Tumkam Tumchea Bible Vachpantlean Anik Faido Koso Mellonk Xokta?

1. Devachea Utrantlim versam Jezuk mhotvachim aslim mhunn koxem kolltta?

JEZU dusreank xikoitalo tednam tachem aikonk lokank koxem distalem astolem tea vixim chintat. Taka Devachea Utrantlim versam tonddpatt aslim, ani dusreank xikoitana to zaite pavtti tim uzar kortalo. Bautizm ghetlea uprant tannem mhunnttlolim survatechim utram, ani morchea adim tannem mhunnttlolim nimannim utram Devachea Utra thaun aslim.b (D.S. 8:3; St. 31:5; Luk. 4:4; 23:46) Ani Jezun sadde tin vorsam porian hea prithumer porgottnni keli tednam, lokank xikoitana tannem zaite pavtti Devachea Utrantlim versam vachlim, tancho ulʼlekh kelo ani tanchi somzonni dili.—Mt. 5:17, 18, 21, 22, 27, 28; Luk. 4:16-20.

2. Jezu vaddlo toso Devachea Utrachi bori somzonni mellonk taka koxi modot zali? (Masikachem fuddlem chitr polloiat.)

² Jezun apli porgottnni suru korchea khub vorsam poilim, tannem zaite pavtti Devachem Utor vachlem ani aikolem. Zoxem ghorant astana, Juze ani Marie sodanch aplea famili lagim Devachea Utra vixim uloitalim tednam Jezu tem aikotalo mhunn kainch dubhav na.c (D.S. 6:6, 7) Toxench, to dor eka Sabathachea disa aplea famili sangata sobha-ghorant voitalo mhunn ami khatren mhunnonk zata. (Luk. 4:16) Thoim astana, Devachea Utrantlean vachtalim tem Jezu bariksannen aikotalo. Ani vell soron gelo toso, to pasun svota zaun tem vachunk xiklo. Hea toren Jezuk Devachea Utrachi bori somzonni mellonk pavli. Udharonnak, 12 vorsanche piraier Jezu Devmondirant aslo tednam Kaideanchi bori vollokh aslole dhormik xikxok, ‘tachi somzopachi tank ani tache zobab aikon ojap zale.’ Tea bhair, Jezu Devachea Utracho mog kortalo ani to tea pormonnem jielo.—Luk. 2:46, 47, 52.

3. Hea lekhant ami kitem polloitolim?

³ Ami pasun chukonastana Devachem Utor vachlem zalear amkam tachi anik somzonni mellttoli, ani ami tacho anikui mog korunk pavtolim. Tor Devachea Utrant ami vachtat tacho anik faido ami koso melloun gheunk zata? Hem amkam, Jezun Kaide zannam aslolea munxank kitem mhunnttlem tantuntlean kollon ieta. Hea munxam modem xastri, Farizev ani Saduki mellon asle. He dhormik fuddari zaite pavtti Kaide vachtale. Punn te vachtat tantuntlean tankam kainch faido zainaslo. Tor tankam kiteak faido zaunk na tea vixim Jezun tin mudʼde sangle, jea vorvim amkam (1) Devachea Utrant ami vachtat tem somzonk, (2) tantunt moladik theve sodhunk, ani (3) Devachea Utrak amchea jivitant bodlav korunk diunk modot zatoli. Hea toren, hea tinui vattamnim ami sudharnni korunk pavtolim.

SOMZONNI MELLONK VACHAT

4. Lukas 10:25-29-antlean, Bible vachpa vixim ami kitem xiktat?

⁴ Devachem Utor ami vachtat tednam ami tem somzonk sodhtat. Na zalear, amkam tantuntlean purnn toren faido zaunchona. ‘Kaide bore bhaxen zannam aslolo ek munis,’ ani Jezu modem kitem ulovop zalem tea vixim chintat. (Lukas 10:25-29 vachat.) Sasnik jivit melloun gheunk tannem kitem korunk zai, mhunn tea munxan Jezuk vicharlem tednam tacho zobab Devachea Utrantlean sodhunk Jezun taka modot keli. Jezun taka vicharlem: “Kaideant kitem boroilam? Tunvem kitem vachlam?” Devacho ani xezareacho mog korchea vixim aslolea versancho ulʼlekh korun tannem sarko zobab dilo. (Lev. 19:18; D.S. 6:5) Punn fuddem tannem kitem mhunnttlem tantuntlean, tannem vachlolem tacho khoro orth taka somzonk na mhunn ami zannam zatat. Karonn tannem Jezuk oxem vicharlem: “Mhozo khoro xezari konn?” Hantuntlean, to kitem vachtalo tem tachea jivitant koxem apnnaunchem tem to noko aslo mhunn amkam kollon ieta.

