Vachpeam Thaun Prosn
Mhonnʼnneo 30:18, 19-achea boroupean “eke tornatte baile sangata eka dadleachi vagnnuk,” ‘somjikaiechea bhair asa’ oxem mhunnttlem tednam, to kitem mhunnonk sodhtalo?
Zaito lok, toxench Bible zannar pasun, hea utrancho orth kitem kai mhunn chintunk poddleat. Novo Sonvsar Bhaxantor-ant him versam oxim dileant: “Tin vostu asat jeo mhojea somjikaiechea bhair asat. Hoi, char vostu asat jeo hanv somzonk xokona: Mollbant uddttolea ghonnichi vatt, khoddpacher voitolea sorpachi vatt, uktea doriantlean voitolea tarvachi vatt, ani eke tornatte baile sangata eka dadleachi vagnnuk.”—Mho. 30:18, 19.
“Eke tornatte baile sangata eka dadleachi vagnnuk,” him utram borea vostum vixim sangonant, oxem ami poilim chintʼtalim. Karonn tachea fuddlea-fattlea versamnim borea vostum vixim sangonk na. Zoxem, Mhonnʼnneo 30:15, 16-nt char vostum vixim sanglam jeo kednach “puro” mhunnonant. Ani vers 20-ant ‘eke pordvari’ baile vixim sanglam ji apnnem kainch vaitt korunk na mhunn sangta. Tor ek ghonn mollbant uddlea uprant, ek sorop khoddpacher gelea uprant, ani ek tarum udkantlean gelea uprant tachi ek lhan khunna pasun urona toxi, ek munis osli ek korni korunk xokta ji konnakuch kollchi na, oso tacho orth mhunn ami chintʼtalim. Tor “eke tornatte baile sangata eka dadleachi vagnnuk,” him utram uzar korun koslea tori vaitt kama vixim sanglam mhunn ami chintʼtalim. Tem mhunnttlear, ek tornatto naddbudʼdi uzar korun eka sadea tornattea cheddvak bhuloita ani tea cheddvak to kitem korta tem kolloch na.
Punn him versam borea vostum vixim sangtat mhunn sangonk borem karonn asa. Tem mhunnttlear, hea versancho boroupi jeo vostu polloun ojap zalo, tea vixim tannem boroilem.
Oxem chintop sarkem asa mhunn Hebrev hostolekam dakhoitat. Theological Lexicon of the Old Testament sangta ki Mhonnʼnneo 30:18-nt “somjikaiechea bhair” hea utrank jem Hebrev utor uzar kelʼlem, tem “kitem tori ojapachem, vo zaunkuch xokona toslem kitem tori dakhoun dita.”
Toxench, United States-achea Harvard University-cho Professor Crawford H. Toy-an pasun, hea versant koslea-i vaitt vostum vixim sangonk na mhunn sanglem. Tannem mhunnttlem: “To boroupi, teo vostu kitleo ojapacheo asat tem sangonk sodhtalo.”
Tor Mhonnʼnneo 30:18, 19-ant jea vostum vixim sanglam, teo khorench ojapacheo ani amchea somjikaie bhair asat oxem mhunnop sarkem zatolem. Tea Bible boroupea bhaxen ami pasun, ek ghonn mollbar koxi uddtta, paim naslolo ek sorop khoddpacher koso voita, ek vhoddlem tarum doriantlean koxem voita, ani ek tornatto cheddo ek tornattea cheddvachea mogan poddon, tim dogaim koxim khuxalkaien sangata jietat tem polloun ojap zatat.