Zhuz Ani Hinvsecho Sogleancher Koso Porinnam Poddtta?
“Dusrea Vixv Zhuzam uprant sonvsarant aiz sogleant chodd zhuzam ani hinvsa zatat. Sumar 200 korodd lok, mhunnttlear, char lokam modlo ek munis oslea zagear ravta zoim kosli na kosli hinvsa zata.”
United Nations Deputy Secretary-General Amina J. Mohammed, Janer 26, 2023.
Zhuzam ani hinvsa kednam-i ani khoinsorui zaunk xoktat ani tacho porinnam zhuz zata tea desantlea lokancheruch nhoi punn poisulʼlea desantlea lokancher pasun poddonk xokta. Titlench nhoi, zhuzam somplea uprant pasun zaito temp poriant lokancher tacho vaitt porinnam poddonk xokta. Tachim thoddim udharonnam polloum-ia:
Bhuk. World Food Programme-a pormonnem, “jevnnam-khannachem unnemponn zaunk mukhel karonn mhunnttlear zhuz. Sonvsarbhor jea lokank jevnnachem unnemponn asa, tanche modle 70 tokʼke lok oslea zageamnim ravtat zoim zhuzam ani hinvsa zatat.”
Mansik duensam ani jivak dhoko. Jednam eka zagear zhuz zavpacho dhoko asta tednam thoinchea lokank khub usko zata ani tim chintnamnim buddttat. Jea vattaramnim zhuzam choltat thoinchea lokank mar lagta itlench nhoi, punn tankam mansik duensam pasun zaunk xoktat. Ani dukhachem mhunnttlear, choddxe pavtti tankam favo to ilaz pasun mellona.
Ghor soddun pollon vochop. United Nations High Commissioner for Refugees-a pormonnem, Setembr 2023 meren sonvsarbhor 11 korodd 40 lakʼkham poros chodd lokank aplem ghor-dar soddun dusre kodden asro gheuncho poddla. Oxem zaunk mukhel karonn mhunnttlear zhuz ani hinvsa.
Poixeanchem unnemponn. Choddxe pavtti zhuzank lagon mhargai vaddtta ani taka lagon lokank poixeanchem unnemponn zata. Toxench, zo poiso lokanchea bholaikek ani xikxonnak uzar korunk zai to poiso sorkar aplea desachi fouz ghott korunk uzar korta. Tor hea pasot lokanche tras anikui vaddttat. Itlench nhoi, zhuzank lagon jem luksonn zata tem bhorun kaddunk zaito poiso lagta.
Vatavoronnak luksonn. Zhuzank lagon vatavoronn piddʼddear zata ani taka lagon lokank tras zatat. Udharonnak, udok, zomin ani varem piddʼddear zata tednam, zaito temp poriant lokanchea bholaikecher khub porinnam poddtta. Tea bhair, zhuzam vellar zomni bhitor lipoun dovorlolea bomb-ank lagon zhuz kabar zalea uprant pasun lokanchea jivak dhoko asta.
Zhuzank lagon nas zata itlench nhoi, punn zaitea lokank tacho vaitt porinnam bhogcho poddtta mhunn kainch dubhav na.