20
Jezu Kristak Jivexim Martat
Jezun ek novo somorombh sthaplo; tacho ghat ghetlo ani taka khillavun marlo
SADDE-TIN vorsam porgottlea ani xinkoilea uprant, Jezu aplea prithumivelea jivitacho xevott lagim asa mhonn zannam aslo. Judevanche dhormxastri taka marunk guddmell kortale, punn lok uchamboll zait mhonn bhietale karann lok taka provadi mhonn mandtale. Hea mhonnosor, bharantlea eklea dhormdutak—Judas Iscariotak Soitanan fosoilo Jezuk lavun diupak. Jezucho ghat gheunk dhormxastri Judasak 30 chandieche nanne diunk kobul zale.
Xevottache ratrik, Jezu aplea dhormdutanchea sangata pask jevonn korunk toear zalo. Judasak dhaddlea uprant, tannem ek novo somorombh ghoddlo zaka Somiachem sanz jevonn mhunnttlam. Tannem unddo ghetlo, Devak dhinvasun to moddlo ani tea 11 dhormdutank vanttlo ani mhollem: “Hi Mhoji Kudd: Hanvem ti tumche pasot somorpunchi asa. Mhozo ugddas korun oxench tumi korat.” Tech porim, tannem patr gheun mhollem: “Hem patr Mhojea Rogtan Novo Korar.”—Luk 22:19, 20.
Jezuk, te ratri aplea dhormdutank zaitem sangchem aslem. Tannem tankam ek novi adnia dili - svart naslolo mog eka meka sovem dakovunk. Tannem mhollem: “hache voilean tumi Mhoje xis mhonn sogllea monʼxank kolltolem.” (Juanv 13:34, 35) Dukhest ghoddneank lagon tanchim kallzam uchamboll korchim nhoi mhonn tannem tankam sanglem. Jezun tanche khatir khoraien magnnem kelem. Te ratrik Devak gaion korit Gethsemanechea bhagent vochunk bhair sorle.
Gethsemanechea bhagent, Jezun dimbhi ghalun kallzantlean khoraien Devak magnnem kelem. Rokddech hattiaram gheun soinikancho ek zomo, iadnik ani her lok Jezuk dhorunk aile. Judas lagim sorun, Jezucho umo gheun taka dakovun dilo. Jezuk soinikanim dhorlea uprant, dhormdut pollun gele.
Judevanche nitixallent ubo ravun, Jezun apunn Devacho put mhonn apli ollokh dili. Nitixallent to dev ninda korta mhonn guneanvkari kelo ani taka mornnachem formonn favo kelem. Uprant Jezuk Romi razpal Pontius Pilata fuddeant vhelo. Zorui taka Jezu niropradhi meulo, tori astana zomo taka zobordosten mar mhunnttat mhonnon tannem Jezuk tanchea adhin kelo.
Jezuk Golgotha mhunnttat te svater vhelo, zoim Romi soinikanim taka khambeak khillailo. Uzvaddik dis ochorianim kallokant bodolʼlo. Uprant donparam, Jezu melo ani teach vellar ek khoddegant bhuimkamp zali. Ek khoddop katrun kelelea fonddant Tachi kudd dovorli. Dusrea disa, iadnikanim fonddak xikko marlo ani ek chovkidarak pareak dovorlo. Jezu te fonddantuch urtolo kai? Na, vhoddleantli vhodd milagre ghoddchi asli.
—Matev avesvor 26 ani 27; Marku avesvor 14 ani 15; Luk avesvor 22 ani 23; Juanv avesvor 12 te 19, hacher adarlelem asa.