Setembr—Jivit ani Porgottnni Mittingechea Pustike Pasot Modot

SETEMBR 3-9

DEVACHEA UTRANTLE THEVE | JUANV 1-2

“Jezu Aplem Poilem Vizmit Korta”

(Juanv 2:1-3) Tisrea disa, Galileiachea Kana ganvant ek logn aslem, ani Jezuchi avoi thoi asli. ² Tea lognak Jezuk-ui ani Tachea xisank apovnnem aslem. ³ Soro somplo. Tedna Jezuche avoin Taka mhollem: “Tanche lagim soro na.”

w15 6/15 4 ¶3

Krist—Devachi Xokti

³ Galileiachea Kana ganvant, eka lognak gelʼlo tednam Jezun aplem poilem vizmit kelem. Lognak ailole lok ghoddie chintlolea poros chodd asle astole. Punn kitem-i zaum, soro kabar zalʼlo. Apoilolea lokam modem Jezuchi avoi Maria pasun thoim asli. Marian zaitim vorsam, aplea puta vixim kelʼlea bhakitancher niall kelo astolo, zaka fuddarak ‘Bhov Vhortea Devacho Put’ mhunn vollkhunche asle. (Lukas 1:30-32; 2:52) Jezun dakhoun diunk nant tosleo xokteo taka asat mhunn Maria zannam asli kai? Kana ganvant Mariek ani Jezuk tea novea kazari zhoddpea vixim kakut disli ani tankam loje thaun vanttaunk zai mhunn tim zannam aslim. Poramos korop hi ek zobabdari mhunn Jezu zannam aslo. Tor tannem 100 gallon (380 L) udok, ‘borea soreant’ bodolʼlem. (Juanv 2:3, 6-11 vachat.) Jezun hem vizmit korunkuch zai aslem kai? Na. Taka lokanchi kallji asli ani to aplea sorginchea Bapacho udar kallzacho gunn dakhounk sodhtalo mhunn tannem toxem kelem.

(Juanv 2:4-11) Jezun tika mhollem: “Ostore, tuka ani Mhaka hem kiteak poddlam? Mhozo vell ozun pavunk na.” ⁵ Tache avoin chakrank mhollem: “To sangit titlem-i tumi korat.” ⁶ Thoi, Judevanche xudʼdhi korpache riti pormannem, fatrachim so donnam aslim; dor-ekant char te so kollxe zatale ⁷ Jezun tankam mhollem: “Donnam udkan bhorat.” Ani tannim tim oto-sor bhorlim. ⁸ Tannem tankam mhollem: “Tantlem ilem kaddun logna-utsovachea karbhariak vhorun diat.” Tannim toxem kelem. ⁹ Karbharian soro zalʼlem udok chakun pollelem. To soro khoicho ailo tem to nokllo aslo, punn udok kaddlolem te chakor mat zanno asle. Dekhun karbharian novreak apoun haddlo,¹⁰ ani taka mhollem: “Soglleanger poilo boro soro ditat, ani lok borench pietoch, holko to vanttʼtat. Punn tunvem boro soro atam porian dovorlai.” ¹¹ Hi aplea khunnam modli poili khunna Jezun Galileiachea Kana ganvant keli, ani Apli mhoima fankoili; ani Tachea xisamnim Tacher bhavarth tthevlo.

jy 41 ¶6

Aplem Poilem Vizmit Korta

Hem Jezun kelʼlem poilem vizmit. Tachea novea xisamnim hem vizmit polloilem tednam, tancho bhavarth anik ghott zalo. Uprant, Jezu, tachi avoi ani tache bhav Galileichea utʼtore poschim vatten aslolea Kapernaum xarant voitat.

Bible-ant Motiam Sodhum-ia

(Juanv 1:1) Orombak soglle rochnne adim, Sobd aslo, ani Sobd Deva sovem aslo ani Sobd Dev aslo.

