Poileo Tin Pidda

Izraelitkarank Faraoh chodd trasachem kam korunk laitalo. Dekhun Jehovan, Moizesak ani Aronak dhaddun Faraohak ho sondex dilo: ‘Mhoji bhokti korunk mhojea lokank oronnʼnneant vochonk di.’ Punn Faraoh gorvan sangta: ‘Jehova kitem sangta tem mhaka poddlolem na. Hanv Izraelitkarank vochonk diunchona.’ Tea uprant, Faraoh Izraelitkarank anikui forsan chodd trasachem kam korunk lailta. Tednam Jehova Faraohk xikxa diunk tharaita. Kosli xikxa tem tum zannam? To Ejipttacher dha pidda dhaddtta. Jehova Moizesak sangta: ‘Faraoh mhojem aikona. Faleam sokallim to Nile nodi-xim astolo. Tum thoim vochon taka sang, tannem mhojea lokank vochonk diunk na dekhun, Nile nodichem udok hanv rogtant bodoltolom.’ Moizes Jehovachem aikon Faraoh-xim voita. Faraohchea mukhar, Aron Nile nodicher boddi marta ani nodichem soglem udok rogot zata. Tea udkak vas marunk lagta. Tantuntlim soglim nustim mortat ani nodichem ilem-xem udok pasun pieupa sarkem urona. Torui Faraoh Izraelitkarank vochonk dina.

Sat disam uprant, Jehova Moizesak Faraoh-xim porot dhaddun sangta: ‘Tum mhojea lokank dhaddina zalear, hanv akʼkhem Ejiptt bebeamnim bhortolom.’ Aron apli boddi ubarta tednam, akʼkho des bebeamnim bhoronk lagta. Lokanchea ghorant, bed-ancher, aidonamnim ani sogle kodden bebech-bebe astat. Hem polloun, Faraoh Moizesak sangta ki hem soglem bond kor mhunn Jehova lagim mag. Ani toxem kelear apunn Izraelitkarank soddttolo mhunn to promise korta. Tednam Jehova ti pidda bond korta. Soglea melolea bebeank Ejipttkar ektthaim kortat ani sogleak tancheo raxeo poddttat. Akʼkhea desant kuslolo vas ieunk lagta. Punn Faraoh apli bhas moddtta ani to lokank dhaddunk toiar zaina.

Uprant Jehova Moizesak sangta: ‘Aronan apli boddi zomnir marunk zai, ani matiechim kimsam zatolim.’ Aron oxem kortanch, sogleak kimsam bhortat. Hem polloun Faraohcho lok taka mhunntta: ‘Hi pidda Deva koddleanuch ailea.’ Punn torui Faraoh Izraelitkarank vochonk dina.