Daniel Xinvanchea Dholint

Babilonacho anik ek raza aslo, zachem nanv Darius aslem. To ek Mediekar aslo. Daniel dusream poros khub huxar asa mhunn tannem polloilʼlem. Dekhun desachea soglea odhikaream voir tannem taka mukheli mhunn nemlo. He odhikari Danielachi nattkai kortale ani taka jivexim marunk sodhtale. Daniel disak tin pavtti Jehova lagim magnnem korta mhunn tankam khobor asli. Dekhun te Dariusak sangtat: ‘Amche raza, ek oslo kaido asonk zai ki lokamnim tuka soddun konnakuch magnnem korchem nhoi, ani konnui oxem korina zalear taka xinvanchea dholint uddouncho.’ Dariusak hem manvolem ani oxem korunk tannem kaideachea panacher sign keli.

Razan kelʼlo novo kaido aikotanch, Daniel rokddoch aplea ghora voita ani uktea zonela mukhar dimbi ghalun Jehovak magnnem korta. Nattkaien bhorlole te munis, Danielachea ghorant bhitor sortat ani to magnnem korta tem polloitat. Uprant, te dhanvon vochon Dariusak sangtat: ‘Daniel tuzo kaido pallina. To sodanch aplea Devak disak tin pavtti magnnem korta.’ Darius Danielak boro kortalo, ani to taka jivexim marunk sodhinaslo. Dekhun, Danielak koso salvar korcho tea vixim to dis-bhor chintit ravta. Punn ekdam kaideacher sign keli mhunnttoch, razan pasun to kaido bodlunk zainaslo ani dekhun Danielak bhirankull xinvanchea dholint uddounk taka aplea munxank hukum diuncho poddtta.

Dariusak tacho itlo husko zata ki taka ratbhor nhid poddona. Dusrea sokallim to dhanvon dholixim voita ani mottʼttean ulo marta: ‘Daniel, tujea Devan tuji rakhonn keli?’

Dariusan ek avaz aikolo. To Danielacho avaz aslo! Tannem Dariusak sanglem: ‘Jehovachea devdutan xinvanchim tonddam bond kelim ani tannim mhaka kainch korunk na.’ Darius ekdom khuxal zalo! Tannem Danielak tea dholintlo bhair kaddunk hukum dilo. Danielachea kuddir xinvanchi ek nakxi pasun lagonk nasli. Uprant razan hukum dilo: ‘Jea munxamnim Danielacher arop ghatlolo tankam dholint uddoiat.’ Tea munxank dholint uddoitanch, xinvamnim tankam pinzun khaile.

Dariusan aplea lokank hukum dilo: ‘Sogleamnim Danielachea Devachi bhirant dhorunk zai. Tannem Danielak xinvanchea tonddantlean vanchoila.’

Daniela bhaxen tum-ui dor disak Jehovak magnnem korta kai?