2
Bhuimkutt Hogddailem
Devacher virodh utthun ek sorgincho dut, poilea monxak ani ostorek, Adanv ani Eve-k, Devachi razpodvi nakarunk fuddem vorta. Tacho porinam mhollear patok ani moronn sonvsarant bhitor sorta
ZAITO kall Monxak rochchea adim, Devan disonant tosle atmik rochnnam rochleleo – mhonnge dev-dut. Eden bhagent ek virodhi dut, zaka Soitan vo Devchar mhonnttla, to, Devan jea rukhachem foll khainaka mhonn adnia diloli tem foll Eve-n khaunk tallnni haddta.
Ek sorop uloita oxem dakovun, Dev bori ti vost te baile ani tichea poti thaun lipoita mhonn Soitanan suchoilem. Tea dutan, Eve ani ticho poti, addvarlolem foll khailear morchinant mhonn sanglem. Hea porim, Soitanan Dev aplea sonvsari bhurgeank fottoita mhonn arop lailo. Naddpean tankam Devachem utor moddlear kherit gineanak ani svotontraiek pavoita tosli ek bori chal oxem tanchea mukhar dovorlem. Punn hem sogllem fott zavun aslem. Khoreponnim hea sonvsaracher uloilʼli hi poili fott. Devache Sorvesporponnacher vo xrextt odhikaracher khoro proxn utthlo—mhonnge Devak raz cholounk odhikar asa ani To aplo odhikar promannikponnan monxamchea faidea khatir choloitolo?
Eve-n soitanachi fott sot manʼnun ghetli. Ti tem foll anvddeunk lagli, uprant tinnem tem khalʼlem. Tea uprant tinnem aplea potikui dilem anik tannem-i tem khalʼlem. Hea porim tim patkim zalim. Tem sadem kortub khorem, pun tem ek fitturponn zavun aslem. Mudʼdomuch Devachi adnia moddun, Adanv ani Eve-n tankam sompurnn jivit ani her soglleo vostu dilʼleo tea Rochnnaracho razodhikar nakarlo.
Tem bim “tujem mostok maddoitoli ani tum tiche khonttek chabtoloi”—Utpoti 3:15
Devan tea fitturanchea korneancho hixob ghetlo. Tannem adinch kolloilem ki fuddem ek bhasailolem Bim vo Soddvonndar ieun, sorpacho mhonnge Soitanacho nas kortolo. Adanv ani Evecher mornachem formonn marunk Devan thoddo kallav kelo, tea udexim tanchea zolmank ieunk naslolea bhurgeank kaklut dakoili. Tea bhurgeank bhorvanso dovorpak ek karann aslelem kiteak zaka Dev pattouncho aslo to Eden bhagent zalʼlea sogllea fitturponnachea vaitt porinamacho xevott korcho aslo. Devan bhasailʼlo Soddvonndar konn zatolo anik to koso ietolo tem toddem-toddem korun Bibleachea survatechea boroupant dison ieta.
Devan Adanv ani Eve-k Bhuimkuttantlim bhair ghatlim. Eden bhageche bhair tankam gham golloun anik koxtt korun, zomin rovun zogchem poddlem. Uprant Eve gorbest zali ani Adanv ani Evecho poilo put Kain zolmolo. Tea zoddpeak Abel ani Seth-a bhair aninkui put-dhuvo zolmoleo. Seth Noahcho purvoz aslo.
—Utpoti avesvor 3 te 5; Prokasovnni avesvor 12:9 hacher adarlelem asa.