Far Marun Sonvsarbhor Kortat Ti Hinvsa—Hea Vixim Bible Kitem Sangta?

Julay 2022-ant, far marun sonvsarbhor zaiti hinvsa zali:

• “Japan-acho famad rajki fuddari Shinzo Abe [zo poilim Prodhan-Montri aslo] tacho khun zalo tednam tea desantlea lokank dhoko boslo ani sonvsarbhor sogle lok thottakle. Karonn Japan-ant titleo chodd kirmi zainant ani pistol uzar korchea vixim tanche kaide ekdom koddok asat.”—Julay 10, 2022, The Japan Times.

• “Copenhagen-achea shopping mall-ant, ek munxan tig zannank far marun jivexim marlim mhunn Denmark-achea lokank dhoko boslo.”—Julay 4, 2022, Reuters.

• “Dokxinn Afrika: Soweto xarachea eka bar-ant, thoddea dadleanchea eka zomean 15 lokank faran marlim.”—Julay 10, 2022, The Guardian.

• “Julay 4 tarkechea sumanant U.S.-ant sutti asta tednam, 220 lokam poros chodd lokank far marun jivexim marlim.”—Julay 5, 2022, CBS News.

Osli hinvsa kabar zatoli mhunn amkam koslo tori bhorvonso asa kai? Bible hea vixim kitem sangta?

Hinvsa Kabar Zatoli

Ami jietat tea kallak Bible-ant ‘nimanne dis’ mhunnttleat. Ani hea kallar choddso lok ragixtt, krur ani nixttur astolo mhunn sanglam. (2 Timotak 3:1, 3) Ani he lok kortat tea hinvsen bhorlolea kamank lagon, lok aiz bhirantin jietat. (Lukas 21:11) Punn hinvsa kabar zatoli toslo ek vell ietolo, ani ‘lok eka xantichea zagear, surokxit ghoramnim, svosth ravnneamnim jietolim’ mhunn Bible-ant bhas dilʼli asa. (Izaias 32:18) Tor hinvsa koxi kabar zatoli?

Dev noxttea lokancho ani soglea hotʼtearancho nas kortolo.

• “Noxtteank dhortorevele kaddun vhortole.”—Mhonnʼnneo 2:22.

• “Dhonu moddun, bhale tuttoun, ddhal lasun uddoun soglle prithumer [Dev] zhuzam sompoita.”—Stotr 46:9.

Dev soglea munxank xantin jieunk xikoitolo ani hea toren to sogli hinvsa kabar kortolo.

• “Mhojea akʼkhea povitr porvotar konnuch vaitt korcho na vo dusream konnakuch nuksann haddcho na. Doria zoso udkan bhorlolo asa, toso Sorvesporache vollkhin sogllo des upott bhoron ietolo.”—Izaias 11:9.

• Aiz pasun, Dev sonvsarbhor aslolea lokank, ‘torsadi moddun nangor korunk ani bhale moddun koiteo korunk,’ tem mhunnttlear, hinvsa ani hotʼtearam uzar korop nakarunk xikoita.—Mika 4:3.

Fuddarak munxam bhirant nastana jietolim mhunn Bible-ant bhas dilea. Hea vixim anik zannam zaunk, “Freedom From Fear—Is It Possible?” ho lekh vachat.

Hinvsa purnn toren koxi somptoli tem zannam zaunk, “Peace on Earth at Last!” ho lekh vachat.