Tumi Dhadoxi Ravonk Xikleant Kai?

1. Dhadoxi asop hacho orth kitem, ani kitem nhoi?

TUJEA lagim jem kitem asa tantunuch tum dhadoxi asa kai? Aplea jivitant dhadoxi aslolo munis Jehovan taka besanvam dileant tea pasot upkari asta ani tachem jivit khuxalkaien ani xantin bhorlolem asta. Aplea lagim na tem chintun to niraxi zaina. Punn dhadoxi asop mhunnttlear, ami amchem jivit koxem jietat tacher dhean dinastana ravop oxem-i nhoi. Zoxem eka Kristanvan Jehovache sevent anik chodd vavr korunk dhei dovrunk zai. (Rom. 12:1; 1 Tim. 3:1) Ani taka zai aslolo sueog tannem chintlolo titlea begin mellona zalear pasun tannem niraxi zaunchem nhoi.

2. Ami dhadoxi nant zalear kosle vaitt porinnam zaunk xoktat?

² Punn amchea lagim jem asa tantunuch ami dhadoxi nant zalear ami chukiche nirnnoi gheunk xoktat. Thoddim zannam tanchea lagim jem asa tantunuch dhadoxi nant dekhun tim anikui vostu melloun gheunk dis-rat kam kortat. Punn khorem mhunnttlear, tankam tea vostunchi gorozuch asona. Dukhachem mhunnttlear, thoddea Kristanvamnim pasun poixe ani her vostu chorleat. Tannim aplea monant oxem chintlem zait, ‘Hem mhaka favo aslem,’ ‘hem mhaka borench poilim mellonk zai aslem,’ vo ‘hanv sodʼdheak he poixe vhortam ani uprant te farik kortolom.’ Punn ami khoinchech toren chori korop Jehovak manvona, ani oxem korop tachea nanvak opman haddtta. (Mho. 30:9) Itlench nhoi, thoddim zannam Jehovache sevent tankam zai to sueog mellona dekhun itlim niraxi zalim ki tannim Jehovachi seva koropuch bond keli. (Gal. 6:9) Tor Jehovachim sevokam oxem korchea vixim chintunk pasun koxim xoktat? Ghoddie sovkas-sovkas korun tanchea lagim jem asa tantunt dhadoxi ravop tannim bond kelem zait.

3. Filipkarank 4:11, 12-ntlean ami kitem xiktat?

³ Ami sogleamnim dhadoxi koxem ravonk zata? Apostl Paulun boroilem ki ‘to koslea-i poristhitint dhadoxi ravonk xiklo.’ (Filipkarank 4:11, 12 vachat.) Tannem him utram boroilim tednam to bondkhonnint aslo. Tori astana, tannem apli khuxalkai hogddaunk na. Karonn to dhadoxi ravcho ‘gutt xikonk pavlolo.’ Dhadoxi ravonk amkam kotthin zata zalear, Pauluchea utrantlean ani onnbhovantlean amkam modot zaunk xokta. Punn hem apxinch zaunchem na. Dhadoxi ravonk ami xikonk zai. Koxem? Hea lekhant ami char gunnam vixim polloum-ia jea vorvim amkam dhadoxi ravonk modot zatoli.

UPKAR ATTOIAT

4. Upkari aslear ami dhadoxi koxim ravtolim? (1 Tesalonikekarank 5:18)

⁴ Upkari munis chodd korun dhadoxi asta. (1 Tesalonikekarank 5:18 vachat.) Amchea lagim gorjecheo vostu asat mhunn ami upkari asat zalear, amchea lagim nant teo vostu melloun gheunk ami chodduch usko korchimnant. Toxench, Jehovache sevent amkam aslolea sueoga pasot ami upkari asat zalear, ami ti zobabdari bore toren korunk dhean ditolim ani je sueog amkam nant tea vixim chintit ravchimnant. Upkari asop amkanch faideachem mhunn Jehova zannam. Tea pasot, Bible-ant amkam magnnem korun, tache upkar attounk urba dilea. Ami oxem kortat zalear, amkam ‘Devachi xanti mellttoli ji somzon gheunchea tanki poros vorti asa.’—Filp. 4:6, 7.