bh 233 pera. 2

Udharonnak, odheai 1 ani vers 18-ant Juanv mhunntta, “Devak [Sorvpodvedar] konnem kodinch polleunk na.” Punn Jezuk munxamnim polloila, ani takach lagon Juanv sangta, “Sobd monis zaun dixtti poddlo: ani oxem Tannem amche modem tthikann kelem. Tachi mhoima ami dekhlea.” (Juanv 1:14) Toxem zalear, Put Sorvpodvedar Devacho ek bhag mhunn koxem mhunno ieta? Juanvan, “Sobd Deva sovem aslo” mhunn sanglam. Toxem zalear, to ani Dev, ek koso asonk xokta? Juanv 17:3-ant, Bap ani put eka-meka pasun veglle mhunn Jezun sarkem dakhoun dilem. Thoinch, to aplea Bapak ‘ekloch khoro Dev’ mhunntta. Ani xevottak Juanv sangta, “Jezu khoreponnim Krist ani Devacho Put mhunn tumi bhavarth dhorche khatir heo vostu boroun dovorleat.” (Juanv 20:31) Hanga Jezuk Devacho Put mhunnttla, Dev nhoi. Juanvachea pustokant dilolea hea odik mahiti voilean, Juanv 1:1-ant boroilam tem koxem somzochem tem amkam kollon ieta. Tantunt, Jezuk Sobd vo ek dev mhunnttla karonn taka podvi asa. Punn to Deva sarko Sorvpodvedar nhoi.

(Juanv 1:29) Dusrea disa, Juanvan Jezuk apnna-xim ieta to dekhlo ani mhollem: “Polleiat, ho Devacho Menddro, sonvsarachem pap kaddta to!

nwtsty obheasachi ttipnni Ju. 1:29

Devacho Menddro: Jezun bautizm ghetlea uprant ani Devcharan tacher tallnni haddlea uprant, Juanv Batistan Jezu “Devacho Menddro” mhunn tachi vollokh dili. Him utram amkam fokot hea versant ani Ju. 1: 36-ant vachunk mellttat. (App. A7-E polloi.) Jezuk ek menddro mhunn sor kela tem sarkem asa. Karonn Bible-ant polloilear, patok manun ghetlam mhunn dakhounk ani Devachi maniotai portun mellonk lagon menddro bolidan kortale. Hem, Jezu fuddarak munxakulla pasot aplem poripurnn jivit bolidan kortolo tem dakhoun ditalem. “Devacho Menddro” him utram, Bible-ant veg-vegllea zagear zoim menddrea vixim sanglam, taka suchit korunk xokta. Juanv Batist-ak Hebrev Bhaxen Boroilolea Pustokanchi bori vollokh asli dekhun, to him utram sangtana: Abrahaman Izakachea bodlek bhettoilolea menddreak suchit kortalo zait (Ut. 22:13), gulamponnim aslolea Israelitkarank Ejiptantlean suttka diunk bhettoilʼlolea Paskachea menddreak suchit kortalo zait (Sutt. 12:1-13), vo dor sokallim ani sanjer Jerusalemant Devachea vedicher bhettoilolea menddreak suchit kortalo astolo (Sutt. 29:38-42). Juanvachea monant Izaiasachem bhakit pasun ugddasak ailem astolem, zoim Jehova ‘mhozo sevok’ mhunn apoita, taka eka “lhan-menddrea sarko” marunk vhortole mhunn sanglam. (Iz. 52:13; 53:5, 7, 11) Apostl Paulun Korintkarank apli poili chitt boroiloli tednam, tannem Jezuk ‘amcho Paskacho Menddro’ mhunnttlo. (1Kor. 5:7) Apostl Pedrun, ‘Kristachem omolik rogot, nixkollonk ani khotavinn Menddrea’ sarkem mhunn sanglem. (1Ped. 1:19) Ani Prokasovnni pustokant 25 poros chodd pavtti, mhoimebhorit zalolea Jezuk ‘Menddro’ mhunn suchit kela.—Thoddim udharonnam: Prok. 5:8; 6:1; 7:9; 12:11; 13:8; 14:1; 15:3; 17:14; 19:7; 21:9; 22:1.

SETEMBR 10-16

DEVACHEA UTRANTLE THEVE | JUANV 3-4

“Jezu Samariekar Bailek Sakx Dita”

(Juanv 4:6, 7) Jakobachi bai thoi asli, ani Jezu, cholun-cholun thoklolo dekhun, baichea kanttar boslo. Sumar donpar zalʼlo. ⁷ Samariechi ek bail udok kaddunk thoi aili. Jezun tika mhollem: “Mhaka ilem pieunk dixi?”

nwtsty obheasachi ttipnni Ju. 4:6

thoklolo: Bible-ant hea ekuch versant, Jezu “thoklolo” mhunn sanglam. Donparchim sumar 12:00 voram zalʼlim ani ghoddie teach disa sokallim, Jezun Judeia-ant aslolea Jordan falkea thaun 900 m (3,000 ft) vo tachea poros chodd choddtti aslolea Samariechea Sikar nogrant provas kelo astolo.—Ju. 4:3-5; App. A7-E polloi.

