OBHEASACHO LEKH 29
GIT 87 Ieiat, Boll Ani Ghottai Melloun Gheiat!
Boro Solʼlo Diunk Kitem Korchem?
“Mhoje dolle tujer dovrun tuka budh diun choloitolom.”—ST. 32:8.
MUKHEL MUDʼDO
Dusreank modot zaunk xokta toslo solʼlo koso diuncho tem ami hea lekhant polloitolim.
1. Konnem solʼlo diunk zai? Somzaiat.
DUSREANK solʼlo diunchea vixim tumkam koxem dista? Oxem korop thoddeank khub sompem asa. Punn thoddeank toxem korunk bhirant dista ani tim fattim-fuddem zatat. Punn kitem-i zaum, goroz poddtta tednam ami sogleamnim dusreank solʼlo diunk zai. Karonn amchea bhav-bhoinnam pasot mog dakhounk hi ek vatt zaun asa. Jezun sanglolem ki amchea modem mog asa zalear ami tache xis mhunn kollon ietolem. (Ju. 13:35) Toxench, Bible-ant sanglam ki ami dusreank ‘bori budʼdh vo solʼlo’ ditat tednam, amchea modem asloli ixttagot anikui ghott zata.—Mho. 27:9.
2. Vhoddilank khas korun kitem khobor asonk zai, ani kiteak? (“Sumanache Modle Mittingek Solʼlo Ditana . . . “ hem boks pasun polloiat.)
2 Boro solʼlo koso diuncho tem vhoddilank khas korun khobor asonk zai. Karonn Jehovan ani Jezun tankam sobhechi kallji gheunchi zobabdari dilea. (1 Ped. 5:2, 3) Te Bible adarit bhaxonnam ditat tednam, sobhechi kallji ghetat mhunn dakhoitat. Toxench, tannim dor eka bhav-bhoinnank ani jim Jehova thaun pois geleant tankam pasun solʼlo diunk zai. Tor vhoddilamnim ani ami sogleamnim dusreank boro solʼlo koso diunk zata?
3. (a) Dusreank bore solʼle koxe diunche tem ami koxem xikonk zata? (Izaias 9:5; “Solʼlo Ditana Jezuchi Dekh Gheiat” hem boks pasun polloiat.) (b) Hea lekhant ami kitem polloitolim?
3 Bible-ant oslea zaitea munxam vixim sanglam, zannim dusreank bore solʼle dile. Tor bore solʼle koxe diunche tem ami tanchea koddlean xikonk zata. Hea vixim Jezun sogleam-von borem udharonn dovorlam. Bible-ant taka “Ojapvont Budh-Dinnar” oxem mhunnttlam. (Izaias 9:5 vachat.) Tor hea lekhant, dusrim solʼlo magtat tednam ami kitem korchem ani dusrim solʼlo magonant punn tankam solʼlo diunchi goroz poddtta tednam ami kitem korchem tem zannam zaum-ia. Toxench, ami sarkea vellar ani sarke toren dusreank koso solʼlo diunk zata tem-ui zannam zaum-ia.
DUSRIM SOLʼLO MAGTAT TEDNAM
4-5. Dusrim amchea lagim solʼlo magtat tednam ami amkanch koslo prosn vicharunk zai? Ek udharonn diat.
4 Dusrim amchea lagim solʼlo magonk ietat tednam, tim amche lagim vicharunk aileant mhunn khuxal zaun ami rokddinch tankam modot korunk fuddem sorot. Punn oxem korchea poilim ami amkanch ho prosn vicharunk zai, ‘Hea vixoi-acher tankam solʼlo diunk hanv purto asam kai?’ Thodde pavtti, ami solʼlo diunchea bodlek, tea vixoi-acher zannvai aslolea munxachi modot gheunk ami tankam sangonk zata.
5 Hem somzonk ami ek udharonn polloum-ia. Tumchea eka lagxilʼlea ixttak ek gombhir duens zalam mhunn chintat. Tor to tumchea lagim ieun, tea duensak kosle-kosle ilaz asat tea vixim apunn sodh korunk lagla mhunn tumkam sangta. Ani uprant, tannem koslo ilaz gheuncho tea vixim to tumchea lagim solʼlo magta. Tednam tumi kitem kortolim? Tannem umkoch ilaz gheunk zai oxem tumkam disot, punn taka solʼlo diunchea poilim tumi ugddas dovrunk zai ki tumi dotor nhoi ani tea vixoi-acher taka solʼlo diunk tumi purtim nant. Tor taka modot korunk sogleam-von bori vatt mhunnttlear tea vixoi-acher zannvai asa toslea eka munxak sodhunk tumi taka modot korunk zata.