5. Jehovache upkari zaunk Izraelitkarank koslim karonnam aslim? (Chitr pasun polloiat.)

⁵ Izraelitkaram sovem kitem ghoddlem tacher dhean diat. Ejipttant mellttalem tem jevonn tankam mellonaslem dekhun tim zaite pavtti gunngunnunk laglim. (Lok. 11:4-6) Oronnʼnneant tanchem jivit kotthin aslem tem khorem, punn Jehovan tanchea pasot kitem kelʼlem tem ugddas korun tannim tache upkar attounk zai asle. Zoxem, tim Ejipttant gulamponnant aslim ani Ejipttkar tanchea koddlean krur toren kam korun ghetale. Tednam Jehovan Ejipttkarancher dha pidda dhaddun Izraelitkarank vanchoilim. Toxench tankam suttka mellʼllea uprant, Jehovan tankam ‘Ejipttachea lokanchi girestkai gheun bhair soronk’ modot keli, zoxem chandi, bhangar ani kopdde. (Sutt. 12:35, 36) Tea bhair, Faraohchi fouz tanchea fattik lagloli ani tim Tambddea Doria lagim pavlim tednam, Jehovan Tambddo Doria doxim korun tankam vanchoilim. Toxench, tim oronnʼnneant aslim tednam, Jehovan tankam dor disak manʼna dilem. Tori astana, Izraelitkaram kiteak gunngunnunk laglim? Tankam jevonn unnem aslem oxem nhoi, punn Jehovan tanchea pasot jem kitem kelʼlem tea pasot tim tache upkari naslim.

6. Ami upkariponn koxem vaddounk zata?

⁶ Ami upkariponn koxem vaddounk xoktat? Poilem, jea vostunk lagon ami khuxal zatat tea vixim chintunk ami dor disak vell kaddunk zai. Tantuntleo don vo tin vostu ami boroun pasun dovrunk zatat. (Vil. 3:22, 23) Dusrem, jednam amchea pasot konnui kitem korta tednam ami tanche upkar attounk zai. Ani chodd mhotvachem mhunnttlear, dor disak ami Jehovache upkar attounk zai. (St. 75:1) Tisrem, ami oslim ixttam vinchun kaddunk zai jim upkari asat. Karonn amchim ixttam onupkari aslear ami-i tanche bhaxen zatolim. Punn amchim ixttam upkari aslear ami pasun upkari astolim. (D.S. 1:26-28; 2 Tim. 3:1, 2, 5) Ami dusreanche upkar attoitat tednam, amchea lagim jem asa tantuntuch ami dhadoxi astolim. Ani jem amchea lagim na tea vixim chintun ami niraxi zaunchimnant.

7. Niraxiponn pois korunk Aci-k koxi modot zali, ani porinnam kitem zalo?

⁷ Indonesia-nt ravpi Aci nanvache bhoinnicho onnbhov polloum-ia. Ti sangta: “COVID-19 pidde vellar, hanv mhoji poristhiti bhav-bhoinnam sangata sor korunk laglem. Tea pasot, hanv niraxi zalem.” (Gal. 6:4) Tor niraxiponn pois korunk tika koxi modot zali? Ti sangta: “Jehova mhaka dor disak koslim besanvam dita ani tachea songottnnecho bhag aslolean mhojea jivitant kitem borem asa, tea vixim hanv chintunk laglem. Ani uprant tea pasot hanvem Jehovache upkar attoile. Oxem kelʼlean, mhaka dhadoxi ravonk modot zali.” Hantuntlean ami kitem xiktat? Amchea poristhitink lagon ami niraxi asat zalear ami bhoinn Aci-chi dekh gheun dhadoxi ravonk xikonk zata.

