OBHEASACHO LEKH 23
GIT 2 Jehova Tujem Nanv
Jehovachem Nanv—Amkam Kitlem Mhotvachem?
“Mhojim sakxidaram tuminch . . . uloita to Sorvespor.”—IZ. 43:10.
MUKHEL MUD’DO
Jehovachem nanv povitr korunk ani tachea nanvak laglolo dag kaddunk modot korunk ami kitem korunk zata tem ami hea lekhant polloitolim.
1-2. Jehovachem nanv Jezuk ekdom mhotvachem mhunn ami koxim zannant?
JEHOVACHEM nanv Jezuk her kitea-i poros chodd mhotvachem asa. Ani tea nanva pasot Jezun jitlo vavr kela titlo anik konnench korunk na. Ami fattlea lekhant polloilem toxem, Jehova povitr asa ani tacheo sogleo vatto sarkeo asat mhunn puravo diunk Jezu aplo jiv bolidan korunk pasun toiar zalo. (Mk. 14:36; Heb. 10:7-9) Ani tachi Ek Hozar Vorsanchi Razvottki somplea uprant to ap-khuxen ti porot Jehovachea hatant ditolo. Karonn sogli mhoima Jehovak mellʼlloli taka zai. (1 Kor. 15:26-28) Tor Jezun kelam tea soglea vorvim, to aplea Bapacho khub mog korta mhunn tannem dakhoun dilem.
2 Jezu Jehovachea nanvan hea prithumer ailo. (Ju. 5:43; 12:13) Tannem tem nanv aplea pattlavdarank kolloilem. (Ju. 17:6, 26) Toxench Jezun Jehovachea nanvan xikoilem ani vizmitam kelim. (Ju. 10:25) Itlench nhoi, tannem Jehova lagim “tujea nanva pasot” aplea xisancho samball kor oxem maglem. (Ju. 17:11) Hantuntlean, Jehovachem nanv Jezuk sogleam-von chodd mhotvachem asa mhunn spoxttponnim kolltta. Tor aiz konnui Jehovachem nanv nokllo vo tem uzar korina zalear, to apunn Jezucho khoro pattlavdar mhunn koso sangonk xokta?
3. Hea lekhant ami kitem polloitolim?
3 Jezuchim pattlavdaram zalʼlean, Jezu sarkim ami pasun Jehovachea nanvacho mog kortat ani taka man ditat. (1 Ped. 2:21) Hea lekhant, “Rajeachi bori khobor” porgott kortat tankam Jehovan hem nanv kiteak dilam tem ami polloitolim. (Mt. 24:14) Toxench, amkam dor ekleak hem nanv kitlem mhotvachem asonk zai tem-ui ami polloitolim.
‘APLEA NANVA PASOT LOK’
4. (a) Sorgar voichea poilim Jezun aplea xisank kitem sanglem? (b) Ami khoinchea prosnanche zobab polloitolim?
4 Sorgar voichea poilim Jezun aplea xisank oxem mhunnttlem: “Tumcher povitr xokti ietoli tednam tumkam boll mellttolem ani Jeruzalemant, ani akʼkhea Judeiant ani Samarient, toxench prithumechea sogleant poisulʼlea vattarant pasun tumi mhojea vixim govai ditole.” (D.I. 1:8) Tor Jezuche xis bori khobor fokot Izraelantuch nhoi, punn sogleak porgott korche asle. Hea vorvim soglea raxttrantlea lokank Jezuchim pattlavdaram zaunk sondhi mellttoli asli. (Mt. 28:19, 20) Punn dhean diat, Jezun mhunnttlem: “Tumi mhojea vixim govai ditole.” Hacho orth novea xisamnim fokot Jezu vixim sakx diunk zai asli kai? Vo tannim Jehovachea nanva vixim pasun dusreank sangop gorjechem aslem? Hacho zobab amkam Itihas odheai 15-nt boroilʼlea ghoddnneam vorvim kollon ieta.
5. Soglea lokamnim Jehovachem nanv zannam zavop gorjechem mhunn Jeruzalemantlea apostlamnim ani vhoddilamnim koxem dakhoilem? (Chitr pasun polloiat.)
