Bible-antlea Mullavea Sotam Thaun Xikot Ravom-ia

1. Tumi sot xiklim tednam Bible-antlea mullavea sotam vorvim tumcher koslo porinnam zalo?

BIBLE-ANTLEA mullavea sotam vorvim amchem akʼkhem jivit bodolʼlem. Udharonnak, Devachem nanv, Jehova mhunn amkam kollʼllem tednam, ami tachim ixttam zaunk fuddem sorlim. (Iz. 42:8) Toxench munis melea uprant tachem kitem zata, hem sot ami xiklim tednam amchim mogachim melolim tras soxinant mhunn amkam spoxttponnim kollon ailem. (Up. 9:10) Tea bhair, Dev hi prithum ek sobit bag kortolo hi bhas ami zannam zalim tednam, fuddara vixim chodduch uskevop ami bond kelem. Karonn ami fokot 70 vo 80 vorsam nhoi, punn sasnak hea prithumer jietolim mhunn amkam khatri mellʼlli.—St. 37:29; 90:10.

2. Sotant ghott ubim aslolea Kristanvank pasun Bible-antlea mullavea sotam thaun faido zaunk xokta mhunn 2 Pedru 1:12, 13-ntlean koxem kollon ieta?

² Bible-antlim mullavim sotam khub mhotvachim mhunn ami kednanch visorchem nhoi. Apostl Pedrun Kristanvank apli dusri chitt boroili tednam tim ‘sotant ghott ubim aslim.’ (2 Pedru 1:12, 13 vachat.) Punn tea vellar sobhentlim thoddim noxttim munxam bhav-bhoinnank fotti sangon Jehova Deva thaun tankam pois vhoronk sodhtalim. (2 Ped. 2:1-3) Tor oslea fottim thaun Pedru bhav-bhoinnanchi rakhonn korunk sodhtalo. Oxem korunk, tannem tankam Bible-antlim thoddim mullavim sotam porot ugddasak haddlim, jea vorvim tankam xevott poriant Jehovak visvaxi ravonk modot zatoli asli.

3. Ami sogleamnim Bible-antlea mullavea sotam vixim niall korop kiteak mhotvachem? Ek udharonn diat.

³ Ami kitlim-i vorsam thaun sotant asum, Bible-antlea mullavea sotam vorvim amkam sogleank azunui faido zaunk xokta. Hem somzonk hea vixim chintat: Ek boro randpi ani halinch randunk xiklolo ek munis, ek-sarkeoch vostu uzar korun ek jevonn toiar kortat. Punn vell soron voita toso, to boro randpi teoch vostu uzar korun veg-veglle torechim ani anik ruchichim jevnnam randunk xikta. Heach bhaxen, halinch sot xiktat tim munxam Bible-antlim versam umkech eke poristhitint uzar korunk xikleant astolim. Punn zaitea vorsam thaun sotant aslolim bhav-bhoinnam, tinch versam veg-veglle poristhitimnim ani anik bore toren uzar korunk xikleant zait. Karonn tannim bautizm ghetlolo tednam thaun atam meren tanchea poristhitimnim vo tim Jehovache sevent kortalim tea kamant bodol zala astolo. Tor tim khub vorsam poilim xiklolea Bible-antlea mullavea sotancher niall kortat tednam tim atam asat tea poristhitint tim versam koxim apnnaunchim tea vixim tim noveo vatto xiktat. Tor sotant ghott aslolea Kristanvamnim Bible-antlea tin mullavea sotam thaun kitem xikonk zata tem atam polloum-ia.

JEHOVA AMCHO ROCHNNAR ZAUN ASA

4. Jehova amcho Rochnnar hem mullavem sot zannam zalʼlean amkam koso faido zala?

⁴ Amcho Rochnnar khub xoktivont ani zannvaien bhorlolo asa. Ho sonvsar ani hea sonvsarant asloleo sogleo vostu tannem rochleat mhunn amkam khobor asa. Bible sangta: “Sogleo vostu rochpi Dev zaun asa.” (Heb. 3:4) Punn hea sota vorvim amkam Jehova vixim anikui xikonk melltta. Tem mhunnttlear, Jehovan amkam rochleant dekhun amchea vixim taka sogli khobor asa. Toxench, to amchi kallji gheta ani amchea pasot kitem borem tem sogleam-von to bore bhaxen zannam. Tor Jehova amcho Rochnnar zaun asa, hem mullavem sot zannam zalʼlean amchea jivitak ek orth melltta.

