Bara Bhedi

Izraelitkar Sinai dongrar thaun bhair sortat. Te Paran-achea oronnʼnneantlean Kadesh mhunnttat thoim pavtat. Thoim Jehova Moizesak sangta: ‘12 munxank dhadd, dor eka kullantlo, ek munis vinch ani oxem korun tankam lipon Kanan des pollounk dhadd. Karonn ho des hanv Izraelitkarank diuncho asam.’ Oslea munxank bhedi mhunnttat. Tor Moizes 12 munxank vinchun kaddtta ani tankam sangta: ‘Kanan desant vochat ani tanchi zomin xet rovunk bori asa zalear polloiat. Thoincho lok oskot vo bollixtt asa zalear polloiat. Toxench, tim tombumnim ravtat vo xaramnim ravtat tem-ui polloiat.’ Te 12 bhedi Kanan desant vochonk bhair sortat, tanchea modem Joshua ani Kaleb asat.

40 disam uprant te bhedi porot ietat. Te aplea borabor anjiram, dallmam ani drakxam gheun ietat. Te bhedi sangtat: ‘Tanchi zomin bori asa, punn to lok khub bollixtt ani tanchea xarank khub vhodd vontteo asat.’ Tednam Kaleb sangta: ‘Ami tankam harounk xoktat. Ami atanch iea!’ Kaleb oxem kiteak mhunntta tem tum zannam? Karonn taka ani Joshuak, Jehovacher visvas aslo. Punn urlole dha bhedi mhunnttat: ‘Na! Te lok amchea poros khub vhodd asat. Te rakes koxe asat! Ami tanchea mukhar toll koxe asat.’

Tea dha bhedianchim utram aikon Izraelitkar niraxi zatat. Te gunngunnonk lagtat ani ekamekak mhunnttat: ‘Ami thoim vochon kiteak morchem? Ami ek dusro fuddari vinchun kaddum-ia ani Ejipttant porot vochom-ia.’ Tednam Joshua ani Kaleb mhunnttat: ‘Jehovachi adnea moddinakat. To amchi rakhonn kortolo. Dekhun bhienakat.’ Punn Izraelitkar tanchem ekui utor kanar ghenant. Te Joshua ani Kalebak jivexim marunk pasun fuddem sortat!

Tednam Jehovan kitem kelem? Tannem Moizesak mhunnttlem: ‘Hanvem Izraelitkaram pasot zaitem kelem, punn toriastana tim mhojem aikonant. Dekhun 40 vorsam porian tim hea oronnʼnneant urtolim ani hangach mortolim. Hanv fokot tanchea bhurgeank, Joshuak ani Kalebak tea desant vhortolom, zo des tankam diunk hanvem bhasailam.’