OBHEASACHO LEKH 28
GIT 88 Tujea Vatten Mhaka Cholonk Xikoi
Bore Solʼle Mellonk Kitem Korchem?
“Budh ghetat tanche thaim xanneponn asta.”—MHO. 13:10.
MUKHEL MUDʼDO
Amkam mellttat tea solʼleam thaun purnn faido melloun gheunk kitem korchem?
1. Bore nirnnoi gheunk ami kitem korunk zai? (Mhonnʼnneo 13:10; 15:22)
AMKAM sogleank bore nirnnoi gheunk zai, jea vorvim amkam boro porinnam mellttolo. Tor bore nirnnoi gheunk ami solʼle magonk zai mhunn Devachem Utor amkam sangta.—Mhonnʼnneo 13:10; 15:22 vachat.
2. Jehova amkam kitem bhas dita?
2 Amkam sogleam-von boro solʼlo amcho Bap Jehova diunk xokta. Tachea koddlean solʼlo gheunk ami magnneant tachea lagim zannvai magonk zai. Oxem kelear to amkam modot kortolo. To oxem sangta: “Mhoje dolle tujer dovrun tuka budh diun choloitolom.” (St. 32:8) Tor Jehova amkam sarko goroz asa to solʼlo ditolo ani to apnnaunk modot kortolo mhunn bhas dita.
3. Hea lekhant ami kitem xiktolim?
3 Hea lekhant Devachea Utrantlean hea char prosnanche zobab zannam zaum-ia: (1) Borea solʼleam thaun faido melloun gheunk mhaka kosle gunn asonk zai? (2) Mhaka bore solʼle konna thaun mellonk xoktat? (3) Mhaka khoreaninch solʼlo zai mhunn hanvem koxem dakhounk zata? (4) Hanvem koslo nirnnoi gheuncho tem hanvem dusreank kiteak vicharchem nhoi?
MHAKA KOSLE GUNN ASONK ZAI?
4. Borea solʼleam thaun faido melloun gheunk amkam kosle gunn asonk zai?
4 Borea solʼleam thaun faido melloun gheunk ami khalti asonk zai. Hacho orth, amkam soglem khobor na ani bore nirnnoi korunk amkam dusreanchea modotichi goroz asa mhunn ami vollkhon gheunk zai. Punn ho gunn amkam na zalear, Jehova amkam modot korunk xokchona ani Bible vachtana Jehova koddlean amkam solʼle mellʼllear pasun tem umtea kollxear udok koxem zatolem. (Mik. 6:8; 1 Ped. 5:5) Punn khalti aslear, ami Bible-antlea solʼleancher rokddinch dhean ditolim ani te apnnaunk vavr kortolim.
5. Raza David kiteak gorvan fulonk xoktalo?
5 Ami Raza Davida koddlean kitem xikonk zata tem polloum-ia. Tannem zaitim borim kamam kelʼlim. Tori astana to gorvan fulonk na. Raza zaunchea zaitim vorsam poilim to ek boro songitkar mhunn lok taka vollkhotale, ani raza pasotui to songit vazoitalo. (1 Sam. 16:18, 19) Tea bhair, Jehovan taka fuddlo raza mhunn makhlo tednam taka apli povitr xokti dili. Ani taka lagon David khub bollvont zalo. (1 Sam. 16:11-13) Tannem dusmanank toxench Filistevkar Goliatak pasun marun uddoilo mhunn lok tachi vakhannʼnni kortale. (1 Sam. 17:37, 50; 18:7) David gorvan fulʼlolo zalear, apnnem him soglim kamam kelʼlim dekhun apnnak dusreanchea solʼleachi goroz na oxem to chintʼtolo aslo. Punn Davidan toxem chintunk na. Karonn to khalto aslo.
6. David dusreanche solʼle aikonk toiar aslo mhunn amkam koxem kolltta? (Chitr pasun polloiat.)
6 Raza zalea uprant, Davidan osle ixtt vinchun kaddle je taka bore solʼle diunk xoktale. (1 It. 27:32-34) Ani raza zaunchea poilim pasun dusrim taka solʼle ditalim tednam, to sodanch tanchem aikonk toiar astalo. Tannem fokot dadleanchech solʼle nhoi, punn Abigail nanvache eke bailecho solʼlo pasun aikolo. Abigail Nabalachi bail asli, zo ekdom gorvixtt, onupkari ani dusreank resped dina toslo munis aslo. Punn David khalto aslo dekhun tannem Abigailacho solʼlo aikolo. Na zalear to ek vhoddli chuk korunk pavtolo aslo.—1 Sam. 25:2, 3, 21-25, 32-34.