5 Judev nhoi tea lokamnim Kristanv zaunk sunot korchi goroz asa kai na hea vixim ulounk, Jeruzalemantle apostl ani vhoddil 49 K.X.-ant, sangata mellon aile. Tem ulovop sompot ailem tednam, Jezucho sovto bhav Jakoban oxem mhunnttlem: “Devan koxe porim poilech pavtti Judev nhoi toslea lokancher dhean dilem ani tanchea modle aplea nanva pasot lokank vinchun kaddle tea vixim [Pedrun] bariksannen amkam sanglem.” Tor Jakob konnachea nanva vixim sangtalo? Provadi Amosachea utrancho ulʼlekh korun tannem fuddem oxem mhunnttlem: “Tea udexim tancho urlolo lok soglea raxttrantlea lokam sangata mellon, kallzant thaun Jehovak sodhtolo. Tanchea vixim Jehovan mhunnttlam, ki tankam mhojea nanvan vollkhotat.” (D.I. 15:14-18) Tor hea novea Kristanvank Jehova vixim xikounn mellttoli asli itlench nhoi, punn tankam Jehovachea nanvan pasun vollkhotole asle.
Poilea xekddeantlem Sonchalon Monddoll sangata mellon ailem tednam, Kristanvam Devachea nanva pasot aslole lok asonk zai mhunn tea visvaxi bhavank spoxttponnim kollon ailem (Peregraf 5 polloiat)
6-7. (a) Jezu hea prithumer kiteak ailʼlo? (b) Jezu hea prithumer ieunk sogleam-von mhotvachem karonn khoinchem?
6 Jezuchea nanvacho orth mhunnttlear, “Jehova Taronn Dita.” Ani apleacher toxench aplea Putacher bhavarth dovortoleank salvar korunk Jehovan Jezuk uzar kelo. Jezun hea prithumer ieun munxakulla pasot aplo jiv bolidan kelo. (Mt. 20:28) Hea vorvim munxank tanchea patkanchem bhogsonnem ani sasnak jieunk sondhi mellttoli asli.—Ju. 3:16.
7 Punn munxank soddvonnechi goroz kiteak asli? Eden bagent kitem zalʼlem tea pasot. Ami fattlea lekhant polloilʼlem toxem, Adanv ani Even Jehovachi adnea moddli ani sasnak jieunchi sondhi hogddaili. (Ut. 3:6, 24) Hea pasot munxank soddvonnechi goroz asli. Punn tachea poros chodd mhotvachem mhunnttlear, Soitanan Jehovachea nanvar ghatlolo arop kaddunk zai aslo. (Ut. 3:4, 5) Ani hea mhotvachea karonnak lagon Jezu hea prithumer ailʼlo. Tor Adanv ani Evechea sonstichi soddvonn ani Jehovachem nanv povitr korop eka-mekak zuddlolem asa. Ani Jezu Jehova pasot uloita ani tache sovem Jehovachem nanv asa dekhun, Jehovachem nanv povitr korunk sogleam-von Jezu purto aslo.
Aiz konnui Jehovachem nanv nokllo vo tem uzar korina zalear, to apunn Jezucho khoro pattlavdar mhunn koso sangonk xokta?
8. Soglea Kristanvamnim kitem manun gheunk zai?
8 Jezucho Bap, Jehovak lagon soglea Kristanvank soddvonn mellʼllea mhunn tannim manun gheunk zai. (Ju. 17:3) Toxench Jezu bhaxen tankam Jehovachea nanvan vollkhotolim. Tea bhair, Jehovachem nanv povitr korop kitlem mhotvachem tem tannim zannam zaunk zai. Oxem kelearuch tankam Devachi maniotai ani sasnachem jivit mellttolem. (D.I. 2:21, 22) Tor Jezuchea soglea visvaxi pattlavdaramnim, Jehovachi toxench Jezuchi vollokh gheunk zai. Heach pasot Juanv 17-nt, Jezun aplea magnneachea xevottak oxem mhunnttlem: “Hanvem tankam tujem nanv kolloilam ani fuddem-i kolloitolom, oxe toren tunvem zoso mhozo mog kela to tanchea-i modem urom ani hanv tanchea sangata ekvottant urom.”—Ju. 17:26.
“TUMINCH MHOJIM SAKXIDARAM”
9. Jehovachem nanv amkam mhotvachem mhunn ami koxem dakhounk zata?
9 Tor atam meren ami jem polloilam tea vorvim Jezuchim khorim pattlavdaram zalʼlean ami Jehovachem nanv povitr korop ekdom mhotvachem mhunn xiklim. (Mt. 6:9, 10) Jehovachea nanvak ami sogleam-von chodd mhotv diunk zai ani tem amchea kamamnim pasun dakhounk zai. Tor Jehovachem nanv povitr korunk ani Soitanan tache vixim fotti sangleat mhunn dakhounk ami kitem korunk zata?
