વીડિયો બતાવીને બાઇબલ વિદ્યાર્થીને શીખવો

વીડિયો, ચિત્રો અથવા કોઈ વસ્તુ બતાવીને શીખવવામાં આવે તો એ જલદી યાદ રહી જાય છે. એ સમજવું પણ સહેલું હોય છે. આપણા મહાન સર્જનહાર યહોવાએ મહત્ત્વની વાતો શીખવવા એવી જ રીત વાપરી હતી. (ઉત ૧૫:૫; યિર્મે ૧૮:૧-૬) મહાન શિક્ષક ઈસુએ પણ શીખવવા માટે એવી રીતો વાપરી હતી. (માથ ૧૮:૨-૬; ૨૨:૧૯-૨૧) થોડાં વર્ષોથી એમાંની એક રીતથી ઘણો લાભ થયો છે. એ છે, વીડિયો. બાઇબલ વિદ્યાર્થીને શીખવતી વખતે શું તમે વીડિયોનો ઉપયોગ કરો છો?

ઈશ્વર પાસેથી ખુશખબર! પુસ્તિકામાંથી સહેલાઈથી શીખવવા માટે ૧૦ વીડિયો તૈયાર કરવામાં આવ્યા છે. એ પુસ્તિકામાં ઘાટા અક્ષરોમાં અનેક સવાલો છે. મોટાભાગે એ જ સવાલો પરથી વીડિયોનો વિષય પસંદ કરવામાં આવ્યો છે. આપણી વેબસાઈટ પર આ પુસ્તિકામાં દરેક વીડિયોની લિંક આપી છે. એનાથી ખ્યાલ આવશે કે વીડિયો ક્યારે બતાવવો. એ ઉપરાંત શીખવવાનાં સાધનો વિભાગમાં બીજા અનેક વીડિયો પણ છે, જે બીજાં પુસ્તક-પુસ્તિકાઓમાંથી શીખવતી વખતે બતાવી શકાય.

શું તમે બાઇબલના એવા કોઈ વિષય પર ચર્ચા કરી રહ્યા છો, જે વિદ્યાર્થી સહેલાઈથી સમજી શકતો ન હોય? અથવા, શું તમારો વિદ્યાર્થી કોઈ મુશ્કેલીમાંથી પસાર થઈ રહ્યો છે? એવું હોય તો, jw.org® અથવા JW બ્રૉડકાસ્ટિંગ પર એને લગતો યોગ્ય વીડિયો શોધો. એનાથી તેમને મદદ મળશે. શક્ય હોય તો, તમે અને તમારા વિદ્યાર્થી એ વીડિયો સાથે જુઓ અને પછી એના પર ચર્ચા કરો.

દર મહિને નવા નવા વીડિયો બહાર પડે છે. તમે એ જુઓ ત્યારે, વિચારી શકો કે કઈ રીતે બીજાઓને શીખવવામાં એ ઉપયોગી બનશે.