Jehovachem Nanv—Jezuk Kitlem Mhotvachem?

1-2. (a) Jezun morchea adlea rati kitem kelem? (b) Hea lekhant ami khoinchea prosnanche zobab polloitolim?

33 K.X.-ant, Nisan 14 tarker, Brestara sanjechea vellar, Jezu aplea visvaxi apostlam sangata Somiachem Sanjechem Jevonn jevlo. Ani rokddoch Judas tacho ghat ghetolo ani tache dusman vollvollaun taka jivexim martole mhunn Jezuk khobor asli. Tea pasot jevnna uprant, Jezun aplea apostlank zaiteo urbebhorit vostu sangleo ani thoinchean bhair soron voichea poilim tannem ek ekdom mhotvachem magnnem kelem. Tem magnnem aiz amkam Juanv odheai 17-nt vachunk melltta.

² Tea magnneantlean Jezuk tea vellar kosle uske asle mhunn kolltta? Ani Jezu prithumer astana taka sogleam-von mhotvachem kitem aslem mhunn kolltta? Hea prosnanche zobab amkam hea lekhant mellttole.

“HANVEM TANKAM TUJEM NANV KOLLOILAM”

3. Jezun aplea magnneant kitem mhunnttlem, ani oxem mhunnon to kitem sangonk sodhtalo? (Juanv 17:​6, 26)

³ Jezun aplea magnneant oxem mhunnttlem: “Hanvem tankam tujem nanv kolloilam.” Khorem mhunnttlear, Jezun aplea xisank Devachem nanv kollit kelam mhunn don pavtti sanglem. (Juanv 17:6, 26 vachat.) Tor to kitem sangonk sodhtalo? Devachem nanv Jehova mhunn tannem aplea xisank sanglem kai? Na. Jezuche xis Judev asle dekhun Devachem nanv Jehova mhunn tankam poilim thaunuch khobor asli. Karonn tem nanv Hebrev Bhaxent Boroilʼlea Pustokamnim hozaramnim pavtti boroilʼlem aslem. Tor Jezun “hanvem tankam tujem nanv kolloilam” oxem mhunnttlem tednam, Jehova koslo Dev zaun asa tem tannem somzailem. Toxench, hea prithume pasot ani munxam pasot Jehovacho udʼdhex kitem asa, tannem kitem-kitem kelam, to fuddarak kitem kortolo ani taka kosle gunn asat, hem Jezun aplea xisank sanglem. Ani hem sangonk Jezuch purto aslo, karonn fokot toch Jehovak ekdom bore bhaxen vollkhota.

4-5. (a) Eka munxachem nanv amkam anikui moladik koxem zaunk xokta? Ek udharonn diun somzaiat. (b) Jezuchea xisank Jehovachem nanv anikui moladik koxem zalem?

⁴ Hem somzonk hea vixim chintat. Tumche sobhent David nanvacho ek vhoddil asa zo dotor asa. Tumi taka zaitea vorsam thaun vollkhotat. Punn ek dis tumcho jiv dhokeant asa dekhun, bhav David kam korta tea hospital-ant tumkam admit kortat, ani toch tumcho jiv salvar korta. Tor atam thaun tachea pasot tumcho mog anikui vaddttolo nhoi? Ani tachem nanv aikotat title-i pavtti tannem tumchea pasot kitem kelam tem tumchea ugddasak ietolem nhoi? Karonn atam bhav David tumchea pasot ek vhoddiluch nhoi, punn tumcho jiv salvar kelo to dotor pasun zaun asa.

⁵ Teach bhaxen, Jezuche xis poilim thaunuch Jehovachem nanv zannam asle. Punn Jezun porgottnni korun Jehovak anikui bariksannen zannam zaunk tankam modot keli tednam, tem nanv tankam moladik zalem. Ami oxem kiteak mhunnonk zata? Karonn Jezun utramnim ani korneamnim purnn toren aplea Bapachi dekh ghetli. Tor tannem jea toren xikoilem ani to dusream sangata jea toren vaglo tem aplea dolleamnim polloilem tednam, tim Jehovak anikui bore toren “vollkhonk” pavlim.—Ju. 14:9; 17:3.