5. Magnnem kelolean ani sovkas vachlolean, ami vachtat tem anik bore toren somzonk amkam koxi modot zatoli?

⁵ Bible vachtana ami thoddeo boreo sonvoim-o vaddounk zatat, jea vorvim Devachem Utor anik bore toren somzonk amkam modot zaunk xokta. Tor ami kitem korunk zata? Bible vachunk suru korchea poilim magnnem korat. Karonn Bible-ant boroilam tem somzonk amkam Jehovachi modot zai. Tor ami vachtat tacher dhean diunk ami Jehova lagim tachi povitr xokti magonk zai. Uprant, ami soddsoddit nhoi, punn sovkas vachunk zai. Oxem kelolean, ami vachtat tem somzonk pavtolim. Ami vhoddlean vachunk zata, vo Bible-achem audio rekordding aikotana amchea Bible-ant aslolea utrancher dhean diunk zata. Oxem kelolean tem somzonk, ugddas dovrunk, ani tantuntlean xikonk amkam modot zatoli. (Josh. 1:8) Ani amchem vachop somplea uprant, ami porot magnnem korun Jehovachea Utra pasot tache upkar attounk zatat ani ami vachlam tem apnnaunk modot magonk zata.

6. Bible vachtat tednam amkanch prosn vicharlolean ani notes ghetlolean amkam koxi modot zatoli? (Chitr pasun polloiat.)

⁶ Bible-achi bori somzonni mellonk ami anik kitem korunk zata? Ami kitem vachtat tea vixim ami amkanch prosn vicharunk zatat. Bible-antli ek umkich ghoddnni vachtana tumkanch vicharat: ‘Hantunt konna vixim sanglam? Hanga konn uloita? To konna sangata uloita, ani kiteak? Hi ghoddnni khoim ani kednam ghoddtta?’ Osle prosn vicharlolean ami vachtat tea vixim chintunk, ani mukhel mudʼde somzonk amkam modot zatoli. Toxench, ami vachtat tache ami lhan-lhan notes gheunk zatat. Notes ghetlolean ami vachlam tea vixim anikui chintunk, tem anik bore toren somzonk, ani tem ugddas dovrunk amkam modot zatoli. Tor ami kosle notes boroun dovrunk zatat? Amkam aslole prosn, sodh korun amkam mellʼlloli mahiti, mukhel mudʼde, ami vachlam tem ami koxem lagu korunk zata, vo tea vixim amkam koxem bhogta tem ami boroun dovrunk zata. Oxem kelolean, Devan aplem Utor amchea dor eklea pasot boroilam mhunn pollounk amkam modot zatoli.

7. Bible vachtana amkam kitem asop gorjechem, ani kiteak? (Matev 24:15)

⁷ Matev 24:15 vachat. Hanga Jezun sanglolea utrantlean, Bible vachʼche vixim amkam anik kitem tori kollon ieta. Jezun mhunnttlolem: “Vachnnarean somzon gheunchem.” Hacho orth kitem? Bible-ant kitem-i vachtana, thoim spoxtt ritin sangonk nant tea vostum vixim pasun ami chintunk zata. Toxench, ami vachtat to Bible-antlo ek vixoi, dusrea eka vixoi-a sangata koso zuddlolo asa vo dusrea eka vixoi-a poros koso vegllo asa tem somzonk ami proitn korunk zai. Itlench nhoi, Jezun sanglolea pormonnem, Bible-antli ek bhasaunni koxe toren ghoddon ieta tem zannam zaunk amkam somjikaiechi goroz asa. Khorem mhunnttlear, ami Bible-ant jem kitem vachtat tantuntlean purnn faido zaunk amkam somjikai asop ekdom mhotvachem.

8. Ami Bible-ant vachtat tachi anik bori somzonni amkam koxi mellonk xokta?

⁸ Jehova aplea sevokank somjikai dita. Tor tache lagim magnnem korun ho gunn vaddounk tachi modot magat. (Mho. 2:6) Toxench, tumchea magnnea pormonnem kam korat. Hem tumi koxem korunk zata? Tumi kitem vachtat tea vixim bariksannen chintat, ani tumi zannant teo her vostu hea vixoi-ak koxeo zuddloleo asat tacher dhean diat. Bible xikonk modot kortat toslim sadhonam uzar korat. Zoxem, Research Guide for Jehovah’s Witnesses. Bible-antlo ek umkoch vixoi somzonk ani tumi tem tumchea jivitant koxem apnnaunk zata tem zannam zaunk him sadhonam tumkam modot kortolim. (Heb. 5:14) Hea toren Bible vachtana tumi bariksannen chintʼtat zalear tumchi somzonni anik vaddttoli.