(Juanv 4:21-24) Jezun tika mhollem: “Mhojem aik, bai: tumi hea dongrar zaum vo, Jeruzaleant zaum, Bapak bhozchim nant, oslo vell ieuncho zalo. ²² Tumi vollkhonant Taka bhoztat; ami zalear vollkhotanv Taka bhoztanv, kiteak taronn Judev loka thaun ieta. ²³ Punn oslo vell ieta, khorench mhollear ho vell pavlo, ki khore bhozpi atmean ani sotan Bapachi bhokti kortole, kiteak mhollear oslech bhozpi Bap sodta. ²⁴ Dev Atmo, ani Tachea bhozpiamnim, Taka atmean ani sotan bhozunk zai.”

(Juanv 4:39-41) “Hanvem kelam titlem-i tannem mhaka sanglam,” oxi te bailen govai dilʼli dekhun, tea nograntlea puskoll Samariekaramnim Tacher bhavarth dovorlo. ⁴⁰ Dekhun Samariekaram Tache-xim ailim tedna, apnnam-xim rav mhonn tannim Tache kodde maglem; ani thoi To don dis ravlo. ⁴¹ Ani Tachea utrak lagun anink khub-khub zannamnim Tacher bhavarth tthevlo,

Bible-ant Motiam Sodhum-ia

(Juanv 3:29) Hokol mhollear novreachi; taka lagim aslolo novreacho ixtt, novreacho tallo aikun, vhodde khuxalkaien murgottʼta. Hich mhoji khuxalkai; ti atam bhoron ailea.

nwtsty obheasachi ttipnni Ju. 3:29

novreacho ixtt: Bible kallar, novreacho ek ixtt novrea pasot kaide sombondit kama kortalo ani kazarachi manddavoll korcheant mhotvachem kam kortalo. Novreak ani vhoklek sangata mellon ieunk to mandavoll kortalo. Kazara disa, vhokle vatteche lok novreachea ghora vo novreachea paichea ghora jevnnank ietale. Jevnna vellar, novro vokle lagim uloita tednam novreacho tallo aikun tacho ixtt khuxal zatalo karonn tannem aplem kam borem toren kelem oxem taka distalem. Juanv Batist apleak, ‘novreachea ixttak’ sor korta. Hantunt, Jezu novro aslo, ani tache xis sangata mellon tache vhoklek suchit kortale. Juanv Batistan, Jezucho vatt toiar korpi zaun, Jezu Kristache “vhokhlechea” zomeantlea poilea sodoxeank tachi vollokh dili. (Ju. 1:29, 35; 2Kor. 11:2; Ef. 5:22-27; Prok. 21:2, 9) “Novreacho ixtt” novreachi vollokh bore bhaxen korun dilea uprant, to anik mukhel munis zaun tanche modem naslo. Teach bhaxen, Juanvan Jezuk sanglem: “To vaddot vochunk zai, punn hanv zalear odik-odik lhan zaunk zai.”—Ju. 3:30.

(Juanv 4:10) Jezun tika portipall kelo: “Devachem dennem koslem tem tuka tor gomlolem ani ‘Mhaka ilem pieunk dixi?,’ oxem tuka mhonntta To konn to tum zanno asli zalear, tunch Tache kodde magtoli asli ani To tuka jivem udok ditolo aslo.”

nwtsty obheasachi ttipnni Ju. 4:10

jivem udok: Hea utrank uzar kelʼlim Grek utram, vhanvtea tea udkak, zhorichem udok, vo zhori thaun baint melltta toslea nitoll udokak uzar keleant. Hem udok eka ttankient asta toslem udok nhoi. Lev. 14:5-ant “vhanvtem udok” hea utrank uzar kelʼlea Hebrev utrancho orth “jivem udok.” Jer. 2:13 ani 17:13-ant Jehovak “jivea udkachi Zhor,” mhunttla. Jezu Samariekar baile lagim uloitana tannem “jivem udok” sanketik toren uzar kelem. Punn ti ghoddie survatek to khorea udka vixim uloitalo mhunn somzoli astoli.—Ju. 4:11; obheasachi ttipnni Ju. 4:14 polloi.

