Zhuzacho Bhirankull Porinnam
Zhuzam ani hinvsek lagon lokancher khub vaitt porinnam zata. Ani hea vixim sonvsarbhorchea soinikank ani zhuzank lagon tras zalʼlea nagrikank sarki khobor asa.
SOINIK
“Dor disa amchea bhonvtonnim lok gombhir ritin zokhmi zatat vo mortat. Taka lagon, amchem-i sovem oxench kitem ghoddttolem mhunn amchem monant soglo vell bhirant asta.”—Gary, Britain.
“Mhojea tonddak ani fattik gullio lagloleo ani mhojea dolleam mukhar zaitea lokank, bhurgeank toxench zanntteank jivexim marlole. Te lok tollmolltat ani mortat tem polloun-polloun kalliz fatra sarke nibor zata ani uprant kallzak koslench dukh bhogona.”—Wilmar, Colombia.
“Tumchem dolleam mukhar konnacherui gulli marlear tumi tem kednanch visronk xokonant. Tim roddttat ani vollvolltat tem porot-porot tumchea dolleam mukhar ieta. Ani tem visrop khub kotthin.”—Zafirah, United States.
NAGRIK
“Mhojea jivitantlim khuxalkai nanch zalʼli. Fokot urli ti mhunnttlear bhirant. Mhaka bhirant asli ki mhozo jiv kednam-i vochonk xokta. Punn tachea poros chodd mhojea ghorcheancho ani ixttancho jiv vochot mhunn mhaka bhirant asli.”—Oleksandra, Ukraine.
“Amkam 20-a poros chodd voram jevnnak lagon line-int ravchem poddttalem. Ani hea vellar khoincheanui amkam gulli ieun lagot mhunn bhirant asli.”—Daler, Tajikistan.
“Mhojim avoi-bapui zhuzant meli. Tor, mhoji kallji gheunk, mhozo mog korunk ani mhaka bhuzvonn diunk konnuch naslo.”—Marie, Rwanda.
Hem khorem ki hea lokank zhuzam ani hinvsek lagon zaite tras sosunk poddleat. Punn uprant tankam monachi xanti mellʼlli ani sonvsarant cholta tim soglim zhuzam ani hinvsa beginuch kabar zatolim mhunn khatri mellʼlli. Hi khatri tankam koxi mellʼlli? Pahrogopur masikechea hea ank-ant amkam hachi Bible-a thaun zap mellttolim.