હસ્તમૈથુનની બૂરી આદત પર જીત મેળવો

હસ્તમૈથુન (માસ્ટરબેશન) એવી ગંદી આદત છે, જેને ઈશ્વર ધિક્કારે છે.a જે વ્યક્તિને આ આદત હોય છે, તે સ્વાર્થી બની પોતાનો જ વિચાર કરતી હોય છે. આ આદત વ્યક્તિના વિચારોને ભ્રષ્ટ કરી દે છે. એટલું જ નહિ, હસ્તમૈથુન કરનારાઓ બીજાઓને ફક્ત પોતાની વાસના સંતોષવાનું એક સાધન ગણવા લાગી શકે. તેઓ માટે જાતીય સંબંધ પતિ-પત્ની વચ્ચેના પ્યારનું પ્રતીક ન રહેતા, ખાલી એવી આદત બની જાય છે, જે પલ-બે-પલની મજા આપે. ખરું કે એનાથી તેની જાતીય ઉત્તેજના શમી જાય છે, પણ થોડી વાર માટે જ. હકીકતમાં, આ આદત ‘વ્યભિચાર, અશુદ્ધતા અને અયોગ્ય કામવાસના’ જેવી શરીરની ખરાબ ઇચ્છાઓને શમાવી દેવાને બદલે ભડકાવે છે.—કલોસી ૩:૫.

પ્રેરિત પાઉલે આમ લખ્યું: ‘વહાલાઓ, આપણે તન-મનની સર્વ પ્રકારની ગંદકી દૂર કરીને પોતે શુદ્ધ થઈએ અને ઈશ્વરનું ભય રાખીને સંપૂર્ણ પવિત્રતા મેળવીએ.’ (૨ કરિંથી ૭:૧) જો તમને આ શબ્દો પાળવાનું અઘરું લાગતું હોય તો નિરાશ ન થતા. યહોવા હંમેશાં તમને ‘માફ કરવા’ અને મદદ આપવા તૈયાર છે. (ગીતશાસ્ત્ર ૮૬:૫; લુક ૧૧:૯-૧૩) તમારું મન ડંખે છે અને તમે એ બૂરી આદત છોડી દેવા પ્રયત્ન કરો છો, એ જ બતાવે છે કે તમે યહોવાના કહેવા પ્રમાણે ચાલવા માંગો છો. ખરું કે અમુક વખતે તમે પાછા એ જ ભૂલ કરી બેસો છો. પણ હિંમત ન હારો. યાદ રાખો, ‘આપણા અંતઃકરણ કરતાં ઈશ્વર મહાન છે, અને તે બધું જ જાણે છે.’ (૧ યોહાન ૩:૨૦) યહોવા આપણાં પાપને જ નહિ, આપણા સારા ગુણોને પણ જુએ છે. એટલે તેમની દયાની ભીખ માંગીએ ત્યારે, તે હમદર્દી બતાવીને આપણી પ્રાર્થના સાંભળે છે. જેમ બાળક તકલીફમાં મદદ માટે પપ્પા પાસે દોડી જાય છે, તેમ આપણે પણ મદદ માટે યહોવાને નમ્ર દિલથી પ્રાર્થના કરતા રહેવું જોઈએ. યહોવા શુદ્ધ દિલથી તેમની ભક્તિ કરવાનો ચોક્કસ આશીર્વાદ આપશે. (ગીતશાસ્ત્ર ૫૧:૧-૧૨, ૧૭; યશાયા ૧:૧૮) ખરું કે એ માટે તમારે પ્રાર્થના પ્રમાણે જરૂરી ફેરફારો કરવા પડશે. દાખલા તરીકે, તમારે હરેક પ્રકારની પોર્નોગ્રાફી અને ખરાબ મિત્રોથી દૂર રહેવા બનતું બધું જ કરવું પડશે.b

જો હસ્તમૈથુનની બૂરી આદત છોડવી તમારા માટે અઘરું હોય તો શું કરશો? યહોવાની ભક્તિ કરતા તમારાં મમ્મી, પપ્પા કે પછી મંડળમાં સારો દાખલો બેસાડતા કોઈ મિત્ર સાથે એ વિષે વાત કરો.c—નીતિવચનો ૧:૮, ૯; ૧ થેસ્સાલોનિકી ૫:૧૪; તિતસ ૨:૩-૫.