MOLADIK THEVE SODHUNK VACHAT

9. Sadukeamnim Devachea Utrant aslolem khoinchem mhotvachem sot manun gheunk na?

⁹ Saduki, Hebrev Bhaxen Boroilʼlea Pustokanchim poilim panch pustokam ekdom bore bhaxen zannam asle. Punn Devachea preronnan boroilʼlea hea pustokamnim aslolim mhotvachim sotam tem manun ghenasle. Udharonnak, tannim Jezuk meloleanchea jivontponna vixim prosn vicharlo tednam Jezun tankam oxem vicharlem: “Moizesachea pustokant jhilkutta lagim Devan kitem mhunnttlolem tem tumi vachunk na? Tannem mhunnttlolem: ‘Hanv Abrahamacho Dev, Izakacho Dev ani Jakobacho Dev.’” (Mk. 12:18, 26) Tor Sadukeamnim hi ghoddnni khub pavtti vachloli zalear pasun, tantunt meloleanchea jivontponna vixim aslolem mhotvachem sot tannim manun gheunk na mhunn, Jezun tankam vicharlolea prosna thaun amkam kollon ieta.—Mk. 12:27; Luk. 20:38.d

10. Bible vachtana ami kiteacher dhean diunk zai?

¹⁰ Amche khatir kitem lisanv asa? Bible vachtana, umkench vers vo ghoddnne thaun amkam kitem xikonk melltta tea sogleacher ami dhean diunk sodhtat. Bible-antlim mullavim sotanch nhoi, punn thevea sarkim lipon aslolim kholaiechim sotam ani totvam pasun ami somzonk proitn kortat.

11. Bible-antle moladik theve sodhunk, tumi 2 Timotak 3:16, 17 koso uzar korunk zata?

¹¹ Bible vachtana amkam moladik theve koxe mellonk xoktat? Hea vixim 2 Timotak 3:16, 17-nt, kitem sanglam tem polloiat. (Vachat.) Thoim, “sogllem Povitr Pustok” (1) xikounn diunk, (2) chuki kaddun dakhounk, (3) nittaier haddunk, ani (4) xist diunk “upkarta” mhunn sanglam. Ami choddxe pavtti uzar korinant tea Bible-antlea pustokantlean pasun amkam he charui faide mellonk xoktat. Tumi vachtat ti umkich ghoddnni, Jehova, tacho udʼdhex vo tannem dilʼlea totvam vixim kitem xikoita tea vixim bariksannen chintat. Toxench, tim versam chuki kaddun dakhounk koxim upkartolim tem polloiat. Oxem korunk, him versam vaitt sobhav vollkhonk ani pois korunk, toxench Jehovak visvaxi ravonk tumkam koxim modot kortolim tacher dhean diat. Tea bhair, chukichem chintop nittaier haddunk, zoxem amkam porgottnnent melltta tea konnui ekleachem chintop chukichem asa zalear tem sarkem korunk tim versam amkam koxim modot korunk xoktat tea vixim bariksannen chintat. Toxench, Jehova chintʼta tea pormonnem chintunk tea versantlean amkam koxi xist melltta tem polloiat. He charui faide ugddas dovorlolean tumkam moladik theve mellttole, jea udexim tumchea Bible vachpantlean tumkam anikui faido mellttolo.

JIVITANT BODLAV KORUNK VACHAT

12. Jezun Farizevank oxem kiteak vicharlem: “Tumi vachunk na?”

¹² Farizev, Devachem Utor sarko irado dovrun vachinasle. Ek pavtti, Jezun ani tachea xisamnim Sabathacho dis pallunk na oxem Farizevamnim mhunnttlem. Tednam Jezun tankam vicharlem: “Tumi vachunk na?” (Mt. 12:1-7)e Jezun Devachea Utrantlim don udharonnam, ani Hosea pustokantlea eka versacho ulʼlekh korun tankam zobab dilo. Tor Devachem Utor vachun Farizev aplea jivitant bodlav kiteak korunk pavonk nant? Karonn te khalti nasle ani te dusreancheo chukeo kaddunk lagon vachtale. Hea pasot, te vachtale tachi somzonni tankam mellonasli.—Mt. 23:23; Ju. 5:39, 40.

