LISANV 45
Razvottkeche Don Bhag Zatat
Solomon Jehovachi bhokti kortalo, tea meren Izraelant xanti asli. Uprant Solomon dusrea desantlea bailam lagim kazar zalo, jim murti-puza kortalim. Sovkas-sovkas korun Solomon bodolʼlo ani to-ui murti-puza korunk laglo. Hem polloun, Jehovak khub rag ailo ani tannem Solomonak sanglem: ‘Tujea hatantli hanv hi razvottki kaddun ghetolom ani tache don bhag kortolom. Vhoddlo bhag tujea sevokak ditolom ani lhan bhag tuka urtolo.’
Jehovan aplo nirnnoi spoxtt toren anik ek ritin dakhoun dilo. Solomonacho eklo sevok, Jeroboam, vatter astana taka provadi Ahija melltta. Ahija aplo kopddo pinzun tache 12 kuddke korta ani Jeroboamak sangta: ‘Jehova Solomonachea famili thaun Izraelachem raj kaddun ghetolo ani tache don bhag kortolo. He dha kuddke tum ghe, karonn tum hea dha kullancher raj kortolo.’ Hea vixim Raza Solomonak kollon ailem tednam to Jeroboamak jivexim marunk sodhta! Dekhun Jeroboam Ejipttak pollon voita. Thoddea tempan Solomon morta, tednam tacho put Rehoboam raza zata. Atam Jeroboamak dista ki tachea jivak dhoko na, dekhun to Izraelant porot ieta.
Izraelache vhoddil Rehoboamak sangtat: ‘Tunvem lokank boreponn dakhoilear, te tuka sodanch visvaxi ravtole.’ Punn Rehoboamache tornnatte ixtt taka sangtat: ‘Tum lokam lagim krur toren vag! Tanchem kam anikui kotthin kor!’ Rehoboam tache tornnatte ixtt sangtat toxem korta. To lokam lagim krur toren vagta, dekhun tim tache add voitat. Dha kullancher tannim Jeroboamak raza kelo ani hea kullank Izraelachem raj mhunnonk lagle. Ani urlolea don kullank Judachem raj mhunnonk lagle ani him Rehoboamak visvaxi ravlim. Hea toren, Izraelachea 12 kullanche don bhag zatat.
Jeroboamak aplea lokamnim bhokti korunk Jeruzalemant gelolim naka aslem. Kiteak tem tum zannam? Karonn thoim Rehoboam raj choloitalo ani taka bhirant asli ki lok taka soddun Rehoboamachea fattlean voitolo. Dekhun to bhangarache don paddkule korta ani lokank sangta: ‘Jeruzalem khub pois asa, tor tumi hangach bhokti korunk zata.’ Lok tea paddkuleachi puza korunk lagtat ani Jehovak porot visortat.
“Onbhavartheam lagim sangat zoddum nakat. Karonn nitivontponnacho khotteponna lagim kitem sombond asa? . . . Vo eka bhavarthea ani onbhavarthea modem kitem-i ek-sarkem asa?”—2 Korintkarank 6:14, 15