10. Izaias odheai 42 tem 44-ant kosle kortt kesi vixim sanglam? (Izaias 43:9; 44:7-9) (Chitr pasun polloiat.)
10 Jehovachem nanv povitr korunk ami kitem korunk zata, tem amkam Izaias odheai 42 tem 44-ant xikonk melltta. Thoim Jehova apli seva korinant tankam tanche dev khore asat kai na tem dakhounk sangta. Korttant ailʼlea porim hea vixim puravo diunk konnui sakxi asat kai mhunn to vicharta. Punn konnuch toxem korunk xokona!—Izaias 43:9; 44:7-9 vachat.
Ami zaitea vattamnim eka orthan eke kortt kesint asat (Peregraf 10-11 polloiat)
11. Izaias 43:10-12-nt Jehova aplea lokank kitem sangta?
11 Izaias 43:10-12 vachat. Jehova aplea lokank oxem sangta: “Tuminch Mhojim sakxidaram . . . Hanv Dev.” Fuddem Jehova tankam ho prosn vicharta: “Mhoje bhair anink konn Dev asa kai?” (Iz. 44:8) Hea prosnacho zobab diunk amkam ek sueog asa. Amchea utram ani korneam vorvim, fokot Jehova khoro Dev ani tachem nanv her soglea nanvam poros vortem asa mhunn ami dakhounk zata. Soitanan amchea jivitant kitle-i tras haddlear pasun, ami jea toren amchem jivit jietat tantuntlean ami khoreponnim Jehovacho mog kortat ani taka visvaxi asat mhunn dakhounk zata. Hea vorvim Jehovachem nanv povitr korunk ami modot kortat.
12. Izaias 40:3, 5-ant asloli bhasaunni koxi purnn zali?
12 Ami Jehovachem nanv povitr kortat tednam, ami Jezu Kristachi dekh ghetat. Izaiasachea bhasaunnent oxem-i sanglolem ki ‘Sorvesporak vatt toiar korunk’ konn tori ietolo. (Iz. 40:3) Hi bhasaunni koxi purnn zali? Juanv Batist, Jezu pasot vatt toiar korunk ailo. Ani Jezu Jehovachea nanvan ailo ani tachea nanvan uloilo. (Mt. 3:3; Mk. 1:2-4; Luk. 3:3-6) Toxench te bhasaunnent oxem-i sanglolem: “Sorvesporachi mhoima porgott zatoli.” (Iz. 40:5) Hem koxem purnn zalem? Jezu hea prithumer ailo tednam, tannem itle bore toren aplea Bapachi dekh ghetli ki eka orthan Jehovach hea prithumer ailʼlea bhaxen zalo.—Ju. 12:45.
13. Ami Jezuchi dekh koxi gheunk zata?
13 Jezu bhaxen ami pasun Jehovachim Sakxi zaun asat. Amchea sovem Jehovachem nanv asa ani ami tachea ojapvont kamam vixim soglea lokank sangtat. Punn Jehova vixim anik bore toren sakx diunk ami lokank Jezun Jehovachem nanv povitr korunk kitem kelem tem pasun sangonk zai. (D.I. 1:8) Karonn sogleam poros chodd Jezun Jehova vixim sakx dili ani ami tachea panvlamnim choltat. (Prok. 1:5) Tor Jehovachem nanv amkam mhotvachem mhunn ami zonn eklean koxem dakhounk zata?
JEHOVACHEM NANV AMKAM ZONN EKLEAK MHOTVACHEM
14. Stotr 105:3-a pormonnem, amkam Jehovachea nanva vixim koxem bhogta?
14 Amkam Jehovachea nanvacho gorv bhogta. (Stotr 105:3 vachat.) Ami Jehovachea nanva vixim boddai martat tednam to ekdom khuxal zata. (Jer. 9:23, 24; 1 Kor. 1:31; 2 Kor. 10:17) Jehova ek povitr Dev ani to korta tem soglem sarkem mhunn dusreank sangop ek vhodd man mhunn ami lekhtat. Tor amchea borabor xiktat, kam kortat, amchea xezareank ani herank ami Jehovachim Sakxi mhunn vollokh diunk kednanch lozchem nhoi! Punn ami Jehovachea nanva vixim ulovop bond kelʼlem Soitanak zai. (Jer. 11:21; Prok. 12:17) Khorem mhunnttlear, lok Jehovachem nanv visron gelʼlo taka ani tachea fottkirea sondex diupeank zai. (Jer. 23:26, 27) Punn amkam Jehovachea nanvacho mog asa dekhun ami tachem nanv vakhannunk amkam melltta ti dor ek sondhi uzar korunk sodhtat.—St. 5:11; 89:16.