DHEAN HALONK DIUM NAKAT ANI KHALTIM RAVAT

8. Baruka sovem kitem ghoddlem?

⁸ Ami Barukachem udharonn polloum-ia. Baruk Jeremiasacho secretary aslo ani taka ek khub kotthin kam korchem aslem. Izraelitkaramnim Jehovacheo adnea moddloleo dekhun tanchem kitem zaunchem aslem tem sangonk, Jehovan Jeremiasak uzar kelo. Tednam Baruk taka modot kortalo. Punn eka vellar Barukachem dhean halʼlem. Jehovak apnnem kitem kelʼlem zai tacher dhean diunchea bodlek, svotak kitem zai tacher to chodduch dhean diunk laglo. Punn Jehovan Jeremiasa udexim taka oxem sanglem: “Tum vhodd-vhodd vostu sodhta. Teo vostu sodhop bond kor.” (Jer. 45:3-5, NW) Dusrea utramnim Jehovan Barukak sanglem: “Tujea lagim jem kitem asa tantunuch dhadoxi rav.” Barukan Jehovacho ho solʼlo aikolo ani to Jehovacho lagxilʼlo ixtt zaunk pavlo.

9. 1 Korintkarank 4:6, 7-antlean ami kitem xiktat? (Chitram pasun polloiat.)

⁹ Thodde pavtti, eka Kristanvak Jehovache sevent apleak umkoch sueog mellonk zai oxem disot. Taka ghoddie boreo kola asot, to khub vavr korpi asot, vo zaitim vorsam poriant tannem Jehovachi seva kelea zait. Punn taka zai aslolo umkoch sueog dusreank melltta tednam niraxi zaina zaunk tannem kitem korunk zata? Tannem 1 Korintkarank 4:6, 7-ant, apostl Paulun kitem boroilʼlem tem ugddas korunk zata. (Vachat.) Amkam aslolo dor ek sueog ani kola Jehovan dilea. Ami dusream poros khas asat oxem nhoi, punn Jehovan amkam favo nasloli doia dakhoilea dekhun amkam teo mellʼlleat.—Rom. 12:3, 6; Ef. 2:8, 9.

10. Ami khalti zaunk koxem xikonk zata?

¹⁰ Jezu vixim chintlear ani tachem udharonn apnnailear ami khaltim zaunk xiktolim. Apunn Devacho Put ani apleak zaito odhikar asa tem zannam zaunui tannem aplea xisanche paim dhuile. Hea vixim apostl Juanvan oxem boroilem: [1] “Bapan sogleo vostu aplea hatant ghatleat ani [2] apunn Deva thaun aila [3] ani Deva lagim voita hem zannam zaun Jezu . . . xisanche paim dhuvunk laglo.” (Ju. 13:3-5) Xisamnim aple paim dhuvunk zai oxem Jezu chintunk xoktalo. Punn tannem toxem chintunk na. Toxench, aplea lagim ek vhoddlem ghor asonk zai, zaite poixe asonk zai ani apnnem susegad jivit jieunk zai, oxem-i tannem chintunk na. (Luk. 9:58) To sodanch khalti aslo ani aplea lagim jem asa tantuntuch dhadoxi aslo. Tor hea vixim tannem amkam ek borem udharonn dovorlam.—Ju. 13:15.

11. Bhav Dennis-ak dhadoxi ravonk koxi modot zali?

¹¹ Netherlands-ant ravpi bhav Dennis, Jezuchi dekh gheun khalti ravonk khub vavr korta. Punn oxem korop taka sompem asona. To sangta: “Mhaka zai aslolo umkoch sueog dusreank melltta tednam, ho mhaka favo aslolo mhunn chintun, hanv thodde pavtti bejar zatam. Oslea vellar, khaltikai, hea vixoi-acher hanv obheas kortam. Hanvem JW Library^® app-ant, khaltikaie vixim thoddim versam tag korun dovorleant. Hea vorvim, mhaka tim rokddinch mellttat ani hanv tim vachunk lagtam. Toxench, hanvem mhojea fonant khaltikaie vixim thoddim bhaxonnam download korun dovorleant, jim hanv zaite pavtti aikotam.a Hanv xikonk pavlom ki hanv jem kitem kortam, tem hanvem Jehovak vakhannʼnni haddunk korunk zai, dusreanchem dhean mhojer haddunk nhoi. Jehova doia dakhoun aplem kam korunk amkam ek sondhi dita, punn khorem mhunnttlear, tem kam takach lagon zaunk pavta.” Tor amkam zai aslolo umkoch sueog amkam mellona tednam ami bejar zatat zalear, ami khaltim ravonk anikui vavr korit ravonk zai. Oxem kelʼlean, Jehova sangata amchi ixttagot ghott zatoli ani amchea lagim jem asa tantuntuch ami dhadoxi ravonk xiktolim.—Jak. 4:6, 8.