SETEMBR 17-23

DEVACHEA UTRANTLE THEVE | JUANV 5-6

“Hetu Sarko Dovrun Jezucho Pattlav Korat”

(Juanv 6:9-11) “Hangasor konn-eklea bhurgea lagim panch undde ani don masllio asat; punn itlea lokak hem khoi pavta?” ¹⁰ Jezun mhollem: “Lokak bosoiat.” Te svater zaitem tonn aslem; mhonnttoch lok boslo: dadlech sumar panch hozar asle. ¹¹ Tedna Jezun undde ghetle ani Devak dhinʼvasun bosloleank te vanttle; tech porim masllio-i vanttleo. Tankam zai titlem vanttun dilem.

nwtsty obheasachi ttipnni Ju. 6:10

dadlech sumar panch hozar asle: Fokot Matev hea vizmita vixim sangtana, hea utram poilim “Bailank ani bhurgeank dhorinastana” mhunn sangta. (Mt. 14:21) Tor, hea vizmita vorvim ghoddie sogle mellon 15,000-a poros chodd lok jevle astole.

(Juanv 6:14) Hi Tannem kelʼli khunna lokan dekhli tedna, tannim mhollem: “Sonvsarant ieuncho asa to Provadi dubava viret hoch to!”

(Juanv 6:24) Jezu thoi naslo mhonn lokan dekhlem, ani Tache xis-ui thoi nant mhonn polleun, to lok hoddeamnim choddun Jezuche sodik Kapernauma ailo.

nwtsty obheasachi ttipnni Ju. 6:14

Provadi: Kristi Xokachea, poilea xekddeant aslole zaite Judev, Dusri Somurtint 18:15, 18-ant sanglolea porim, Mesias Moizesa sarko provadi astolo mhunn opekxa kortale. Hea versant uzar kelʼlim, Sonvsarant ieuncho asa, him utram, ieuncho aslolea Mesias-a vixim mhunnttlolim zait. Hea versant sangloleo ghoddnneo fokot Juanv boroita.

(Juanv 6:25-27) To tankam toddir mellʼllo; tedna tannim Taka mhollem: “Guruji, Tum hanga kedna ailoi?” ²⁶ Jezun tankam zap diun mhollem: “Khorench khorem Hanv tumkam sangtam, tumi khunna dekhleo mhonn nhoi, punn undde khaun dhadoxi zaleant dekhun tumi Mhoje sodik aileant. ²⁷ Khaun sorta toslea khanna khatir tras gheum nakat, punn Sasnnik Jivitak togta toslea khanna khatir tras gheiat; oslem khann Monʼxacho Put tumkam ditolo; karonn Bapan, khud Devan, Tacher Aplo xikʼko marla.”

(Juanv 6:54) Jim konn Mhojem mas khatat ani Mhojem rogot pietat, tanche sovem Sasnnik Jivit asa, ani tankam nimannea disa Hanv punorjivont kortolom.

(Juanv 6:60) Hem aikun, Tachea xisantlea zaitea zannamnim mhollem: “To sangta tem kotthin lagta; konnachean toslem aikun gheunk zait?”

(Juanv 6:66-69) Hea uprant, Tachea xisantlim zaitim zannam koddsorun gelim, ani Tachea sangata anink bhonvona zalim. ⁶⁷ Jezun Bara Zannank mhollem: “Tumi-i vochunk sodtat bi?” ⁶⁸ Simanv Pedrun Taka zobab dilo: “Saiba, konna-xim mhonn vetoleanv ami? Tujim utram Sasnnik Jivitachim! ⁶⁹ Ami bhavarth dhortanv, ani Tum Devan sonvskarlolo mhonn amkam khatri zalea.”

nwtsty obheasachi ttipnni Ju. 6:27, 54

Khaun sorta toslea khanna khatir . . . Sasnnik Jivitak togta toslea khanna khatir: Thodde lok fokot jevnna-khannacheo ani tosleo her gorzo purnn korchea pasot aplea ani aplea xisam sangata bhonvtale mhunn Jezu zannam aslo. Zoxem, jevonn munxank dor disa ghottai dita, toxench Devachea utrantlem “jevonn,” munxank sasnnank jieunk modot korta. Jezu zomeak “Sasnnik Jivitak togta toslea khanna” pasot vavrunk urba dita. Hacho orth, lokamnim Deva sangata apli ixttagot ghott korunk ani te xiktat tacher bhavarth dovrunk vavrunk zai.—Mt. 4:4; 5:3; Ju. 6:28-39.

