Zhuz Ani Hinvsa Aslearui Xanti Koxi Mellonk Xokta?
“Gary zo poilo ek fouji aslolo to mhunntta, “Sonvsarant itle dukh-tras ani onʼneai kiteak asa, lok itle nixttur kiteak asat tem mhaka poilim khobor nasli. Punn hanv Bible xikonk laglo tednam mhaka hea soglea prosnanche zobab mellʼlle. Hanv hem-ui xiklom ki Jehova Dev beginuch sonvsarantle sogle dukh-tras kaddun uddoitolo ani tednam amkam koslich bhirant aschina, dekhun atam mhaka monachi xanti mellʼllea.”
Gary bhaxen anikui lokank Bible-antlean modot mellʼllea. Tantuntlim thoddim zannam kitem mhunnttat tem polloum-ia.
BIBLE SANGTA: “Tum Jehova boro ani bhogsunk toiar asa.”—Stotr 86:5, NW.
KOXI MODOT ZATA? “Hea versantlean Jehova ek doiall Dev mhunn mhaka khatri zali. Dekhun, poilim hanvem zhuzant bhag gheun jem kitem kelʼlem taka lagon Jehova mhaka bhogxitolo mhunn hanv zannam.”—Wilmar, Colombia.
BIBLE SANGTA: “Hanv novem mollob ani novi prithum rochtam, ani adleo vostu porot monant ieuncheonant, teo amchea kallzant pasun ieuncheonant.”—Izaias 65:17.
KOXI MODOT ZATA? “Zaite pavtti mhaka usko zata ani bhirankull sopnam poddttat. Karonn hanv poilem foujent aslem ani zhuzant bhag ghetlolean mhaka post-traumatic stress disorder (PTSD) ani depression zalʼlem. Punn hea versantlean mhaka bhuzvonn melltta ki Jehova beginuch mhojeo heo vaitt iadi kaddun uddoitolo ani tim mhaka porot kednanch sotaichimnant. Hanv tea vellachi axeun vatt polloitam!”—Zafirah, United States.
BIBLE SANGTA: “Tachea kallar vostolim promannikponn ani xanti: chondrim aso-sor xekanxek tim togtolim.”—Stotr 72:7.
KOXI MODOT ZATA? “Hanv sodanch hea utrancher niall kortam. Beginuch soglim zhuzam kabar zatolim ani tankam lagon zo vaitt porinnam zata to-ui aschona. Tednam amkam vo amchea ghorcheank kitem-i vaitt zait mhunn bhirant aschina.”—Oleksandra, Ukraine.
BIBLE SANGTA: “Tuje lok je meleat te uttʼtthole. . . . Tumi je dhulʼlint asat, Utthat ani khuxalkaien bob marat!”—Izaias 26:19.
KOXI MODOT ZATA? “Dusre zatichea lokamnim Tutsi zatichea lokank jivexim marle tednam, mhojea familintlea choddxea zannancho jiv gelo. Punn tim porot jivont zatolim mhunn mhaka hea versantlean bhorvonso mellʼllo. Tankam porot mellonk ani tancho avaz aikonk hanv axeun ravtam!”—Marie, Rwanda.
BIBLE SANGTA: “Matso rav noxtte monis nanch zatole. . . . Punn Des zatolo khaltea monxancho ani sogllech vatten tankam xantin jieunk melltolem.”—Stotr 37:10, 11.
KOXI MODOT ZATA? “Zhuz kabar zalem tem khorem, punn azunui vaitt lok asat ani onʼneai zata. Punn hea versantlean mhaka dhir mellʼlla. Jehovache nodrent kainch liplolem na ani mhaka koxem bhogta tem to khub bore bhaxen somzota mhunn hanv zannam zalom. Tannem bhas dilea ki to amche sogle dukh-tras kaddun uddoitolo ani te amchea ugddasak-ui ieuchenant.”—Daler, Tajikistan.
Hea masikent zannim aplo onnbhov sangla, tim soglim Jehovachim Sakxi zaun asat. Oxem lakʼkhamnim Jehovachea Sakxeank Bible-a thaun xanti mellʼllea. Tannim zat-kat, raxttr, kull vo her karonnak lagon dusreancho dves korop soddun dila. (Efezkarank 4:31, 32) Jehovache Sakxi rajkaronnant konnanchich bazu ghenant ani tim koslech torechi hinvsa korinant.—Juanv 18:36.
Tea bhair, sonvsarbhor aslolim Jehovachim Sakxi ek famil koxi zaun asa. Tim eka-mekacho mog kortat ani gorje vellar eka-mekak pavtat. (Juanv 13:35) Ukraine desant zhuz suru zalem tednam, Oleksandra, zachea vixim ami poilem vachlolem tika tichea bhoinni borabor des soddun voichem poddlem tea vella vixim ti sangta: “Ami border par korun dusre desant pavlim tednam thoinchim Jehovachim Sakxi amkam ieukar diunk ailolim. Ani tanchea modotik lagon ami eka porkea desant aslearui thoim ravonk amkam sompem zalem.”
Ami tumkam amche mittingek ieunk kallzant thaun ieukar ditat. Aiz tumkam monachi xanti koxi mellonk xokta? Ani fuddarak sonvsarbhor xanti koxi astoli? Tea vixim tumkam thoim xikonk mellttolem. Tumkam lagim poddtta to zago sodhunk jw.org website-ir vochat. Vo eka Jehovachea Sakxea lagim Sasnak Khuxalkaien Jieiat! hea pustikechea adaran Bible funkott xikonk amchea website-ir fom bhorat.