Eka-mekak Man Dium-ia

1. Dusrim amkam man ditat tednam amkam kiteak borem dista? (Mhonn’nneo 22:1, NW)

DUSRIM amkam man ditat tednam amkam borem dista nhoi? Khorem mhunnttlear amkam sogleank dusreamnim amkam man dilʼlo zai. Man melltta tednam ami khuxal zatat. Tea pasot Bible sangta: “Chandi ani bhangra poros man melloun ghevop odik borem”!—Mhonnʼnneo 22:1, NWa vachat.

2-3. Dusreank man diunk amkam kiteak kotthin zaunk xokta, ani hea lekhant ami kitem polloitolim?

² Punn thodde pavtti dusreank man diunk amkam kotthin zaunk xokta. Hachem ek karonn mhunnttlear, amkam dusreancheo chuki dixtti poddttat. Toxench, aiz amchea bhonvtonnim aslolo choddso lok dusreank man dina. Punn ami tanchea poros vegllim asonk zai. Karonn ami “soglea torechea lokank” man dil’lo Jehovak zai.—1 Ped. 2:17.

³ Tor hea lekhant dusreank man divop mhunnttlear kitem ani ami (1) familint, (2) sobhent, ani (3) Sakxi nant tea lokank koso man diunk zata tem polloum-ia. Ani khas korun kotthin aslear pasun ami dusreank koso man diunk zata tacher dhean dium-ia.

DUSREANK MAN DIVOP MHUNNTTLEAR KITEM?

4. Dusreank man divop mhunnttlear kitem?

⁴ Dusreank man divop mhunnttlear, tanche vixim borem chintop ani tanchea sangata bore toren vagop. Bore gunn asat ani borim kamam kortat tankam ami man ditat. Toxench, amcher thoddo odhikar asta tankam pasun ami man ditat. Ani hem ami korunk zai mhunn nhoi, punn kallzant thaun kortat.—Mt. 15:8.

5. Ami dusreank kiteak man ditat?

⁵ Ami dusreank man dil’lo Jehovak zai. Udharonnak ‘amcher odhikar asloleank’ to amkam man diunk sangta. (Rom. 13:1, 7) Punn thoddim ghoddie oxem mhunnot: “Dusrim sarkem asa tem kortat zalearuch hanv tankam man ditolom.” Punn oxem chintop sarkem asa kai? Na. Jehovachim sevokam zalolean, dusrim kitem kortat vo korinant taka lagon nhoi, punn ami Jehovacho mog kortat ani taka khuxal korunk sodhtat dekhun ami dusreank man ditat.—Josh. 4:14; 1 Ped. 3:15.

6. Dusrim amkam man dinant zalear pasun ami tankam man diunk xoktat kai? Somzaiat. ( Chitr pasun polloiat.)

⁶ Punn thoddim ghoddie oxem chintit: ‘Dusrim amkam man dinant zalear pasun, ami tankam man diunk xoktat kai?’ Hoi. Hea vixim thoddim udharonnam polloum-ia. Raza Saulu aplo put Jonathana sangata dusream hujir ekdom krur toren uloilo. (1 Sam. 20:30-34) Torui, Jonathanan moro poriant taka man dilo ani zhuzant taka tenko dilo. (Sutt. 20:12; 2 Sam. 1:23) Toxench Mha-iadnik Eliche put vaitt kamam kortale. Ani bapui toxench Mha-iadnik zalʼlean Elin tankam xist diunk zai asli. Punn to toxem korinaslo mhunn akʼkhea Izraelak khobor asli. (1 Sam. 1:15-18; 2:22-24) Hana pasun hem zannam asli. Torui, ti pieun tombunt ailea mhunn Elin ticher arop ghatlo tednam tinnem tacho opman korunk na, punn taka man dilo. (1 Sam. 1:12-14) Tea bhair Athenachea thoddea munxamnim apostl Pauluk ‘boddbodd korpi’ mhunnon tacho opman kelo. (D.I. 17:18) Torui, Paulu tanchea sangata respedan uloilo. (D.I. 17:22) Tor hea udharonnantlean, ami kallzantlean Jehovacho mog kortat ani taka manvota tench korunk sodhtat tednam, kotthin aslear pasun ami dusreank man ditolim. Tor ami konnank man diunk zai ani kiteak tem atam polloum-ia.

