Adanv Ani Eve-n Devachem Aikonk Na

Ek dis Eve ekttich asli tednam ek sorop tichea lagim uloita. To tika vicharta: ‘Devan tumkam khoinchea-i zhaddanchem foll khainakat mhunnttlam?’ Eve sangta: ‘Ami soglea zhaddanchim follam khaunk zatat, fokot ek soddun. Tea zhaddachem foll khailear ami mortolim.’ Tednam sorop tika sangta: ‘Na, tumi morchimnant. Khorem munnttlear, tea zhaddachem foll khailear tumi Deva bhaxen zatolim.’ Hem khorem aslem kai? Na. Ti ek fott asli. Punn Eve-k tem khorem dislem. Jitli chodd ti tem foll polloitali titlem chodd tika tem khaum-xem distalem. Xevottak, ti tem foll khata ani thoddem aplea ghovakui dita. Adanvak khobor asli ki Devachi adnea moddlear, tim mortolim mhunn, punn toriastana Adanv tem foll khata.

Teach disak sanjer, Jehova, Adanv ani Eve lagim uloita. Apli adnea kiteak moddli tem tannem tankam vicharlem. Eve-n mhunnttlem ki tika tem sorpan kha mhunnttlem. Ani Adanvan mhunnttlem ki taka tem Eve-n dilem. Apli adnea moddli mhunn Devan tankam bagentlim bhair ghatlim ani tim portun te bagent vochona zaunk tannem tea vatter devdutank ube kele ani ek ujeachi tolvar dovorli.

Jehovan sanglem zannem Eve-k fott marli taka-i xikxa mellttoli. Punn khoreaninch sorop Eve lagim uloilo kai? Na. Karonn Jehovan sorpak ulounk xokti diunk na. Khorem mhunnttlear, tea sorpa fattlean ravon ek vaitt devdut uloitalo. To tika fosounk sodhtalo. Tea vaitt devdutak Soitan mhunnttla. Fuddarak, Jehova Soitanacho nas kortolo ani vaitt kamam korunk to lokank kednanch fosounk pavchona.