Dhavi Pidda

Moizes Faraohk promise korta ki to taka porot mellonk ieunchona. Punn voichea poilim to Faraohk sangta: ‘Aiz modle ratik Ejipttantle sogle poile put mortole. Faraohcho put toxench chakranche put pasun mortole.’

Jehova Izraelitkarank ek khas jevonn korunk sangta. Tannem sanglem: ‘Eka vorsacho ek menddro vo ek bokddo marat. Ani tachem rogot tumchea daranchea donui vattamnim laiat. Tachem mas bhazat ani khomir (fug) naslolea unddeam borabor khaiat. Uprant, nheson ani zotim ghalun bhair soronk toiar ravat. Aiche ratik, hanv tumkam soddoitolom.’ Hem aikon tim kitlim khuxal zalim astolim nhoi!

Modle ratik, Jehovacho ek devdut Ejipttachea dor ek ghorant voita. Jea ghorachea darachea donui vatten rogot lavunk naslem, tea ghorantlo poilo put morta. Punn jea ghorancher rogot lailʼlem, tea ghorant devdut kainch korina. Hea toren, Ejipttachea dor ek familint, tim girest vo gorib zaum tancho poilo bhurgo morta. Punn Israelitkaranchem ekui bhurgem moronk na.

Faraohcho put pasun morta. Tednam Faraoh Izraelitkarank dhaddunk toiar zata. To rokddoch Moizesak ani Aronak sangta: ‘Hanga sorlean vochat. Vochat, ani tumchea Devachi bhokti korat. Tumchea zonvarank pasun gheun vochat!’

Xekim, Izraelitkaranchi suttka zali. Izraelitkaram Ejiptta thaun bhair sorlim tea ratik akʼkho chondrim dixtti poddttalo. Dor ek famil, aplea kullachea loka sangata manddavollin bhair sortat. Izraelitkaram modem 6,00,000 dadle, tea bhair tancheo bailo ani bhurgim aslim. Toxench, zaite her lok pasun bhair sortat. Karonn, te-ui Jehovachi bhokti korunk sodhtale!

Jehovan tankam Ejiptta thaun koxim soddoilim, tem ugddas dovrunk tannim tem khas jevonn dor vorsak korunk zai aslem. Tea jevnnak, Paskanchem jevonn mhunnttale.