FAMILINT MAN DIAT

7. Familint eka-mekak man diunk kiteak kotthin zait?

⁷ Man diunk kiteak kotthin zait? Ami familint eka-meka sangata khub vell sartat dekhun amkam eka-mekache bore gunn toxench unneponnam dison ietat. Toxench familintlo konnui duent asta vo konnakui khub usko zata tednam tanchi kallji gheunk amkam kotthin zait. Tea bhair, familintlim thoddim eka-mekak dukhoitat toslem kitem-i mhunnot vo korit. Khorem mhunnttlear, familint ekvott ani xanti asonk zai. Punn familint eka-meka sangata respedan uloinant tednam tim eka-mekacher ragar zaunk xoktat ani familicho ekvott piddʼddear zaunk xokta. Ek famil ami amchea kuddik sor korunk zata. Ami duent asat zalear amchi kudd bore toren kam korina tea bhaxen, ami eka-mekak man dinant zalear familint ekvott urona. Punn zaitea duensank ilaz asa tea bhaxen familint ami eka-mekak man diunk xikonk zata.

8. Familik man divop kiteak mhotvachem? (1 Timotak 5:4, 8)

⁸ Man kiteak diunk zai? (1 Timotak 5:4, 8 vachat.) Timotak boroilʼlea poilea chittint, apostl Paulun ami amchea ghorcheanchi kallji gheun “Deva pasot apli bhokti dakhounchi” mhunn sanglem. Paulun somzailem ki ami familik man diunk poddtta mhunn nhoi, punn ami Jehovacho mog kortat ani ho amcho bhoktecho bhag zaun asa dekhun ditat. Familichi manddavoll Jehovan kelea. (Ef. 3:14, 15) Tor ami familintleank man ditat tednam, khorem mhunnttlear famil ghoddoun haddpi Jehova Devak ami man ditat. (1 Tim. 5:4) Hantuntlean familik man divop kitlem mhotvachem tem kolltta.

9. Ghovan ani bailen eka-mekak man koso diunk zata? (Chitram pasun polloiat.)

⁹ Man koso diuncho? Ghovan aplea bailek koso man diunk zata? Tim ekttim asum vo dusream sangata asum, ti apleak moladik asa mhunn to dakhoitolo. (Mho. 31:28; 1 Ped. 3:7) Toxench to ticher kednanch hat ubarchona, tika lojent ghalchona, vo ti kainch faideachi nhoi oxem tika bhogonk diuncho na. Hea vixim Argentina-nt ravpi bhav Arielb sangta: “Mhojea bailechea duensak lagon ti thodde pavtti mhaka dukhoita toslim utram uloita. Punn oslea vellar ti kallzantlean toxem mhunnonk sodhina mhunn hanv ugddasak haddttam. Toxench hanv 1 Korintkarank 13:5, mhojea monant haddttam. Hea vorvim tichea sangata ragan nhoi punn respedan ulounk mhaka modot zata.” (Mho. 19:11) Bailen aplea ghovak koso man diunk zata? Ti sodanch tache vixim borem tench uloitoli. (Ef. 5:33) Toxench, ti taka tomnne marchi na ani tachim fokannam vo opman korchi na. Karonn oxem kelear tanchem kazari jivit piddʼddear zatolem mhunn ti ugddas dovorta. (Mho. 14:1) Hea vixim amkam Italy-ntlea eke bhoinnicho onnbhov asa. Ti sangta: “Thodde pavtti mhozo ghov gorje bhair chodduch usko korta oxem mhaka dista. Poilim oxem zatalem tednam mhojea utram vorvim ani tonddachea hav-bhava vorvim hanv taka man dina mhunn dison ietalem. Punn atam hanv oslea ixttam sangata vell sartam jim eka-meka lagim respedan uloitat. Ani oxem kelʼlean mhojea ghovak anikui man diunk mhaka modot zalea.”

10. Bhurgeamnim avoi-bapaik man ditat mhunn koxem dakhounk zata?

¹⁰ Bhurgeamnim avoi-bapaik koso man diunk zata? Avoi-bapui famili pasot je kaide kortat te bhurgeamnim pallunk zai. (Ef. 6:1-3) Toxench tannim avoi-bapai sangata respedan ulounk zai. (Sutt. 21:17) Avoi-bapui zannttim zait voitat toxim, tankam aplea bhurgeanchi anikui chodd goroz poddot. Tor tanchi kallji gheun bhurgeamnim tankam man diunk zai. Bhoinn Maria-n, bhurgeam pasot ek borem udharonn dovorla. Ticho daddy Jehovacho Sakxi na. To duent poddlo tednam to tichea sangata krur toren vagtalo. Ani bhoinnik tachi kallji gheunk anikui kotthin zatalem. Maria sangta: “Mhojea daddy-k man diunkuch nhoi, punn taka man dita mhunn dakhounk pasun hanv Jehova lagim magnnem kortalem. Jehovan mhaka mhojea mummy-daddy-k man diunk sanglam zalear, toxem korunk to mhaka modot kortolo mhunn hanv zannam. Vell soron gelo toso hanv xiklem ki, mhozo daddy mhojea sangata krur toren vagta zalear pasun hanvem taka man diunk zai.” Tor kotthin aslear pasun ami familik man ditat tednam ami Jehovachea manddavollik man ditat mhunn dakhoitat.