13. Ami koslo irado dovrun Bible vachunk zai, ani kiteak?

¹³ Ami sarko irado dovrun Bible vachunk zai. Hem amkam, Jezun Farizevank sanglolea utrantlean kollon ieta. Farizevam bhaxen zaunchea bodlek, ami khaltim ani xikonk toiar asonk zai. Devan amchea kallzant ‘vomplam tem utor khaltikaien ami manun gheunk zai.’ (Jak. 1:21) Ami khaltim asat zalear Devachea Utra pormonnem amchea jivitant bodlav korunk toiar astolim. Toxench, kakut, doia-maia ani moga vixim aslolim Bible-antlim lisanvam ami apnnaunk pavtolim.

14. Devachea Utra pormonnem ami amchea jivitant bodlav kortat vo na tem koxem kollon ieta? (Chitram pasun polloiat.)

¹⁴ Ami dusream sangata koxe toren vagtat tantuntlean, ami Devachea Utra pormonnem bodlav kortat kai na tem kollon ieta. Farizevamnim oxem korunk na. Tea pasot, ‘guneanvkari nant tankam pasun tannim guneanvkari tharaile.’ (Mt. 12:7) Teach bhaxen, ami dusream vixim kitem chintʼtat ani dusream sangata koxe toren vagtat, tantuntlean ami Devachea Utra pormonnem amchea jivitant bodlav kela kai na tem ami zannam zaunk pavtolim. Udharonnak, amkam dusreanchea borea gunnancher dhean diunchi sonvoim asa kai, vo amkam rokddinch tanchim unnemponnam dison ietat? Ami dusreank doia dakhoun tankam bhogsunk toiar astat, vo tancheo chuki kaddun tancho rag gheun bostat? Hea toren ami amchich choukoxi kelolean, amchea chintnancher, bhavnancher ani vagnnukecher ami vachtat tacho probhav ami poddonk ditat vo na tem kollon ietolem.—1 Tim. 4:12, 15; Heb. 4:12.

DEVACHEM UTOR VACHLOLEAN TUMKAM KHUXALKAI MELLTTOLI

15. Devachea Utra vixim Jezuk koxem bhogtalem?

¹⁵ Jezuk Devachea Utracho khub mog aslo. Ani hea vixim Stotr 40:8-ant pasun bhasaunni kelʼli. Thoim oxem boroilam: “Tuje khuxek hanvem pallo diuncho mhonn Deva mhojea, sogllea mhojea kallzan Tuje Somurticho hanv mog kortam!” Tor Jezuk Devachea Utracho mog aslo dekhun to khuxal aslo ani Jehovachi seva korit ravonk pavlo. Teach bhaxen, ami pasun Devachem Utor vachlear ani tacho mog korunk xiklear ami khuxal astolim ani Jehovachi seva korit ravonk pavtolim.—St. 1:1-3.

16. Tumchea Bible vachpantlean anik faido melloun gheunk tumi kitem korunk sodhtat? (“Tumi Vachtat Tem Somzonk Jezuchim Utram Tumkam Modot Korunk Xoktat,” hem boks polloiat.)

¹⁶ Jezun jem xikoilem ani tannem ji dekh dovorli, tea vorvim Bible vachpachi amchi kola anikui vaddoum-ia. Bible-ant sanglam tem anik bore toren somzonk ami magnnem korum-ia, soddsoddit nhoi punn sovkas vachum-ia, amkanch prosn vicharum-ia, ani lhan-lhan notes gheum-ia. Toxench, Bible-acher adarit aslolea prokaxonanche modotin ami kitem vachtat tea vixim bariksannem chintum-ia. Oxe toren ami somjikai dakhoum-ia. Tea bhair, Bible-antlim versam ani amkam titli khobor na toslea Bible-antlea ghoddnneam vixim aslole liplole theve sodhun, ami Bible anik bore toren uzar korunk xikom-ia. Toxench, Devachem Utor sarko irado dovrun vachun, tea pormonnem amchea jivitant bodlav korunk proitn korum-ia. Oxem korunk amchean zata tem soglem ami kortat tednam Bible vachpantlean ami anikui faido melloun gheunk pavtolim ani Jehovak anikui lagim sortolim.—St. 119:17, 18; Jak. 4:8.