ઈશ્વરનું રાજ્ય શું છે?

પવિત્ર શાસ્ત્ર શું કહે છે?

“ઈશ્વર એક રાજ્યની સ્થાપના કરશે. એ રાજ્યનો કદી નાશ થશે નહિ.”—દાનિયેલ ૨:૪૪.

“આપણને દીકરો આપવામાં આવ્યો છે. તેના ખભા પર રાજ કરવાની સત્તા રહેશે.”—યશાયા ૯:૬.

આ વચનથી આશા મળે છે કે . . .

• ઈશ્વરની એ ન્યાયી સરકારથી તમને પોતાને ફાયદો થશે.—યશાયા ૪૮:૧૭, ૧૮.

• ઈશ્વરનું રાજ્ય આવશે ત્યારે બીમારી, ઘડપણ અને મરણ પણ નહિ હોય. એ સમયે ખરી સુખ-શાંતિ હશે.—પ્રકટીકરણ ૨૧:૩, ૪.

પવિત્ર શાસ્ત્ર જે કહે છે, એ શું આપણે ખરેખર માની શકીએ?

હા, એ માનવાનાં ઓછાંમાં ઓછાં બે કારણો છે:

• ઈશ્વરનું રાજ્ય શું કરશે, એ વિશે ઈસુએ જણાવ્યું હતું. ઈશ્વરનું રાજ્ય આવે અને તેમની ઇચ્છા પૃથ્વી પર પૂરી થાય એ માટે ઈસુએ પોતાના શિષ્યોને પ્રાર્થના કરતા શીખવ્યું હતું. (માથ્થી ૬:૯, ૧૦) એ પ્રાર્થનાનો કઈ રીતે જવાબ મળશે એની ઈસુએ ઝલક પણ આપી હતી.

  ઈસુ ધરતી પર હતા ત્યારે ભૂખ્યાઓને ખવડાવ્યું, બીમારોને સાજા કર્યા. એટલું જ નહિ, ગુજરી ગયેલાઓને પણ જીવતા કર્યા! (માથ્થી ૧૫:૨૯-૩૮; યોહાન ૧૧:૩૮-૪૪) ઈશ્વરે પોતાના રાજ્યના રાજા તરીકે ઈસુને પસંદ કર્યા છે. રાજા તરીકે પોતે ભાવિમાં કેવા આશીર્વાદો વરસાવશે એની ઈસુએ ઝલક આપી હતી.—પ્રકટીકરણ ૧૧:૧૫.

• દુનિયાની હાલત સાબિતી આપે છે કે ઈશ્વરનું રાજ્ય જલદી જ આવશે. ઈસુએ જણાવ્યું હતું કે ઈશ્વરનું રાજ્ય પૃથ્વી પર સુખ-શાંતિ લાવે એ પહેલાં દુનિયામાં યુદ્ધો, દુકાળ અને ધરતીકંપ થતા રહેશે.—માથ્થી ૨૪:૩, ૭.

  આજે દુનિયામાં ચારે બાજુ એવું જ જોવા મળે છે. એટલે આપણે પૂરો ભરોસો રાખી શકીએ કે ઈશ્વરનું રાજ્ય બહુ જલદી આપણી સર્વ મુશ્કેલીઓનો અંત લાવશે.