બાઇબલના સિદ્ધાંતો આપણને કેવી રીતે લાભ કરે છે?

૧. આપણને માર્ગદર્શનની કેમ જરૂર છે?

આપણા સરજનહાર આપણા કરતાં ઘણા બુદ્ધિશાળી છે. એક પ્રેમાળ પિતાની જેમ તે આપણી સંભાળ રાખે છે. ઈશ્વરનો એવો ઇરાદો ન હતો કે આપણે તેમની દોરવણી વગર જીવીએ. (યિર્મેયા ૧૦:૨૩) જેમ બાળકને માબાપના માર્ગદર્શનની જરૂર છે, તેમ આપણને ઈશ્વરના માર્ગદર્શનની જરૂર છે. (યશાયા ૪૮:૧૭, ૧૮) બાઇબલના સિદ્ધાંતો આપણને માર્ગદર્શન આપે છે. એ ઈશ્વર તરફથી એક ભેટ છે.​—૨ તીમોથી ૩:૧૬ વાંચો.

યહોવાના નિયમો અને સિદ્ધાંતો આપણને હાલમાં જીવનનો ઉત્તમ માર્ગ બતાવે છે. ભાવિમાં કઈ રીતે કાયમી આશીર્વાદો મેળવી શકીએ એ પણ બતાવે છે. ઈશ્વર આપણા સરજનહાર હોવાથી, એ યોગ્ય છે કે તેમના માર્ગદર્શન માટે કદર બતાવીએ અને એ પ્રમાણે જીવીએ.​—ગીતશાસ્ત્ર ૧૯:૭, ૧૧; પ્રકટીકરણ ૪:૧૧ વાંચો.

૨. બાઇબલના સિદ્ધાંતો શું છે?

બાઇબલના સિદ્ધાંતો સનાતન સત્ય છે. એ કોઈ પણ સંજોગોમાં લાગુ પાડી શકાય છે. જ્યારે કે નિયમો કદાચ અમુક જ સંજોગોમાં લાગુ પડે છે. (પુનર્નિયમ ૨૨:૮) સિદ્ધાંતો કયા સંજોગોમાં લાગુ પડે છે, એ સમજતા આપણે શીખવું જોઈએ. (નીતિવચનો ૨:૧૦-૧૨) દાખલા તરીકે, બાઇબલ શીખવે છે કે જીવન ઈશ્વર તરફથી એક ભેટ છે. એ સિદ્ધાંત આપણને કામ પર, ઘરમાં, મુસાફરીમાં કે વાહન ચલાવતી વખતે લાગુ પડે છે. એ સિદ્ધાંત આપણને સાવચેતીનાં પગલાં લેવા ઉત્તેજન આપે છે, જેથી પોતાનું કે બીજાઓનું જીવન જોખમમાં ન મૂકાય.​—ગીતશાસ્ત્ર ૧૦૦:૩ વાંચો.

૩. કયા બે સિદ્ધાંતો સૌથી મહત્ત્વના છે?

ઈસુએ સૌથી મહત્ત્વના બે સિદ્ધાંતો વિષે વાત કરી હતી. પહેલો સિદ્ધાંત આ છે, જે જીવનનો હેતુ બતાવે છે: આપણે ઈશ્વરને ઓળખીએ, તેમને પ્રેમ કરીએ અને દિલથી ભક્તિ કરીએ. આપણે જે કોઈ નિર્ણય લઈએ એમાં આ સિદ્ધાંતનો વિચાર કરવો જોઈએ. (નીતિવચનો ૩:૬) જેઓ આ સિદ્ધાંત દિલમાં ઉતારે છે, તેઓનો ઈશ્વર સાથે ગાઢ સંબંધ બંધાય છે. તેમ જ, તેઓને ખરું સુખ અને અનંતજીવન મળશે.​—માથ્થી ૨૨:૩૬-૩૮ વાંચો.

બીજો સિદ્ધાંત આપણને લોકો સાથે શાંતિમય સંબંધો બાંધવા મદદ કરે છે. (૧ કોરીંથી ૧૩:૪-૭) આ સિદ્ધાંત લાગુ પાડવાનો અર્થ એ થાય કે ઈશ્વર જે રીતે લોકો સાથે વર્તે છે, એ રીતે આપણે પણ વર્તીએ.​—માથ્થી ૭:૧૨; ૨૨:૩૯, ૪૦ વાંચો.

૪. બાઇબલના સિદ્ધાંતોથી આપણને કેવી રીતે ફાયદો થાય છે?

બાઇબલના સિદ્ધાંતો શીખવે છે કે કુટુંબમાં બધા કેવી રીતે પ્રેમના બંધનમાં એક થઈ શકે. (એફેસી ૪:૩૨; કોલોસી ૩:૧૨, ૧૪) કુટુંબના રક્ષણ માટે બાઇબલ આ મહત્ત્વનો સિદ્ધાંત શીખવે છે: લગ્‍નબંધન તૂટવું ન જોઈએ.​—ઉત્પત્તિ ૨:૨૪ વાંચો.

બાઇબલના સિદ્ધાંતો પ્રમાણે ચાલીશું તો આપણને નોકરી-ધંધો ટકાવી રાખવા મદદ મળશે. મનની શાંતિ પણ મળશે. દાખલા તરીકે, માલિકો ઘણી વાર એવા લોકોને નોકરીએ રાખે છે, જેઓ બાઇબલ સિદ્ધાંતો પ્રમાણે પ્રમાણિક અને ખંતીલા છે. (નીતિવચનો ૧૦:૪, ૨૬; હિબ્રૂ ૧૩:૧૮) બાઇબલ એ પણ શીખવે છે કે જીવન-જરૂરી ચીજોમાં સંતોષ પામીએ અને ચીજવસ્તુઓ કરતાં ઈશ્વર સાથેના સંબંધને કીમતી ગણીએ.​—માથ્થી ૬:૨૪, ૨૫, ૩૩; ૧ તીમોથી ૬:૮-૧૦ વાંચો.

બાઇબલના સિદ્ધાંતો આપણને તંદુરસ્ત રહેવા મદદ કરે છે. (નીતિવચનો ૧૪:૩૦; ૨૨:૨૪, ૨૫) દાખલા તરીકે, ઈશ્વરનો નિયમ દારૂડિયા બનવાની મનાઈ કરે છે. એ સિદ્ધાંત પ્રમાણે જીવવાથી જીવલેણ રોગો અને અકસ્માતોથી રક્ષણ મળે છે. (નીતિવચનો ૨૩:૨૦) યહોવા દારૂ પીવાની રજા આપે છે, પણ વધુ પડતો પીવાની મના કરે છે. (ગીતશાસ્ત્ર ૧૦૪:૧૫; ૧ કોરીંથી ૬:૧૦) ઈશ્વરના સિદ્ધાંતો ફક્ત આપણા વર્તનને જ નહિ, વિચારોને પણ કાબૂમાં રાખતા શીખવે છે. (ગીતશાસ્ત્ર ૧૧૯:૯૭-૧૦૦) સાચા ખ્રિસ્તીઓ પોતાના ફાયદા માટે જ નહિ, પણ યહોવાને માન આપવા માટે ઈશ્વરનાં ધોરણો પાળે છે.​—માથ્થી ૫:૧૪-૧૬ વાંચો.