Te Murte Mukhar Paim-am Poddonk Nant

Raza Nebukadnezarak tea imajichem sopon poddlea uprant, thoddea vellan tannem bhangarachi ek vhoddli murti bandli. Ti tannem Dura nanvachea moidanar ubi keli. Ani aplea desantlea mhotvachea lokank te murte mukhar ektthaim zaunk sanglem. Tanche modem Shadrak, Meshak, ani Abednego, pasun asle. Razan hukum dilo: ‘Tumi trumpet, harp ani her vazontorancho avaz aikotanch tea murtea mukhar paim-am poddonk zai. Zo konn oxem korina, taka ujeachea khornant uddoitole.’ Tor, te tin Hebrevkar te murte mukhar paim-am poddttole kai vo te fokot Jehovachi seva kortole?

Razan vazontoram vazounk hukum dilo tednam, soglim murte mukhar paim-am poddlim. Punn Shadrak, Meshak, ani Abednegon toxe korunk na. Hem thoddea munxamnim polloilem ani vochon razak sanglem: ‘Te tin Hebrevkar tunvem kelʼlea murtechi puza korinant.’ Tednam Nebukadnezaran tea tegank apoile ani tankam mhunnttlem: ‘Hea murtechi puza korunk hanv tumkam anik ek sondhi ditam. Tumi toxem korinant zalear, hanv tumkam ujeachea khornant uddoitolom. Sonvsarant oso konnuch dev na, zo tumkam mhojea hatantlean vanchounk xokta.’ Tednam tannim oso zobab dilo: ‘Amkam anik sondhi naka. Amcho Dev amkam vanchounk xokta. To amkam vachoina zalear pasun ami tuje murtechi puza korchenant.’

Hem aikon Nebukadnezarak khub rag ailo. Tannem aplea munxank sanglem: ‘Khornacho uzo anik sat pavtti gorom korat!’ Uprant tannem aplea soinikank hukum dilo: ‘Hea munxank bandat ani tankam ujeant uddoiat!’ Tem khorn itlem gorom aslem ki soinik thoim pavtanch mele. Te tin Hebrev ujeachea khornant poddle. Punn Nebukadnezaran bhitor polloile tednam tin munxanchea bodlek, char munis tea khornant choltat te taka dislem. To bhielo ani tannem aplea odhikareank vicharlem: ‘Ami fokot tinuch munxank ujeant uddoilʼle nhoi? Punn mhaka char zann dixtti poddttat, ani tantuntlo eklo devdut koso dista!’

Nebukadnezaran khorna lagim vochon ulo marlo: ‘Bhov Vortea Devachea sevokamno, bhair ieiat!’ Shadrak, Meshak ani Abednegocher ujeacho kainch porinnam zaunk na tem polloun, thoim aslolim soglim ojap zalim. Tanchi kat, kens ani tanche kopdde pasun lasonk na. Ani tankam ujeacho vas pasun ienaslo.

Tednam Nebukadnezaran mhunnttlem: ‘Shadrak, Meshak ani Abednegocho Dev khub vorto asa. Tannem aplea devdutank dhaddun tankam salvar kele. Tanchea Deva sarko anik dev na.’

Tujea jivitant kosle-i tras ailear, hea tin Hebrevkaram bhaxen tunvem Jehovak visvaxi ravonk nichov kela kai?