Mhojem mas khatat ani Mhojem rogot pietat: Jezu Kristachem mas khavop ani rogot pievop mhunnchem tacher bhavarth dovrop mhunn bhonvtonnchim versam vachlear kolltta. (Ju. 6:35, 40) Him utram Jezun 32 K.X.-ant sanglolim. Tor hanga to eka vorsa uprant korcho aslo tea Somiachea Rat-Jevnna vixim uloinaslo. Tannem him utram, ‘Judevanchea Pask-Utsova’ poilim sanglolim. (Ju. 6:4) Toxem zalʼlean, aikotoleanchea monant beginuch suru zaunchem asa tea festacho, ani Israel porzank Ejiptantlean suttka zali tea rati menddreachea rogta vorvim tancho jiv koso salvar zalo tem tanchea ugddasak ailem astolem. (Sutt. 12:24-27) Xisamnim sasnachem jivit zhoddunk, aplem rogot kitlem mhotvachem tem Jezu dakhounk sodhtalo.

w05 9/1 21 ¶13-14

Jehova Amchea Devachea Nanvan Ami Fuddem Cholun Vetolim

¹³ Lok Jezuchea fattlean gele ani sodhit, “doriache poltoddi” pasun pavle mhunn Juanv sangta. Jezun raza zaunk nakarlem tednam pasun te tachea fattlean kiteak gele? Moizesachea disamnim, Jehovan oronnʼnneant jevonn-khann koxem dilʼlem tea vixim uloun zaiteamnim apli as dakhoun dili. Tor tim, Jezu pasun tankam jevonn-khann di-it ravonk zai mhunn sangonk sodhtalim. Punn Jezu tancho hetu vollkholo ani tanchim chintnam nittaier haddunk to tankam Deva vixim sot xikounk laglo. (Ju. 6:17, 24, 25, 30, 31, 35-40) Hem aikon, thoddim zannam tache add gunngunnunk laglim chodd korun hi vopar sangli tednam: “Khorench khorem Hanv tumkam sangtam, tumi Monʼxachea Putachem mas khelea bogor ani Tachem rogot pielea xivai, tumche sovem Jivit asum nozo. Jim konn Mhojem mas khatat ani Mhojem rogot pietat, tanche sovem Sasnnik Jivit asa, ani tankam nimannea disa Hanv punorjivont kortolom.”—Ju. 6:53, 54.

¹⁴ Jezuchea vopaream udexim choddxe pavtt lok khoreanich Devache vatten cholonk sodhtat vo na tem sarkem kollttalem. Ani he vopare thaun pasun tanchea kallzant kitem aslem tem kollon ailem. Te vegllech toren ulounk lagle tem amkam vachunk melltta: “Hem aikun, Tachea xisantlea zaitea zannamnim mhollem: ‘To sangta tem kotthin lagta; konnachean toslem, aikun gheunk zait?’” Jezun tankam, apunn kitem sangonk sodhtalo tacho orth zannam zaunk tannim sodhchi goroz asa mhunn somzailem. Tannem mhunnttlem: “Atmo ki Jiv dita, mas kiteakuch upkarona Tumkam hanv uloilam tim utream Atmo ani Jivit.” Tori astana zaitim tachem aikonaslim mhunn tem vers fuddem sangta: “Tachea xisantlim zaitim zannam koddosorun gelim, ani Tachea sangata anink bhonvona zalim.”—Ju. 6:60, 63, 66.

Bible-ant Motiam Sodhum-ia

(Juanv 6:44) Bapan Mhaka dhaddla, ani, Tannem konnak Mhoje-xim oddun haddlea xivai, konnacheanuch Mhoje-xim ieunk zaina; ani Mhoje-xim ietoleank Hanv nimannea disa punorjivont kortolom.

nwtsty obheasachi ttipnni Ju. 6:44

oddun haddlea: “Oddun hadd” hea utrank uzar kelʼlem Grek kriapod, zallent nustem oddun haddop haka uzar kelam (Ju. 21:6, 11). Tori punn, tacho orth lokank naka zalear-ui Dev tankam oddun haddtta oso zaina. Hea kriapodacho orth “akorxit korop” oso-i zaunk xokta. Jezuchim utram, Jer. 31:3-ant Jehovan aplea adlea kalla voilea lokank mhunnttlolim, tim utram monant haddunk xokta: “Doiall mogan Hanvem tuka Mhoje-xim oddun haddla.” (Septuagint-ant hanga hench Grek kriapod uzar kelam.) Ju. 12:32-a pormonnem, Jezu pasun heach ritin soglea torechea lokank aplea-xim oddun haddtta mhunn kolltta. Jehovan munxank borem ani vaitt vinchpachi tank dilea mhunn Bible sangta. Tachi seva korchi vo na tem dor eklean vinchunk zata. (D.S. 30:19, 20) Favo asat tankam, Dev doiallaien apnnam-xim oddun haddtta. (St. 11:5; Mho. 21:2; D.I. 13:48, NW) Hem soglem Jehova, Bible-antlea sondhex-a vorvim ani aple povitr xokte udexim korta. Iz. 54:13-ant sanglolem bhakit Ju. 6:45-ant dilʼlem asa jem, Bap aplea-xim oddun haddtta tea lokank lagu zata.—Ju. 6:65 sor kor.