FUDDARACHEA BHORVONXEACHER NIALL KORAT

12. Fuddarachea khoinchea bhorvonxeacher dhean dilʼlean amkam atam dhadoxi ravonk modot zata? (Izaias 65:21-25)

¹² Fuddarachea bhorvonxeacher dhean dilolean amkam atam dhadoxi ravonk modot zatoli. Amkam koslea trasancho fuddo korunk poddtta tem Jehova zannam ani to beginuch te kaddun uddoitolo mhunn bhas dita. (Izaias 65:21-25 vachat.) Tea vellar, amkam dor ekleak ek sobit ghor, borem kam ani bholaikek boreak poddtta toslem jevonn astolem. Tea bhair, thoim amkam vo amchea bhurgeank kitem-i vaitt zatolem mhunn bhieunchi goroz aschina. (Iz. 32:17, 18; Ez. 34:25) Jehovan sangloli fuddarachi dor ek bhasaunni purnn zatolich mhunn ami tacher ghott visvas dovrunk zata.

13. Ami khas korun khoinchea poristhitimnim amchea bhorvonxeacher dhean diunk zai?

¹³ Poilim poros atam ami amchea bhorvonxeacher dhean divop chodd mhotvachem zaun asa. Karonn ami “nimannea disamnim” jietat ani amkam sogleank osleo oddchonneo asat, zancho “fuddo korop khub kotthin” zaun asa. (2 Tim. 3:1) He tras sosunk Jehova amkam margdorxon ani ghottai dita ani modot korta. (St. 145:14) Toxench, amchea bhorvonxeak lagon amkam oddchonneancho fuddo korunk modot zata. Ghoddie tumkam tumchea familicheo gorzo purnn korunk kotthin zata zait. Tumchi hi poristhiti sodanch oxich urtoli kai? Na. Karonn novea sonvsarant Jehova tumcheo gorzoch nhoi, punn tumkam anikui zaiteo vostu ditolo. (St. 9:18; 72:12-14) Tumi dor disak khub dukh sostat zait, vo niraxi asat zait, vo tumkam ek gombhir duens zalam zait. Punn hem soglem tumkam sodanch sosunk poddttolem? Na. Novea sonvsarant duensam ani moronn aschem na! (Prok. 21:3, 4) Ani ho bhorvonso, amkam aslolea trasank lagon niraxi vo ragar zaina zaunk atam amkam modot korta. Tor jednam amkam onʼneai sosunk poddtta vo amcho konnui mogacho bhair poddtta, vo amchea jivitant anik kosle-i tras ietat tednam, tea bhorvonxeak lagon ami dhadoxi astat ani amkam monachi xanti asta. Tor atam ami kitli-i kotthin poristhiticho fuddo kelear ti fokot ‘thoddeach vellachi’ ani novea sonvsarant kednanch tras aschem nant mhunn amkam khatri melltta.—2 Kor. 4:17, 18.