BHAV-BHOINNANK MAN DIAT

11. Bhav-bhoinnank man diunk amkam kiteak kotthin zait?

¹¹ Man diunk kiteak kotthin zait? Amchim bhav-bhoinnam Bible-achea dorjeam pormonnem jietat. Punn ek-ek pavtti tim amchea sangata doiall toren vagonant, amchea vixim vaitt chintunk xoktat vo amkam rag haddunk xoktat. Tor ‘oxe toren tim amkam dukhoitat’ tednam tankam man diunk amkam kotthin zaunk xokta. (Kol. 3:13) Tor ami tankam koso man di-it ravonk zata?

12. Bhav-bhoinnank man divop kiteak mhotvachem? (2 Pedru 2:9-12)

¹² Man kiteak diunk zai? (2 Pedru 2:9-12 vachat.) Pedrun aplea dusrea chittint sanglem ki poilea xekddeantlea Kristi sobhentle thodde munis, “Devan zankam apli mhoima dilea” tem mhunnttlear, Kristi vhoddilam vixim vaitt uloitale. He munis kitem uloitale ani kortale tem devdut polloitale. Punn devdut “Jehovak man ditat” dekhun te hea munxam add ekui vaitt utor ulounk nant. Tachea bodlek tanchi zhoddtti korunk tannim Jehovacher soddun dilem. (Rom. 14:10-12; Judas 9 sor korat.) Devdutam koddlean ami kitem xiktat? Te tea virodheam add ulounk nant. Tor Jehovacho mog korpi amchea bhav-bhoinnank man divop anikui kitlem mhotvachem nhoi! Khorem mhunnttlear ami “poilim fuddem soron” tankam man diunk zai. (Rom. 12:10) Karonn oxem kelʼlean ami Jehovak man ditat mhunn dakhoitat.

13-14. Ami bhav-bhoinnank koso man diunk zata? Ek udharonn diat. (Chitram pasun polloiat.)

¹³ Man koso diuncho? Vhoddilamno, bhav-bhoinnank xikoitana tumkam tancho mog asa mhunn dison ieum-di. (Fil. 8, 9) Konnakui solʼlo diuncho poddtta tednam, tumi ragar astana dium nakat. Tachea bodlek to doiallaien diat. Bhoinnimno, tumi dusreancheo chaddio korinastana vo dusreanchem nanv piddʼddear zata toslem kitench uloinastana eka-mekak man diunk zata. (Tit. 2:3-5) Toxench ami sogleamnim vhoddilanchem nirdexon aikon ani te sobhe pasot jim kamam kortat tem mhunnttlear mitting korunk, porgottnnent fuddakar gheunk ani “chukichem panvl” ghetlam tankam modot korunk te zo vavr kortat tachea pasot ami tanche upkar attounk zai. Oxem kelʼlean ami tankam man ditolim.—Gal. 6:1; 1 Tim. 5:17.

¹⁴ Eka vhoddilan Rocio nanvachea eke bhoinnik solʼlo dilo tednam tea bhavak man diunk tika khub kotthin zalem. Bhoinn sangta: “To bhav mhojea sangata doiallaien ulounk na oxem mhaka dislem dekhun hanv bejar zalem. Hanv hem bhailean dakhoinaslem. Punn ghorant astana hanv tachea vixim chukichem uloitalem. Taka mhojem kainch poddon vochonk na oxem mhaka dislem dekhun, hanvem tacho solʼlo nakarlo.” Bhoinnik ticho sobhav bodlunk koxi modot zali? Ti sangta: “Hanv Bible vachop kortalem tednam, 1 Tesalonikekarank 5:12, 13-ntlean mhaka modot zali. Hanv tea bhavak man dinaslem mhunn mhaka kollon ailem tednam, mhojem ontoskornn mhaka sotaunk laglem. Mhozo sobhav bodlunk hanvem Jehova lagim magnnem kelem, ani mhaka modot zata tosli mahiti mellonk prokaxonamnim sodh kelo. Vell soron gelo toso, mhaka kollon ailem ki tea bhavan koslich chuk korunk nasli, punn hanv mhoje vixim chodduch chintʼtalem. Hanv khalti na zalear dusreank man diunk mhaka kotthin zatolem mhunn mhaka kollʼllem. Dusreank man diunk hanv azunui vavr korit asam. Ani Jehova mhojea vavracho valor korta oxem mhaka dista.”