(Juanv 6:64) Punn tumche modem bhavarth dhorinant toslim kai zannam asat.” Konn-konn bhavarth dhorchim naslim, ani konn Aplo ghat ghetolo aslo, tem Jezu poilinch thaun zanno aslo.

nwtsty obheasachi ttipnni Ju. 6:64

konn Aplo ghat ghetolo . . . tem Jezu poilinch thaun zanno aslo: Jezu Judas Iskariota vixim sangtalo. Aplea 12 apostlank vinchun kaddche adim, Jezun akʼkhi rat aplea bapai-xim magnnent sarli. (Luk. 6:12-16) Tor, survatek Judas Devak visvaxi aslo. Punn, apleacho lagincho ixttuch apleak ghat kortolo mhunn Jezu Hebrev bhaxen boroilolea pustokantlea bhakitantlean zannam aslo. (St. 41:9; 109:8; Ju. 13:18, 19) Kalliz ani chintnam zannam zaunchi tank aslolea Jezuk, Judas vaitt margan cholonk laglo tednam tachem kalliz bodolta mhunn kollon ailem. (Mt. 9:4) Devak fuddara vixim zannam zaunchi xokti aslolean, Jezucho visvaxi ixttuch taka ghat kortolo mhunn Dev zannam aslo. Punn Judasuch ghatki zatolo mhunn Devan adinch tharailolem mhunn chintop sarkem zaunchem na karonn toxem kelem zalear to aple gunn ani apunn adim lokam lagim jea toren vaglo tachea add gelʼlea sarkem zatolem.

poilinch thaun: Him utram, Judas zolmolʼlo tea vella vixim vo jednam Jezun akʼkhi rat magnnem korun taka apostl mhunn vinchun kaddlo tea vella vixim sangonant. (Luk. 6:12-16) Punn hem Judasan ghatki gunn dakhounk suru kelem tea vella vixim sangta jem Jezu rokddoch somzolo. (Ju. 2:24, 25; Prok. 1:1; 2:23; obheasachi ttipnni Ju. 6:70; 13:11 polloi.) Hachea voilean hem pasun kollon ieta ki Judasachem kalliz okosmat bodlonk na. Tannem tacher poilinch niall korun ani ievzun tem pavl ghetlem. Grek bhaxen boroilolea pustokamnim “poilinch thaun” (Grek bhaxen, ar·kheʹ) hea utrancho orth somzonk, tea versanchim bhonvtonnchim versam pollounchim poddttat. Udharonnak, 2Ped. 3:4-ant, “poilinch thaun” hea utrank “rochnnechea orombak thaun” mhunn bhaxantor kelam. Punn zaitea zagear, hacho orth thoddo vell oso dita. Pedrun, ‘survatek amcher denvloli’ toxi Videxi lokancher povitr xokti denvli mhunn sanglem. (D.I. 11:15) Hanga, Pedrun “survatek” vo “polinch thaun” mhunn sanglem tednam to aplea zolmachea vella vixim, vo taka apostl mhunn vinchun kaddlolo tea tempa vixim sangonaslo. Punn, to 33 K.X.-achea Ponʼnasavea disachea utsovachea eka udʼdexa pasot povitr xokti “survatek” vo “poilinch thaun” denvlʼli tea vella vixim sangtalo. (D.I. 2:1-4) Sorvbhonvtonnchim versam vachun “poilinch thaun” hacho sarko orth melltta toslim her udharonnam amkam Luk. 1:2; Ju. 15:27; ani 1Ju. 2:7 vachunk melltta.