14. Ami amcho bhorvonso ghott koso korunk zata?

¹⁴ Dhadoxi ravonk fuddaracho bhorvonso amkam modot korta. Tor ho bhorvonso ami koso ghott korunk zata? Pois asloleo vostu anik spoxtt toren pollounk eka munxak vokl ghalunk poddot. Teach bhaxen, fuddara vixim Jehovan jem bhasailam tem purnn zatolench mhunn amcho bhorvonso ghott korunk amkam thoddim panvlam gheunk poddot. Udharonnak, amkam poixeam vixim usko zata tednam, ami novea sonvsara vixim chintunk zata, jednam poixe aschenant ani konnuch gorib aschona. Toxench, Jehovache sevent amkam ek umkoch sueog mellona mhunn ami niraxi zatat tednam, novea sonvsarant poripurnn zaun, amkam hozaramnim vorsam Jehovachi seva korunk mellttoli tea sueoga vixim ami chintunk zata. Oxem kelolean, amkam zata to usko ami pois korunk pavtolim. (1 Tim. 6:19) Ami sodʼdheak ghoddie zaitea vostum vixim usko kortat astolim, zaka lagon fuddarachea bhorvonxeacher dhean diunk amkam kotthin zata astolem. Punn tea bhorvonxea vixim ami jitlim chodd chintʼtolim titlench tacher dhean diunk amkam sompem zatolem ani ami chodd usko korchimnant.

15. Christa-chea onnbhovantlean tumi kitem xiklim?

¹⁵ Fuddarachea bhorvonxeacher dhean dilolean bhoinn Christa-k koxi modot zali tacher dhean dium-ia. Ti bhav Dennis-achi bail, zache vixim ami hea lekhant poilim uloilʼlim. Ti mhunntta: “Mhaka ek oslem duens asa, zaka lagon mhoje kuddiche muscles ekdom oskot zatat. Mhojean cholonk zaina dekhun mhaka wheelchair uzar korunk poddtta ani choddxe pavtti hanv beddicheruch astam. Mhaka dor disak khub dukh sosunk poddtta. Halinch mhojea dotoran sanglem ki hanv anik borem zatolem mhunn gerentti na. Punn hanvem rokddoch ho ugddas kelo ki fuddara vixim mhaka zo bhorvonso asa tea vixim taka khobor na. Hea bhorvonxeacher dhean dilolean mhaka monachi xanti melltta. Aiz hea sonvsarant mhaka khub tras sosunk poddtta tem khorem, punn novea sonvsarant mhaka ekdom bori bholaiki astoli!”

“TACHI BHOKTI KORTOLEANK KAICH UNNEM NA”

16. Jehovachi bhokti kortoleank “kaich unnem na” mhunn Raza Davidan kiteak boroilem?

¹⁶ Amkam tras aslear pasun ami dhadoxi ravonk xoktat. Hea vixim amkam Raza Davidachem udharonn asa. Tachim tin tori bhurgim bhair poddlolim. Lokamnim tacher khotto arop ghatlolo ani tachea ixttamnim taka ghat kelʼlo. Itlench nhoi, ek raza tacho jiv kaddunk sodhtalo dekhun taka zaitim vorsam pollon vochonk poddlem. He sogle tras asonui David dhadoxi aslo. Tea pasot tannem Jehova vixim oxem mhunnttlem: “Tachi bhokti kortoleank kaich unnem na.” (St. 34:9, 10) David oxem kiteak mhunnonk pavlo? Karonn, aplea jivitant oddchonneo aslear pasun apleak khorench kiteachi goroz asa tem Jehova ditolo mhunn taka khatri asli. (St. 145:16) Jehovan Davidak modot keli toxi, trasanchea vellar apleak visvaxi ravonk to amkam-i modot kortolo mhunn ami tacher visvas dovrunk zata. Ani oxem kelear, oddchonneo aslear pasun ami dhadoxi astolim.

17. Tumi kiteak dhadoxi ravonk sodhtat?

¹⁷ Ami dhadoxi aslolim Jehovak zai. (St. 131:1, 2) Tor dhadoxi asonk amchean zata tem soglem ami korum-ia. Tem mhunnttlear, ami upkariponn vaddoum-ia, amchem dhean halonk diunchem nhoi, khaltim ravom-ia ani fuddarachea bhorvonxeacher amcho visvas ghott korum-ia. Oxem kelolean ami mhunnonk pavtolim: “Hoi! Hanv dhadoxi asam!”—St. 16:5, 6, NW.