Raza Davidan khaltikaien Abigailacho solʼlo manun ghetlo (Peregraf 6 polloiat)
7. Ami Davida thaun kitem xiktat? (Upodexok 4:13, 14) (Chitram pasun polloiat.)
7 Ami Davida thaun kitem xiktat? Amkam umkench kitem korunk kola asa zait, vo amkam thoddo odhikar asa astolo. Tori astana, amkam soglem khobor asa ani amkam dusreanchea solʼleachi goroz na oxem ami kednanch chintchem nhoi. Amkam konnui solʼlo dium, Davida bhaxen bore solʼle aikonk ami sodanch toiar asonk zai. (Upodexok 4:13, 14 vachat.) Oxem kelear, amcher toxench dusreancher dukh haddttat toslea vhodd chukim thaun pois ravonk amkam modot zaunk xokta.
Amkam solʼle konnui dium, bore solʼle aikonk ami sodanch toiar asonk zai (Peregraf 7 polloiat)c
MHAKA BORE SOLʼLE KONNA THAUN MELLONK XOKTAT?
8. Jonathan Davidak boro solʼlo kiteak diunk xoktalo?
8 Davida thaun ami anik kitem xiktat? Tannem oslea munxancho solʼlo aikolo, zanchi Jehova sangata ghott ixttagot asli ani jim tachea poristhiti vixim bore bhaxen zannam aslim. Udharonnak, Raza Saulu aplea lagim xanti korunk toiar asa kai na, hem to zannam zaunk sodhtalo tednam, tannem Saulucho put, Jonathana koddlean solʼlo ghetlo. Jonathan taka boro solʼlo kiteak diunk xoktalo? Karonn Jehova sangata Jonathanachi ghott ixttagot asli. Toxench, to aplo bapui Sauluk bore bhaxen vollkhotalo. (1 Sam. 20:9-13) Tor ami Davidachi dekh koxi gheunk zata?
9. Ami konna lagim solʼlo magonk zai? Somzaiat. (Mhonnʼnneo 13:20)
9 Amkam solʼleachi goroz asta tednam ami to oslea munxa lagim magonk zai, zachi Jehova sangata ghott ixttagot asa ani tea poristhiti vixim taka bori khobor asa.a (Mhonnʼnneo 13:20 vachat.) Udharonnak, ek tornatto bhav kazar zaunk aplea pasot ek sangati sodhta mhunn chintat. Tor taka boro solʼlo konn diunk xokta? Tannem aplea eka ankvar ixtta lagim solʼlo maglear ani tea ixttan taka Bible-antlean solʼlo dilo zalear to solʼlo taka faideak poddonk xokta. Punn tea tornattea bhavan, apleak ekdom bore bhaxen vollkhota ani zaitea vorsam thaun sangata mellon Jehovachi seva korta toslea eka kazari zoddpea lagim solʼlo maglo zalear, taka to anikui faideak poddonk xokta. Karonn tim taka to solʼlo koso apnnauncho titlench nhoi, punn aplea kazari jivitantlean tankam kitem xikonk mellʼllem tem pasun sangonk xoktat.
10. Ami fuddem kitem polloitolim?
10 Tor atam meren, amkam khoinche don gunn asonk zai ani amkam konn boro solʼlo diunk xokta tem ami polloilem. Tor fuddem, amkam khoreaninch solʼlo zai mhunn ami koxem dakhounk zata, ani ami koslo nirnnoi gheuncho tem ami dusreank kiteak vicharchem nhoi tem polloum-ia.
MHAKA KHOREANINCH SOLʼLO ZAI MHUNN HANVEM KOXEM DAKHOUNK ZATA?
11-12. (a) Thodde pavtti ek munis kitem korit? (b) Raza Rehoboamak mhotvacho nirnnoi gheuncho aslo tednam tannem kitem kelem?
11 Thodde pavtti ek munis dusream lagim solʼlo magot. Punn to kitem kortolo tem tannem poilinch tharailam zalear, to khoreponnim dusream lagim solʼlo magona mhunn dakhoitolo. Karonn tannem jem tharailam tench tim apleak sangtat kai na itlench to pollounk sodhta. Tor oslea munxak Raza Rehoboamak kitem ghoddlem tantuntlean ek xittkaunni asa.