“TUNVEM MHAKA DILAM TEA TUJEA NANVA PASOT”

6. Jehovan Jezuk aplem nanv dilam hacho orth kitem? (Juanv 17:​11, 12)

⁶ Jezun aplea xisam khatir oxem magnnem kelem: “Tunvem mhaka dilam tea tujea nanva pasot tancho samball kor.” (Juanv 17:11, 12 vachat.) Oxem sangon Jehova hem aplem nanv zatolem mhunn Jezu sangonk sodhtalo kai? Na. Dhean diat, Jezun thoim “tujea nanva pasot” oxem mhunnttlam. Tor Jehova hem Jezuchem nanv zaunk na. Toxem zalear, “tunvem mhaka dilam tea tujea nanva pasot,” oxem Jezun kiteak mhunnttlem? Poilem, Jehovan Jezuk aplea pasot ulounk dhaddlolo. To Jehovachea nanvan ailʼlo ani tea nanvan tannem zaitim vizmitam kelʼlim. (Ju. 5:43; 10:25) Toxench, Jezuchea nanvacho orth mhunnttlear, “Jehova Taronn Dita.” Hea vorvim Jezuchea nanvak Jehovachem nanv zuddlolem asa mhunn kolltta.

7. Jezu Jehova pasot kiteak ulounk xoklo? Ek udharonn diat.

⁷ Jezu Jehova pasot ulounk xoklo hem somzonk ami ek udharonn polloum-ia. Ek odhikari aplea pasot ulounk eka munxak dhaddunk xokta. Tor tea munxak pasun odhikareak asta titloch odhikar asta. Teach bhaxen, Jehova pasot ulounk Jezuk odhikar aslo. Karonn Jehovan taka dhaddlolo.—Mt. 21:9; Luk. 13:35.

8. Jezu hea prithumer ieunchea poilim pasun tachea “sovem” Jehovachem nanv koxem aslem? (Suttka 23:​20, 21)

⁸ Jehova devdutank ani munxank diunk sodhtalo te sondex ani nirdexon tannem Jezu udexim dilem. Hea pasot Bible-ant Jezuk “Xobd” mhunnttla. (Ju. 1:1-3) Ani Izraelitkaram oronnʼnneant aslim tednam, tanchi kallji gheunk Jehovan jea devdutak uzar kelʼlo, to chodd korun Jezu aslo. Karonn tea devdutachem aik mhunn Jehovan Izraelitkarank sanglea uprant tannem oxem mhunnttlem: “Kiteak tache sovem Mhojem Nanv asa.”a (Suttka 23:20, 21 vachat.) Jehovan oxem mhunnonk karonn mhunnttlear, Jezu Jehova pasot uloita ani Jehova korta tem soglem sarkem ani to povitr mhunn mukhel zaun, Jezu puravo dita.

“BAPA, TUJEA NANVACHI MHOIMA KOR”

9. Jezuk Jehovachem nanv kitlem mhotvachem aslem? Somzaiat.

⁹ Ami polloilem toxem, Jezu hea prithumer ieunchea poilim pasun Jehovachem nanv taka khub mhotvachem aslem. Ani to prithumer ailea uprant Jehovachem nanv taka kitlem mhotvachem asa tem tannem apnnem kelʼlea soglea kamam vorvim dakhoilem. Tachi seva sompot aili tednam tannem oxem mhunnttlem: “Bapa, tujea nanvachi mhoima kor.” Rokddoch sorgar thaun tachea Bapan taka vhodd avazan oxem sanglem: “Hanvem tachi mhoima kelea ani porot kortolom.”—Ju. 12:28.

10-11. (a) Jezun Jehovachea nanvak mhoima koxi dili? (Chitr pasun polloiat.) (b) Jehovachem nanv povitr kiteak korunk zai ani tachea nanvak laglolo dag kiteak kaddunk zai?