5. Koslem sot zannam zalʼlean ami khaltim asonk zai mhunn xiktat? (Izaias 45:9-12)

⁵ Toxench Jehova amcho Rochnnar, hem mullavem sot zannam zalʼlean ami khaltim asonk zai mhunn ami xiktat. Udharonnak, Job Jehova add zaitem chukichem uloilo. Tannem apnnacheruch chodd dhean dilem ani apunn sarko asa mhunn to puravo diunk laglo. Tea vellar Jehovan tachea ugddasak haddlem ki to Sorvpodvedar Dev ani Rochnnar zaun asa. (Job 38:1-4) Oxem kelʼlean, Jehova korta tem sodanch sarkem asta mhunn Jobak kollon ailem. Zaitea tempa uprant, provadi Izaiasan oxem boroilem: “Kitem kortai tum? . . . oxem mati aplea kumbarak mhonntta kai?”—Izaias 45:9-12 vachat.

6. Amcho Rochnnar khub xoktivont ani zannvaien bhorlolo asa, hacher khas korun konnem dhean divop gorjechem, ani kiteak? (Chitram pasun polloiat.)

⁶ Zaitea vorsam thaun Jehovachi seva kelʼlo munis, Jehovacher ani tachea Utrant melltta tea margdorxonacher dhean diunchea bodlek aplea chintpacher chodduch dhean diunk xokta. (Job 37:23, 24) Punn aplea Rochnnara vixim bariksannen chintlolean ani to khub xoktivont ani zannvaien bhorlolo asa mhunn dhean dilolean tea munxak koxi modot zatoli? (Iz. 40:22; 55:8, 9) Hem mhotvachem sot zannam zalʼlean, aplea chintpa poros Jehovachem chintop vortem asa mhunn vollkhon gheunk ani khalti ravonk taka modot zatoli.

7. Songottnnen kelʼlo bodlav manun gheunk bhoinn Rahela-n kitem kelem?

⁷ Jehova amcho Rochnnar, hea sota vixim chintlolean, Slovenia-nt ravpi Rahela nanvache eke bhoinnik modot zali. Songottnnen kelʼle bodlav manun gheunk tika kotthin zatalem. Ti sangta: “Fuddakar gheupi bhavamnim kelʼle bodlav manun gheunk, thodde pavtti mhaka kotthin zatalem. Udharonnak, hanvem 2023 Sonchalon Monddolla Thaun Novi Mahiti #8, ho video polloilea uprant pasun, ek bhav khadd dovrun bhaxonn dita tem hanvem poilech pavtti polloilem tednam tem chukichem oxem mhaka distalem. Tor ho bodlav manun gheunk hanvem Jehova lagim magnnem kelem.” Toxench, Jehova amcho Rochnnar, hea sota vixim chintlolean aplem songotton koxem cholounchem tem Jehova sogleam-von bore toren zannam mhunn bhoinnik kollon ailem. Hantuntlean ami kitem xiktat? Songottnnen kelʼle bodlav manun gheunk amkam kotthin zata zalear, ami vell kaddun amcho Rochnnar kitlo xoktivont ani zannvaien bhorlolo asa tea vixim bariksannen chintunk zai.—Rom. 11:33-36.

DEVAN DUKH-TRAS KITEAK KADDUNK NANT

8. Devan dukh-tras kiteak kaddunk nant hem sot zannam zalʼlean amkam koso faido zala?

⁸ Devan dukh-tras kiteak kaddunk nant? Zaitea lokank hacho zobab mellonk na dekhun tim Devacher ragar asat vo Devuch na oxem tim chintʼtat! (Mho. 19:3) Punn Bible-antlean amkam kollon ailem ki ami patki ani opurnn asat dekhun ami dukh-tras sostat ani mortat. Ani Jehova hacho zobabdar nhoi. Toxench amkam hem-ui kollon ailem ki Jehova pasiens dakhoita ani hea noxttea sonvsaracho tannem nas korunk na dekhun lakʼkhamnim lokank tachi vollokh mellʼllea ani to dukh-tras koso kaddun uddoitolo tem zannam zaunk sondhi mellʼllea. (2 Ped. 3:9, 15) Him sotam zannam zalʼlean amkam bhuzvonn melltta ani ami Devak anikui lagim sortat.

9. Jehova dukh-tras kiteak kaddun uddoina hem ami khas korun kednam chodd ugddas korunk zai?

⁹ Jehova dukh-tras kaddun uddoitolo to dis ieum meren ami pasiens dakhounchi goroz asa. Punn amcho mogacho konnui morta, vo amkam vo amchea familik onʼneai vo oddchonneo sosunk poddttat tednam, Jehova kiteak itlo vell gheta mhunn chintun ami niraxi zait. (Hab. 1:2, 3) Oslea vellar, nitivont lokancher ietat te tras Jehova kiteak kaddun uddoina, tea karonnam vixim ami niall korunk zai.a (St. 34:19) Toxench, to fuddarak purnn toren dukh-tras kaddun uddoitolo mhunn ami ugddas dovrunk zai.