6. Ami solʼlo diunchea poilim kitem kelear borem?
6 Punn ami solʼlo diunk purtim asat oxem amkam dislear pasun ami rokddoch solʼlo diunk zaina. Karonn, Mhonnʼnneo 15:28 sangta: “Promannikachem kalliz zobab dinvche adim chintʼta.” Tor solʼlo diunchea poilim ami sodh korunk zai, magnnem korunk zai, ani tea vixim bariksannen chintunk zai. Oxem kelear, ami Jehovachea chintpa pormonnem solʼlo diunk pavtolim. Hea vixim ami provadi Nathana koddlean kitem xiktat?
7. Ami provadi Nathana koddlean kitem xikonk zata?
7 Raza David provadi Nathana lagim uloitalo tednam, apunn Jehova pasot Devmondir bandunk sodhta mhunn tannem Nathanak sanglem. Tednam Nathanan taka rokddench toxem kor mhunn sanglem. Punn Davidak solʼlo diunchea poilim Jehovak kitem zai tem Nathanan zannam zaunk zai aslem. Karonn Jehovan taka uprant David aplea pasot Devmondir bandchona mhunn sangonk lailem. (1 It. 17:1-4) Hantuntlean ami kitem xiktat? Dusrim amchea lagim solʼlo magtat tednam, ami amchea “uloupant tabo dovorcho.”—Jak. 1:19.
8. Ami solʼlo diunchea poilim chotrai dovrunk anik ek karonn kitem?
8 Dusreank solʼlo diunchea poilim ami kiteak chotrai dovorchi goroz asa, tachem anik ek karonn polloum-ia. Ami chukicho solʼlo dilear ani tacho vaitt porinnam zalear, ami-i zobabdar zatolim. Taka lagon solʼlo diunchea poilim ami bariksannen chintop ekdom gorjechem.
DUSRIM SOLʼLO MAGONANT TEDNAM
9. Solʼlo diunchea poilim vhoddilamnim kosli khatri korunk zai? (Galasiekarank 6:1)
9 Ek bhav vo bhoinn “chukichem panvl gheta tednam” vhoddilamnim taka solʼlo diunk zai. (Galasiekarank 6:1 vachat.) Karonn chukichem panvl ghetlolean, to gombhir patkant poddonk xokta. Tea pasot Jehovachi seva korit ravonk ani sasnak jieunk, vhoddil taka modot korunk sodhtat. (Jak. 5:19, 20) Punn solʼlo diunchea poilim, tea bhavan khorench chukichem panvl ghetlam mhunn vhoddilamnim khatri korunk zai. Karonn Jehovan zonn ekleak tanchea ontoskornna pormonnem nirnnoi gheunk svotontrtai dilea. (Rom. 14:1-4) Punn eka bhavan khorench chukichem panvl ghetlam mhunn kolltta tednam, vhoddilamnim taka koso solʼlo diunk zata?
10-12. Dusreank solʼlo diunk poddtta tednam vhoddilamnim kitem korunk zai? Ek udharonn diat. (Chitram pasun polloiat.)
10 Dusrim solʼlo magonant tednam solʼlo divop vhoddilank sompem asona. Karonn Paulun sanglolem ki eka bhavan vo bhoinnin chukichem panvl ghetlam mhunn taka ghoddie khobor asona. Tor solʼlo aikonk vhoddilamnim tankam koxim toiar korunk zata?
11 Hea vixim chintat. Ek xetkar nibor zomnicher bim rovunk sodhta. Tor to poilim ti zomin khonnon mov korta. Uprant to tantunt bim ghalta ani magir tem vaddonk taka udok ghalta. Heach bhaxen, eka bhavak vo bhoinnik solʼlo diunchea poilim, to solʼlo aikonk vhoddilan taka toiar korunk zai. Udharonnak, ek bori sondhi polloun vhoddilan taka apleak tachi porva asa mhunn khatri diunk zata. Ani apunn tachea lagim kitem tori ulounk sodhta mhunn sangonk zata. Vhoddil mogall ani doiall astat tednam, dusreank tancho solʼlo manun gheunk sompem zatolem.
12 Uprant to vhoddil tea bhava lagim uloitana, ami soglim chuktat ani amkam thodde pavtti solʼleachi goroz poddtta mhunn tannem tachea ugddasak haddunk zata. (Rom. 3:23) Oxe toren, tannem eka orthan ti mati mov korit ravonk zata. Ani magir, tannem xantponnim ani respedan tea bhavan koxe toren chukichem panvl ghetlam tem Bible-antlean dakhounk zata. Ani tannem apli chuk manun ghetlea uprant, vhoddilan eka orthan “bim rovunk” zata. Tem mhunnttlear, tannem kosle bodlav korunk zai tem vhoddilan taka sompeponnim ani spoxttponnim sangonk zata. Ani xevottak, tem bim vaddounk, vhoddilan eka orthan “udok ghalunk” zata. Mhunnche, to bhav jem kitem borem korta tea pasot taka xabaski diunk zai ani tachea sangata magnnem korunk zai.—Jak. 5:15.