SETEMBR 24-30

DEVACHEA UTRANTLE THEVE | JUANV 7-8

“Jezun Aplea Bapaik Mhoima Dili”

(Juanv 7:15-18) Hem polleun, Judev ojap zaun mhonnttale: “Haka zannvai khoichi re? Xikxonn kai na taka.” ¹⁶ Jezun tankam portipall kelo: “Mhoji xikovnn Mhoji nhoi, punn Mhaka pattoila Tachi; ¹⁷ konn Tachi khuxi korunk raji asat zalear, Mhoji xikovnn Devachi vo Mhojeach monantli, tem tankam kollon ietolem. ¹⁸ Apleach monantlem kaddun uloitat tim aplich vhoddvik sodtat; punn apnnank dhaddla tachi vhoddvik sodtat tim sota pormannem choltat; oslea monʼxam sovem lottikponn na.

cf 100-101 ¶5-6

“Oxem Boroilʼlem Asa”

⁵ Apunn sangtalo to sondhex khoim thaun aila tem lokamnim zannam zalʼlem Jezuk zai aslem. Tannem mhunnttlem: “Mhoji xikovnn Mhoji nhoi, punn Mhaka pattoila Tachi.” (Juanv 7:16) Anik eka vellar, tannem mhunnttlem: “Jem Hanvem Mhojea Bapa sovem dekhlam tem Hanv sangtam.” (Juanv 8:28) Fuddem anik ek pavtt tannem mhunnttlem: “Jem kitem Hanv tumkam sangtam, tem Hanv Mhojech osttongim uloina; punn Mhoje sovem asa to Bap Aplim kortutvam korit asa.” (Juanv 14:10) Jezun, Devachea Utrantlean portun-portun ulʼlekh kelo tednam tannem eke ritin him utram khorim mhunn dakhoilim.

⁶ Jezuchea utrancher bariksannen obheas kortana, Hebrev Bhaxen Boroilolea Pustokam modem ordea-von chodd pustokam thaun Jezun ulʼlekh kelo mhunn kolltta. Ulʼlekh kortana tannem tim utram asa toxinch vapurlim vo tantuntle vichar sangon uloilo. Poilem ghoddie tumkam titlem vhoddlexem kainch nhoi oxem disot. Ani tumi chintit, tachea sadde tin vorsanche porgottnnent tannem prerit zalʼlea soglea pustokam thaun kiteak ulʼlekh korunk na kai. Khorem mhunnttlear, tannem soglea pustokam thaun ulʼlekh kela astolo. Ugddas dovrat, Jezuchea utram vixim ani tannem kelʼlea kamam vixim fokot chimttibhor mahiti amkam Bible-ant melltta. (Ju. 21:25) Tumi Bible-ant Jezun mhunnttlolim soglim utram vachunk boslear tumi ghoddie tim thoddeach voram bhitor vachun kabar korit. Atam chintat, tumi thoddim voram Deva vixim ani tachea Rajea vixim uloitat, ani teach vellar Hebrev Bhaxen Boroilolea Pustokam modlem ordea-von chodd pustokam thaun ulʼlekh korcho proitn kortat! Tea bhair, choddxe pavtt Jezuchea hatant kovlle pasun naslole. Tannem Dongrar updes ditana, Hebrev Bhaxen Boroilolea Pustokam thaun zaitim utram ulʼlekh kelim ani tem-ui polloinastana!

(Juanv 7:28, 29) Dekhun Devmondirant xikoitana Jezun arddun mhollem: “Tumi Mhaka vollkhotat khorem? ani Hanv khoicho ailam, tem-i tumi zannont? Khorem mhollear, Hanv Mhojech osttongim ieunk na; Mhaka patthoila To sotevont, ani Taka tumi vollkhonant. ²⁹ Hanv zalear Taka vollkhotam, kiteak Hanv Tache thaun ailam ani Tannem Mhaka pattoila.”

(Juanv 8:29) Ani Zannem Mhaka patthoila To Mhoje sovem asa; Tannem Mhaka eklo sanddunk na, kiteak Taka manʼta tench Hanv sodam kortam.”

w11 3/15 11 ¶19

Devacho Atmo Apnnaiat, Sonvsaracho Nhoi

¹⁹ Sogle ritin Jehovachem utor pallat. Jezun sodanch aplea Bapak khuxalkai haddtta tem kelem. Punn ek pavtt, eke poristhitik koxem tondd diunchem tea vixim Jezuchem chintop Jehova thaun vegllem aslem. Tori astana, tannem visvasan aplea Bapaik mhunnttlem: “Mhoji khuxi nhoi, Tujich khuxi zaum-di.” (Lukas 22:42) Tumi tumkanch vincharat, ‘Mhaka sompem zaina tednam pasun hanv Devachem utor palltta kai?’ Devachem utor pallop gorjechem karonn amchem jivit tacher tharlolem asa. To amcho Rochnnar, amchea Jivitachi Zhor ani amkam jivim uronk zai tem soglem diupi zalolean ami sogle ritin tachem utor pallunkuch zai. (St. 95:6, 7) Devachi maniotai zai zalear ami tachem utor pallop gorjechem. Tachi maniotai melloun gheunk anik dusri vatt na.