10. Bhoinn Anne-ak bhuzvonn koxi mellʼlli?

¹⁰ Devan azunui dukh-tras kiteak kaddunk nant tea vixim sot zannam zalʼlean amcher ietat te dukh-tras sosunk amkam modot zata. Hea vixim, Indian Ocean-ant, Mayotte zunvear ravpi, bhoinn Anne-acho onnbhov asa. Ti mhunntta: “Thoddea vorsam poilim mhoji avoi bhair poddli tednam hanv khub dukhi aslem. Punn dukh-trasancho Jehova zobabdar na mhunn hanv porot-porot ugddas kortalem. Khorem mhunnttlear, Jehova sogle dukh-tras kaddun uddounk ani bhair poddlolea amchea mogacheank jivont korunk axeun ravla. Hea sotancher niall kelolean, mhaka itle dukh-tras asonui monachi xanti melltta.”

11. Jehovan dukh-tras kiteak kaddunk nant, hea vixim sot zannam zalʼlean porgottnni korit ravonk amkam koxi modot zata?

¹¹ Toxench Jehovan dukh-tras kiteak kaddunk nant, hea vixim sot zannam zalʼlean porgottnni korit ravonk amkam urba melltta. Lok poschatap korun salvar zalʼlo Jehovak zai dekhun to pasiens dakhoita hem somzailea uprant, Pedrun oxem mhunnttlem: “Tumi kosle toreche lok asonk zai tem chintat. Tumchi vagnnuk povitr asonk zai ani tumi Devache bhoktek zuddlolim kamam korunk zai.” (2 Ped. 3:11) ‘Devache bhoktek zuddlolea kamamnim’ amchem porgottnnechem kam mellon asa. Jehova pasiens dakhoun amchea vattarant aslolea lokank apli bhokti korunk sondhi dita. Jehova bhaxen ami pasun lokancho mog kortat ani tim novea sonvsarant jielʼlim amkam zai. Tor Deva sangata kam korpi zaun zata titlea lokank xevott ieunchea poilim tache vixim zannam zaunk modot korunk amkam ek vhodd sueog asa!—1 Kor. 3:9.

AMI “NIMANNEA DISAMNIM” JIETAT

12. Ami “nimannea disamnim” jietat hem sot zannam zalʼlean amkam koso faido zala?

¹² “Nimannea disamnim” lok koxe astole tem Bible-ant spoxtt toren sanglolem asa. (2 Tim. 3:1-5) Amchea bhonvtonnim lok koxe vagtat tem ami polloitat tednam, Bible-ant sanglam tem sarkem mhunn amkam kollon ieta. Toxench lokancho sobhav ani tanchi vagnnuk disan-dis vaitt zait asa. Hantuntlean, Devachem utor visvas dovorpa sarkem mhunn amchi khatri anikui vaddtta.—2 Tim. 3:13-15.

13. Lukas 12:15-21-ant, Jezun sangloli vopar monant dovrun ami amkanch kosle prosn vicharunk zatat?

¹³ Toxench ami nimannea disamnim jietat hem sot zannam zalʼlean amcho vell bore toren uzar korunk amkam modot zata. Oxem korop kiteak mhotvachem tem amkam Lukas 12:15-21-ant, Jezun sanglolea vopari thaun kolltta. (Vachat.) Hea versant tea munxak ‘murkh’ mhunnttla. Kiteak? To girest aslolo dekhun nhoi, punn to aplo vell bore toren uzar korinaslo hea karonnak lagon. ‘To girestkai ektthaim korunk vavurtalo punn Devache nodren girest zaunk vavr korinaslo.’ Oxem korop kiteak dhokeachem aslem? Karonn Devan taka mhunnttlem: “Aiz rati tum morpacho asa.” Hea vopari thaun ami kitem xiktat? Xevott ieunk aiz chodd vell uronk na, tea pasot ami amkanch he prosn vicharunk zai: ‘Hanvem je dhei dovorleat tea vorvim hanv mhozo vell bore toren uzar kortam mhunn dison ieta kai? Hanv mhojea bhurgeank kosle dhei dovrunk urba ditam? Hanv mhozo vell, takot ani mhoje lagim asat teo vostu girestkai ektthaim korunk uzar kortam kai vo Devache nodren girest zaunk uzar kortam?’

14. Ami nimannea disamnim jietat hem ugddas dovrop kiteak mhotvachem tea vixim bhoinn Miki-chea onnbhovantlean ami kitem xiktat?