15. Jehovachea nanvan ulo marop mhunnttlear kitem?
15 Ami Jehovachea nanvan ulo marit ravtat. (Jo. 2:32; Rom. 10:13, 14) Jehovachea nanvan ulo marop hacho orth, fokot tachem nanv zannam zavop ani tem uzar korop itlench nhoi. Punn Jehova koslo Dev tem ami zannam zaunk zai, tacher visvas dovrunk zai, ani modot toxench margdorxona pasot tacher patieunk zai. (St. 20:7; 99:6; 116:4; 145:18) Tea bhair, Jehovachea nanva ani gunnam vixim ami dusreank sangonk zai, ani tanchea jivitant bodol korunk tankam modot korunk zai. Hea vorvim, tankam Jehovachi maniotai mellttoli ani tim salvar zatolim.—Iz. 12:4; D.I. 2:21, 38.
16. Soitan fottkiro mhunn ami koxem dakhounk zata?
16 Jehovachea nanva pasot ami tras sosunk toiar asat. (Jak. 5:10, 11) Tras ailear pasun Jehovak visvaxi ravon ami Soitan fotting mhunn dakhounk zata. Jobachea disamnim, Jehovachi seva kortat tancher Soitanan oso arop ghatlolo: “Aplo jiv vattaupak monis kiteim korta.” (Job 2:5a) Tor Jehovachim sevokam soglem borem asa tednanch tachi seva kortat ani tras ailear tim taka soddun voitolim mhunn Soitanan boglantt ghatlem. Punn Joban Jehovak visvaxi ravon Soitan fottkiro mhunn dakhoilem. Ami pasun toxench korunk zata. Soitan amkam niraxi korunk proitn korta vo amchean sosunk zaina tosle tras amcher haddtta tednam, Jehovak visvaxi ravon Soitan fottkiro mhunn ami dakhounk zata. Ani aplea nanva pasot Jehova aplea sevokancho samball kortolo mhunn ami purnn khatri dovrunk zata.—Ju. 17:11.
17. 1 Pedru 2:12 pormonnem, ami anik khoinchea toren Jehovachea nanvak mhoima diunk zata?
17 Ami Jehovachea nanvak man ditat. (Mho. 30:9; Jer. 7:8-11) Lok amkam Jehovachim Sakxi mhunn vollkhotat dekhun, ami jem kortat tea udexim Jehovachea nanvak mhoima mellonk xokta vo opman zaunk xokta. (1 Pedru 2:12 vachat.) Tea pasot, amchea utramnim ani korneamnim Jehovak mhoima mellonk amchean zata tem soglem ami korunk sodhtat. Hea vorvim ami opurnn aslearui, Jehovachea nanvak mhoima diunk pavtolim.
18. Jehovachem nanv amkam mhotvachem asa mhunn ami anik koxem dakhounk zata? (Futtnott pasun polloiat.)
18 Amchea nanva poros, Jehovachem nanv amkam chodd mhotvachem asa. (St. 138:2) Ami Jehovak manvota tem kortat dekhun choddxe pavtti lok amcho dves korit ani amcheo khobro korit.a Jehovachem nanv povitr korunk, Jezu guneanvkari mhunn moronk pasun toiar aslo. “Apleak loz zatoli mhunn porva korinastana” tannem Jehovak mhoima dili. (Heb. 12:2-4) Karonn tachem dhean Jehovachi khuxi korunk aslem.—Mt. 26:39.
19. Tumkam Jehovachea nanva vixim koxem bhogta, ani kiteak?
19 Jehovachea nanvacho amkam gorv bhogta. Ani dusrim amkam Jehovachim Sakxi mhunn vollkhotat, ho ek vhoddlo man mhunn ami lekhtat. Lokamnim amkam opman kelear pasun ami te sosunk toiar asat. Karonn amchea nanva poros Jehovachem nanv amkam chodd mhotvachem asa. Tor Soitan amkam niraxi korunk vo Jehovachem nanv dusreank kolloina zaunk kitlo-i vavr korum, Jehovachem nanv vakhannunk ami ghott nichov korum-ia. Oxem kelear, Jezu bhaxen Jehovachem nanv amkam sogleam-von chodd mhotvachem mhunn ami dakhoitolim.
GIT 10 Jehova Devak Vakhannia!
a Eka vellar Job pasun apleach vixim chodd chintunk laglo. Tannem tachim bhurgim ani tachi sogli girestkai hogddaili tednam tannem “patok korunk na, nhoi mhonn Devak kosloch opman korunk na.” (Job 1:22; 2:10) Punn tachea tin khottea ixttamnim tannem kitem tori vaitt kelam mhunn tacher arop ghatlo tednam, Job ‘khor-khos utram’ uloilo. Hea vellar Jehovachem nanv povitr korchea bodlek to apleach nanva vixim chodd chintunk laglo.—Job 6:3; 13:4, 5; 32:2; 34:5.