SAKXI NANT TANKAM MAN DIAT

15. Sakxi nant tankam man diunk amkam kiteak kotthin zait?

¹⁵ Man diunk kiteak kotthin zait? Porgottnni kortana amkam zaite pavtti, Bible-acher ani Devacher patienant tosle lok mellttat. (Ef. 4:18) Thoddea zannank lhanponnim thaun jem xikoilʼlem taka lagon tim amchem aikonk sodhinant. Toxench, amchea sangata iskolant xiktat vo kam kortat tantuntlim thoddim zannam khub krur asonk xoktat. Tea bhair, ami iskolant vo kamachea zagear khub vavr kortat astolim. Punn amcheo ttichereo ani patranv amchea kamacho valor korinant tednam, tanchea pasot amcho resped unno zaunk xokta ani ami tanchea sangata doiallaien vagop bond korunk xoktat.

16. Azun poriant Jehovachi seva korinant tankam ami man divop kiteak mhotvachem? (1 Pedru 2:12; 3:15)

¹⁶ Man kiteak diunk zai? Sakxi nant tanchea sangata ami koxim vagtat tacher Jehova dhean dita mhunn ami ugddas dovrunk zai. Apostl Pedrun Kristanvanchea ugddasak haddlolem ki tanchea borea vagnnuke udexim him munxam ‘Devachi mhoima’ korunk xoktat. Tea pasot, amchea bhavartha vixim sangtana ami “movallaien ani kallzantlean man diun” tanche lagim ulounchem mhunn tannem sanglem. (1 Pedru 2:12; 3:15 vachat.) Tor ami konnachea-i lagim uloum, zaum to ek neai korpi vo amcho xezari, ami eka orthan Jehova mukhar asat mhunn ugddas dovrun tankam man diunk zai. Karonn ami kitem uloitat ani koxe toren uloitat tem Jehova polloita ani aikota. Hantuntlean, Sakxi nant tankam man divop kitlem mhotvachem tem amkam kolltta.

17. Azun poriant Jehovachi seva korinant tankam ami koso man diunk zata?

¹⁷ Man koso diuncho? Porgottnni kortana, aiknnareak Bible-a vixim titlem khobor na vo kainch khobor na dekhun, ami tanchea poros huxar asat mhunn kednanch chintchem nhoi. Tache bodlek tim Devak moladik asat mhunn ami ugddas dovrunk zai, ani tankam amchea poros vortim lekhunk zai. (Hag. 2:7; Filp. 2:3) Konnui amcho opman korta tednam, ami tacho opman korcho nhoi. (1 Ped. 2:23) Punn ami chukon tankam dukhoita toxem kitem mhunnttlem zalear, ami rokddench sorry mhunnonk zai. Kamachea zagear ami dusreank koso man diunk zata? Ami koxtti vavr korpi asonk zai. Toxench, patranvachea ani amchea sangata kam kortoleanchea borea gunnancher ami dhean diunk zai. (Tit. 2:9, 10) Ami khub vavr korpi ani promannik astat tednam, munis khuxal zaum vo na zaum, Jehova khuxal zatoloch mhunn ami khatri dovrunk zata!—Kol. 3:22, 23.

18. Dusreank man divop ani ami tankam man ditat mhunn dakhovop kiteak mhotvachem?

¹⁸ Dusreank man diunk ani ami tankam man ditat mhunn dakhounk, zaitim karonnam ami hea lekhant polloilim. Zoxem ami familik man ditat tednam, familicho Mukheli Jehovak man ditat mhunn polloilem. Ami bhav-bhoinnank man ditat tednam, amchea sorginchea Bapak man ditat mhunn polloilem. Ani ami Sakxi nant tankam man ditat tednam, tim ghoddie amcho vorto Dev Jehovak mhoima di-it. Dusrim amkam man dinant zalear pasun ami tankam man ditat tednam, Jehova amkam besanvam ditolo. Karonn tannem oxi bhas dilea: “Mhaka man ditat tankam hanv-ui man ditolom.”—1 Sam. 2:30.