¹⁴ Ami khoreaninch nimannea disamnim jietat mhunn ami bariksannen niall kortat tednam amchem jivit bore bhaxen uzar korunk amkam modot zata. Hea vixim amkam bhoinn Miki-cho onnbhov asa. Ti sangta: “Mhojem iskol zalea uprant mhaka zonvaram vixim anik xikonk zai aslem. Punn teach borabor mhaka porgottnnaranchi chodd goroz asa thoim vochon niemit pioneer mhunn seva korunk zai aslem. Punn mhojean hem donui korunk zatolem kai mhunn bariksannen chintunk sobhentlea thoddea bhav-bhoinnamnim mhaka modot keli. Tannim mhojea ugddasak haddlem ki hea noxttea sonvsaracho beginuch nas zauncho asa. Ani novea sonvsarant soglea zonvaram vixim mhaka sodankal xikonk sondhi mellttoli. Tor hanvem ek lhan kors korunk vinchun kaddlo, jea vorvim hanv thoddeo kola xikonk pavlem ani mhaka ek kam mellʼllem. Oxe toren, niemit pioneer seva kortana mhaka modot zali ani uprant Ecuador-ant porgottnnaranchi chodd goroz asa thoim vochon seva korunk mhaka sondhi mellʼlli. Aiz Miki ani ticho ghov tea desant sorkittachem kam kortat.

15. Bori khobor aikonk fattim sortat tankam porgottit ravonk Jakobachem udharonn amkam koxem modot kortolem? (Chitram pasun polloiat.)

¹⁵ Lok bori khobor aikonk nakartat mhunn ami niraxi zaunchem nhoi, karonn te bodlonk xoktat. Hea vixim amkam Jezucho sovto bhav, Jakobachem udharonn asa. To Jezu sangata vaddlolo ani Mesiasa vixim kelʼleo bhasaunneo Jezu sovem purnn zaleo tem tannem polloilem. Toxench, Jezun vizmitam kelim ani sogleam-von bore toren xikoilʼlem tem-ui tannem polloilem. Tori astana, tea vellar to Jezucho xis zaunk na. Punn Jezu jivont zalea uprantuch to tacho urbevont xis zalo!b (Ju. 7:5; Gal. 2:9) Hantuntlean ami kitem xiktat? Ami sotant naslolea amchea ghorcheank zaite pavtti bori khobor sanglea astoli, punn tannim ti aikonk na zait. Tori astana, ami nimannea disamnim ravtat ani porgottnnechem kam khub mhotvachem asa hem ugddas dovorlolean ami tankam porgottit ravtolim. Ami tankam kitem sangtat tem tim atam aikonant zalear pasun, vhodd sonkoxtt suru zalea uprant tankam to ugddas ieunk xokta ani tim bodlonk xokta.c

MULLAVEA SOTAM PASOT UPKARI RAVAT

16. Jehova xikoita tea mullavea sotam thaun tumkam koso faido zala? (“Bible-antlim Sotam Dusreank Koxim Somzaunk Zatat?” hem boks pasun polloiat.)

¹⁶ Amchem songotton oslea lokank pasun Bible-antlean xikounn dita zankam Bible-a vixim chodd khobor na. Udharonnak, dor sumanak aslolem jahir bhaxonn, jw.org-acher aslole thodde lekh ani video, ani songottnnechim jahir masikam khas korun Sakxi nasloleam pasot asat. Torui, tanchea vorvim amkam-i faido zata. Zoxem Jehova pasot amcho mog anikui vaddtta, tachea Utracher amcho bhavarth anik ghott zata, toxench Bible-antlim mullavim sotam anik bore toren xikounk amkam modot zata.—St. 19:7.

17. Khoinchea poristhitimnim ami Bible-antlea mullavea sotancher dhean diunk zai?

¹⁷ Jehovachim Sakxi zalolean amkam Bible-achea sotam vixim novi somzonni melltta tednam ami khub khuxal zatat. Punn Bible-achea mullavea sotam pasotui ami khub upkari asat, jea vorvim ami Jehovak lagim soronk pavlim. Ami polloilem toxem him sotam amkam aizui modot korunk xoktat. Zoxem, songottnnen dilʼlea margdorxona poros amchem chintop vegllem asta tednam, amcho Rochnnar Jehova, zo zannvaien bhorlolo ani khub xoktivont asa, to hem songotton choloita mhunn ami khaltikaien manun ghetat. Toxench, Jehovan azunui tras kiteak kaddunk nant hem zannam zalʼlean ami vo amchim mogachim tras sostat tednam pasiens dakhounk amkam modot zata. Tea bhair ami nimannea disamnim jietat hem ugddas dovorlolean amcho vell ani poixe xanneponnan uzar korunk amkam modot zata. Tor, Jehova amkam heo vostu ugddasak haddtta mhunn ami xannim zaunk pavtat ani tachi seva visvaxiponnan korit ravonk pavtat.