Bible-ant Motiam Sodhum-ia

(Juanv 7:8-10) Tumi Utsovak choddun vochat; Hanv hea Utsovak choddun vochona, kiteak Mhozo vell ozun pavunk na. ⁹ Oxem mhonnun, To Galileiant ravlo. ¹⁰ Punn Tachim soirim Utsovak choddun vetoch, Jezu Apunn-ui gelo, ukteponnim nhoi, punn konnak kollonastana.

w07 2/1 6 ¶4

Ami Sot Kiteak Ulounk Zai?

Hea vixim Jezun koslem udharonn dovorlam? Eka vellar, Jezuchea provasa vixim zannam zaunk sodhtale tea thoddea onbhavarthi lokam lagim uloitana, tannim taka oso solʼlo dilo. “Hangasorlo bhair sor ani Judeiant [Jerusalem-ant] voch.” Jezun tankam kitem zobab dilo? “Tumi Utsovak choddun vochat; Hanv hea Utsovak choddun vochona, kiteak Mhozo vell ozun pavunk na.” Punn thoddea tempa uprant, Jezu Jerusalemak festak gelo. Tor tannem toso zobab kiteak dilo? Jezu khoim ani kednam voitolo, tem soglem bariksannen zannam zaunk tim favo naslim. Jezun thoim fott marunk nasli, punn tannem tankam ordoch zobab dilo. Oxem sangon, tannem apleacher ani aplea xisancher ieunk xoktalo to dhoko addoilo. Hi ek fott nhoi, karonn Apostl Pedrun Krista vixim oxem boroilʼlem: “Tannem koslench patok korunk na, Tachea tonddant koslich lobaddi mellunk na.”—Juanv 7:1-13; 1 Pedru 2:22.

(Juanv 8:58) Jezun tankam portipall kelo: “Khorench khorem Hanv tumkam sangtam: Abrahamʼ asche adim HANV ASAM!

nwtsty obheasachi ttipnni Ju. 8:58

HANV ASAM: Jezun, apnnem ‘Abrahamak dekhlo’ mhunn sanglem tednam virodh kortolea Judevamnim taka fatraunk chintlem. Te mhunnttale, Jezuk “ozun ponʼnas vorsam zaunk nant.” (Ju. 8:57) Oxem mhunnon Jezu tankam, apunn hea prithumer ieunchea poilim ani Abraham zolmochea poilim sorgar ek xoktivont devdut aslo mhunn sangonk sodhtalo. Thodde lok him utram Jezuch Dev mhunn dakhoitat oxem mhunnttat. (Zoxem Povitr Pustok – Adlo ani Novo Korar, hea Bible-ant him utram vhoddlea okxoramnim dileant). Te mhunnttat, hea utrank Grek bhaxen uzar kelʼlem utor, e·goʹ ei·miʹ (HANV ASAM), Septuagint-ant Sutt. 3:14-ant uzar kelʼlea utrak eke ritin suchit korta. Tor don-ui versamnim hinch utram uzar korunk zai mhunn te sangtat. (obheasachi ttipnni Ju. 4:26-E polloi.) Hea versachim bhonvtonnchim versam vachlear, ei·miʹ hea Grek kriapodacho orth, Jezu “Abraham asche adim” aslo ani ozun to asa mhunn kolltta. Tor, him utram sarkim bhaxantor kelim zalear, “HANV ASA” hea utranche bodlek “Hanv aslo” mhunnttlear sarkem zatolem ani zaitim adlim ani halinchim bhaxantoram, “Hanv aslo,” ho orth dita toslim utram uzar kortat. Ju. 14:9-ant ei·mi,ʹ hench Grek kriapod uzar kelam, zoim Jezu mhunntta: “Filip, itlo vell tumche sangatim asam, ani ozun tumi Mhaka vollkhunk na?” Zaitim bhaxantoram oxinch utram uzar kortat. Bhonvtonnchea versam pormonnem, ei·miʹ-k hem utor “Hanv aslo,” mhunn bhaxantor korunk veakronnant kainch chuk zaina mhunn hachea voilean kolltta. (Hem Grek kriapod dusrea versamnim pasun uzar kelam: Luk. 2:48; 13:7; 15:29; Ju. 1:9; 5:6; 15:27; D.I. 15:21; 2Kor. 12:19; 1Ju. 3:8.) Toxench, Ju. 8:54, 55-ant Jezun sanglam, tachea voilean, to aplo Bapui ani apunn ek mhunn sangonk sodhinaslo mhunn kolltta.