12 Raza Solomona uprant, tacho put Rehoboam Izraelacho raza zalo. To raza zalo tednam Izraelant soglem borem choltalem. Punn lokank distalem ki Solomonan tancher kamancho bhar ghatlolo. Tor aplea kamancho bhar matso unno kor mhunn tannim Rehoboama lagim vinoti keli. Tednam kitem korchem tea vixim chintunk apleak thoddo vell diat mhunn Rehoboaman tankam sanglem. Ani Solomonak modot kelʼli tea zanntteam lagim tannem solʼlo maglo. Oxem korun tannem borem kelem. (1 Raz. 12:2-7) Punn tea zanntteancho solʼlo tannem nakarlo. Oxem tannem kiteak kelem astolem? To kitem kortolo tem tannem ghoddie poilinch tharailʼlem astolem. Ani tannem jem korunk chintlolem tench te zanntte apleak sangtole oxem tannem chintlem zait. Punn toxem zaunk na. Tea pasot, Rehoboaman aplea tornatteam ixttam lagim solʼlo maglo. Ani to jem korunk sodhtalo tench tannim taka sanglem tednam taka tem avoddlem ani tannem tancho solʼlo manun ghetlo. (1 Raz. 12:8-14) Uprant tannem lokank tachea ixttamnim jem sanglolem tench sanglem. Hacho porinnam kitem zalo? Zaito lok Rehoboamachea add gelo ani tannim dusro ek raza vinchun kaddlo. Tednam thaun Rehoboamak tras sosunk poddle.—1 Raz. 12:16-19.
13. Ami dusreancho solʼlo aikonk toiar asat vo na tem amkam koxem kollon ieta?
13 Rehoboama thaun amkam kitem xikonk melltta? Ami kitem kortolim tem ami solʼlo magchea poilim tharaunchem nhoi. Dusrim amkam solʼlo ditat to aikonk ami toiar asonk zai. Tor ami amkanch vicharunk zata, ‘Hanv dusream koddlean solʼlo magtam, punn hanvem chintlolea poros to vegllo asa zalear hanv to rokddoch nakartam kai?’ Hea vixim ek udharonn polloum-ia.
14. Amkam konnui solʼlo dita tednam ami kitem ugddas dovrunk zai? Ek udharonn diat. (Chitr pasun polloiat.)
14 Eka bhavak ek borea pagarachem kam melltta mhunn chintat. Punn tem kam gheunchea poilim to eka vhoddila lagim solʼlo magta. Tea kamak lagon apleak zaito temp poriant aple famili thaun pois ravonk poddttolem mhunn to bhav tea vhoddilak sangta. Tednam tache familik Devachea Utra pormonnem margdorxon divop hi tachi mukhel zobabdari zaun asa mhunn to vhoddil tea bhavachea ugddasak haddtta. (Ef. 6:4; 1 Tim. 5:8) Punn hem tea bhavak avoddna dekhun to tea vhoddilacho solʼlo nakarta. Ani apnnem jem korunk chintlam tem apleak aikonk mellom poriant to her bhavam lagim solʼlo magot ravta. Tor to bhav khoreponnim solʼlo magta kai, vo apnnem korunk chintlam tench to dusream koddlean aikonk sodhta? Amchem kalliz ghatki mhunn ami ugddas dovrunk zai. (Jer. 17:9) Thodde pavtti, amkam oslo solʼlo mellot zo amkam aikonk avoddna, punn khorem mhunnttlear, amkam toch solʼlo faideacho asta.
Ami khoreponnim solʼlo magtat kai, vo jem ami korunk chintlam tench ami dusream koddlean aikonk sodhtat? (Peregraf 14 polloiat)
HANVEM KOSLO NIRNNOI GHEUNCHO TEM DUSREANK KITEAK VICHARCHEM NHOI?
15. Ami kitem korchem nhoi, ani kiteak?
15 Ami zonn eklean svotache nirnnoi kelʼle Jehovak zai. (Gal. 6:4, 5) Ami polloilem toxem, ek xanno munis nirnnoi gheunchea poilim Devachea Utra thaun ani zaitim vorsam thaun visvaxiponnan Jehovachi seva kortat tanchea koddlean solʼlo ghetolo. Punn ami koslo nirnnoi gheuncho tem ami dusreank vicharchem nhoi. Thoddim zannam tankam khub visvas aslolea konnak oxem vicharit, “Tum mhojea zagear aslo zalear kitem kortolo aslo?” Vo thoddim zannam tea vixoi-acher bariksannen chintinastana dusrim jem kortat tench korit.
