Uprant Ailoleo Sov Pidda

Devan kitem mhunnttlam tem Moizes ani Aron Faraohk ieun sangtat: ‘Tum mhojea lokank vochonk dina zalear, hanv akʼkho des musamnim bhortolom.’ Gorib toxech girest Ejipttkaranchea ghoramnim, musanchem bhirem ieunk laglem. Akʼkho des musamnim bhorlo. Punn Goshen-ant, zoim Izraelitkaram ravtalim thoim ek pasun mus ieunk na. Hi ani urloleo pidda fokot Ejipttkarancheruch aileo. Faraoh sangta: ‘Please, Jehovak hi pidda kadd mhunn sang, tednam tumi sogleamnim vochonk zata.’ Punn Jehovan hi pidda kaddlea uprant, Faraoh Izraelitkarank vochonk dina. Kednam tori Faraoh Izraelitkarank vochonk ditolo mhunn tuka dista?

Jehova sangta: ‘Faraoh zor mhojea lokank dhaddina zalear, Ejipttkaranchim zonvaram duent zaun mortolim.’ Dusrea disak toxench zata. Ejipttkaranchim zonvaram moronk lagtat. Punn Izraelitkaranchea zonvarank kainch zaina. Torui Faraoh hottʼttiponnam korta. Ani to Izraelitkarank dhaddunk sodhina.

Uprant Jehovan, Moizesak sanglem ki tannem Faraohchea mukhar vochon varear gobor marcho. Tannem toxem kelem tednam, tea gobrachi dhulʼl zata. Hi dhulʼl Ejipttkaranchea lokancher ani zonvarancher poddta. Tednam tanchea angak fodd futttat ani tankam khub tras zatat. Toriastana, Faraoh Izraelitkarank dhaddunk toiar zaina.

Jehovan Moizesak porot Faraoh-xim dhaddlo ani oxem sanglem: ‘Tum azunui mhojea lokank dhaddunk fattim sorta? Polloi! Faleam tujea desant hanv korveancho pavs dhaddttam.’ Dusrea disak, Jehovan korveancho pavs, goddgodd ani uzo dhaddlo. Ejipttant oslem bhirankull vaddoll poilim kednanch ieunk na. Hea vadollant soglim zhaddam ani xetam kabar zatat. Punn Goshen-ant, oxem kainch zaunk na. Tednam Faraohn sanglem: ‘Please, Jehovak hem vadoll thambounk sang! Ani hanv tumkam dhaddttolom.’ Punn korveancho pavs thamblea uprant pasun, Faraoh tankam dhaddina.

Uprant Moizesan sanglem: ‘Vadollant jim zhaddam kabar zaunk nant tim atam toll ieun khaun uddoitole.’ Lakʼkhamnim toll aile ani tannim xetant ani zhaddancher jem kitem urlolem tem khaun kabar kelem. Faraohn vinoti keli: ‘Please, Jehovak he toll kaddunk lai.’ Jehova toll kaddta. Punn uprant Faraoh Izraelitkarank vochonk dina.

Jehovan Moizesak sanglem: ‘Tuzo hat mollba vatten voir kadd.’ Oxem kortanch, mollob ekdom kallem zalem. Tin dis Ejipttkarancher kallokh poddlo. Te kitench vo konnakuch pollounk xoklenant. Fokot Izraelitkaranchea ghoramnim uzvadd aslo.

Faraohn Moizesak sanglem: ‘Tunvem ani tujea lokamnim vochonk zata. Punn tumchea zonvarank vhoronakat.’ Moizesan sanglem: ‘Amkam amchim zonvaram gheun vochonk zai. Karonn, tednanch ami tim Devak bhettounk xoktolim.’ Faraoh ekdom ragar zalo. Tannem bovall marun sanglem: ‘Hanga thaun voch! Tum mhaka porot dislo zalear hanv tuzo jiv kaddttolom.’