Jehova Joshuak Vinchun Kaddtta

Moizesan zaitim vorsam Izrael raxttrak vatt dakhoili, atam to morpacho asa. Jehova taka sangta: ‘Tum Izraelitkarank Bhasailʼlea Desant gheun voichona. Punn hanv tuka to des pollounk ditolom.’ Moizes Jehovak ek novo fuddari vinchun kaddunk sangta, zo lokanchi kallji ghetolo. Jehova taka sangta: ‘Joshua lagim voch ani taka sang ki taka hanvem vinchun kaddla.’

Moizesan Izrael raxttrak sanglem ki to morpacho asa ani tankam Bhasailʼlea Desant vhoronk Jehovan Joshuak vinchun kaddla. Uprant, Moizes Joshuak sangta: ‘Tum bhienaka. Jehova tuka modot kortolo.’ Magir rokddoch, Moizes Nebo nanvachea dongrar voita. Thoim Jehova taka Abraham, Izak, ani Jakobak Bhasailʼlo Des dakhoita. Uprant Moizes morta. To tednam 120 vorsancho aslo.

Jehovan Joshuak sanglem: ‘Jordan nodi par korun Kanan desant voch. Tum bhienaka, punn dhir dhor. Hanvem Moizesak modot kelea, toxich tuka-i kortolom. Tum dor disa chukonastana mhozo Kaido vach. Ani hanvem tuka adnea dilea toxench vochon kor.’

Joshuan don bhediank Jeriko xarant dhaddle. Thoim kitem zalem tem ami fuddlea lisanvant zannam zatolim. Te bhedi porot ailea uprant tannim Joshuak kolloilem ki to vell Kanan desant bhitor soronk ekdom boro asa. Dusrea disak, Joshua Israel raxttrak sangta ki tannim aplem samonn bandun toiar ravchem. Uprant, to korarachi ark-pett vhortolea iadnikank sangta ki tannim sogleant poilim ti ark-pett gheun Jordan nodi lagim voichem. Ti nodi ekdom bhoron vhanvtali. Punn jednam iadnikamnim aple paim udkant dovorle, nodi vhanvpachi bond zali ani udok suklem! Iadnik cholon nodichea ekdom modem vochon ube ravle. Akʼkhem Izrael raxttr nodi par korta mhunnosor te thoinch ravle. Hem vizmit polloun Izraelitkarank, Jehovan tambddea doria lagim kelʼlea vizmitacho ugddas ailo astolo oxem tuka dista?

Xevttak, zaitea vorsam uprant Izraelitkar Bhasailʼlea Desant pavtat. Atam tim thoim ghoram ani xaram bandunk xoktat. Tim xetam, drakxanche molle ani dusre torechim follanchim zhaddam rovunk xoktat. Ho khorench dudh ani mhonv vhanvta toslo des aslo.