16. Murteank bhettoilʼlem mas khaunchea vixim Korint sobhentlea Kristanvamnim koslo nirnnoi gheunk zai aslo, ani ho nirnnoi gheunchi zobabdari konnachi asli? (1 Korintkarank 8:7; 10:25, 26)
16 Poilea xekddeant Korint sobhentlea Kristanvam vixim chintat. Tannim oslem mas khaunchea vixim nirnnoi gheuncho aslo jem ghoddie murteank bhettoilʼlem. Tea vixim Paulun oxem boroilem: “Murteo sonvsarant kainch nhoi, ani ekleach Devak soddun anik konnuch dev na mhunn ami zannant.” (1 Kor. 8:4) Hem monant dovrun, bazarant viktale tem mas, jem ghoddie murteank bhettoilʼlem, tem apunn khatolim mhunn thoddea Kristanvamnim nirnnoi ghetlolo. Punn thoddeamnim, tanchem ontoskornn tankam sotaitolem dekhun tim tem mas khaunchimnant mhunn tharailʼlem. (1 Korintkarank 8:7; 10:25, 26 vachat.) Ho nirnnoi zonn eklean gheunk zai aslo. Paulun Korintkarank dusream pasot nirnnoi gheunk vo dusrim kortat tench korunk kednanch sangonk na. Karonn ‘dor eklean Devak hixob diunk’ zai aslo.—Rom. 14:10-12.
17. Dusreamnim ghetla toch nirnnoi ami ghetlear kitem zaunk xokta? Ek udharonn diat. (Chitram pasun polloiat.)
17 Aiz amkam pasun oxench kitem ghoddonk xokta. Udharonnak, rogtachea fraction-a vixim chintat. Apunn fraction ghetolo kai na tem dor eka Kristanvan svota zaun tharaunk zai.b Ho vixoi purnn toren somzonk matso kotthin asa tem khorem. Torui, ami svota zaun hea vixim nirnnoi gheunk zai. (Rom. 14:4) Dusreamnim ghetla toch nirnnoi ami ghetat zalear ami kednanch xannim zaunk pavchimnant. Ami Bible-antlea totvam adarit nirnnoi ghetat tednanch ami xannim zatolim. (Heb. 5:14) Punn hea vixim sodh kelea uprant pasun, Bible-antlim totvam amche poristhitik koxim lagu zatat tem somzonk amkam modot zai zalear ami dusream koddlean solʼlo gheunk zata.
Ami sodh kelea uprantuch dusream koddlean solʼlo magonk zai (Peregraf 17 polloiat)
SOLʼLO GHEIT RAVAT
18. Jehovan amchea pasot kitem kelam?
18 Jehovan amkam svotache nirnnoi gheunk dileat, hache voilean taka amcher kitlo visvas asa tem kolltta. Te nirnnoi gheunk modot zaunk tannem amkam Bible dila. Toxench tannem amkam mogall ixttam dileant, jim Bible-antlim totvam koxim apnnaunchim tem somzonk modot kortat. Oxe toren, amcho mogall Bap Jehovan apli zobabdari purnn kelea. (Mho. 3:21-23) Tor ami taka upkariponn koxem dakhounk zata?
19. Jehovak khuxal korit ravonk ami kitem korunk zai?
19 Hea vixim chintat. Aplim bhurgim zannvaiechim ani Jehovachim sevokam zaun dusreank modot kortat tednam, avoi-bapaink khub khuxalkai bhogta. Teach bhaxen, ami borim Kristanvam zatat, dusream koddlean solʼle ghetat, ani Jehovak man haddttat tosle nirnnoi ghetat tednam, Jehova khub khuxal zata.
GIT 127 Tuka Manta Toslo Munis Mhaka Kor
a Thodde pavtti ek Kristanv poixe, ilaz vo her vixoi-ancher Jehovachi seva korinant tanchea koddlean pasun solʼle gheunk xokta.
b Hea vixim anik zannam zaunk, Sasnak Khuxalkaien Jieiat! pustokant odheai 39-acho mudʼdo 5 ani “Anik Sodhat” ho bhag polloiat.
c CHITRACHI MAHITI : Ek vhoddil mittingek koso uloilo tea vixim dusro ek vhoddil taka solʼlo dita.