¹⁰ Jezun pasun aplea Bapachea nanvak mhoima dili. Koxi? Tannem Jehovache gunn ani tachea ojapachea kamam vixim dusreank sanglem. Hachea bhair, tannem anik kitem tori mhotvachem kelem. Jehovan soglem sarkem tem kelʼlem ani tachem nanv povitr mhunn Jezun dakhoun dilem. Oxem korop kitlem mhotvachem tem Jezun aplea xisank xikoilʼlea magnnea vorvim kollon ieta. Tannem mhunnttlem: “Amchea Bapa sorginchea, tujem nanv povitr zaum.”—Mt. 6:9.

¹¹ Tor Jehovachem nanv povitr kiteak korunk zai ani tachea nanvak laglolo dag kiteak kaddunk zai? Karonn Eden bagent Soitanan Jehovachem nanv piddʼddear kelem. Jehova fottkiro ani taka Adanv ani Evechem kainch borem zalʼlem naka mhunn Soitanan khotto arop ghatlo. (Ut. 3:1-5) Oxem sangon Jehova raz-odhikar cholounk purto na hem to sangonk sodhtalo. Uprant, munis mogak lagon nhoi, punn axek lagon Jehovachi seva korta ani kotthin poristhitint to tachi seva korop bond kortolo mhunn tannem Jobachea disamnim sanglem. (Job 1:9-11; 2:5a) Tor konn khoreponnim fottkiro, Jehova vo Soitan, hem dakhounk vellachi goroz asli.

“HANV MHOZO JIV DITAM”

12. Jezuk Jehovachea nanvacho mog aslo dekhun to kitem korunk toiar aslo?

¹² Jezu Jehovacho mog kortalo dekhun, Jehovachem nanv povitr korunk ani tachea nanvak laglolo dag kaddunk to apleachean zata tem soglem korunk toiar aslo. Tannem mhunnttlem: “Hanv mhozo jiv ditam.” (Ju. 10:17, 18) Jehovachea nanva pasot to aplo jiv bolidan korunk pasun toiar aslo.b Jehovan rochlolim poripurnn munxam, Adanv ani Even, tachi adnea moddli ani Soitanak sangat dilo. Punn Jezu tanchea bhaxen naslo. To ap-khuxen hea prithumer ailo ani utramnim ani korneamnim apunn Jehovacho kitlo mog korta tem tannem dakhoilem. (Heb. 4:15; 5:7-10) Trasanchea khambear moro poriant to Jehovak visvaxi ravlo. (Heb. 12:2) Oxe toren, to Jehovacho ani tachea nanvacho khub mog korta mhunn tannem puravo dilo.

13. Soitan fottkiro mhunn dakhounk Jezu sogleam-von purto kiteak aslo? (Chitr pasun polloiat.)

¹³ Jehova nhoi, punn Soitan fottkiro mhunn Jezun aplea soglea kamamnim dakhoilem. (Ju. 8:44) Dusrea konnachea-i poros Jezu Jehovak bore toren vollkhotalo. Tor Soitanan Jehovacher ghatlolo arop mat legun khoro aslo zalear, Jezuk tea vixim khobor astoli asli. Punn Soitan fottkiro mhunn to zannam aslo dekhun, tannem Jehovachi bazu ghetli ani tachem nanv povitr korit ravlo. Ani Jehovan taka soddla oxem dislear pasun, Jezu aplea mogall Bapak visvaxi ravlo ani tachea nanva pasot aplo jiv pasun bolidan korunk toiar zalo.—Mt. 27:46.c

‘TUNVEM MHAKA DILAM TEM KAM HANVEM PURNN KELEM’

14. Jezuchea visvaxiponnak lagon Jehovan taka kitem inam dilo?

¹⁴ Apunn morchea adlea rati Jezu oxem mhunnonk xoklo: ‘Tunvem mhaka dilam tem kam hanvem purnn kelem.’ Aplea visvaxiponnak lagon Jehova apleak inam ditolo mhunn Jezuk khatri asli. (Ju. 17:4, 5) Ani Jehovan toxench kelem. Tannem Jezuk fonddantuch dovrunk na. (D.I. 2:23, 24) Tannem Jezuk jivont kelo ani sorgar ek vhodd podvi dili. (Filp. 2:8, 9) Uprant taka aplea Rajeacho Raza kelo. Hea Rajea vorvim kitem zaunk pavtolem? Jezun xikoilʼlea magnneachea dusrea bhagant oxem sanglam: “Tujem Raj ieum. Tuji [Jehovachi] khuxi sorgar zata, toxi sonvsarant zaum.”—Mt. 6:10.

