Xittkailem—Hea Vixim Bible Kitem Sangta?

23 May 2023-ant, social media udhexim tornnatteancher vaitt porinnam zata mhunn United States-antlea eka vhodd bholaiki odhikarean sanglem.

• “Social media thaun bhurgeank ani tornnatteank ghoddiek thodde faide asot, punn hea udhexim tancher mansik ritin ani bholaikecher khub vaitt porinnam poddtta mhunn zaite purave pasun asat.”—Social Media and Youth Mental Health: The U.S. Surgeon General’s Advisory, 2023.

Ami kiteak hem zannam zaunchi goroz asa tem ho sodh amkam dakhoun dita.

• 12 to 15 vorsa modlim tornnattim “jim dor disak 3 vhoram poros chodd social media uzar kortat tanchea mansik bholaikecher vaitt porinnam zaunk chodd bhirant asa, zoxem depression ani chodduch usko korchem duens zaunk xokta.”

• 14-vorsachim-tornnattim, “chodd vhoram social media uzar kortat tednam tanchi nhid piddʼddear zata, tankam social media-cher sotaitat, apunn borim disonant mhunn tim chodd chinta kortat, apunn kainch faideachim nhoi oxem tankam dista, ani tankam depression zata. Ani hem cheddeam poros cheddvank chodd ghoddtta.”

Avoi-bapaimnim aplea bhurgeank hea dokhea thaun koxim samballunk zatat? Hea vixim Bible-ant khub faideacho solʼlo dilʼlo asa.

Avoi-bapaimnim kitem korunk zata

Bhurgim kitem kortat tacher nodor dovrat. Avoi-bapaimno, social media thaun kosle dokhe asat tem zannam zaiat ani tumchea bhurgeamnim tem uzar korunk zata vo na tem tharaiat.

• Bible-antlem totv: “Bhurgeank nitt vatt xikoi.”—Mhonnʼnneo 22:6.

• Hea vixim anik zannam zaunk, “Should My Child Use Social Media?” ho lekh vachat.

Tumi tumchea bhurgeank social media uzar korunk ditat zalear, tantunt kosle dokhe asat tem zannam zaiat ani tumchim bhurgim internet-acher kitem kortat tacher nodor dovrat. Hem tumi koxem korunk zata?

Vaitt ani pozddea vostu thaun tumchea bhurgeanchi rakhonn korat. Vaitt ani pozddeo vostu vollkhonk ani teo pois korunk tumchea bhurgeank proxikxonn diat.

• Bible-antlem totv: “Tumi onoitik kuddichea sombonda vixim ani koslea-i torechea mhelleponna vixim vo axe vixim ulounchem pasun nhoi, . . . tumchea modem lojechi vagnnuk ani murkhponnachem ulovop aschem nhoi, ani tumi burxeponnachim fokannam korchim nhoi.”—Efezkarank 5:3, 4.

• Faideacheo suchounneo mellonk, “Teaching Your Teenager Social Media Safety,” ho lekh vachat.

Thodde kaide korat. Zoxem, tumchim bhurgim kednam ani kitlo vell social media uzar kortolim tea vixim thodde kaide korat.

• Bible-antlem totv: “Tumchi vagnnuk koxi asa ti pollounk tumcher koddok nodor dovrat . . . xanneam sarkim cholat, Tumcho vell bore toren uzar korat.”—Efezkarank 5:15, 16.

• Kaide asop kiteak gorjechem tem tumchea bhurgeank somzaunk, Social-Network Uzar Korchea Vixim Chotur Ravat ho video tankam dakhoiat.