Solʼlo diuncho poddtta tednam vhoddil to mogan ani apnnaunk sompo zatolo tea toren dita (Peregraf 10-12 polloiat)
13. Eka bhavak vo bhoinnik solʼlo somzola mhunn vhoddilamnim koxi khatri korunk zata?
13 Punn thodde pavtti, vhoddilancho solʼlo somzonk tea bhavak vo bhoinnik kotthin zaunk xokta. Tednam vhoddilamnim kitem korunk zata? Tannim taka doiall toren prosn vicharunk zatat. (Up. 12:11, NW) Oxem kelʼlean, tannem kitem korunk zai tem taka somzolam vo na tem vhoddilank kollon ietolem.
SARKEA VELLAR ANI SARKE TOREN SOLʼLO DIVOP
14. Ami ragar astana solʼlo kiteak diuncho nhoi? Somzaiat.
14 Ami soglim opurnn asat mhunnttoch, dusreank dukhoita toxem kitem korit vo mhunnot. (Kol. 3:13) Ani Bible-ant sanglam ki ami thodde pavtti eka-mekak rag pasun haddunk xoktat. (Ef. 4:26) Punn “ragar zata to munis Devachea nitivontponna pormonnem kam korunk xokona.” (Jak. 1:20) Tea pasot, ami ragar astana amkam dukhoilam taka ami solʼlo diuncho nhoi. Toxench ragar astana solʼlo dilear, poristhiti anikui bigddonk xokta. Toxem zalear, hacho orth oso kai ki amkam koxem bhogta tem ami taka kednanch sangchem nhoi? Na, toxem nhoi. Ami amcho rag thondd zaum poriant ravonk zai ani uprant taka solʼlo diunk zai. Hea vixim amkam Elihuchem ekdom borem udharonn asa, zannem Jobak boro solʼlo dilʼlo.
15. Ami Elihuchea udharonnantlean kitem xiktat? (Chitr pasun polloiat.)
15 Jobachea khottea ixttamnim tacher zaite arop ghatlole. Te arop sarke nhoi mhunn dakhounk, Job zaite dis tanchea lagim uloilo. Elihun tanchem aikolem ani taka Jobachi doia disli. Punn Job aplo guneanv na mhunn sangtalo tednam, to Jehova vixim chukichem uloilo. Hem aikon Elihuk khub rag ailo. Punn Elihu rokddoch ulounk na. To sarkea vella pasot ravlo ani tannem xantponnim ani respedan Jobak solʼlo dilo. (Job 32:2; 33:1-7) Elihuchea udharonnantlean ami ek mhotvachem lisanv xiktat: Ami sarkea vellar, tem mhunnttlear rag thondd zalea uprant, ani sarke toren, tem mhunnttlear mogan ani respedan solʼlo diunk zai.—Up. 3:1, 7.
Jobachim utram aikon Elihuk khub rag ailo. Punn to aplo rag thondd zaum poriant ravlo ani Joba lagim respedan uloilo (Peregraf 15 polloiat)
SOLʼLO DI-IT RAVAT ANI APNNAIT RAVAT
16. Stotr 32:8-antlean ami kitem xiktat?
16 Hea lekhachea mukhel versa pormonnem, Jehova amkam oxem sangta: “Mhoje dolle tujer dovrun tuka budh diun choloitolom.” (Stotr 32:8 vachat.) Hacho orth, Jehova amkam modot korit ravtolo. Jehova fokot amkam solʼloch dina, punn to solʼlo apnnaunk amkam modot pasun korta. Tor ami Jehovachi dekh koxi gheunk zata? Amkam dusreank solʼlo diunk poddtta tednam, to solʼlo diunchea borabor ami eka orthan tancher amche dolle dovrunk zai. Mhunnche, tankam urba di-it ravonk zai ani bore nirnnoi korunk tankam modot korit ravonk zai.
17. Bible adarit solʼlo ditat tea vhoddilank ami kitea sangata sor korunk zata? Somzaiat. (Izaias 32:1, 2)
17 Solʼlo diunk ani to apnnaunk poilim poros atam chodd goroz asa. (2 Tim. 3:1) Bible adarit solʼlo ditat te vhoddil, ‘sukea zomnintlean vhanvtea vhalla sarke’ asat. (Izaias 32:1, 2 vachat.) Toxench amkam goroz to solʼlo diunk fattim soronant tea ixttam pasot ami khub upkari asat. Karonn tanchim utram “rupeachea tattan dovorlolea bhangarachea apolam” sarkim asat. (Mho. 25:11) Tor boro solʼlo diunk ani mellonk ami sogleamnim kitem korchem tem ami xikot ravom-ia.
GIT 109 Kallzant Thaun Mog Dakhoiat