15. Jezu anik kitem kortolo?

¹⁵ Jezu beginuch Jehovachea dusmana add zhuz kortolo ani Armageddonachea zhuzant noxtteank kabar korun uddoitolo. (Prok. 16:14, 16; 19:11-16) Tea uprant rokddoch to Soitanak “patallant” uddoitolo ani Soitan thoim kainch korunk xokchona. (Prok. 20:1-3) Magir Jezu ek hozar vorsam raz choloitolo ani hea prithumer xanti haddttolo toxench soglea munxank poripurnn zaunk modot kortolo. To meloleank jivont kortolo ani hi akʼkhi prithum ek sobit bag kortolo. Hea toren Jehovacho udʼdhex purnn zatolo!—Prok. 21:1-4.

16. Jezuchea Ek Hozar Vorsanchea Razvottkechea xevottak kitem zatolem?

¹⁶ Jezuchea Ek Hozar Vorsanchea Razvottkechea xevottak kitem zatolem? Patok anik aschem na. Tea pasot soddvonnechea adarit amkam patkanchem bhogsonnem magonk anik poddchem na. Toxench, modestichi ani iadnikanchi pasun amkam goroz poddchina. Ani “nimanno dusman,” mhunnche mornnacho nas zatolo. Toxench melʼlim munxam jivont zatolim ani hea prithumer aslolim soglim poripurnn zatolim.—1 Kor. 15:25, 26.

17-18. (a) Ek Hozar Vorsanchea Razvottkechea xevottak kitem zatolem? (b) Jezucho raz cholouncho vell somplea uprant to kitem kortolo? (1 Korintkarank 15:​24, 28) (Chitr pasun polloiat.)

¹⁷ Ek Hozar Vorsanchea Razvottkechea xevottak kitem tori khas zatolem. Jehova povitr ani neai korpi Dev mhunn konnuch anik kednanch dubhavcho na. Kiteak? Soitanan Eden bagent khotto arop ghatlolo ki Jehova fottkiro ani to munxancher mogan raz choloina. Punn tednam thaun atam meren, jim Jehovak resped ditat tannim porot-porot Jehovachem nanv povitr kelam. Tor Ek Hozar Vorsanchea Razvottkechea xevottak, Jehovachea nanvak laglolo dag samkoch pusun voitolo. Ani to ek mogall sorgincho Bap mhunn sogleank purnn toren puravo mellttolo.

¹⁸ Ek Hozar Vorsanchea Razvottkechea xevottak sogleank kollon ietolem ki Soitanan Jehova vixim sogleo fotti sangloleo. Jezucho raz cholouncho vell somplea uprant to kitem kortolo? Soitana bhaxen to Jehovachea add voitolo kai? Na! (1 Korintkarank 15:24, 28 vachat.) Jezu raz-odhikar porot aplea Bapak ditolo. Ani to svota zaun Jehovachea raz-odhikara adhin ravtolo. Hoi, Jezu hem soglem kortolo karonn to Jehovacho khub mog korta.

19. Jezuk Jehovachem nanv kitlem mhotvachem asa?

¹⁹ Jehovan Jezuk aplem nanv diun ekdom sarkem kelem. Karonn Jezun poripurnn toren aplea Bapachi dekh ghetli. Taka Jehovachem nanv kitlem mhotvachem asa? Her kitea-i poros Jehovachem nanv Jezuk sogleam-von chodd mhotvachem asa. Tea nanva pasot to aplo jiv bolidan korunk toiar zalo. Ani fuddarak tachi Ek Hozar Vorsanchi Razvottki cholouncho vell somplea uprant, to ti ap-khuxen Bapachea adhin kortolo. Tor ami Jezuchi dekh koxi gheunk zata tem ami fuddlea lekhant polloum-ia.